Lesona 7

Faalatalata Atu i le Atua i le Tatalo

Aisea e tāua ai le tatalo e lē aunoa? (1)

O ai e tatau ona e tatalo atu i ai, ma e faapefea ona tatalo atu? (2, 3)

O ā mataupu e talafeagai ona tatalo atu ai? (4)

O le ā le taimi e tatau ona e tatalo ai? (5, 6)

Pe faafofogaina e le Atua tatalo uma? (7)

1. O le tatalo o le talanoa atu lea ma le loto maulalo i le Atua. E tatau ona e tatalo atu e lē aunoa i le Atua. O le a e lagona ai le mafuta vavalalata atu ia te ia e pei o se uo pele. E matautia ma malosi Ieova, e ui i lea, e faafofoga mai o ia i a tatou tatalo! Pe e te tatalo atu ea e lē aunoa i le Atua?​—Salamo 65:2; 1 Tesalonia 5:17.

2. O le tatalo o se vaega lea o la tatou tapuaiga. O lea, ua tatau ai ona tatou tatalo atu tau lava o Ieova le Atua. A o iai Iesu  i le lalolagi, na tatalo atu pea o ia i lona Tamā, ae e lē i se isi lava tagata. E tatau ona tatou faia le mea lava lea e tasi. (Mataio 4:10; 6:9) E ui i lea, o a tatou tatalo uma lava, e tatau ona ala atu i le suafa o Iesu. E faaalia ai i lea lo tatou āva i le tulaga o Iesu ma tatou te faatuatua i lana taulaga togiola.​—Ioane 14:6; 1 Ioane 2:1, 2.

3. Pe a tatou tatalo, e ao ona tatou talanoa atu i le Atua mai i o tatou loto. E lē tatau ona tatou tatalo atu i le Atua faatauloto po o le faia mai i se tusi tatalo. (Mataio 6:7, 8) E mafai ona tatou tatalo atu a o iai i so o se tulaga faaaloalo, i so o se taimi, ma i so o se nofoaga. E mafai foi ona faafofogaina e le Atua tatalo lē leoa o faia i o tatou loto. (1 Samuelu 1:12, 13) E lelei ona fai a tatou tatalo totino i se nofoaga toʻafilemu e lē o iai nisi tagata.​—Mareko 1:35.

4. O ā mataupu e mafai ona e tatalo atu ai? So o se mea lava e aafia ai lau faiā ma ia. (Filipi 4:6, 7) Ua faailoa mai e le tatalo ua fai ma faaaʻoaʻo e tatau ona tatou tatalo mo le suafa o Ieova ma lana fuafuaga. E mafai foi ona tatou talosaga atu mo le mauaina mai o o tatou manaoga faaletino, mo le faamagaloina o a tatou agasala, ma mo le fesoasoani e tetee atu ai i tofotofoga. (Mataio 6:9-13) E lē tatau ona manatu faapito a tatou tatalo. E tatau ona tatou tatalo mo na o mea e talafeagai ma le finagalo o le Atua.​—1 Ioane 5:14.

5. E mafai lava ona e tatalo i so o se taimi e uunaia ai oe e lou loto e faafetai pe vivii atu i le Atua. (1 Nofoaiga a Tupu 29:10-13) E tatau ona e tatalo pe a iai ni ou faafitauli ma pe a tofotofoina lou faatuatua. (Salamo 55:22; 120:1) E talafeagai ona tatalo a o lei faia lau taumafataga. (Mataio 14:19) Ua tāloina i tatou e Ieova ina ia tatalo ʻi so o se taimi.’​—Efeso 6:18.

6. E faapitoa le manaomia ona tatou tatalo pe afai ua tatou faia se agasala matuia. O le taimi lena e tatau ai ona tatou matuā ole atu i le alofa mutimutivale o Ieova ma lana faamagaloga. Pe afai tatou te taʻutaʻu atu a tatou agasala ia te ia ma matuā tauivi ina ia lē toe faia na agasala, e ʻnofosauni [le Atua] e faamagalo’ mai.​—Salamo 86:5; Faataoto 28:13.

7. E na o tatalo a tagata amiotonu e faafofogaina e Ieova. Ina ia faafofogaina au tatalo e le Atua, e tatau ona e matuā taumafai e ola e tusa ai i ana tulafono. (Faataoto 15:29; 28:9) E tatau ona e loto maulalo pe a e tatalo. (Luka 18:9-14) E manaomia ona e galue e tusa ai ma au tatalo. O le a e faamaonia ai e te faatuatua ma e te faamaoni i au upu o fai atu. I le faia faapea, ona faatoʻā tali mai ai lea o Ieova i au tatalo.​—Eperu 11:6.