Lesona 2

O Ai le Atua?

O ai le Atua moni, ma o ai lona suafa? (1, 2)

O le ā le ituaiga tino e iai o ia? (3)

O ā ona uiga autū? (4)

Pe tatau ona tatou faaaogaina tupua ma mea ua fai ma faatusa i la tatou tapuaiga atu ia te ia? (5)

O ā auala e lua e mafai ona aʻoaʻoina ai i tatou e uiga i le Atua? (6)

1. E tele mea ua tapuaia e tagata. Ae ua taʻu mai e le Tusi Paia ia i tatou e na o le toatasi lava le Atua MONI. Na ia foafoaina mea uma i le lagi ma i le lalolagi. Talu ai ua ia foaiina mai ia i tatou le ola, ua na o Ia lava la e tatau ona tatou tapuai i ai.​—1 Korinito 8:5, 6; Faaaliga 4:11.

2. E tele ni tofi ua faasino atu i le Atua ae e na o le tasi lava lona suafa. O lena suafa o IEOVA. I le tele o Tusi Paia, ua aveesea ai le suafa o le Atua ma ua suia i le tofi o le ALII po o le ATUA. Peitai ina ua tusia le Tusi Paia, na iai i totonu le suafa o Ieova i se aofaiga pe ā ma le 7,000!—Esoto 3:15; Salamo 83:18.

3. E iai se tino o Ieova, ae e lē pei o o tatou tino. Ua faapea mai le Tusi Paia: “O le Atua o le agaga lava ia.” (Ioane 4:24) O se peresona agaga, o se ituaiga olaga e sili atu ona maualuga ma mamalu nai lo  tatou. E leai lava se tagata ua vaai i le Atua. E soifua Ieova i le lagi, ae e mafai ona ia silafia mea uma. (Salamo 11:4, 5; Ioane 1:18) O le ā ea la le agaga paia? E lē o se peresona e pei o le Atua. Ae o le malosi galue o le Atua.​—Salamo 104:30.

4. Ua faailoa mai e le Tusi Paia uiga totino o Ieova ia i tatou. Ua faaalia mai ai ona uiga autū o le alofa, faamasinotonu, poto, ma le malosi. (Teuteronome 32:4; Iopu 12:13; Isaia 40:26; 1 Ioane 4:8) Ua faailoa mai foi e le Tusi Paia ia i tatou e faapea e alofa mutimutivale, agalelei, faamagalo, limafoai, ma onosai o ia. Ia pei i tatou o fanau usiusitai, e tatau ona taumafai e faaaʻoaʻo atu ia te ia.​—Efeso 5:1, 2.

5. Pe e tatau ona tatou ifo pe tatalo atu i ni tupua, ata, po o ni mea ua fai ma faatusa i la tatou tapuaiga? E leai! (Esoto 20:4, 5) Ua fetalai mai Ieova e na o ia lava e tatau ona tatou tapuai atu i ai. O le a na lē tuuina atu lona mamalu i se isi tagata po o se isi lava mea. E leai se mana i tupua e fesoasoani mai ai ia i tatou.​—Salamo 115:4-8; Isaia 42:8.

6. E mafai faapefea ona tatou iloa lelei le Atua? O se tasi o auala o le mātauina lea o mea ua ia foafoaina ma manatunatu loloto i mea ua taʻuina mai ai ia i tatou. Ua faaalia mai e foafoaga a le Atua ia i tatou le tele o lona poto ma lona mana. Ua tatou iloaina lona alofa i mea uma ua ia faia. (Salamo 19:1-6; Roma 1:20) O se tasi auala e mafai ona tatou aʻoaʻoina ai e uiga i le Atua o le suesue lea i le Tusi Paia. Ua ia faamatala atili mai ai iina ia i tatou le tele o isi mea e faatatau i le ituaiga o Atua e iai o ia. Ua ia faamatala mai ai foi ia i tatou lana fuafuaga ma le mea e finagalo i ai o ia tatou te faia.​—Amosa 3:7; 2 Timoteo 3:16, 17.

[Ata i le itulau 5]

E aʻoaʻoina i tatou e uiga i le Atua mai le foafoaga ma mai le Tusi Paia