Lesona 4

O Ai le Tiapolo?

Satani le Tiapolo​—o fea na tupuga mai ai o ia? (1, 2)

E faapefea ona taʻitaʻiseseina e Satani tagata? (3-7)

Aisea e tatau ai ona e tetee atu i le Tiapolo? (7)

1. O le upu “tiapolo,” o lona uiga o se tasi na te faia ni pepelo matuā leaga e faatatau i le isi tagata. O le upu “Satani,” o lona uiga o se fili po o sē e tetee. O faaupuga nei ua tuuina atu i le fili sili o le Atua. I le taimi muamua, na avea o ia o se agelu lelei atoatoa i le lagi ma le Atua. Peitai ane, na oo ina manatu faamaualuga o ia ia te ia lava ma manao na te maua le tapuaiga e na o le Atua ua tonu ona avatu i ai.​—Mataio 4:8-10.

2. Na tautala atu lea agelu, o Satani, ia Eva e ala i se gata. I le taʻuina atu o pepelo ia te ia, na faapogaia ai e Satani ia Eva ina ia lē usiusitai atu i le Atua. O lea na luʻia ai e Satani le mea ua taʻua o le “pule silisili ese” a le Atua, po o le tulaga o Lē Silisili ona Maualuga. Na faatupu e Satani se masalosaloga pe faamata e lelei le pule a le Atua ma pe mo le lelei o ē o loo Ia pule mai i ai. Na faatupuina foi e Satani le masalosalo pe faamata o le a iai se tagata e tumau ma le faamaoni i le Atua. O le faia o lenei mea, na faia ai e Satani o ia lava ma fili o le Atua. O le mafuaaga lena ua taʻua ai o ia o Satani le Tiapolo.​—Kenese 3:1-5; Iopu 1:8-11; Faaaliga 12:9.

3. E taumafai Satani e faasese tagata ina ia tapuai atu ai ia te ia. (2 Korinito 11:3, 14) O se tasi o auala ua ia taʻitaʻiseseina ai tagata e ala mai lea i lotu sese. Pe afai e aʻoaʻo e se lotu ni pepelo e uiga i le Atua, ua ia faataunuuina moni ai lava le mea e manao i ai Satani. (Ioane 8:44) O tagata o avea ma ē auai i lotu sese atonu e talitonu ma le faamaoni o loo latou tapuai atu i le Atua moni. Peitai o loo auauna moni atu lava i latou ia Satani. O ia o “le atua o le lalolagi nei.”​—2 Korinito 4:4.

4. O faiga faataulaitu o se tasi lea o auala ua pulea ai e Satani tagata. Atonu latou te valaau atu i agaga ina ia puipuia i latou, ia faataugā atu i isi, ia valoiaina le lumanai, po o le faia o vavega. O Satani o le malosi amioleaga lea o i tua o nei faiga. Ina ia faafiafia le Atua, e ao ona tatou matuā taumamao mai faiga faataulaitu.​—Teuteronome 18:10-12; Galuega 19:18, 19.

5. Ua taʻitaʻiseseina foi e Satani tagata e ala lea i le matuā faatāuaina o le mitamita  i le lanu ma le tapuai atu i faalapotopotoga faapolotiki. Ua lagona e nisi e faapea e sili atu lo latou atunuu po o lo latou lanu nai lo isi. Ae e lē moni lena mea. (Galuega 10:34, 35) O isi tagata ua vaavaai atu i faalapotopotoga faapolotiki e foiaina faafitauli o tagata. I le faia o lenei mea, ua latou teena ai le Malo o le Atua. Ua na o le pau lea o le vaifofo mo o tatou faafitauli.​—Tanielu 2:44.

6. O se isi auala e taʻitaʻiseseina ai e Satani tagata o le faaosoosoina lea o i latou i tuinanauga o le agasala. Ua fetalai mai Ieova ia i tatou ia ʻaloese mai i amioga leaga auā ua ia silafia e faaleagaina ai i tatou. (Kalatia 6:7, 8) E ono mananao nisi tagata e te faatasi atu ia i latou i na ituaiga faiga. Ae ia manatua, o Satani moni lava lena e manao e te faia na mea.​—1 Korinito 6:9, 10; 15:33.

7. E ono faaaogā e Satani sauāga po o teteega ina ia e tuulafoaiina ai Ieova. O nisi e alolofa ia te oe atonu e matuā feitai lava ona o loo e suesueina le Tusi Paia. O isi atonu o le a latou faifai ane ia te oe. Ae o ai o e nofo aitalafu ai i lou ola? E manao Satani e faafefe oe ina ia taofia ai oe mai le aʻoaʻoina e uiga ia Ieova. Aua e te faatagaina Satani e mālō! (Mataio 10:34-39; 1 Peteru 5:8, 9) O le tetee atu i le Tiapolo, e mafai ona e faafiafia ai Ieova ma faaalia ai e te lagolagoina Lana pule silisili ese.​—Faataoto 27:11.

[Ata i le itulau 9]

O lotu sese, o faiga faataulaitu ma le lotonuu ua taʻitaʻiseseina ai tagata

[Ata i le itulau 9]

Tetee atu ia Satani e ala i le faaauau pea ona aʻoaʻoina e uiga ia Ieova