Lesona 10

O Faiga e Inosia e le Atua

O le ā se lagona e tatau ona ia te oe i mea ua fetalai i ai le Atua e leaga? (1)

O ā ituaiga amioga faaleituaiga e leaga? (2)

O le ā le vaaiga e tatau ona iai i se Kerisiano e faatatau i le pepelo? (3) pelē tupe? (3) gaoi? (3) faiga sauā? (4) faiga faataulaitu? (5) ma le onā? (6)

E mafai faapefea ona faasaʻolotoina se tagata mai ni uiga leaga? (7)

1. E fiafia auauna a le Atua i le mea lelei. Ae e tatau foi ona aʻoaʻoina i latou ina ia ʻinoʻino i le leaga. (Salamo 97:10) O lona uiga o le alofia lea o ni faiga patino e ʻinoʻino i ai le Atua. O ā nisi o ia faiga?

2. Faitaaga: O feusuaiga a o lei faaipoipo, mulilua, feusuai ma manu, mataifale, ma le tauatane, o agasala matuia uma ia faasaga i le Atua. (Levitiko 18:6; Roma 1:26, 27; 1 Korinito 6:9, 10) Pe afai e lei faaipoipo se tane ma se fafine ae o loo nonofo o se ulugalii, e ao ona teteʻa i laua a lē o lena, e tatau ona faaipoipoina faaletulafono.​—Eperu 13:4.

3. Pepelo, Pelē Tupe, Gaoi: E lē mafai ona tala pepelo Ieova le Atua. (Tito 1:2) O ē e mananao e fiafia mai le Atua ia i latou e tatau ona alofia le pepelo. (Faataoto 6:16-19; Kolose 3:9, 10) O so o se ituaiga pelē tupe lava, e maua ai le matapeapea. O lea e lē auai Kerisiano i so o se ituaiga lava o pelē tupe, e pei o lūlū, o tuuga solofanua, ma bingo. (Efeso 5:3-5) E lē gāoi foi Kerisiano. E latou te lē faatauina mai ni mea gaoi, pe  afai latou te iloaina, po o le aveina foi o mea e aunoa ma le faanoi.​—Esoto 20:15; Efeso 4:28.

4. Lē Pulea o le Ita, Sauā: O le lē pulea o le ita e mafai ona oo atu ai i le sauā. (Kenese 4:5-8) O se tagata e sauā, e lē mafai ona avea o ia ma uo a le Atua. (Salamo 11:5; Faataoto 22:24, 25) O se mea sese le taui atu ma sui po o le taui atu o mea leaga ua faia e isi ia i tatou, i le leaga.​—Faataoto 24:29; Roma 12:17-21.

5. Faiga Faataulaitu ma Faaagaga: Ua faatauanau e isi ia le mana o agaga ina ia taumafai ai e faamālōlō maʻi. O isi ua tuu atu i agaga latou te faalauatauina o latou fili ina ia latou mamaʻi ai pe oo foi lava ina fasiotia ai i latou. O le mana o loo i tua o nei faiga uma, o Satani. O lea, e lē tatau ai i Kerisiano ona faia se vaega i so o se tasi o na mea. (Teuteronome 18:9-13) O le mafuta vavalalata atu ia Ieova o le puipuiga sili lea mai i faalauatauga e ono faia mai e isi ia i tatou.​—Faataoto 18:10.

6. Onā: E lē leaga pe a inu sina uaina itiiti, pia, po o isi ituaiga o ʻava malosi. (Salamo 104:15; 1 Timoteo 5:23) Ae o le inu tele ma le onā e leaga lea i le silafaga a le Atua. (1 Korinito 5:11-13; 1 Timoteo 3:8) E mafai ona avea le inu tele ma mea e faaleagaina ai lou soifua mālōlōina ma faavevesi ai le aiga. E mafai foi ona faafaigofie ai ona e lolo atu i isi tofotofoga.​—Faataoto 23:20, 21, 29-35.

7. O tagata latou te faia mea ua fetalai i ai le Atua e leaga, o le a “le fai le malo o le Atua mo latou tofi.” (Kalatia 5:19-21) Pe afai e te alofa moni lava i le Atua ma manao e faafiafia o ia, e mafai ona e manumalo mai nei amioga. (1 Ioane 5:3) Ia aʻoaʻo e ʻinoʻino i mea ua fetalai i ai le Atua e leaga. (Roma 12:9) Ia faatasitasi atu i tagata o ē e amio faaleatua. (Faataoto 13:20) O uo Kerisiano taʻumatuaina e ono faamaonia le avea o se puna e maua mai ai le fesoasoani. (Iakopo 5:14) Ae o le silisili o na mea uma lava, ia faalagolago atu i le fesoasoani a le Atua e ala i le tatalo.​—Filipi 4:6, 7, 13.

[Ata i le itulau 20, 21]

E inosia e le Atua le onā, gaoi, pelē tupe, ma faiga sauā