Lesona 16

O Lau Faaiuga ia Auauna i le Atua

O le ā e tatau ona e faia ina ia avea ai oe ma uo a le Atua? (1, 2)

E faapefea ona e faia se tuuina atu i le Atua? (1)

O fea le taimi e tatau ai ona e papatiso? (2)

E faapefea ona e mauaina le malosi e tumau ai ma faamaoni i le Atua? (3)

1. Ina ia avea ma uo a le Atua, e tatau ona lava le poto o le upu moni o le Tusi Paia e te mauaina (1 Timoteo 2:3, 4), faatuatua i mea ua e aʻoaʻoina (Eperu 11:6), salamō i au agasala (Galuega 17:30, 31), ma liliu ese mai ala tuai o lou olaga. (Galuega 3:19) Ona tatau ai lea i lou alofa mo le Atua ona uunaia oe ina ia tuuina atu oe lava ia te ia. O le uiga o lenei mea, i lau lava tatalo totino, tau lava o oe, e te taʻuina atu ai ia te ia e faapea, ua e tuuina atu oe lava ia te ia e faia lona finagalo.​—Mataio 16:24; 22:37.

2. Pe a uma ona e tuuina atu oe i le Atua, e tatau loa ona papatisoina oe. (Mataio 28:19, 20) O le papatisoga e faailoa atu ai i tagata uma ua e tuuina atu oe lava ia Ieova. O lea la, o le papatisoga e mo na o i latou ua lava lo latou matutua e faia se tuuina atu e auauna i le Atua. Pe a papatisoina se tagata, e tatau ona faamagoto lona tino atoa i lalo o le vai mo sina taimi. *​—Mareko 1:9, 10; Galuega 8:36.

3. Pe a uma ona e tuuina atu, o le a faatalitalia mai oe e Ieova e te ola aʻe e tusa ai ma lau folafolaga. (Salamo 50:14; Failauga 5:4, 5) O le a taumafai le Tiapolo e taofia oe mai lou auauna atu ia Ieova. (1 Peteru 5:8) Ae ia faalatalata atili i le Atua e ala i le tatalo. (Filipi 4:6, 7) Ia suesue i lana Afioga i aso taitasi. (Salamo 1:1-3) Ia mafuta vavalalata atu i le faapotopotoga. (Eperu 13:17) E ala i le faia o nei mea uma, o le a e maua ai le malosi e tumau ai ma faamaoni i le Atua. E oo lava i le faavavau o le a faapea ona e faia ai mea e manaomia e le Atua mai ia te oe!

[Faaopoopoga i lalo]