Lesona 6

O le ā le Malo o le Atua?

O fea e iai le Malo o le Atua? (1) O ai lona Tupu? (2)

Pe e iai nisi e pule faatasi ma le Tupu? Afai e iai, e toafia i latou? (3)

O le ā e faaalia ai o loo tatou ola i aso e gata ai? (4)

O le ā o le a faia e le Malo o le Atua mo tagata i le lumanai? (5-7)

1. A o iai o ia i le lalolagi, na aʻoaʻo ai e Iesu ona soo e tatalo mo le Malo o le Atua. O le malo, o se pulega ua faapea ona faauluulu i se tupu. O le Malo o le Atua, o se pulega lea e faapitoa. Ua faavaeina i le lagi ma o le a pulea maia lenei lalolagi. O le a ia faapaiaina le suafa o le Atua. O le a faapogaia ai ona faia le finagalo o le Atua i le lalolagi e pei ona faia i le lagi.—Mataio 6:9, 10.

2. Na folafola mai e le Atua o le a avea Iesu ma Tupu o Lona Malo. (Luka 1:30-33) A o iai Iesu i le lalolagi, na ia faia ni mea o le a faamaonia atu ai o le a agalelei o ia, e fai mea tonu, ma o se Pule e atoatoa ona lelei. Ina ua toe afio atu o ia i le lagi, sa lei faapaleina loa o ia e avea o se Tupu o le Malo o le Atua i lena taimi. (Eperu 10:12, 13) I le 1914, na tauaaoina ai e Ieova le pule ia Iesu, lea na Ia folafolaina atu ia te ia. E talu mai lena taimi, na pule ai Iesu i le lagi e avea o le Tupu tofia a Ieova.—Tanielu 7:13, 14.

3. Ua filifilia foi e Ieova nisi tane ma fafine faamaoni mai le lalolagi ina ia ō atu i le lagi. O le a latou pule faatasi ma Iesu o ni tupu, faamasino, ma faitaulaga i luga o tagata. (Luka 22:28-30; Faaaliga 5:9, 10) Ua taʻua e Iesu nei pule lagolago i lona Malo o se “lafu mamoe itiiti.” O le latou faitau aofai e 144,000.—Luka 12:32; Faaaliga 14:1-3.

4. I le taimi lava na fai ai Iesu ma Tupu, na ia tuli ese ai Satani ma ana agelu amioleaga mai le lagi ma lafoina mai i lenei lalolagi. O le pogai lena ua matuā leaga ai lava tulaga o mea i le lalolagi talu mai le 1914. (Faaaliga 12:9, 12) O taua, oge, faamaʻi, ma le faateleina o le solitulafono—o nei mea uma o se vaega  o le “faailoga” e faailoa ai o loo pule Iesu ma o lenei faiga o mea ua iai i ona aso e gata ai.—Mataio 24:3, 7, 8, 12; Luka 21:10, 11; 2 Timoteo 3:1-5.

5. E lē o toe umi ae faamasinoina loa lea e Iesu tagata, tuueseeseina i latou e pei ona tuueseeseina e le leoleo mamoe o mamoe ma ʻoti. O “mamoe” o i latou ua faamaonia lo latou avea ma tagatanuu faamaoni. O le a latou mauaina le ola e faavavau i le lalolagi. O “ʻoti” o i latou ua latou teena le Malo o le Atua. (Mataio 25:31-34, 46) O le a faaumatia e Iesu i se taimi lata mai i le lumanai i latou uma e pei ni ʻoti. (2 Tesalonia 1:6-9) Afai e te manao e avea oe o se tasi o “mamoe” a Iesu, e tatau ona e usiusitai atu i le feau o le Malo ma amio e talafeagai ai ma mea ua e aʻoaʻoina.—Mataio 24:14.

6. Ua vaevaeina le lalolagi i lenei taimi i ni atunuu se tele. Ua tofu le atunuu ma lana lava pulega. E masani ona fetauai nei atunuu. Ae o le a suia e le Malo o le Atua pulega uma faaletagata. O le a na o le pau lea o le pulega e puleaina le lalolagi atoa. (Tanielu 2:44) Ona lē toe iai loa lea o ni taua, solitulafono, ma faiga sauā. O le a nonofo faatasi uma tagata i le filemu ma le autasi.—Mika 4:3, 4.

7. I le vaitaimi o le Pulega o le Afe Tausaga a Iesu, o le a avea ai tagata faamaoni ma ē e lelei atoatoa, ma o le a avea le lalolagi atoa o se parataiso. E oo ane i le faaiuga o le afe tausaga, o le a maeʻa ai ona faia e Iesu mea uma ua fetalai atu ai le Atua ia te ia na te faia. Ona ia toe tuuina atu loa lea o le Malo i lona Tamā. (1 Korinito 15:24) Aisea e lē taʻu atu ai i au uo ma ē e te alofa i ai mea o le a faia e le Malo o le Atua?

[Ata i le itulau 13]

I lalo o le pulega a Iesu, o le a lē toe iai le feainaʻi po o le faailoga tagata