Mataupu 16

Amioga Tausaafia e le Fiafia i ai le Atua

1. I le saili e faafiafia le Atua, pe tatou te maua ai mea pe alu ai mea?

UA TATOU maua mea uma e aoga ma ua leai se mea aoga moni e maimau i le sailia ia faafiafia le Atua i mea uma. O ia lenei na fai mai ai le fai Salamo: “E te faailoa mai ia te aʻu le ala o le ola; o i ou luma le fiafia e malie ai; o i lou itu taumatau le olioli e faavavau.” (Salamo 16:11) Ui ia mea, ua taumafai Satani le Tiapolo e faaliliu ese tagata mai le tapuaiga moni ma faasino latou i ala e le fiafia i ai Ieova le Atua. O le tasi o mea ua ia faaaoga e faataunuuina ai lenei mea, o le faia lea o amioga tausaafia e faasalaese i aʻoaʻoga a le Tusi Paia.

2. Po o le a e iloiloina aʻe ai pe sese se aganuu tausaafia?

² E le sese uma amioga tausaafia. Peitai e lē finagalo malie i ai le Atua pe afai e pogai aʻe i lotu sese, a le o lea, pe afai foi ua latou i ai i ni isi ala e fetoaʻi ai ma mataupu silisili o le Tusi Paia. (Mataio 15:6) Ma le loto naunau fiafia lava, o le tele o amioga tausaafia ua faasaoina e oo mai i aso nei o natura faalotu. Talu ai ona ua uma ona tatou vaaia ia lotu faalelalolagi ua faatafa ese mai ma le tulaga o le Tusi Paia, le tapuaiga mamā, e ao ona e le se mea tatou te ofo ai ona maua o le tele o a latou aganuu ua faavae aʻe i faiga faalotu faapaupau.

3. (a) Po o le a le lapataiga na tuu atu e Ieova i lona nuu faasaga i aganuu faapaupau faalotu? (e) Pe mafai faapefea ona fesoasoani mai i a i tatou i le faatatauina o fautuaga ua maua i le Roma 12:3?

³ I le lapataia o Isaraelu faasaga i amioga faalotu o nuu o siomia ai, na tulei Ieova i lona nuu faapea e “aua nei aʻoaʻo outou i tu a nuu ese.” (Ieremia 10:2) O se lapataiga alofa lenei, aua o ia aganuu faapaupau e faavae aʻe i mea sese, ua faaeseina ai le Atua ma lana fuafuaga. E masani lava ona i ai uiga leaga i ia aganuu i amioga a i latou o faia ia mea. O le pogai faapea ua fautuaina ai tatou e le Tusi Paia i aso nei: “Aua foi tou te amio faatasi ma lenei lalolagi, ae peitai ia liliuina i le toe fuataʻiina o outou loto, ina ia outou suesue pe se a le finagalo o le Atua.” (Roma 12:2) O se faanaunauga faamaoni e faafiafia Ieova le Atua, o le a fesoasoani ai i a i tatou ia faia faapea.

O LE FAAAOGAINA O LE KORUSE

4. Po o le a ua talia e le tusi The Catholic Encyclopedia e uiga i le koruse?

⁴ Toatele tagata e o i lotu o asoa koruse, pe i ai foi sana faatusa o le koruse ma se faatagata i le fale, ma ua maua lava koruse i fale lotu e tele. Peitai pe na e iloa o koruse e i ai moni lava sona amataga faapaupau? Ua faaalia e mea moni tainane ina ua lē fai ma faailoga auuliuli o le faa-Kerisiano, ua leva ona faaaogaina le koruse i senituri a o lumanai le fanau mai o Keriso. Ua talia lenei mea e le Catholic Encyclopedia (tusiga 1908, Tusi. IV, itulau 517):

“O le faailoga o le koruse, ua fai ma sui i lona tino aupito faigofie e ni laau fesauaʻi e lua i le tulaga saʻo, ua matua faaanamua tele lava, i Sasae ma Sisifo, i le uluai aumaia o le faa-Kerisiano. E oo atu lava i se vaitaimi e matua maotua lava o le malamalama faaletagata.”

5. Po o le a fa le tusi The Ancient Church e uiga i le amataga faapaupau o le koruse?

⁵ O le faaalia o le amataga faalotu faapaupau o le koruse, fai mai le tusi The Ancient Church e le alii faifeau o W.D.Killen (tusiga 1859, itulau 316):

“Mai mea anamua aupito maotua sa faapaiaina le koruse i Aikupito ma Suria; sa tausia tutusa le mamalu e Puta o Sasae...e tusa o le amataga o tatou aso, sa amio aʻi tagata faapaupau e fai le faailoga o se koruse i luga o le muaulu i le faamanatuga o nisi o a latou mea lilo paia.”

6. Po o fea na amata mai ai le koruse, ma po o ai le atua ua fai le koruse mona faailoga?

 ⁶ Ma, ua faaalia atili lona fesootaʻiga ma le lotu Papelonia, fai mai W.E.Vine i le tusi An Expository Dictionary of New Testament Words (Tusi 1, itulau 256), faapea o le koruse “sa amataina mai i Kaletaia anamua [Papelonia] ma na faaaogaina e fai ma faailoga o le atua o Tamusa (le tino mai o le Tau faamealilo [po o le T], o le mataitusi o lona igoa).”

7. (a) E tusa i le tusi o le Tusi Paia o Galuega pe na fasiotia Iesu i se koruse lua laau fefaalavaʻi? (e) Pe ua faaaoga faapefea e tusitala Eleni le upu ua faaliliuina “koruse” i nisi lomiga o le Tusi Paia?

⁷ Peitai pe na lei fasiotia Iesu i se koruse laau-lua? Ua faasino mai e le Tusi Paia e leai. Ua taʻuina mai i a i tatou i le Galuega 5:30 ma le 10:39, faaliliuga o le Tusi Paia Katoliko ma Porotesano faapea na maliu Iesu i se “laau.” Ua faaliliuina iinei le upu “laau” i le upu Eleni xylon (po o le xulon). Faatatau i lenei upu ma le upu stauros, ua faaliliuina “koruse” i isi lomiga, fai mai le Companion Bible i le itulau 186 i le “Faaopoopoga” o le tusi:

“Ua faaaoga e Homer [tusitala Eleni anamua] le upu stauros o se pou e masani ai po o se laau, po o se fasi laupapa e tasi. Ma o le uiga lenei ma le faaaogaina o le upu e tagata iloga o Eleni. E le taitai lava ona uiga i ni fasi laupapa se lua ua fefaalavaʻi le tasi i luga o le tasi i soo se faalava, ae na o le tasi pe lava le fasi laau. O lea la o le faaaogaina o le upu xulon [po o xylon, o le uiga o le fasi laupapa] i le faatatau atu ma le uiga o le maliu o lo tatou Alii, . . . Ua faapea ona atoa le faamaoniga, na fasiotia le Alii i luga o se laau saʻo, ma e le o ni fasi laupapa e lua ua faamauina i soo se faalava.”

8. Pe na amata ana fea le faaaogaina o le koruse i tagata fia Kerisiano? Ma pe ai se a na latou nonoina ai se faailoga faapaupau?

⁸ I le faaalia o le faaaogaina ma po o ana fea na amata ai le faaaogaina o le koruse i tagata ua taʻua o Kerisiano, fai mai W. E. Vine i lana tusi:

“I le taulotoaiga o lona 3 o senituri T.A. sa uma ona see ese lotu mai, po o na [faia ni faataʻitaʻiga faalefetaui], o ni aʻoaʻoga o le faatuatuaga faa-Kerisiano. Ina ia faateleina le mamalu o faiga faaleekalesia lotu mavae  na talia ai tagata faapaupau i totonu o le ekalesia, e ese ai mai le toe faatuputupulaʻia o le faatuatua, ma na faatagaina tele ia taofiofia a latou faailoga faapaupau ma faatusa. O le mea lea na avea ai le Tau po o le T, . . . faatasi ma le fasi laupapa faalava ua tuutuuina ifo i lalo e fai mo le koruse o Keriso.”—Tusi 1, itulau 256.

9. Pe ua o se mea e masani ai ona faapelepeleina se auupega na faaaogaina e fasiotia ai se ua pele? (e) Afai ua faaaoga e se tasi se koruse, po o le a le filifiliga e tatau ona ia faia? Po o le a foi o le a fesoasoani ai i le faia o le mea saʻo?

⁹ Ua se mea e le masani ai ona faapelepeleina ma faamamaluina le mea na faaaogaina e fasiotia ai se tasi ua tatou alolofa i ai. Po o ai e manatu e fia kisi i le fana gutu-ono na faaaogaina e fasiotia ai se ua pele, pe asoaina i le ua o se tagata? Ua faapeaina lava lenei mea, ma ua faamaonia le koruse o se faatusa faalotu faapaupau, o tagata la o asoaina sea mea pe i ai foi faakoruse ma faatusa i o latou fale, o manatu faapea e faamamaluina ai i lenei mea le Atua ma lona Alo o Iesu Keriso, o loo ua faafesagaʻi nei ma se filifiliga tāua. Po o le a latou faaauau pea ona faaaogaina ia mea? Po o le a latou tausia i latou? O le alofa i le upu moni ma le faanaunauga ia faafiafiaina le Atua i mea uma e fesoasoani ai i le faia o le iʻuga saʻo.—Teuteronome 7:26.

FAATUSA MA ATA FAALOTU

10. (a) Po o le a le maotua o le faaaogaina o faatusa faalotu, mea paia ma ata? (e) I lenei fesootaiga, po o a fesii e tatau ai la ona tatou mafaufauina i lea fesootaiga?

¹⁰ Talu mai lava le taimi o Aikupito ma Papelonia anamua, ua matua tausaafia le faaaogaina o faatusa, mea paia ma ata i fale. Ua faapelepeleina ia mea e tagata o e ua talitonu o le a aumaia e ia mea le faasaoina ma le manuia i o latou aiga. Peitai pe finagalo fiafia Ieova i lenei faiga? Po o ia faamaonia i latou o e o vaai ma le naunau vilivilitaʻi i mea faitino ae le tuuina le faatuatua atoa i a te ia le Atua soifua moni?

11. (a) Pe sa faataga e le Atua Isaraelu anamua e faaaoga faatusa faalotu e fesoasoani ia alofa vilivilitaʻi ai? (e) Pe ai se a sa alo ese ai Kerisiano anamua i le faaaogaina o faatusa?

¹¹ I le faaalia o le lē fiafia o lona finagalo i faatusa faalotu faapea e fesoasoani ai i le lagona vilivilitaʻi, na tuu atu ai e le Atua lana tulafono i a Isaraelu  ia faasa ai lo latou faaaogaina. E le gata ai i lea, ae na ia lapataʻiina i latou faasaga i le tuʻinanau i auro ma ario o ia faatusa na latou maua mai tagata faapaupau. (Esoto 20:4, 5; Teuteronome 7:25) Pe na suia le finagalo o le Atua ina ua aumaia le lotu faa-Kerisiano? E leai, aua foi ua faaali mai e le Tusi Paia sa faapea foi Kerisiano ona latou alo ese mai le faaaogaina o faatusa. (Galuega 17:29) I le mulimuli atu i le fautuaga a le aposetolo o Ioane, “ia leoleo outou ia te outou ia taumamao i tupua,” na latou savavali “i le faatuatua, ae le o le tino mai o mea.” Na latou matua faatuatua atoatoa i le Atua e le vaaia.—1 Ioane 5:21; 2 Korinito 5:7, NW.

12. Pe na amata faapefea faatusa o Keriso? O lea, pe sa i ai i uluai Kerisiano se faatusa o le tinā o Iesu?

¹² Ua se fau e taʻi tala tuufaasolo faalelalolagi ma lenei mea. Pei ona taʻu mai e le MʻClintock and Strongs Cycyopaedia (Tusi IV, itulau 503) i a i tatou: “Sa le iloa lava faatusa i le tapuaiga a Kerisiano muamua.” Talu ai ona sa tausia e uluai Kerisiano o latou aiga ia auuliuligia ma faatusa faalotu, po o fea ea la na amata mai ai faatusa o Keriso? Ua taʻu mai i a i tatou, e le tusi The History of the Christian Religion and Church, During the Three First Centuries (e Dr. Augustus Neander) (Tusiga lona lua, 1848, itulau 183): “O tagata pouliuli, o e, pei o Alexander Severus [tupu o Roma o le tolu o senituri T.A.], sa iloa se mea tau Atua i a Keriso, ma ituaiga, o mea na faafefiloia faatasi ai faiga faanuupo ma faiga faa-Kerisiano, o i latou lava ia na mua i malae i le faaaogaina o faatusa o Keriso.” Talu ai ona sa leai ni faatusa o Keriso na faaaogaina e uluai Kerisiano, ua manino ai foi le mata o le vai sa le i a i latou ni faatusa o Maria, le tinā o Iesu.

13. (a) Po o le a e iloa ai se faatagata po o se ata e le fiafia i ai le Atua? (e) Po o le a le amataga o le halo po o le “nimbus”?

¹³ Po o le uiga o lenei mea e faapea ua sese ona i ai ni mea mananaia pei o ata po o faatagata, i fale? Leai, aua foi e i ai se eseesega i le va o mea na, o mea mananaia ma mea tāua faalotu. Po o le ā e te iloa ai e lē fiafia le finagalo o le Atua i se faatagata po o se ata? O le mea lenei: pe paia pe tapuaia, atonu  o moli gaʻo po o mea ʻai ua laulauina ai i luma, pei ona faia i isi atunuu? Po o ia suiseseina ai le Tusi Paia? Po o ia faaataina mai ai faatagata faapaupau? Pe te matauina o nisi ata o Iesu Keriso ua i ai se liʻo o le malamalama faataamilo i lona ulu. Ua taʻua lenei mea o se halo po o nimbus. Afai e te tagai ane i le upu “nimbus” i se tusi encyclopedia o le a e aʻoaʻoina ai faapea na faaaogaina lenei upu e Aikupito, Eleni ma Roma anamua i a latou mea taʻua mananaia faalotu faapaupau. E mafai ona sailia i tua le halo i ifoga o le la faa-Papelonia ma ua aliali mai ai faatasi ma mea ua fai ma sui o atua o Papelonia.

14. Po o le a sa fai e auauna faatuatua a le Atua i aso ua teʻa pe a latou maua ni mea faalotu sese i totonu i a i latou?

¹⁴ Po ua i a i tatou se taʻiala mai aso ua mavae i le mea e ao ona ia tatou fai pe a tatou maua ia faatusa faalotu ma ata i totonu i a i tatou lava? Ia, po o le a na fai e Iakopo faatuatua ina ua na maua atua sese i totonu o lona aiga? Na ia lafoaia i latou uma. (Kenese 35:2-4) Ma po o le a na fai e le Tupu talavou o Iosia, o se iʻuga o le amataga ona saili mo le Atua moni? Na ia faamamaina faatusa ma tupua ua ta nai sa Iutā, lepetia ma nutililia i latou. (2 Nofoaiga a Tupu 34:3, 4) Paga ni faaaʻoaʻoga lelei o le maelega i le avatua o le viiga i a Ieova le Atua!—Salamo 115:1-8, 18.

FAAMAMALUINA O TAGATA MA FAALAPOTOPOTOGA

15. (a) Pe fiafia le Atua i aso malolo e avatu ai mamalu faatapuaʻiga i mea-fai-ola? (e) O aso malolo e mafaufau ai “agaga o e ua oti” o faavae aʻe i ā aʻoaʻoga sese? O lea, po o le a le upu moi e uiga i le aso o All Souls’ Day?

¹⁵ I le tele o nuu o le tu ma le aganuu ia faataatiaese aso e faamamaluina ai “tagata paia” po o tagata taʻutaʻua, oti pe ola. Pe mālie lenei mea i le Atua? Ua lapataʻi mai le Tusi Paia faasaga i le avatua o mamalu faatapuaiga i mea-fai-ola, ma ua faapea aso malolo ona agai atu i lea tulaga ua le tala feagai ma le finagalo o le Atua. (Galuega 10:25, 26; 14:11-15; Roma 1:25; Faaaliga 19:10) E le na o lea, a o aso malolo e faamanatu ai “agaga o e ua oti” ua matua faavaeina aʻe i aʻoaʻoga sese o le ola pea o le tagata ola. O lea e le se mea e ofo ai ona tatou faitau, i le tusi o le Encyclopaedia  Britannica (lomiga 1946, Tusi 1, itulau 666), faapea “o ni talitonuga iloga tausaafia ua fesootaʻi ma le All Souls’ Day e pogai mai faapaupau.” Ua faaeteete tagata o e alolofa i le ala o le upu moni ia latou alo ese mai ia faamanatuga.

16. (a) Po o le a le sese i aso malolo po o faamanatuga faapea e faamamaluina ai atu nuu po o faalapotopotoga faalelalolagi? (e) Pe faapefea ona faaalia e le Tusi Paia le ala e ao ona ui ai Kerisiano?

¹⁶ O isi aso malolo po o aso faamanatu ua faamamaluina ma faaeaeaina ai atunuu po o faalapotopotoga faalelalolagi. O le aganuu sese o i ai i lea mea ua avatu le viiga i ia faalapotopotoga mo mea aoga e ao ona faaeaeaina moni i le Atua, po o le faaeaeaina o ia faalapotopotoga ona o le malosi e faasao ma puipuia ai i se ala e na o le Atua moni lava ia na te mafai ona fai. (Ieremia 17:5-7) O lea, o e ua au ai i nei faamanatuga ua latou tau pelopelo i le Atua. O le a taʻitaʻia Kerisiano moni e le mataupu silisili faapea e le “ni o le lalolagi outou.” (Ioane 15:19) Ua latou le faaaʻoaʻo i le lalolagi, ae o le a latou le “amio faatasi ma lenei lalolagi.”—Roma 12:2.

17. (a) Po o ai ua faasilisilia o le totonugalemu o faanaunauga i faamanatuga o aso fanau? (e) Pe na o ai tagata o taʻua mai i le Tusi Paia ia na faamanatu o la aso fanau? (i) Pe na vaaia faapefea e uluai Kerisiano faamanatuga o aso fanau?

¹⁷ Pe mata māmā mai lava nisi aganuu ae taʻitaʻia ai i le itu lava e tasi pei o faiga ua taʻua i luga. O lea, a o tino mai mata e itiiti le aogā o le faailogaina o aso fanau, a ua latou faaeaeaina ma faasilisilia ai le mea-fai-ola, ua faia ai o ia ma totonugalemu o mafaufauga a ua lē o Lē na faia mea. E ao foi ona tatou matauina, e na o le lua lava faailogaina o aso fanau o taʻua i le Tusi Paia, o i laʻua ia o Farao o Aikupito ma Herota Anetipa, o tupu o e na mulimuli atu i le lotu sese. (Kenese 40:20:22; Mataio 14:6-10) Ma pe ā uluai Kerisiano? Fai mai le tala a Neander: “Sa mamao lava le mafaufau i se tausamiga o se aso fanau mai mafaufauga o Kerisiano o lenei vaitaimi i le lautele.” Itulau 190) Na latou ʻalo ʻalo ese i faamanatuga o aso fanau e amata mai faapaupau. O i latou o e saili ma le naunautaʻi e faafiafia le Atua e  ʻalo ese ma le atamamai mai aganuu e faasilisilia ai soo se mea-fai-ola po o lea foi, o latou amataga e mai lotu sese.—Ioane 5:44.

ESETA MA LE KIRISIMASI

18. (a) Pe na faamanatu e uluai Kerisiano le Eseta? (e) Po o le a le amataga o tu tausaafia o le Eseta? (i) Pe o i ai soo se lagolagoina o le Eseta i le Tusi Paia?

¹⁸ O le aso malolo faalotu sili i Atunuu Lotu Kerisiano o le Eseta, ua faapea ua faia, e faamanatu ai le toe faatuina o Keriso nai e ua oti. Peitai pe na tuu atu e Keriso se faatonuga ia faamanatu lona toe tu? E leai, sa ia lei faapena mai. Ua taʻu mai i a i tatou e tusi o tala tuufaasolo faapea sa lei faailogaina le Eseta e uluai Kerisiano ma ua faapea ua faavae aʻe i luga o faiga faapaupau anamua. Fai mai le tusi The Encyclopaedia Britannica:

“Ua leai se faasinoga o le tausia o le tausamiga o le Eseta i le Feagaiga Fou . . . O le faapaiaina o taimi faapito o se mafaufauga na le i ai i manatu o uluai Kerisiano.” *

Fai mai Dr. Alexander Hislop i aganuu o le Eseta:

“O faamanatuga tausaafia o saga pea i ai le vaitaimi o lona faamanatuga ua faateleina ai ona faamaonia le molimau a tala tuu faasolo i lona amioga faa-Papelonia. O pani vevela o le Aso Faraile Lelei atoa ma fuamoa ua valiina a Pasch po o le Aso Sa Eseta, na fuafuaina i sauniga faa-Kaletaia [faa-Papelonia] pei ona latou faia nei.” *

O le upu “Eseta” ua tasi ona i ai i le Tusi Paia o le King James i le Galuega 12:4 ua o se faaliliuga sese mo le upu “paseka.” * Ua leai lava se mea o aliali mai ai le “Eseta” i le Tusi Paia Katoliko o le Douay. O le mea lea ua matua le lagolagoina ai lava le aso malolo sili a Atunuu Lotu Kerisiano, o le Eseta, i le Tusi Paia. Ua o se mea amata faapaupau ma o le ala lea ua le fiafia i ai le Atua.

19. (a) Pe na faailogaina le Kirisimasi e uluai Kerisiano?? (e) Po o le a le faamanatuga na faatonu e Iesu i ona tagata ia tausia?

 ¹⁹ Po o le a e uiga i le Kirisimasi? I le sue atu i faasinomaga o galuega i se fale tusi, o le a e maua ai sa le iloa lava e uluai Kerisiano muamua. Sa faatonuina e Iesu ona tagata ia latou fai se faamanatuga o lona maliu, ae le o lona soifua mai. (1 Korinito 11:24-26) Fai mai le tusi The Catholic Encyclopedia: “Sa le i ai le Kirisimasi i uluai tausamiga aupito muamua lava a le ekalesia. . . . O le faamaoniga muamua o le tausamiga e mai Aikupito.” *

20. (a) Pe ua faaalia faapefea e mea moni na le mafai ona fanau Iesu i le malulu o le tau malulu? (e) Po o ana fea na filifilia ai le aso 25 o Tesema, ma pe ai se a lea aso?

²⁰ Po o le a la le aso 25 o Tesema, ua faailogaina e le toatele o le aso fanau o Keriso? Ua le mafai ona fai ma aso na fanau ai Iesu. Ua faaali mai e le Tusi Paia faapea o le taimi a o i ai pea leoleo mamoe i le fanua i le po. Pei ona faamaonia e le tusi o le Encyclopaedia Britannica (1907, Tusi V, itulau 611) na latou lei i ai iina i le malulu ma timuga o le tau malulu. (Luka 2:8-12) A o le amataga o le aso, fai mai le tusi The World Book Encyclopedia:

“I le T.A. 354, na poloaiina ai e Pikopo Liberius o Roma tagata ia faailoga le 25 o Tesema. Atonu na ia filifilia lenei aso aua ua faailogaina e tagata o Roma lenei aso o le Tausamiga a Satana e faamanatu ai le aso fanau o le la.” *

21. Po o a mea moni o tala tuu faasolo ua faaalia i le amataga o le tele o amioga o le Kirisimasi?

²¹ Talu ai ona o le aso o le Kirisimasi e pogai mai faapaupau, e ao foi la ona ua le tulaga ese aganuu o le Kirismasi e faapogai mai faapaupau. Ua faapea ona taʻu mai ai e le tusi o le Encyclopaedia of Religion and Ethics i a i tatou:

“O le tele o aganuu o le Kirisimasi o loo ua aoao nei . . . e le ni tu Kerisiano mama, a o aganuu faanuupo o mea ua faaemo mai po o ua faatagaina e le Ekalesia . . . Ua aumaia e le Saturnalia i Roma le faaaʻoaʻoga mo le tele o aganuu fiafia o le taimi o le Kirisimasi.” *

 I le ma lea foi ua faasino mai e le tusi, The Encyclopedia Americana faapea i aganuu ua nonoina mai le tausamiga a Roma faapaupau a Saturnalia o “le avatua o meaalofa.” *

22. (a) Ua ao ona pulea faapefea e le Kalatia 5:9 o tatou uiga agai i le Kirisimasi? (e) Po o a mafuaaga lelei ia alo ese ai Kerisiano moni i lea faamanatuga?

²² E leai sē sola mai ai: O le Kirisimasi e pogai mai faapaupau. O le iloaina o lenei mea, e ao ona tatou utagia ai le lapataiga a le aposetolo o Paulo faasaga i le faafefiloia o le mea moni ma le mea sese. Ua ia fai mai “e faafefeteina le paluga falaoa uma lava i sina mea itiiti e faafefete aʻi.” (Kalatia 5:9) Sa ia aʻoaʻia nisi o uluai Kerisiano ona o le matauina o aso sa tausia i lalo o le tulafono a Mose ae peitai na soloia e le Atua lea mea mo Kerisiano. (Kalatia 4:10, 11) Po o le a le tāua sili o lenei mea mo Kerisiano o aso nei ona ia ʻalo ʻalo ese i se faailogaina e le taitai ona faatonuina e le Atua, ae faapea e oso mai Papelonia faapaupau, ma faapea ona molimau pepelo ai i le suafa o Keriso!

SILI ONA LELEI I FAAMANATUGA FAAPAUPAU

23. Po o a mea ua i Kerisiano e sili ona lelei i lo le “agaga o le Kirisimasi” e pa tasi i le tausaga?

²³ Ua i ai i Kerisiano moni ni mea e sili ona lelei i lo faamanatuga faapaupau. Ua i a i latou le “fua o le agaga” o le mea e i ai le “alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le lē gaoiā.” (Kalatia 5:22, 23) O lenei fua e tupu mai ai le alofa e sili ona matagofie ma mamā i lo le “agaga o le Kirisimasi” e fuga tasi i le tausaga. Ua fua mai e le agaga o le Atua le agalelei ma le lē manatu faapito e mafai ona vaaia ma le manino i aso taitasi uma o le tausaga. Ua faataaliseina Kerisiano e lenei mea e foai, e leai ma se manatu e toe totogia mai, pe ona o le mamafatu o le omiga ua i ai, ae ia alu aʻe mai le alofa faa-Kerisiano mamā.—Luka 6:35, 36; Galuega 20:35.

24. (a) Po o a fea e fai meaalofa ai Kerisiano moni ma maua ai aso fiafia faatasi? (e) Faapefea ona sili lea i lo mea o fai e le lalolagi?

²⁴ E mafai e Kerisiano moni ona avatu meaalofa ma fiafia faatasi uma ai i le tausaga atoa. (Luka 6:38)  E le tau faatali matua mo aso fanau po o aso Kirisimasi, ae latou te mafai ona aumai meaalofa i a latou tamaiti i taimi eseese i le tausaga. Ua faia ai i lenei mea sauniga fiafia e tele ae le ni o le tasi pe lua. E le gata i lea, ua iloa ai e tamaiti o latou matua ē o aumaia i a i latou meaalofa, o le mea ua faia aʻe faapea mai le alofa mo i latou. E fesoasoani lenei mea e simā aʻi le fusi o le alofa i le va o matua ma fanau. I le ma lea foi, ua lē faamalosia ai tamaiti ia lē loto faafetai i tagata po o le Atua, ona ua manatu ua alagatatau ona latou maua meaalofa i aso faailogaina.—Kolose 3:14.

25. O le aʻoaʻoina o le upu moni e uiga i tu ma aganuu tausaafia e tuusaolotoina ai i tatou mai le ā, ma po o le a le sini o i luma?

²⁵ O le aʻoaʻoina o le upu moni e uiga i le amataga faapaupau o aganuu tausaafia e mafai ona maua ai se uiga saoloto ofoofogia. Tatou te le toe faalogoina ai le  fai ma matua tausi i le mulimuli atu i faiga e faamaonia ai ua fai ma avega, i le itu tau tupe ma isi mea, i tagata o le lalolagi. Ma, o le mea aupito sili ona tāua, o lo tatou iloa o le upu moni e tuusaolotoina ai i tatou i le tausisia o le auala e faafiafia ai i a Ieova, ia faapea ona tatou maua ai le ola faavavau i lana faiga fou amiotonu.—Ioane 8:32; Roma 6:21, 22.

[Faaopoopoga i lalo]

[Fesili mo le Suʻesuʻega]