Mataupu 20

Atiaʻe se Olaga Faaleaiga Fiafia

1. Pe ai se ua leai ai se isi mea e sili atu i lo le Tusi Paia e maua ai fautuaga e uiga i le olaga i le aiga?

E LE gata ina aumaia e le upu moni mataupu tau aʻoaʻoga, a ua aumaia foi e le Tusi Paia le tele o faatonuga faatatau i olaga i le aiga. Ua faaalia i a i tatou le ala e faafetaiaia ai ma le manuia faalavelave o le olaga i aso taitasi. Ua leai se isi mea tatou te maua ai fautuaga sili ona lelei, aua foi o Ieova, Le na faia le Tusi Paia, o Ia lava lea na ia amataina ona faia faaipoipoga ma fuafuaina mo olaga i le aiga.—Kenese 2:18, 22.

2. (a) Pe na faapefea ona faasino e Iesu le naunau fiafia i le ʻau faatasi e ao ona i ai i le va o le tane ma le āvā? (e) Po o le a lenei mea e manaʻomia ia latou ati aʻe?

² Ina ua aumaia e le Atua le uluai tane ma le fafine ia faatasia o le tane ma le āvā, sa ia faamamafa atu le faatasia e ao ona ia i ai i a i laua. Sa faatepaina lava e Iesu Keriso i lenei mea ina o ia fetalai atu: “Tou te lei faitaulia ea, o le na faia tagata i le amataga, na ia faia i laua o le tane ma le fafine, na ia fetalai ane foi, O le mea lea e tuua ai e le tane o lona tamā ma lona tinā, a e faatasi ma lana āvā; ona avea lea o i laua o le tino e tasi? O lea e le toe toalua ai, a o le tino e tasi i laua; o lenei, o e ua faatasia e le Atua, aua nei faateʻaeseina e se tagata.” (Mataio 19:4-6) E le ni tagata tausinio. Pe na ona masani e faifai mea i se nofoaga e tasi. Leai, sa faia ia “tasi le tino” i laua. O lea, e ao ai i e ua faaipoipo ona ati aʻe le alofa loloto o le tasi i le tasi, ma ia sailia ia fetosina aʻi i le au faatasi i fuafuaga.

TUU FEAGAI O LE TANE MA LE AVA

3. (a) Po ua faamatala mai faapefea e le Efeso 5:23 le tulaga o le tane? (e) Po o le a le uiga o lenei mea?

³ Mo le olaga faaipoipo ia matua fiafia moni lava, e tatau i le tane ma le ava ona talisapaia fiafia o la tulaga ua i ai. Ua le na o ni tulaga ua faia aʻe e aganuu a le nuu. Ua faatulagaina nei tulaga i le Afioga lava a le Atua, le Tusi Paia, ma ua tala feagai ma uiga na totoina i totonu o le tane ma le fafine e le Atua i le taimi o le foafoaina. O lona silafia o le faia o le tagata, ma le fuafuaga na ia faatatau i ai, na faamau ai e Ieova i lana Afioga faapea “o le tane o le ulu ia o le avā, pei o Keriso foi o le ulu ia o le ekalesia.” (Efeso 5:23) O le uiga o lenei mea ia taulamua ma ia taʻitaʻi le tane i le aiga, i le fuafuaina o gaoioiga a le aiga ma tauaveina le avega tauave o le faia o iʻuga mulimuli. Peitai ua le tuuina atu ai i a te ia le pule e soona fai ai pe pule sauā i lona aiga.—Kolose 3:19.

4. Po o le faaaʻoaʻoga lelei a ai e ao ona suesue i ai tane Kerisiano, ma, mo le ā le aogā?

⁴ Ui ina toatele ua faia a latou pulega i se auala faalealofa, e ao i tane Kerisiano ona alo ese i lena mea. E ao ina latou suesue ma le faaeteete pe na faapefea ona faia e Iesu Keriso lana pulega i luga o le faapotopotoga Kerisiano, ma mulimuli ai loa i lana faaaʻoaʻoga. Ua fautuaina tane i le Efeso 5:25: “Ia outou alolofa atu i a outou lava avā, faapei o Keriso foi ona alofa mai i le ekalesia, ma foaiina mai e ia ia te ia e fai mona sui.” A faia faapea, o le a latou le soona fai feau i a latou āvā, ae o le a faia mea o le aiga i se auala e faafiafiaina ai ē uma e aafia ai.—Mataio 11:28-30.

5. (a) Pe vaai faapefea se āvā Kerisiano i lana tane a ao ai? (e) Afai e sili ona maʻai tele le mafaufau o se āvā i lo le tane, pe mafai faapefea e ia ona faaaoga lenei uiga i se auala e aogā? (i) Po o a avega tauave o fafine faaipoipo ua faatuina mai i le Tito 2:4,5?

⁵ O le āvā, o lana vaega, “ia āva o ia i lana tane.” (Efeso 5:33) Talu ai ona o le tane ua faatonuina e le Atua e taʻitaʻi, e mafai la e le fafine ona fai sana vaega tele e saosao laumea ai i le fiafia o le aiga i le  lolo atu ma le loto i lona tulaga ulu. (Kolose 3:18) Afai e malosi tele lona mafaufau i lo lana tane, pei ona faapea ai i isi aso, ona ia mafai lea ona faaaoga lenei uiga e lagolagoina ai lana tane i lana vaega, o le ulu, ae ia le tauva ma ia pe faaleamanaia ai le mea ua ia fai. (Faataoto 12:4) E tele lava mea mo ia e fai i le fesootaʻiga ma le olaga o le aiga. Ua uʻunaʻia malosi e le Tusi Paia fafine faaipoipo ia “alofa atu i a latou tane, ia alofa atu i a latou fanau, ia faautauta i latou, ia le gaoiā, ia tausi lelei i o latou aiga, ia agalelei, ia usiusitai atu i a latou lava tane, ina neʻi upuleagaina le afioga a le Atua.” (Tito 2:4, 5) O le āvā ma le tinā e faataunuuina ia tiute o le a manumalo ia i a i latou i le alofa tumau ma le faaaloalo a lona aiga.—Faataoto 31:10, 11, 26-28.

6. (a) Po o a mea ua paʻū i tane ona mafaufauina e uiga i a latou āvā ua faapea ona faaoso mai ai faalavelave? (e) O lea po o le a ua fautuaina e le 1 Peteru 3:7 tane e fai?

⁶ Ua mapuna aʻe faalavelave i le tele o aiga talu ai ona ua le taulau ona mafaufauina e se tane uiga tau fafine, e i ai le faia aʻe o mea i le faalogona, a lana āvā. E manaomia e le tane ona fiafia e iloa e ese le vaai a le fafine i mea. E tali atu ona faalogona i se auala e ese. E le tusa si ona malosi ma lona. O lea la o le fautuaga faagaeeina i tane: “Ia faapea outou tane, ia nonofo faatasi ma i latou ma le poto, ia ava i le avā, auā o le ipu ia ua sili ona vaivai ia te oe, mona ua tofia faatasi i le ola e foaifuaina mai.” (1 Peteru 3:7) A fai e se tane lenei mea, o lona uiga, ua ia fesoasoani e aumai se agaga o le faautauta ma le saogalemu i le aiga.

7. (a) Pe faatatau faapefea mea ua tusia i le Eperu 13:4 ona saosao laumea ai i le uiga o le saogalemu i le aiga? (e) Po o ai e tatau ona faatapulaaina mai ai le naunau fiafia faaulugalii o se Kerisiano, ma pe ai se a?

⁷ Ua taatele i tagata faalelalolagi ona elia aʻe le nofo lelei ma le saogalemu o le aiga e le naunau fiafia e tafao i fafo atu o le fusi o le la aiga. Peitai o i latou o e ola e tala feagai ma le Afioga a le Atua ua puipuia mai le loto tiga ma le faanoanoa e aumai e lea amioga. I le gagana e faigofie ona malamalama ai ua lapatai mai le Tusi Paia: “Ia faamamaluina le  faaipoipo i tagata uma, ma o tofaga foi ia aunoa ma le faaleagaina, auā e faamasino le Atua ē faitaaga ma mulilulua.” (Eperu 13:4, NW) Ua le o i ai se faatagaga mo le amioleaga. O e ua fia avea ma auauna a le Atua e ao ona ola i olaga mama. (1 Tesalonia 4:3-8) E tatau i ulugalii ona faatapulaaina mai o latou naunau fiafia faaulugalii i a latou lava paʻaga faaipoipo e tusa ma le tulafono, ma latou te tala i le Atua i le faia faapea. (Faataoto 5:15-21) E ao ona ia avea ma faanaunauga aʻiaʻi o i laua o le tane ma le āvā ona fesoasoani le tasi i le tasi ia ʻalo ese mai soo se tofotofoga e faia ai le sese. Latou te mafai ona fai lenei mea i le faaalia o mafaufauga lē manatu faapito mo le tasi e le tasi.—1 Korinito 7:3-5.

8. (a) Mo se faaipoipoga ia galueaiina lelei, po o le a e tatau ona taua muamua i le aiga? (e) O lea po o le a e ao ina avea o se vaega o le ala faaleaiga o le olaga?

⁸ Ui i lea mea, afai o se faaipoipoga ua galueaiina aʻe moni lava e tala feagai ma mataupu silisili ua tatou talanoaina, e tatau foi ona ia faamamafaina e le aunoa mea faaleagaga. O le tapuaiga i a Ieova le Atua e ao lava ona avea o le mea taua muamua lea i le aiga. E ao ina ia le eueua i tafatafa ona o le fiafia i taumafaiga ia sili ona tele mea faaletino ia maua, po o ia sili atu taimi mo le sailia o mea faafiafia. (Luka 8:11, 14, 15) Talosaga a le aiga ma tauaofiaga e le aunoa i suesuega faale Tusi Paia a le aiga o le mea e ao ona o se vaega o auala taitasi uma o le olaga o le aiga. Po o e faatatauina mo lenei mea i lou aiga?

TAUSIA AʻE O LE FANAU I LE ALA FAALEATUA

9. Pe mafai faapefea ona faafetaiaia ma le manuia faalavelave o le tausia aʻe o tamaiti?

⁹ Pe a fananau tamaiti, o le faanaunauga maumauaʻi o matua alolofa ona vaai i olaga o e laiti ia iu lelei. Peitai e le se galuega faigofie lea mea. E tele lava faalavelave e tau fai malaga aʻe i le ala. O ia mea e mafai ona faafetaiaia ma le manuia lava pe a faatatauina fautuaga i le Afioga a le Atua.—Faataoto 22:6; Teuteronome 11:18-21.

10. (a) Po o le a e manaʻomia sili ona taua e fanau, ua le gata mai ai i mea e ʻai, lavalava ma mea e malu ai? (e) Po o a fea e ao ai ona saunia lenei mea?

 ¹⁰ E tele le taimi ma taumafaiga e masani lava ona tatou manaomia e vaai ai ia i ai mea e ʻai e tatau, lavalava mamā, atoa ma se aiga fiafia e mau ai. Peitai ua faaali mai soo e le Tusi Paia le avega tauave a matua ia le taitai ona gata ai iina. E tāua foi ona ia aafia ai tamaiti e le aunoa i le faasologa a le aiga i faatonuga i le Afioga a le Atua. (Salamo 78:5-7) E le na o taimi o suesuega e masani ai e le aunoa, a o isi foi taimi e ao ai i matua ona tautalatala i a latou fanau e uiga i a Ieova ma ona ala. (Teuteronome 6:6, 7) A maea lenei mea, ua aʻoaʻoina la tamaiti e mafaufau i le Atua i le tuu feagai ai ma gaoioiga uma o le olaga.

11. Po o ai e ana le avega tauave sili o le vaaia ua maua e tamaiti le faatonuga i le Afioga a le Atua, ma po ua faaalia faapefea e le Tusi Paia lenei mea?

¹¹ I le itu tau mataupu silisili lava la, o le tamā, le ulu o le aiga, ua tuu i ai e Tusi Paia le avega tauave ia vaai ia avatua lenei faatonuga. Pe a ia faia sauniuniga mo lea mea, ma taulamua ia i le aumaia o le a matua sili ona tosina faatasi le aiga atoa. I lea lava taimi e tasi, ua tuuina i le fanau se ituaiga aʻoaʻoga ua faapea ona latou matua manaomia tele. O lea ua faapea ona ia avea ai i fale o loto le mea ua faamauina i le Efeso 6:4: “O outou tamā foi, aua neʻi tou faaonoono atu i a outou fanau, a ia tausi atu i ai i aoaiga ma apoapoaiga a le Alii.”—Tagai i le Faataoto 4:1.

12. Pe ai se a ona ia le manatu māmā ai i le usiusitaʻi i matua?

¹² O le vaega o le “aoaiga...a le Alii” e tatau ona aʻoaʻoina e aafia ai le vaega tauave ia usiusitaʻi i ona matua. Ua le o se mea e manatu māmā i ai, aua o le vaai a le tamaitiiti mo le ola faavavau ua aafia ai. (Efeso 6:1-3) O le Atua o ia lea ua finagalo ia usiusitaʻi le fanau i o latou matua. E faaalia ai le atamai i le vaega a matua pe a latou uʻunaʻia ma le maumauaʻi ma le onosai lenei mataupu i mafaufau ma loto o a latou fanau.—Kolose 3:20, 23.

13. Po ua faamamafaina mai faapefea e le Tusi o Faataoto o le Tusi Paia le manaʻomia ona faatonu tamaiti pe a latou faia ma le maumauaʻi le mea ua sese?

¹³ E i ai taimi e sili ona manaomia ai lenei mea ia  le na ona taʻu atu i le tamaitiiti le mea ua saʻo. Pe a ia faia moʻi ma le uigā le mea ua na iloa e sese, ona manaomia lea o le faiga sili ona malosi ia ʻōmia ifo ai le tāua o le mataupu i a te ia. Ua matauina mai ma le poto e le Tusi Paia: “Ua fusifusia le valea i le loto o le tama; a e faateaeseina ai ia te ia i le sasa e aoai aʻi.” (Faataoto 22:15) Ona o le le lelei atoatoa tuufaasolo ua fananau ai tamaiti ma le uiga ua mafuli atu e fai le mea ua leaga, ua faapea ona latou mananao ia faasaʻoina. O le a le faatuatuanaʻia e matua alolofa lenei mea. Pei ona fai mai le Faataoto 13:24: “O le ua tuuna lana sasa, ua ʻinoʻino o ia i lona atalii; a o le ua alofa ia te ia, ua saili le aʻoaʻiga mo ia.”

14. E faapefea ona avatu aʻoaʻiga i totonu o le aiga, ma o ā iʻuga lelei e maua ai?

¹⁴ O faatonuga e faia i le alofa ua iloa e aoga umi i le tamaitiiti. Ua le faia i le sasao tele aʻe o le ita, po o le eʻē leo tele i upu taufaamataʻu. Ua le o le auala faa-Kerisiano lea. (Efeso 4:31, 32) E tatau ona maumauaʻi ae ao ona lelei foi le mafaufau e pulea. E ao i matua ona tuu se faataʻitaʻiga lelei, ia le na ona faaemo mai sina amiotonu—e vave lava i tamaiti ona iloa atu i o lea mea—peitai ia fai ma le faamaoni, ma le alofa. Afai latou te fai faapea o le a fesoasoani tele i tamaiti latou te iloa lelei le aiga ua pulea e mataupu silisili amiotonu a le Atua, ae le na o se mea e avane ai po o ni lagona le tumau. O le a le fefefe le tupulaga i le faia o i latou ma e ua lavevea i faasalaga amioletonu. Ae, o le a latou faafesootaia le faasalaga ma le solia po o le lepetia o tulafono tonu o le amio lelei.

15. Pe ao ona faatatauina faapefea le aʻoaʻoina ai tamaiti faatatau i le Pepelo? Gaoi? Amioleaga faaulugalii? (e) Pe mafai faapefea e matua ona aʻoaʻo a la fanau ina ia faapea ona latou faia ai le mea ua saʻo a la fanau ina ia faapea ona latou faia ai le mea ua saʻo tusa lava pe latou te o ese mai o latou matua?

¹⁵ I mataupu silisili amiotonu mai le Tusi Paia e ono tatau i talanoaga loloto a le aiga, o mea ia e faia aʻe ai tulaga o amioga faaleatua. E manaomia ona aʻoaʻoina tamaiti, auā foi la lenei, ua faapea mai “e ua loto i le tala pepelo ma latou faia,” ua inosia lea e Ieova. (Faaaliga 22:15; Faataoto 6:16-19) O le gaoi foi i ona uiga eseese e ao ona ia vaaia o se solia lea  o le tulaga o le finagalo o le Atua. (Efeso 4:28; Roma 13:9, 10) E manaomia ona ia lapataia nei tagata talavou, i se auala o le a latou malamalama ai, faasaga i amioleaga faaulugalii ma soo se mea mata e taʻitaʻia ai i ai. (Efeso 5:5; Faataoto 5:3-14) Talanoa faatasi se aiga i ia faafitauli eseese e mapuna aʻe i aiga, i aoga ma taaloga. Filifili faatasi i Tusi Paia e faaalia ai le ituaiga amio e finagalo malie i ai le Atua. O le a faatatauina e tamaiti le Tusi Paia i o latou olaga i lenei auala. O le a fai o se puipuiga malu, tusa ai la, pe le i ai le fanau i o latou matua a o le faatonuga ua latou maua o le a faaauau pea ona taʻitaʻia ai i latou.—Faataoto 6:20-23.

16. (a) Po o le a fa le Tusi Paia i le mea e afāina ai i aumea leaga? (e) Pe mafai faapefea ona faaali e matua le poto e uiga i filifiliga o aumea a le fanau?

¹⁶ E manaomia foi ona mafaufauina ma le faaeteete ia tuuina atu i le filifilia o ʻaumea. E matua ōia loloto ai lava le olaga o le tagata i e masani. E iʻu lelei ʻaumea lelei, peitai “o le feoai ma e amio leaga e leaga ai amio lelei.” (1 Korinito 15:33) Ua faataʻitaʻia mai pea lava pea e le Tusi Paia lenei mea moni. (Kenese 34:1,2; Numera 25:1,2) Mata e le fiafia tamaiti i le loloto o lenei mea, ae ao i matua ona faapea. Ua faapea ona avea ai o se faamaoniga o le atamai i a i latou ona vaai ma le alofa i filifiliga o aumea a latou  fanau. O nei aumea, e aafia ai, e le na o i latou o taaalo i ai tamaiti, a o i latou o latou faitau, ma i latou o maimoa i tifaga ma televise.—Filipi 4:8.

17. Po o le a isi mea e fesoasoani ai i le faia o le olaga faaleaiga e loto malie moni ai?

¹⁷ Mo le olaga i le aiga ia matua lelei moni, e tele atu mea e manaomia i lo na o le alo ese i mea ua faatuputupu leaga. E ao foi ona ia olioli i le faia faatasi o mea lelei a se aiga. Ua leiloa le olioli moni o le olaga o le aiga pe a tau fai taitoatasi ma aga i lona lava ala, e aunoa, ma le manatu mo isi. Ae pe a i ai se talanoaga faaleaiga e tauatiina aʻe, pe a folasia faatasi fuafuaga ma taitoatasi ma galulue faatasi e faataunuuina ia mea, ona tosina faatasi lea le aiga i le ʻau faatasi. (Faataoto 15:22) Ua le faigata lenei mea pe a i ai le alofa i le aiga. Ma o le alofa o se mea e masani ai ona lotolotoi i totonu i a i latou o e iloa moni le Atua ma ua i ai lona agaga.—1 Ioane 4:7,8; Kalatia 5:22, 23.

FAATOAFILEMUINA O FAIGATA O AIGA

18. Pe mafai faapefea e le faatonuga i le Kolose 3:12-14 ona fesoasoani i a i tatou i le faatoafilemuina o ni faigata faaleaiga e mapuna aʻe?

¹⁸ E oo lava i aiga ua masani ona fiafia, e mapuna aʻe lava faigata i aso. Ua masani ona oo mai ia mea ona o le lē lelei atoatoa faaletagata, po ona o omiga o le lalolagi ua tatou mau ai. Po o le a e ao ona fai pe a tuputupu aʻe fetoaʻiga i va o tagata o le aiga? Ua le matua faigata ona maua le fofo pe afai tatou te manatua, e le lelei atoatoa tatou uma. Ua le na o fafo o le aiga, ae atoa foi ma totonu o le puiaiga ua faapea ona tatou manaomia ai ona faatatau i ai le aʻoaʻiga faagaeeina: “O lenei, ia oofu outou i le alofa mutimuti vale, ma le agalelei, ma le loto maulalo, ma le agamalu, ma le onosai. Ia fefaapalepaleaʻi, ma ia fefaamagaloaʻi outou, pe afai ua agaleagaina se tasi e se tasi. Faapei ona faamagalo mai Ieova ia te outou, ia faapea foi outou. A o le alofa, e lautua lea i nei mea uma, o le fusi lea e atoatoa ona lelei ai.”—Kolose 3:12-14, NW; tagai foi i le Faataoto 10:12; 19:11.

19. Pe a i ai se finauga i le va o le fanau, po o le a mata e fai e se tasi o matua o le a matuā aogā moni?

 ¹⁹ Pe a aliali mai se faalavelave o se mea ua iloga ona e faafaifaigata tele, e i ai laasaga e mafai ona uia e sauniunia ai le ala mo le faamagaloga ma le alofa. Mo se faataʻitaʻiga, pe a tupu aʻe se finauga i va o tamaiti, pe nofo ifo le tasi o matua faatasi ma i latou, ma faalogo i le faalavelave, ma faamalosia ia toe fefaafoifoiaʻi ma fefaamagaloaʻi o le mea e manaomia. I ia mea, e mafai ona toe faatepaina i le aoga lelei o mau pei o ia na faatoa sei faitauina.

20. Pe a tutupu aʻe ni faigata i le va o tane ma āvā, po o le a e lē fesoasoani ai i le faatoafilemuina o le mataupu, ae po o le a e mafai ai?

²⁰ Pe a i le va o le tane ma le āvā le faigata, ua mautinoa ona sili ona lelei ona le puaiina i luma o tamaiti. Pe o le a faalauaʻiteleina foi le tulaga i le faasalalau atu mea ua le malilie ai i uo ma e tuaoi. Ui ina po ua matua mafatia tele ai le tasi, e le faaleleia ai uiga i le tuu alaga. (Faataoto 29:22) Ma o le a faateleina le va pe a faatautūtū faauliulito e aunoa ma le toe fetautalatalaʻi o le tasi i le tasi mo ni aso. O le mea faa-Kerisiano e fai ia talanoaina faatasi le faalavelave, faatasi ma se faaiʻuga mautu ia toe faafoisia le filemu. Tusa po o le tasi e sese, ua sili ona faafaigofieina ai le leleiga ona o lou agalelei. Ae afai e te sese, ia e faatagi ma le loto faamaulalo mo le faamagaloga. Aua le fai mea tuu i ai; tagofia loa le faalavelave e aunoa ma le faatuatuai. “Aua nei goto le la o ita pea outou.”—Efeso 4:26; tagai foi i le Mataio 18:21-35.

21. (a) Po o talaga-faaipoipoga le auala e fōʻia ai faalavelave i faaipoipoga? (e) Po o le a fa le Tusi Paia i le pogai tasi mo le talaga-faaipoipoga e tuusaolotoina ai se tasi e toe faaipoipo?

²¹ Ui ina taatele le talaga-faaipoipoga i le lalolagi, ua le fautuaina e le Tusi Paia lea mea faapea o le auala lea e fōʻia ai faalavelave. O le faaipoipoga o se noataga mau lea e olaga atoa le umi, ma ia le manatu māmā i ai. (Roma 7:2) Ua faataga e le Afioga a le Atua na o le tasi pe lava le pogai e mafai ai e se Kerisiano ona faia se talaga-faaipoipoga e saoloto  mai ai o ia ia toe faaipoipoina. Po o le a lea mea? O le mulilua. I lenei mea e tuu lava i le o mamā ona filifili pe fai se talaga-faaipoipoga pe leai. (Mataio 5:32) Ui i ia mea, o gaoioiga o talaga-faaipoipoga e ao ona ia le faia ona o na o se masalosaloga; e ao lava ina o faamaoniga maʻoti.

22. Afai e vave vave se tasi e tatala le faaipoipoga a o lei iloa le tulafono a le Atua ma nonofo ma se isi, po o le a e ao ona ia fai pe afai ua ia manaʻo e auauna i a Ieova?

²² I aso ua mavae, a o lumanai ona aʻoaʻoina le finagalo tonu o le Atua e manaomia, pe vave vave isi tagata e tatala a latou faaipoipoga ma ua toe nonofo atu nei ma se isi. Po o le a le mea e mafai ona latou fai e uiga i ai? Latou te le mafai ona toe foi i tua ma ola ai o latou olaga. Peitai, afai latou te mananao ia i ai ni a latou vaega i le auaunaga a Ieova le Atua, ma ua fai ni o latou  taitoalua, e ao ona ia mautinoa a latou faaipoipoga o i ai nei e ao ona ia faamauina i le malo. E ao ona latou tatalo i le Atua ma talosagaina lana faamagaloga mo latou ala tuai o aso ua teʻa. Ona ao ai lea i a i latou ona galulue aʻiaʻi ia ola aʻe mai lenei taimi ma alu ai e tusa i le finagalo e manaomia o le Atua i faaipoipoga.

23. (a) Po o faamalosia e le Tusi Paia le nofo eseese mai se tasi lē talitonu o le ulugalii pe a tutupu faalavelave? (e) Pe faaleleia faapefea e le tagata talitonu le tulaga i le aiga, ma po o le a le iuga e mafai ona tupu?

²³ Po o le a pe afai e le fia suesue lau paaga ma oe i le Afioga a le Atua? Ma po o le a pe a e le mafai ona oulua talanoa faatasi i faalavelave i le faavae o mataupu silisili o le Tusi Paia? Ua faamalosia pea oe e le Tusi Paia e nonofo faatasi ma ia, ia le manatu o le faateteʻaeseina le auala faigofie e matala ai ou faalavelave. Fai le mea e mafaia e le tagata lava ia ia faaleleia ai le tulaga i lou aiga i lou faatatauina o mea ua fai mai ai le Tusi Paia e uiga i au lava amio. I se taimi, ona o lau lava amio faa-Kerisiano ua mafai ai ona e mālō i lau paaga. (1 Korinito 7:10-16; 1 Peteru 3:1, 2) Ma pagā se faamanuiaga o le a fai mou pe afai o le a tauia mai lou onosai alofa i lenei ala?

24. I le aotelega, pe te mafai faapefea ona ati aʻe se olaga faaleaiga fiafia?

 ²⁴ E tele lava mea e mafai ona faia i aiga taitasi uma ia atiina aʻe ai se olaga faaleaiga sili ona fiafia. Faaaoga ma faatatau fautuaga a le Tusi Paia o le a maua ai uiga lelei! Sei taitoatasi o le au aiga ona saili ma le alofa mea e lelei ai le isi, e faapea ona faamalosia ai noataga o le aiga. (Kolose 3:14) A ia laualuga i mea uma ia ʻau ai faatasi i le tapuaiga moni, ina ia faapea ona olioli faatasi ai outou uma i le faamanuiaga ʻoa tele a Ieova le Atua, o Le mafai ona faapaleina lou fiafia i le ola faavavau.—Faataoto 3:11-18.

[Fesili mo le Suʻesuʻega]

[Ata i le itulau 175]

O tauaofiaga e le aunoa o suʻesuʻega o le Tusi Paia e ao ona o se vaega o le ala o le ola i aiga taitasi