Mataupu 17

Faapefea ona Tatalo ma Faafofogaina ai e le Atua

1. Po o le a fa le Salamo 65:2 e uiga i le Atua, ma po o ai e o mai i a te ia ma le mautinoa e faafofogaina i latou?

UA TAUTALA le Tusi Paia i a Ieova le Atua: “Le faafofoga tatalo e, e o atu ia te oe tagata uma lava.” (Salamo 65:2) Ioe, e faafofoga le Atua i tatalo. Ma o tagata i le lalolagi uma o e alolofa i le upu moni, o e naunau e fai lona finagalo, ma o e o atu i a te ia i le ala ua ia faamaonia, e mafai ona olioli i lenei faaeaga tāua. (Galuega 10:34,35) O le moni lava, paga se faaeaga ofoofogia o le mafai ona tautala i le Tupu mamalu o le vateatea uma ma iloa e faafofoga mai i a te oe!—Salamo 8:1,3,4; Isaia 45:22.

2. (a) Uiga i le tatalo, po o le a le folafolaga ua aumai e le Tusi Paia o i le Filipi 4:6, 7? (e) Pe ai se a ua lagona faalemautinoa ai isi e uiga i le tatalo?

² Ua folafola mai ma le faamalosi e lana Afioga tusia: “Aua nei popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.” (Filipi 4:6,7) Ui i lea, ua le mautinoa le faalogona faaletagata lava e uiga i le mataupu o le tatalo aua o le tele o a latou tatalo pei ua lē talia mai. Pe ai se a lenei mea? E tāua mo i tatou ona iloa. Ua faamaninoina mai e le Atua i lana Afioga lona finagalo faatatau i le tatalo.

O LE ALA E FAALATALATA ATU AI I LE ATUA I LE TATALO

3. Po o ai e ao ona faasaga i ai a tatou tatalo uma, ma pe ai se a?

³ Ua taʻu mai e le Tusi Paia i a i tatou, “auā e tatau i lē alu atu i le Atua ona talitonu o loo soifua o ia, o ia foi na te tauia mai o e matua saili ia te ia.” (Eperu 11:6) Matau mai le mea ua fai mai ai lenei mau tatou te ‘ō atu i le Atua.’ Pei ona finagalo Ieova le Atua soifua moni ia tatou tatalo atu i a te ia, ae le o se tasi ese. O le tatalo o se vaega o la tatou ifoga ma ona o lenei mafuaaga e ao ai ona faasino tonu tatalo tau o Lē na faia mea, o Ieova. (Mataio 4:10) Sa aʻoaʻo e Iesu Keriso ona tagata ia tatalo i lona “Tamā i le lagi.” (Mataio 6:9) Sa lei aʻoaʻo i latou e Iesu ia tatalo atu i a te ia lava, po o lona tinā o Maria, po o i soo se isi tagata. O Ieova e ou le malosi, e ou le poto, e amiotonu atoatoa ma e alofa. O lea, pe ai se a tatou te o ai i soo se tagata e itiiti ifo? E le na o lea, ua faamaonia mai e le aposetolo o Paulo i a i tatou faapea o le Atua “e le mamao o ia ma i tatou taitoatasi,” pe afai tatou te sailia o ia i le auala saʻo.—Galuega 17:27.

4. Mo a tatou tatalo ia talia e le Atua, po o le suafa o ai e ao ona tatalo atu i ai? Ai se a?

⁴ Peitai, a nei e te fai mai, “Pe mafai faapefea e i tatou, o mea-fai-ola lē lelei atoatoa ua tuufaasoloina i ai le agasala, ona tatalo i le Atua o Lē lelei atoatoa ma amiotonu?” Ua mafaufauina ma le alofa lava e Ieova lenei mea ma aumaia ai se “fesoasoani” e felataʻi ma i tatou i le lagi. O lea fesoasoani o “Iesu Keriso lea o lē amiotonu.” (1 Ioane 2:1, 2) Na ia foaiina atu lona soifua e fai ma togiola mo le fanau a tagata. E le gata i lea, ua tofia foi e Ieova o ia o lana Ositaulaga Sili. Ua finagalo Ieova ia tatou iloa lelei le tulaga o lona Alo i Lana fuafuaga ma ia tatalo uma atu a tatou talosaga i lona suafa. O le pogai lea na fetalai atu ai Iesu i ona tagata: “E le alu atu lava se tasi i le Tamā, pe a le ui mai ia te aʻu.” (Ioane 14:6) Na fetalai foi Iesu: “O mea uma tou te ole atu ai i le Tamā i loʻu igoa, e foai mai e ia ia te outou.” (Ioane 16:23) O a tatou tatalo la e talia e le  Atua, e tatau ona tatou tatalo i a Ieova le Atua e ala i lona Alo, o lona uiga, i le suafa o Iesu.

TATALO E MALIE I LE ATUA

5. (a) I le vaai atu i le mea o fai mai ai le 1 Peteru 3:12, pe ao faapefea ona taumafai ma le faamaoni ia ola aʻe o tatou olaga pe afai ia faafofogaina mai e le Atua? (e) Po o ai e le tatau ona faamoemoe faapea o le a tali mai le Atua i ana tatalo mo le fesoasoani?

⁵ Ua tatou faitau i le 1 Peteru 3:12, NW: “Aua o fofoga o Ieova o loo fesagai i e amiotonu, e liliu mai foi ona taliga i a latou faatoga.” O lea, a fiafia le Atua i a tatou tatalo, e tatau ona tatou faamaoni ia taumafai ona ola aʻe o tatou olaga ia tala feagai lelei ma mataupu silisili o le Afioga a le Atua. Afai e teea e se tasi le Afioga a le Atua ma lona finagalo e ao ona ia le manatu e talia mai e le Atua ana talosaga mo se fesoasoani i taimi faigata. (Faataoto 15:29; 28:9) Mo se faaaʻoaʻoga, i a i latou o e le faaaloalo i le paia o le ola, ua tulei le Atua: “E ui lava ina outou faateleina tatalo; ou te le faalogo ai lava; ua tutumu o outou lima i le toto.” (Isaia 1:15) I lenei “taimi o le iʻuga” ona ua sili ona faateleina pea le sauā, amioleaga, lē faamaoni, ifoga sese ma isi amioga sese ua sili ona taatele, ua manaomia moʻi ai ona tatou mafaufau loloto i le auala ua tatou ola ai i o tatou olaga i aso taitasi pe afai tatou te mananao ia faafofogaina mai a tatou tatalo e le Atua.—1 Ioane 3:21, 22.

6. (a) E tusa i faatonuga a Iesu, po o le a le mea e ao ona mafaufauina muamua i a tatou tatalo? (e) Pe na faaalia faapefea e Iesu faapea o a tatou tatalo e ao ona ia le faia mo na o i tatou lava? E ao la ona tatou tatalo foi mo o ai?

⁶ O le mea o tatou tatalo i ai e tele foi mea e fai i ai i le mafaufauina pe o le a talia mai e le Atua a tatou tatalo. Na tuu atu e Iesu se tatalo faaaʻoaʻo e taʻitaʻia ai i latou i le ituaiga tatalo e talia e le Atua. (Mataio 6:9-13) Ua faaali mai i lenei tatalo le suafa o le Atua ma fuafuaga e ao ina avea ma o tatou uluai mafaufauga. O le isi mea, pe tatou te tagi atu mo tatou manaoga faaletino, mo le faamagaloga atoa, ma mo le laveaiina mai tofotofoga ma lē ua leaga. Matau, foi, ua aʻoaʻo i tatou e Iesu ia tatalo “lo matou Tamā e,” ia “foai mai ia te i matou i le aso nei a  matou mea e ʻai” ma “ia e faamagalo ia te i matou.” Ua faaalia i lenei mea, pe a tatalo, e ao ona ia le manatu le tagata tau o ia lava, po o ona lava faalavelave ma mea e manaomia. Ia le faapeaina, ae ao ona faalauaitele atu ma le lē manatu faapito lana tatalo ia aofia ai ma isi. E o ona tatou tauaofia, e le na o lou lava aiga ma ou aiga, a o isi foi o e o saili ia faafiafia le Atua, ma, ae maise lava i latou o feagai ma tofotofoga ma faigata i a latou auaunaga i le Atua.—Iakopo 5:16; Efeso 6:18-20.

7. (a) Po o le a le mafuaaga aupito sili ua faapogai ai ona tele tatalo ua le talia? (e) Ina ia talia tatalo, po o le a e ao ona tatou muai fai?

⁷ Ua tusi mai le aposetolo o Ioane: “O lenei foi le faamalosi ua tatou maua i ona luma, pe afai tatou te ole atu ai se mea e tusa ma lona finagalo, e faafofoga mai o ia ia te i tatou.” (1 Ioane 5:14) Ioe, o vaega taitasi o le olaga Kerisiano o se mataupu tonu mo talosaga. Peitai o le mea tāua o le mea ua ia faatoga ai ia tala feagai ma le finagalo o le Atua. O se mafuaaga aupito sili lea ua faapogai ai ona le talia le tele o tatalo. Ua le muamua ona taumafai le tagata e saili ia maua muamua le finagalo o le Atua. (Faataoto 3:5-7) O lea ia sili atu i lo le mafaufau i le mea ua tatou mananao i ai e fai pe ia maua, ma tatalo ai i le Atua e uiga i ai, po ua le sili ona tusa ona sailia muamua ia iloa le mea ua finagalo ai le Atua i a i tatou, po o le a lona finagalo mo i tatou, ona faia aʻe ai lea ma le tusa a tatou tatalo?—Iakopo 4:3, 13-15.

8. (a) Mafai faapefea ona tatou malamalama i le finagalo o le Atua? (e) Po o le a aumaia moni e le Atua le atamai e taʻitaʻia ai lo tatou ala i le ola?

⁸ I la tatou suesuea o le Afioga a le Atua atoa ma mea ua tatou oo i ai i le auauna atu i a te ia i le au au faatasi ma isi Kerisiano moni ua mafai ai ona tatou malamalama i lona finagalo. (Roma 12:2) Sa tatalo le fai Salamo: “Ia e aʻoaʻo mai ia te aʻu, ona ou anaana lea i lau tulafono, ma ou tausia ma loʻu loto atoa. Ia e taʻitaʻiina atu aʻu i le ala o au poloaiga; aua ou te fiafia lava i ai. Ia e faauai atu loʻu loto i au tulafono, a e aua nei i le matapeʻapeʻa.” (Salamo 119:34-36) Afai tatou te tatalo i le Atua ma le faatuatua, o le a ia foaiina mai i a i tatou le atamai tatou  te manaomia e faafetaiaia ai faalavelave o le olaga. (Iakopo 1:5-8) O le a ia fesoasoani mai i a i tatou ia iloa ma fai mea o le a viia ai lona lava suafa sili, ma o le a iʻu atu foi lenei mea i lo tatou lava fiafiaga.—Salamo 84:11, 12.

O LE UIGA SAʻO O TALOSAGA

9. (a) Pe a tatou tatalo, pe manaʻomia soo se tulaga iloga? (e) Po o le a na faaali e Iesu e uiga i tatalo a le tagata lava ia? (i) Po o le a le ituaiga tatalo na fetuuina e Iesu?

⁹ Pe finagalo le Atua ia tatou fai atu i se tulaga iloga pe a tatalo, pe tatou te o i se fale faapito e tatalo ai? Ua faaali mai e lana Afioga e le faapea lona finagalo. (Neemia 8:6; Tanielu 6:10; Mareko 11:25; Ioane 11:41) Na faasinoina mai e Iesu e lelei ona faia i le mea tuufua gaogao tau o oe le tatalo a le tagata lava ia, alu i le potu o le tagata ia e tatalo ai. Mataio 6:6) Ma e ui ina sa tatalo lava Iesu ia i isi aso i nofoaga o le lautele, sa ia fetuuina malosi lava ona tatalo i luma o isi tau ina ia vaaia ma iloa ai ma faaalialia ai le “paia” o se tasi. Na faaalia foi e le finagalo le Atua i le tāutu i upu lava e tasi i tatalo. (Mataio 6:5, 7, 8) Pe ai se a lenei mea?

10. (a) Faamatala pe ai se a e ao ai ona le faitauina atu ai a tatou tatalo mai se tusi? (e) Po o le a ituaiga gagana e ao ona tatou faaaoga pe a tatou tatalo?

¹⁰ Auā foi o le mea e tāua moni i le Atua o le mea lea o i o tatou loto. “Aua o fofoga o Ieova e fetaufetuliaʻi i le lalolagi uma, na te fesoasoani ia te i latou o e ua sao o latou loto ia te ia.” (2 Nofoaiga a Tupu 16:9) Pe mafai faapefea la ona faaalia i a tatou tatalo mea ua i o tatou loto, pe afai e na ona faitau aʻe mai se tusi tatalo? O lea, pe a tatou tatalo, e ao ona tatou faia faapea mai le loto, faatasi ma le loto maulalo. “E tetee atu le Atua i e faamaualuga, a e foai mai le alofa tunoa i e faamaulalo.” (Iakopo 4:6) E leai se tāua o a tatou tatalo i le faaaogaina o gagana e le masani ai pe maotua. Ae ao ona tatou tautala i le Atua pei ona tatou tautala i se uo mamae ma le faatuatuaina ma pei o se atalii i lona tamā. O a tatou tatalo e mafai lava ona lē leoa, ae tatalo i o tatou loto. (1 Samuelu 1:12, 13) I isi aso pe tatou te le maua upu saʻo e faaalia ai o tatou manatu i le Atua. Peitai tatou te mafai ona mautinoa ua silafia  e le Atua o tatou manaoga ma o le a malamalama lava i a tatou tatalo faigofie.

TALISAPAIA O LE FAAEAGA O LE TATALO

11. (a) Pe ao ona tatou faatali seia ua tatou manaʻomia se fesoasoani faapito a o lei tatalo atu i le Atua? (e) Pe ai se a ua fetaui lelei ai ona tatalo i le taimi o mea taumafa?

¹¹ Ua tatou oo uma lava i vaitaimi o tatou olaga ua le auvaa ai se fesoasoani faaletagata po ua le lava foi le fesoasoani ua ofo mai e tagata mo tatou manaoga. Ona na o le Atua e toatasi lava la e tatau ona tatou liliu atu i ai. Ui ia mea, afai tatou te alolofa i a Ieova ma talisapaia le faaeaga o le tatalo, o le a mautinoa ona tatou le faatali mo ia sauniga e tautala ai i a te ia. Ae o le a tatou faalatalata atu i a te ia e le aunoa, ma le lē utuva, faatasi ma faaaliga o le faafetai ma viiga, atoa foi ma tatou faatoga ma talosaga. (Efeso 6:18; 1 Tesalonia 5:17, 18) E tele aoga o tatalo i se aiga, e oo lava i sina faaaliga o le faafetai i le Atua i taimi o mea taumafa, faaaʻoaʻo i le faaaʻoaʻoga a Iesu.—Mataio 14:19.

12. Taʻu mai ni aogā ofoofogia o tatalo.

¹² Ma le moni lava, e aumaia e tatalo lē leoa, tatalo i aiga ma tatalo faale faapotopotoga aogā ofoofogia a tele. Ua faaalia e le tatalo se iloa lelei o lo tatou matua faalagolago atoatoa i le Atua mo mea uma. E tosina atu ai faatasi i le mafutaga o le ʻau tapuai. E aumaia ai i luga o i tatou uma le filemu o Lē na faia mea ma le alofa. E amata ai le tafe mai o le agaga o le Atua i o tatou ola. E fesoasoani ai i a i tatou ia mautinoa uiga o le lumanai. O se meaalofa mai le Atua ma o ia e ao ona tatou talisapaia ma faaaogā.

[Fesili mo le Suʻesuʻega]