Mataupu 21

Lau Filifiliga Ia Auauna i le Atua

1. Po o a mafuaaga ia tatou faafetaia ai ma vivii i a Ieova le Atua?

UA FAAPEA ona tele mea tatou te faafetai ma vivii ai i a Ieova le Atua. Ua ia faia ma le alofa tunoa sauniuniga mo i tatou ia olioli ai i le ola faavavau. Ua maeʻa ona ia fuafuaina ia soloia āuga e oti ai o le agasala, i le saunia lea o lona lava Alo e fai ma taulaga togiola. O le fuafuaga foi a le Atua ia faia ia olioli lana fanau faalelalolagi i se aiga parataiso ua toe o se aga ona iloaina lea! Po ua le faapogai ai i lenei sauniuniga alofa a le Atua ona tumu ma solo i tua lou loto ua osofia i le faafetai i a te Ia?—Ioane 3:16; 1 Ioane 4:9-11.

2. (a) I le faavae o le mea ua e iloa nei, po o le a lou uiga faatatau i a Ieova? (e) Afai tatou te alolofa moni i a Ieova, po o le ā o le a na faagaeeina atu i tatou e fai?

² E moni, ua leai se tasi o i tatou e iloaina mea taitasi uma e uiga i a Ieova ma ona ala. Ua matua faapea ona silisili o Ia e aʻoaʻoina mai ai pea e tagata mea fou e uiga i a te ia. (Roma 11:33) Peitai i le faavae o mea ua uma ona e iloa, pe te le talia ma le fiafia ea mea taitasi uma ua ia faia e tonu, ma o loo ua faapea ona i ai pogai ma mafuaaga uma e tuu atoa atu ai le faatuatua i a te ia? Pe te lei talitonu maumauaʻi ea e alofa moni ia i ana galuega fai-ola, ma ua faapea ona alofa mutimutivale ma alofa tunoa, i le ma lea foi, e lelei atoatoa i le amiotonu ma le atamai? (Salamo 86:5, 10, 15) Afai o lou lagona lenei e uiga i a Ieova le Atua, o le a uʻunaia oe e auauna i a te Ia, ma o le a leai lava se mea e taofia mai oe.

3. (a) Po o a auala e lua ua tatalaina i tagata uma? (e) Po o le a le filifiliga o le a taʻitaʻia i le fiafiaga aupito sili ona tele?

³ E lua auala ua tatalaina i le fanau uma a tagata. O le tasi ala e taʻitaʻia ai i le oti ma, o le isi e taʻitaʻia ai i le ola faavavau. (Teuteronome 30:19, 20) Po o le fea o le a e ui ai? O le faia o lau filifiliga ia auauna i a Ieova o le a taʻitaʻia ai oe i lou fiafiaga aupito sili nei ma e faavavau. Pei ona fai mai le fai salamo: “Amuia le tagata o lē mataʻu ia Ieova, o loo o fiafia tele i ana poloaiga.”—Salamo 112:1.

TUUINA ATU MA LE PAPATISOGA

4. Pe a iʻu i se tagata ua ia manaʻo moni lava e faia le finagalo o le Atua, po o le a ua tala feagai lelei ona ia fai?

⁴ Pe a faagaoioia oe e le alofa mo le Atua e te manao ai e fai lona finagalo ona tatau ai lea i a te oe ona e alu atu i a te ia i le tatalo e ala i a Iesu Keriso ma faaali i ai ou manaoga ia avea oe o se tasi o ana auauna, e savali i tulaga aao o lona Alo. Ua tala feagai ai foi ona e taʻu i a Ieova e te manao ia avea oe mo ia ma ua e fia faia lona finagalo nei ma taimi uma lava o sau. (Salamo 104:33) I lenei auala ua e tuuina atu ai oe e oe lava i le Atua. O le mea lenei o se mea tau le tagata lava ia. E leai se isi ese e mafai ona ia faia mo oe.

5. (a) Pe a mavae ona faia lou tuuina atu i le Atua, po o le a ua ia finagalo ai i a te oe ia fai? (e) Po o le a le fesoasoani ua avanoa atu i a te oe i lou ola aʻe i lau tuuina atu?

⁵ A maeʻa ona e faia o lau taʻutinoga i a Ieova e fai lona finagalo, o le a silasila mai lava e te tausia lea mea. E le se mataupu māmā lenei mea. Ia faamaonia o oe o se tagata e tausi i au upu i le tausisi atu ma le faamaoni i lenei filifiliga po o le tuuina atu i aso uma lava a o e ola. (Salamo 50:14) O le a faaaoga e le Tiapolo auala uma e mafai ia e lepetia ai lou faatuatua i a Ieova. Peitai o le a faatasi lava Ieova ia ma oe. E te mafai ona e liliu atu i a te ia i le tatalo ma o le a ia lagolagoina lava oe. E le gata i lea, pei ona ua aʻoaʻoina ai oe, ua i ai se faalapotopotoga iinei i le lalolagi, ma o le a e maua ai iinei Kerisiano taʻumatuaina o e o le a lagolago ma faamalosia oe ma le alofa ma le fiafia.—1 Peteru 5:8, 9; 3:12; 1 Tesalonia 5:11.

6. Pe ai se a na alu ai Iesu i a Ioane le Papatiso i le Vaitafe o Ioritana, ma po o le a ua tatou aʻoaʻoina ai mai lenei mea?

 ⁶ O le filifilia faaletagata e auauna i a Ieova ma faaalia lenei faaiʻuga i le tatalo e tāua lava. Peitai e i ai se mea e sili atu. Sa faaalia lenei mea e Iesu Keriso, o le na ia saunia se fua mo i tatou ia mulimuli ai. Manatua, sa faia e Iesu e sili atu i lo na ona taʻu i lona Tamā, na ia afio mai e fai Lona finagalo. (Eperu 10:7) Ina ua ia amata lana auaunaga o se tagata talaʻi o le malo o le Atua sa ia maliu atu loa i a Ioane le Papatiso, i le Vaitafe o Ioritana, ma na papatisoina ai i le vai.—Mataio 3:13, 15.

7. (a) Po ua faaalia mai faapefea e le Tusi Paia ua faamaonia e le Atua le papatisoga o Iesu? (e) Pe ai se a ua le mo tamaiti le papatisoga na faatonuina e Iesu?

⁷ Ua faaalia e le Tusi Paia na faamaonia e Ieova le Atua le papatisoga o Iesu. Ua faapea mai, i lea sauniga tāua, “ona faaavanoaina ai lea o le lagi, ona afio ifo lea o le Agaga Paia i ona luga, ua tino mai e peiseai se lupe, ua oo mai foi le siufofoga mai le lagi, ua faapea mai, O loʻu Atalii pele oe, ua ou fiafia lava ia te oe.” (Luka 3:21, 22) Talu ai ona ua tuu e Iesu le fua, ua ao ai i Kerisiano tuuina atu o aso nei ona papatisoina. O le mea moni, na faatonu e Iesu ona tagata ia fai ma soo tagata uma o atunuu ma ia papatisoina nei soo fou. E leai la se papatisoga o pepe i lenei faiga. O le papatisoga o tagata ua avea ma e talitonu, ua iʻu i o latou mafaufau ia auauna i a Ieova.—Mataio 28:19; Galuega 8:12.

8. Faamatala le uiga o le papatisoga faa-Kerisiano.

⁸ Po o le a la ua faailogaina i le papatisoga faa-Kerisiano? E le o le fufulueseina o agasala a se tagata, aua o le faamamaina mai le agasala e ala tasi mai lea i le faatuatua i a Iesu Keriso. (Efeso 1:7) O lea la, o se faaalialia i luma o tagata a lautele, o le faamaonia o lea tagata ua faia se tuuina atu mamalu i a Ieova le Atua, ma ua tuulimaina atu o ia e ia lava e fai Lona finagalo. O lea ua faapea ai ona le vaai i le papatisoga e itiiti le taua. O se mea lea e manaomia mo tagata uma o e savavali ma le usiusitaʻi i tulaga aao o Iesu Keriso.

9. (a) I le vaai atu i le auala na papatisoina ai Iesu, po ua faataunuuina faapefea le papatisoga saʻo faa-Kerisiano. (e) Afai ua e manaʻo ia papatisoina oe po o ai i le faapotopotoga e ao ona faailoaina i ai lenei mea?

 ⁹ Fai mai le Tusi Paia ina ua mavae lona papatisoga, ona “ēa aʻe lea nai le vai,” o Iesu. Sa matua i totonu lava i le vai na faapea ona mafai ai e Ioane ona faatofuina atoatoa lelei lava o ia. (Mataio 3:16, NW; Ioane 3:23) O lea, sa le o se mea tau ina sausauina ai i le suavai. O le papatisoga faa-Kerisiano saʻo la ia faataunuuina i le matua faatofuina atoatoa o le tagata i le vai ma toe faatu aʻe o ia i luga e se auauna faamaoni a le Atua—o se tane, pei o Ioane le Papatiso. Afai ua iu i lou mafaufau e te auauna i a Ieova ma e manao ia papatisoina oe, ona faaali lea o lenei mea i le auauna tausi mea o le faapotopotoga o molimau a Ieova o outou ʻau ʻau faatasi. O le a ia fesoasoani ma le fiafia i a te oe e aunoa ma se totogi mo le papatisoga.

O LE AUAUNAGA FAAKERISIANO

10. (a) Po o le a uiga o Iesu e ao i se Kerisiano ona maua? (e) A o i ai Iesu i le lalolagi, po o le a le finagalo o le Atua mo ia?

¹⁰ E moni lava, e le o le iʻuga o le faia e se tasi o le finagalo o le Atua le tuuina atu ma le papatisoga. Ua na o le amataga lena. Ua faailogaina ai e ia mea le amataga o se olaga fiafia o le auauna i a Ieova, atoa ma le vaai atu i luma i le ola ai pea e faavavau, o faia lona finagalo. E ao i Kerisiano tuuina atu taitoatasi uma ona i ai pea lea uiga o Iesu Keriso, o le na fetalai ane: “O laʻu mea e ʻai, ia ou faia le finagalo o le na auina mai aʻu, ma faaiu lana galuega.” (Ioane 4:34) O se vaega sili o le galuega a le Atua mo Iesu i le lalolagi ia talaʻia le Malo o le Atua ma na ia tuu le faavae mo se faalapotopotoga talaʻi e tauaveina pea lenei gaoioiga pe a mavae lona maliu. O le finagalo lena o le Atua mo ia, ma sa faia ma le faamaoni lava e Iesu lea galuega.—Luka 4:43; Ioane 17:4.

11. (a) E tusa i fetalaiga a Iesu ua i le Mataio 24:14, po o le a le finagalo o le Atua mo Kerisiano i aso nei? (e) Pe ai se a ua faataalise ai lenei galuega?

¹¹ Po o le a le finagalo o le Atua mo Kerisiano i  aso nei? E mo i latou ona ia faia lea galuega talaʻi lava e tasi, ma o le galuega ua matua luluti tele i ai le talo. Ua faaalia e le valoaga o le Tusi Paia ma le lē masese o loo ua tatou ola nei i le vaitaimi “o le iʻuga o le faiga o mea.” Ma sa muai fetalai Iesu faatatau i lenei taimi: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:3, 14) O le finagalo la o le Atua ia faia nei lenei galuega talaʻi. E tatau ona faailoina le lapataiga faatatau i le iʻuga o lenei faiga amioleaga. E manaomia e ē agamalu ona faaalia i ai le mea e saogalemu ai. Pe o le a e ʻau ai i lenei galuega?—Sefanaia 2:2, 3; Faataoto 24:11, 12.

12. (a) Pe faapefea ona faia le galuega talaʻi? (e) Po o le faatonuga a Iesu ia “fai ma soo” e faatatau i Kerisiano uma?

¹² Na faatu e Iesu Keriso le faaaʻoaʻo o le faia o le auaunaga. Sa ia talaʻi i mea uma lava, i aai ma nuu, i aiga ma nofoaga faitele-e oo foi i se fafine i tafatafa o se vaieli. (Ioane 4:7, 21-24) O le a mulimuli atu lava se Kerisiano moni i le faaaʻoaʻoga a Iesu. O le a ia talaʻi i avanoa uma. O le a ia le na ona faatalitali mo tagata ia o mai i a te ia, ae o le a ia taumafai e saili atu tagata e taliga fia faalogo. Na faatonu e Iesu: “O lenei, ia outou o atu e fai nuu uma lava ma soo.” (Mataio 28:19; tagai foi i le Mataio 10:11-13.) E faatatau lava lenei faatonuga i Kerisiano uma—leipa ma āvā i aiga, tagata matutua ma le ʻau talavou—pei lava foi ona sa faia ai i le uluai senituri.—Galuega 4:13; Roma 16:1.

13. Po o fea ia tele ai ona faia le galuega talaʻi?

¹³ Sa mulimuli uluai Kerisiano i le faatonuga ma le faaaʻoaʻoga a Iesu, i le faia o se taumafaiga faapito ia oo atu i tagata i o latou aiga. (Luka 8:1; 10:1-6; Galuega 5:42) Fai mai le aposetolo o Paulo: “Ma loʻu lei natia se mea aoga, ina neʻi le faailoa atu ma aʻoaʻo atu ia te outou i luma o le nuu, atoa foi ma lea fale ma lea fale.” (Galuega 20:20) O le ala sili lava lenei e tauaveina ai pea e Kerisiano moni le latou auaunaga i o tatou aso.

14. Po ua fesoasoani mai faapefea le Atua i le auaunaga?

¹⁴ O i latou o ʻau ai i lenei galuega tele latou te le  faia faapea i o latou lava malosi. E lagolagoina i latou e Ieova le Atua. Ua ia taʻuagavaaina ma faamalosia i latou mo le auaunaga e lona agaga. (2 Korinito 3:5, 6; 2 Timoteo 4:17) Ua ia saunia foi le aʻotauina ma le lagolagoina e auala mai i lana faalapotopotoga vaaia, e le faatauina i tupe, mo ana molimau uma. E mafai foi ona e olioli ai i aoga o lenei sauniuniga i lo outou lava Potu o le Malo.

15. Pe a filifilia e le tagata lava ia ia auauna i le Atua, po o a faamanuiaga ʻoa ua teuina mo ia?

¹⁵ Pe a iʻu i lau filifiliga ma lou loto atoa ia e auauna i a Ieova le Atua, o le a e oo i faamanuiaga ʻoa tele. O le fiafia e te maua i le aʻoaʻoina o le upu moni e uiga i a Ieova ma lana fuafuaga, o le a matua faateleina a o e ʻau ai faatasi ma isi ma vaaia ai suiga lelei e aumai i o latou olaga. (Galuega 20:35; Ioane 13:17) A o outou faatatauina atu ma le sili atoatoa le Afioga a le Atua i o outou olaga, o le a tosina atu ai outou ia sili ona lata atu i Lē na faia outou. O le a outou olioli ai i lana tausiga alofa i ala e te lei faapea ona e oo i ai muamua. (Faaaliga 7:9-17) E moni lava, o le a olioli le finagalo o le Atua i lou ala ua tonu ma le poto. (Faataoto 27:11) Ma paga le olioli o le a fai mo oe a o e oo atu i ai i le faataunuuga o upu a le fai salamo: “Amuia le nuu e fai Ieova mo latou Atua.”—Salamo 144:15.

[Fesili mo le Suʻesuʻega]