O Aso Mulimuli o Lenei Faiga Amioleaga o Mea
Mataupu 11
O Aso Mulimuli o Lenei Faiga Amioleaga o Mea
1. Po o ana fea na amata ai “aso e gata ai,” ma po o le a le mea e tupu o le a iʻu ai?
UA TAUTALA le Tusi Paia i le taimi o loo tatou ola ai o “aso mulimuli” po o “taimi o le iʻuga.” (2 Timoteo 3:1, NW; Tanielu 11:40, NW) Ua faaalia e mea moni o le vaitaimi faamutaina lenei e i ai se amataga moni ma se iʻuga moni. Na amataina i le 1914 ina ua faanofoina Iesu Keriso fai ma tupu i lagi. O le a faaiʻuina lea mea pe a faaumatia e le Atua lenei faiga amioleaga o mea. Paga se mapusaga o le a i ai pe a mavae uma faalapotopotoga ma tagata lē faamaoni ma le faasauā, atoa ma i latou uma o ē faalavelaveina ai le saogalemu o latou uso tagata.
2. Po o le a fa a Iesu i le Mataio 24:34, o ona “po o le iʻuga” e uma a fea?
2 Po ua taulata mai faapefea lea mea? Ua aumaia e le Alo lava o le Atua, o Iesu Keriso, le tali. Ina ua mavae ona faatepaina i le tele o mea ua faailoga ai le vaitaimi i le sau mai le 1914, o le “taimi o le iʻuga,” na fetalai Iesu: “E le mavae atu lava lenei tupulaga, seia oo mai nei mea uma.” (Mataio 24:34) Po o le fea tupulaga na ia faauiga i ai?
3. (a) Po o le fea tupulaga na fetalai ai Iesu e le mavae a o luma ona oo mai le iʻuga? (e) O lea pe mafai faapefea ona tatou iloa ua tatou lata tele i le iʻuga o lenei faiga amioleaga?
3 Sa na ona faasino e Iesu i tagata latou te “vaaia ia mea uma.” O “ia mea uma” o mea tutupu na oo mai talu mai le 1914 ma o ia mea e tutupu mai i le iʻuga o lenei faiga amioleaga. (Mataio 24:33, NW) E oo lava i tagata na fananau ua lima sefulu tausaga talu ai latou te le vaaia “ia mea uma.” Latou te oo atu i le vaaia o ia mea ina ua mavae ona faasolo mai ia mea tutupu na muai taʻuina mai. Peitai o loo i ai pea tagata o ola na ola i le 1914 ma na vaai i mea na tutupu i na aso atoa foi ma ē lava le matutua latou te manatua pea na mea tutupu. Ua oo atu ina uma nei tausaga o lenei tupulaga. O se motu o tagata e toatele i latou ua uma ona mavae ese atu nei i latou i le oti. Ae na fetalai tino lava Iesu: “E le mavae atu lava lenei tupulaga, seia oo mai ia mea uma.” O le a ola pea nisi o i latou e vaaia le iʻuga o lenei faiga o mea. O le uiga o lenei mea ua na o se taimi puupuu o totoe a o lumanai ona oo mai le iʻuga! (Salamo 90:10) O lea o nei lava le taimi ia gaoioi ai loa pe afai e te le manao ia tafiesea oe faatasi ma lenei faiga amioleaga.
AI SE A SE “TAIMI O LE IʻUGA”
4. (a) Pe ai se a ua mafai ona tatou fiafia ai na lei faaleagaina loa e le Atua i latou o e sa lei auauna i a te ia ina ua afio lona malo i le mana i le 1914? (e) Pe fesoasoani faapefea le Tusi Paia i le 2 Peteru 3:9, i a i tatou ia vaai ma le saʻo i lenei mea?
4 Ui ina afio le Malo i le mana i le 1914, sa lei faaleagaina loa e Ieova ē na le auauna i a te ia. Pagā lo tatou fiafia e mafai ona maua i lea mea! Aua o le faapalepale o le Atua ua mafai ai e i tatou le avanoa e tutu ai ma le lē faagaeetia mo lona malo, ma faapea ona sosola ese ai mai le faaumatiaga. Ua fesoasoani mai le Tusi Paia i a i tatou i le vaai i lenei mea i le malamalama saʻo, i le faapea mai: “E le faatuai mai le Alii i le mea na folafolaina mai, faapei o le manatu a isi tagata i le faatuai; a e peitai ua onosai mai lava o ia ia i tatou, ona ua le finagalo ia fano se tasi, a ia oo uma lava i le salamo.”—2 Peteru 3:9; tagai foi i le Mataio 24:21, 22.
5. (a) Pe na faamatalaina faapefea e Iesu le galuega o le vaevaeina o le a ia faia i lenei taimi? (e) Po o le a e tupu i a i latou e faasaga i ai le faaooina mai o le faamasinoga i le faaiʻuga o nei “aso e gata ai”?
5 I lenei iʻuga, ua faatagaina ai e Ieova le taimi mo le galuega o le vaevaeina i ia “aso mulimuli.” I lana faamatalaga o le “iʻuga o faiga o mea,” na muai fetalai i ai Iesu, ua faapea mai: “Pe a sau le Atalii o le tagata [Iesu Keriso] i lona mamalu ma le au agelu paia uma faatasi ma ia, ona tietie ai lea o ia i lona nofoalii mamalu; e faapotopotoina foi i ona luma o nuu uma lava; ona tuueseeseina lea o i latou e ia, e pei o le leoleo mamoe ona tuueseeseina o mamoe ma ʻoti; ona tuu ai lea e ia o mamoe i lona itu taumatau, a o ʻoti i lona itu tauagavale. Ona fai atu ai lea o le Tupu i e o i lona itu taumatau, O mai ia, o outou ua faamanuiaina e loʻu Tama, ia fai mo outou tofi le malo ua saunia mo outou a o lei faavaeina le lalolagi. . . . Ona fai atu foi lea o ia i e o i lona itu tauagavale, O outou ua faafanoina, o ese atu ia ia te au i le afi e faavavau, [o le faaumatiaga] ua saunia mo le tiapolo ma ana agelu. . . . Ona o atu ai lea o i latou nā i le sala e faavavau; a o e amiotonu e o atu i le ola e faavavau.” (Mataio 25:31-46) Pe a faaoo mai le faamasinoga i le faaiʻuga o nei “aso mulimuli,” o ē faaleagaina o le a ō atu i le “sala [faaumatiaga] e faavavau.” O le a le toe foi i le ola i se toe faatuina o i latou. (2 Tesalonia 1: 7-9) O lea, i nei “aso mulimuli,” e tuuina atu ai e le Atua ma le alofa i mea uma le avanoa e filifili ai i le itu o lona malo ma ola ai.
6. (a) Pe faataunuuina faapefea le galuega o le tuueseeseina? (e) O lea, po o le a e tatau ona tatou faia nei pe afai tatou te mananaʻo i le ola i lalo o le malo o le Atua?
6 Pe faapefea ona fai e le Atua lenei mea? Pe faataunuuina faapefea le galuega o le vaevaeina? I lalo o le faatonutonuga faa-agelu a auauna faamaoni a le Atua i le lalolagi atoa o alagaina ai le feau a le malo o le Atua ina ia mafaia ai e tagata loto faamaoni ona faalogo ma galulue i ai. O le galuega lenei na muai fetalai i ai Iesu o le vaega o le “faailoga” e faasinoina mai ai le lalata o le iʻuga, ua faapea mai: “Ia muai talaʻiina foi le tala lelei i nuu uma lava e ao ai.” (Mareko 13:10; tagai foi i le Mataio 24:14 ma le Faaaliga 14:6, 7) Ona o le tulaga o la latou tali i lenei feau, ma o latou uiga agai i a i latou o e ua faaaoga e Ieova o ana ave feau, ua faamasinoina tagata pe o le a faasaoolaina i latou pe leai. (Mataio 25:40, 45) Afai e te manao i le ola i lalo o le malo o le Atua, e tāua ona faaalia mai nei i lou talisapaia ma le fiafia le feau o le Malo ma uʻunaʻia isi e faia foi lea mea e tasi. Toeitiiti lava ona faamutaina lea o lenei galuega talaʻi toe o se aga. O le a tapunia le faitotoa o le avanoa. O le a tuai tele la lea taimi!—Esekielu 33:8, 9.
PO O AI O LE A FAAUMATIA!
7. Po ua faamatala mai faapefea e le Ieremia 25:33 le iʻuga o lenei faiga leaga o mea, ma po ua fesoasoani mai faapefea le Tusi Paia i a i tatou, ia ʻalo ese ai mai i a i latou e fasia?
7 I tuutuuga sasaʻo ua faaalia mai e le Tusi Paia faapea, pe a oo mai lenei faiga amioleaga i lona iʻuga, “o le fasi a Ieova . . . e afua mai i le tasi pito lalolagi e oo atu i le tasi pito lalolagi.” (Ieremia 25:33) Peitai e te le i ai i a i latou o le a fāsia. Ua faamatalaina mai ma le manino e le Atua i lana Afioga, le Tusi Paia, le ituaiga o tagata, faiga ma faalapotopotoga o le a faaumatia. Ona ua muai lapataʻia, o tagata o e alolofa i le ola, ma e mananao faamaoni e faia le mea saʻo i fofoga o le Atua, e mafai ona e sola ese mai le ogā laueleele o le faalavelave.
8. (a) Po o ai ua tulei i ai le Atua o le a faaumatia? (e) Po o a ituaiga o tagata ua faavasegaina e le Atua e amioleaga? Pe latou te mafai ona suia o latou ala?
8 O lea la, po o ai ua tulei i ai le Atua o le a faaumatia? Pei lava ona tatou faatalitalia, o ē amioleaga lava. “A tupu olaola o e amio leaga e pei o le vao iti, a fuga mai foi i latou uma o e fai mea leaga, e faapea i latou ina ia faaumatia e oo i le faavavau lava.” (Salamo 92:7) Peitai, seia lē taʻitaʻiseseeseina i tatou i le faaaʻoaʻo atu i le vaaiga a le lalolagi i le mea e tonu ma le mea e leaga. Ua tulei ma le manino mai le Atua i a i tatou o le tele o mea ua vaaia i lenei lalolagi o ni mea taatele ua leaga i ona fofoga. Faitaaga, mulilua ma le tauatane po o faatagaina ma fetuutuunaʻia e faalapotopotoga faaona po nei, peitai o e faia ia mea e le faasaoolaina i latou e le Atua i le iʻuga o lenei faiga o mea. E faapena foi, i latou o e tala pepelo, gaoi, onā ma fasioti tagata, o le a tapunia i latou mai le vaaiga o le malo o le Atua. (1 Korinito 6:9, 10; Faaaliga 21:8) Pe ua aafia ai nisi i ia faiga ona o uo ma ʻau mea leaga. Peitai le taimi nei, ua iloa le mea ua tulei i ai le Atua, e tāua mo i latou ia ona suia o latou ala pe afai latou te mananao ia ʻalo ese i le faaumatiaga. O le a leai se nofoaga i le faiga fou a le Atua mo tagata o e amioleaga ma tala pepelo ma faalavelaveina ai ola o latou uso tagata.
9. (a) Po o le a e tupu i se lotu e fausia aʻe i mea pepelo, ma pe ai se a? (e) Afai tatou te le mananaʻo ia faitauina ma i tatou i totonu o i latou o fili o le Atua, po o le a e tatau ona tatou fai?
9 O le a le i ai foi ni faalapotopotoga e taitaiseseeseina tagata. Ua maeʻa ona aʻoaʻoina i tatou mai le Tusi Paia e le o lotu uma ua talia e le Atua. O lea e ao ona le ofo ai tatou i lotu ua fausia aʻe i mea sese ma o le a avea ai ma mea o aso ua mavae. Pe i ai ni maota matagofie o se faalapotopotoga lotu ma ni ana sauniga felanulanuaʻi, peitai afai na te le aʻoaʻoina le upu moni e uiga i le Atua ua matua auauna ma le faamaoni atu lea lotu i le fuafuaga a le fili o le Atua, o Satani le Tiapolo. (1 Korinito 10:20; 2 Korinito 11:13-15) Pe latou te faaaoga ni mea o le Afioga a le Atua, ae afai o ona sailia ia avea o se vaega o le lalolagi i le i ai o se leo i upu fai a le lalolagi, ona pei ai lea ona faaalia mai e le Tusi Paia ua avea o “se fili o le Atua.” (Iakopo 4:4, NW; Ioane 15:19) Pe tatou te mananao ia faitauina i tatou ia aofia ai i fili o le Atua? Afai e leai, ua i a te i tatou la ona faamaonia i le Atua nei tatou te le loto atu i a i latou, a ua tatou fiafia na o le upu moni ma ua tatou faia e i tatou lava le tapuaiga e “mama ma e le ponā mai le silafaga a lo tatou Atua le Tamā.”—Iakopo 1:27, NW.
10. (a) Pe ai se a o le a faaumatia ai e le Atua le faiga faafaiga-malo aoao i le lalolagi? (e) O lea la, po o le a le filifiliga ua tatou fesagaʻi taʻitoatasi?
10 O isi foi ua laina mo le faaumatiaga o le faiga malo ia ua faapea ona soona faapuapuagatiaina ai ma le sauā le fanau a tagata. Soo se suesuega o tala tuufaasolo ua faaalia ai, ua i ai i lenei faiga o mea se tala faamaumauina o le toto masaa ma le faaalualuō mo le pule. Le tioa ona faatusaina ai e le Afioga a le Atua ma le fetaui lelei le fuafuaga aoao o faiga malo i le lalolagi o se “manu feai,” ma ua faamatalaina le pogai ua faaalialia ai uiga faamanu. Ua taʻu mai ai i a i tatou faapea o Satani le Tiapolo, “le tarako,” ua tuuina atu e malo faalelalolagi o latou malosi ma ua latou galulue ai i lalo o lana pulega. (Faaaliga 13:2; Tanielu 8:20, 21; Luka 4:5-8) Ua faaooina mai e le Atua lenei faamatalaga i a i tatou e mafai ai ona tatou filifili ma le poto pe i ai se tatou mea e fai i upu fai faafaigamalo o le lalolagi pe leai. Ua logoina mai foi e le Atua i a i tatou le mea o le a ia fai. Ua ia fetalai i le Tanielu 2:44, i le taimi e “faatuina ai e le Atua o le lagi o le malo e le faaumatia e faavavau.” Na oo lena mea i le 1914 T.A. Peitai, o le gaoioiga o le a faia e le malo o le Atua i le lumanai ua lata mai, i le taua o Amaketo po o Ha-Maketo, ua ia tulei ai pea “na te tuʻimomomoina ma faaumatia ia malo uma lava, [malo o i ai i le taimi o le iʻuga], a o ia e tumau lava e faavavau.”—Tagai foi i le Faaaliga 16:14, 16; 19:17-21.
11. (a) A mavae ona olopalaina o le vaega vaaia o lenei faiga o mea, o ai o le a liliu atu i ai le finagalo o le Atua? (e) Po ua faapefea ona faamatalaina mai e le Faaaliga 20:1-3 lenei mea?
11 Pe a uma ona olopalaina le faiga vaaia aoao a Satani, ona liliu atu lea o Ieova lona finagalo i a Satani le Tiapolo, le atua o lenei faiga leaga o mea. O le a ia nutipalaina Satani, ma ua toeitiiti lava ona ia faia lenei mea. (2 Korinito 4:4; Roma 16:20) I le taimi na tulia mai ai Satani mai le lagi na sosoo ma le faavaeina o le Malo i le 1914, ua iloa ai e Satani ua “saasaa ona po.” (Faaaliga 12:12) Nei ua sili ona puupuu le taimi. Toeitiiti faataunuuina le faaaliga faavaloaga o faamauina i le Faaaliga 20:1-3: “Na aʻu iloa foi le agelu ua alu ifo i le lagi, ua ia te ia le ki o le to e le gata, ua i lona lima foi le maea uamea tele. Ua pue foi e ia le tarako, o le gata tuai, o le tiapolo lea ma Satani, . . . Ua ia lafo foi ia te ia i le to e le gata, ua pupuni foi ia te ia, ma tuuina atu le faamaufaailoga i ona luga.” O lea, ua aveesea ai Satani, faatasi ma ana temoni. O le a mavae ese atu foi la latou faatosina. O le a oo atu lenei faiga amioleaga o mea o aso nei, o ona vaega uma i lona iʻuga.
12. (a) Po o le a i ai soo se vaega a Kerisiano moni i lea faaumatiaga? Po o ai o le a faaaogaina e le Atua e faataunuuina le faamasinoga? (e) Pe a faasagatonuina mai le faasauaga i a te i latou, pe ao faapefea i auauna a Ieova ona tali atu?
12 O le a leai se vaega a Kerisiano moni iinei i le lalolagi i lea faaumatiaga. O le taua a le Atua lea. O le a ia faaaoga malosi o au agelu i lalo o Keriso e faaooina le faasala. O le a ia faapogaia foi le faaliliuina atu o le tasi vaega o le faalapotopotoga vaaia a Satani i le isi ma le ita malosi tele. Peitai e le ʻauai auauna a Ieova i le sauaga. (2 Korinito 10:3, 4) E tusa lava pe faasaga tonu atu sauaga i a te i latou, e le tatau ona latou toe fia totogi ma sailia le fia taui ma sui faasaga i taʻitaʻi pe taumafai ia lafotuina le malo. Latou te faatali i le Atua. “Le au pele e, aua le taui atu ma sui, a ia outou tuu atu i le toasa; auā ua tusia: ‘Ua fetalai mai Ieova, O i a te aʻu le taui ma sui, ou te taui atu.’”—Roma 12:19, NW.
O LE MEA E LE TAITAI ONA IʻU
13. Po o le a faaumatia le lalolagi pe a iʻu lenei faiga o mea?
13 O le iʻuga o lenei faiga o mea o le a le o le iʻuga lea mo lenei lalolagi paneta. Ua faamaonia mai lea i le Afioga lava a le Atua: “A o le lalolagi e tumau lea e faavavau.” “O le na faavaeina le lalolagi i luga o ona faavae, ina ia le gaee e faavavau faavavau lava.” (Failauga 1:4; Salamo 104:5) E le o le lalolagi ua leaga, a o le faiga leaga o i ona luga.
14. Po o le a le ituaiga o tagata o le a leai, a o ai o le a tumau?
14 E le gata foi i lea, e le o olaga faaletagata uma o le a oo atu i se iʻuga. “O tagata faalemataʻu” o le a faaumatia. (2 Peteru 3:7) O tagata na faia aʻe ai le lalolagi le talitonu o le a leai. Peitai, ina ua mavae ona fetalai atu i lenei mea, ua faaopoopo mai le 1 Ioane 2:17: “A o le fai le finagalo o le Atua, e tumau lea e faavavau.” Ina ia mafaia ona fai lenei mea na tuuina atu ai e Iesu Keriso lona soifua e sui aʻi le fanau a tagata.—Eperu 5:9.
15. Ina ia faasaoina mai le iʻuga o lenei faiga amioleaga ma ola i le faiga fou a le Atua, po o le a e tatau ona tatou fai nei?
15 O le vaai atu ofoofogia i le ola faavavau i lalo o le malo amiotonu a le Atua o faatali i e faasaoina mai le iʻuga o lenei faiga amioleaga o mea. Pe o le a avea ea oe o se tasi o i latou? E lelei pe a e faapea. Peitai, afai e faapea, ia tatau lava ona ia e “matua faamalosi” nei, ina ia matua pulea loloto e le Afioga a le Atua lou olaga atoa. (2 Peteru 3:13, 14, NW; Roma 12:1, 2) Paga lo tatou loto faafetai tele ua faia e Ieova, i lona alofa ma le alofa mutimutivale, sauniuniga mo le faasaoina!
[Fesili mo le Suʻesuʻega]
[Ata i le itulau 95]
I TOTONU O LE TUPULAGA E TASI
1914
IUGA O LE FAIGA LEAGA
Tupu tele le amioleaga
Le tasi nuu i le tasi nuu
Mafuie
Oge
Atuatuvale o nuu, le iloa le mea e ui ai
Aso faigata
Le usitai i matua
O ē le taofi manao o le tino
“ASO E GATA AI”
