Mataupu 15

“O Ese Mai i iā Latou”

1. Afai tatou te alolofa i le upu moni ma le amiotonu, po o le a e tatau ona tatou ita i ai ma alo ese ai?

UA FINAGALO Ieova le Atua i e uma o e alolofa ma auauna i a te ia ia auuliuligia mai tapuaiga sese. Fai mai le Tusi Paia i le Alo o le Atua: “Ua e fiafia i le amiotonu, a ua e inoino i le amio leaga.” Ona o lenei mea ua faamanuia faapitoa ai lava o ia e lona Tamā, ma faaeaina ai o le tupu tofia o le Malo o le Atua. (Eperu 1:9) Afai e te alofa i le upu moni ma le amiotonu, o le a e inoino ai ma alo ese i le mea ua sese ma e le fiafia i ai le Atua. E te mafai ona maua le puipuiga i lenei ala nei atoa ma le oo mai o le faasala o le faamasinoga a le Atua i luga o i latou o e faaleamanaia lona finagalo.

2. Afai tatou te vaai i le eseesega i le va o e auauna i le Atua ma i latou e le auauna i a te ia, po o le a le auala e ao ona tatou ui ai, ma pe ai se a?

² Na muai tuleia e le Atua anamua lava faapea o le a i ai se nuu o e o le a fai mana “oloa taua,” ma o le a iloa moni ai e tagata “e eseese lē amiotonu ma lē amio leaga; e ese le ua auauna i le Atua, ma le ua le auauna ia te ia.” (Malaki 3:17,18) Afai e te vaaia lenei eseesega, ona ao ai lea ona e gaoioi loa faatatau i ai. O le lē taulau ai ona faia faapea o le a lamatia ai lau vaai i le mauaina o le ola faavavau. Po o le a le ala e ao ina e ui ai? Ua tautala mai ma le matua mautinoa le Afioga a le Atua: “Aua tou te amo faalegatasi ma e le talitonu; auā pe faapefea ona faatasi o le amiotonu ma le amio leaga? Pe faapefea foi ona mafuta o le malamalama ma le pouliuli? . . . Pe faapefea foi ona tofusia faatasi o lē talitonu ma lē ua le talitonu?” Aua e le mafai ona mafuta faatasi lelei e fai le amiotonu ma i latou o e faia le amio leaga, ua faatonu mai le Atua: “O lea ia o mai ai outou nai totonu ia te i latou, ma ia outou vavae mai.”—2 Korinito 6:14-17.

O ESE NAI “PAPELONIA LE SILI”

3. Po o a upu lava e pei o afioga na tulei ai le Atua i lona nuu a o tafea i Papelonia anamua, ma pe na aveesea ai i a i latou soo se mea lelei?

³ Na tulei Ieova le Atua i a i latou o e sa fai mona nuu ma o e na tafea i Papelonia anamua, i upu faapenei: “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai. E! ana uai mai ou taliga i aʻu poloaiga, po ua tusa ma se vaitafe lou manuia; ma lau amiotonu, e tusa lea ma peau o le sami. . . . E le vavaeeseina, ma le fanoia lona igoa ai oʻu luma. Ia outou o ese i Papelonia!” (Isaia 48:17-20) O le mea na faia e Ieova iina na fai e aoga mo i latou e alolofa i a te ia, e le aveesea i a i latou soo se mea lelei. I le mea na faia e Ieova iina na fai e aoga mo i latou e alolofa i a te ia, e le aveesea i a i latou soo se mea lelei. I le faatoilaloina o Papelonia i le 539 T.L.M. na ia faia ai ia mafai e i latou ona tuua Papelonia o se nuu saoloto.

4. (a) Ui ina le o toe i ai Papelonia anamua, po o le a fa le Atua e uiga i le isi Papelonia? (e) I le Faaaliga mataupu 17, po ua faaataina mai faapefea lenei Papelonia Tele?

⁴ Ua faamutaina ona i ai Papelonia anamua. Ae ua tulei lava le Atua i le isi Papelonia ua taʻua o “Papelonia Tele” (po o Papelonia le Sili). Ma ua ia toe tuu mai foi le faatonuga: “Loʻu nuu e, ia outou o ese ia te ia, ina neʻi faatasia outou i ana agasala, ina neʻi tofusia foi outou i ona mala.” (Faaaliga 18:4) I le mataupu e sefulufitu o le Faaaliga, ua faamatalaina ai Papelonia Tele i faailoga o se fafine amio leaga o tiʻetiʻe po o pule i “nuu ia, ma motu o tagata ma atunuu, ma gagana eseese,” ma o le ua i ai, “le pule i tupu o le lalolagi,” ma ‘ua faitaaga’ ma ia tupu.—Faaaliga 17:1, 2, 15, 18.

5. (a) Po o Papelonia Tele se emepaea faafaigamalo (polotiki)? (e) Pe ai se a na le mafai ai ona faia Papelonia Tele o se emepaea faa-faatauoa? (i) Pe ai se a ua faaataina ai se emepaea faalotu i le Tusi Paia e se fafine talitane?

⁵ O le uiga la o lenei mea o Papelonia Tele o se malo. Po o le a le ituaiga malo? Talu ai ona o “tupu o le lalolagi,” o le vaega faafaigamalo, ua faapea ona ‘faitaaga’ ma ia, Papelonia le sili lava ia, ua iloa ai e le o se emepaea faafaigamalo (polotiki). Ua faaalia  e le tusi o le Faaaliga pe a faaleagaina Papelonia Tele, ua tutu mamao mai “faatauoa” o le lalolagi ma faanoanoa; ua faapea ai ona e le se emepaea faatauoa foi o ia. (Faaaliga 18:15) Pe mata la e mafai ona o se emepaea faalotu? Ia ua mautinoa ona tele le malosi o lotu i luga o malo faafaigamalo, ma ua faaoo atu lana puleaga i tagata uma o le lalolagi. Peitai pe ai se a ua ao ai ona faaataina lenei emepaea faalotu i se fafine talitane ua agasala i le faitaaga? Aua foi ua na ia palua faatasi lotu ma faigamalo. Pei ona faatataua i Atunuu Lotu Kerisiano, ua faaali mai e le Tusi Paia i latou o taofi o auauna a le Atua ae le faamaoni ma ua ulufale atu i le faiga aiga ma malosi faafaigamalo ua silafiaina e le Atua o se talitane po o le fafine mulilua faaleagaga lea.—Esekielu 16:1, 2, 28-30; Iakopo 4:4.

6. Po o fea na amata ai le lotu sese ina ua mavae le Lolo, ma pe na faapefea ona faasalalauina ana aʻoaʻoga ma faiga?

⁶ Ina ua faatoa mavae atu le lolo o le lalolagi i aso o Noa, na faatuina aʻe ai lona amataga o lotu sese i Papelonia o le mea na faasilisiliina ai e Nimarota ia lava, “e faasagatau i a Ieova.” Ui i lea, na faaeseeseina e Ieova le gagana a le tagata ma “na faataapeape foi e Ieova ia te i latou ai lea mea i le lalolagi uma.” Ina ua o latou, sa ave faatasi ma i latou o latou aoaoga ma amio faa-Papelonia. (Kenese 10:8,10; 11:4-9) Ina ia tala feagai ma lenei mea, ua taʻu mai e le tusi The Religion of Babylonia and Assyria (e Professor Morris Jastrow, itulau 701) “le lagona loloto na maua aʻe e le lalolagi anamua, i faaaliga uiga ese o mafaufauga faalotu i Papelonia ma e ala i gaoioiga faalotu na malo i lea itu.”

7. Po o fea na maua ai aʻoaʻoga e tele ma faiga ua maua i lotu i aso nei o latou amataga?

⁷ I lea ala, ui ina le iloa e le toatele o tagata, ua i ai tele aʻoaʻoga ma faiga ua maua i lotu i le lalolagi i aso nei ua i ai pogai taatele o lotu sese a Papelonia. Po o le a nisi o ia mea?

8. (a) Taʻu mai ni aʻoaʻoga faalotu maoaʻe i Papelonia anamua. (e) Po o aʻoaʻoina i latou e le Afioga a le Atua?

⁸ I aʻoaʻoga maoaʻe i Papelonia anamua o: ifoga i se tasitolu po o le tiriniti o atua, o le talitonuga faapea  e le mafai ona oti le tagata ola (soul), atoa ma le aʻoaʻoga faapea e faapuapuagatia tagata pe a oti i se lalolagi i lalo o le eleele po o “le nuu e le foi mai ai.” Malosi tele foi le vaega o le faaaogaina o faatusa i le tapuaiga faa-Papelonia. Pei ona ua faaalia muamua i mataupu o lenei tusi, e leai lava ni mea o aʻoaʻoina i le Afioga a le Atua, le Tusi Paia. Ui i ia mea, po tatou vaaia ia aʻoaʻoga ma faiga faapea i faalapotopotoga lotu o siomia ai i tatou i aso nei?

9. (a) Po o le a ua faailogaina ai se lotu o le vaega o Papelonia Tele? (e) Talu ai ona sa muai tuleia e le Atua o le a ia aumai le faaumatiaga faafuasei i luga o Papelonia Tele, po o le a ua faataalise ona ia fai?

⁹ Faatasi ma aʻoaʻoga o le “Tiriniti,” le ola pea o le tagata ola (soul) ma se afi e faapuapuagatiaina ai, soo se isi aʻoaʻoga ma faiga e le ogatasi i le Afioga faagaeeina a le Atua ua faailogaina ai se lotu e sese ma ua avea ma se vaega o Papelonia Tele. Pe ua taofi se lotu o ia faia le tapuaiga i le Atua moni o le Tusi Paia ma pe o ia faaaogaina foi le suafa o lona Alo, o Iesu Keriso, ae o le ā le aogā tāua o lenei mea pe afai ua faaleagaina e aʻoaʻoga faa-Papelonia ma ana faiga? (Kalatia 5:7-9; Mataio 7:22, 23) Ua muai tuleia mai e le Atua faapea e faafuaseia, “i le aso e tasi” ona oo mai o mala o le “oti ma le faanoanoa ma le oge” i luga o Papelonia Tele. O lea ua luluti ai le talo ma mo lo tatou lelei ia vavaeesea atoatoa maia i tatou e i tatou lava nei mai vaega taitasi uma o lea emepaea faalotu pepelo.—Faaaliga 18:8.

10. (a) Po o ni tagata ua ‘o ese mai i a i latou’ pe afai o faaauau pea ona ʻau atu i soo se lotu o aʻoaʻo aʻoaʻoga sese? (e) Po o le a le faaaliga e ao ona tufaina atu i le faalapotopotoga lotu sa e muai ʻau atu i ai?

¹⁰ Po o le a le uiga “ia outou o ese ia te ia”? Pe ua lava tau ina iloa e se tagata i lona mafaufau le sese o aʻoaʻoga faa-Papelonia, a o loo faaauau ona au au pea ma se faalapotopotoga lotu o taofi pea i na aʻoaʻoga? Pe le moni ea o se auala pepelo lea? Pe le o le lagolagoina vaaia ea lea o se mea ua faatoina e le Atua? Pe mafai faapefea e sea tagata ona mafaufauina ma le faamaoni o ia usitaʻi lava i le faatonuga a le Atua “o lea ia o mai ai outou nai totonu ia te i  latou, ma ia outou vavae mai, . . . aua foi tou te papai atu i se mea leaga”? (2 Korinito 6:17) Afai tatou te le mananao ia pei o ia tagata o e na faapotopotoina i le malumalu o Paala i aso o Ieu ia tau ina mafatia ai i le faaumatiaga i le faatonuga a le Atua, ona tatou manaomia lea ona ia matua motusiaeseina moni mai i tatou i soo se tasi po o faalapotopotoga uma o Papelonia Tele. Tatou te le manaomia ona ʻau ai i a latou gaoioiga. (2 Tupu 10:20-27) Tatou te manaomia ona faailo atu i a te i latou ua tatou o ese mai le latou faalapotopotoga. O lo tatou faia o lenei mea o le a tatou le “faaletonu ai i manatu e lua,” i le taumafai ‘ona tofutofusia i le “laoai a le Atua” atoa ma le laoai a temoni,’ ma faapea ona “faausu ai le fuā o Ieova.”—1 Tupu 18:21; 1 Korinito 10:21, 22, NW.

11. Po o le a le vaaiga a le Tusi Paia i gaoioiga o faatuatua aufaatasi?

¹¹ Peitai pe le o le faatasia ea o lotu po o se gaoioiga faalelalolagi faalotu se mea lelei? Ia pe faapefea le silasila a Ieova le Atua i ai? Ua faaalia e tala a le Tusi Paia e le faatagaina e le Atua se faatuatua sese faatasi ma tagata o sa Kanana mo le nuu o Isaraelu. (Teuteronome 7:3, 4) Ma pe na faapefea ona silasila le Alo o le Atua i le aufaatasi o faatuatua eseese? Sa ia le ʻau ai i gaoioiga o le aufaatasi ma ituaiga lotu eseese o Iutaia a o i ai i le lalolagi. Sa lē faapena, ae sa ia faasalaina le lotu sese o ona aso, ma fetalai atu ma le maumauaʻi: “E le alu atu lava se tasi i le Tama, pe a le ui mai ia te aʻu.”—Ioane 14:6; tagai foi i le Mataio 23:13, 38.

TU MAU MO LE UPU MONI E AUMAI AI FAAMANUIAGA

12. (a) Pe a matua vavaeese mai se tasi mai tāpuaʻiga sese, po o le a mata e tupu e uiga i tagata o ona aiga? (e) Po o le a le alofa ua tofotofoina?

¹² O le o ese moni mai le tapuaiga sese e oo mai ai faalavelave. Na faaalia e Iesu faapea pe tetee mai aiga o le tagata i sea auala. Ae, e oo lava i a i latou ua tetee mai po o e lata mai ma pele, o tagata o lona lava aiga, na fetalai Iesu e le ao ona fai lea ma faalavelave i la tatou filifiliga. (Mataio 10:32-37) O le mea la, e le o le itiiti o le alofa o i latou ia i lo isi, ae o  le malosi o lo tatou alofa mo Ieova ma lana Afioga le upu moni.

13. (a) Po o le a uiga e oo i tagata e lata tele mai i a te oe ona o lou tumau ma le onosai i le upu moni? (e) Po o le a le faamaoniga e aumai e le Atua?

¹³ O le mea tonu lava ia, o le tumau ma le le faagaeetia mo le upu moni e mafai ona lelei ai e le tagata ona galue mo le lelei tumau o aiga o e na muai tetee mai i le ala saʻo. O le lolo atu i omiga ua oo mai pe na ona faamalosia ai i latou ia i a latou faasagatau mai i le upu moni. O le isi itu foi, o lau amio faatuatua ma le faamaoni i le taofi mau i le upu moni o le Afioga a le Atua ma ola ia tala feagai lelei ai o le a aumai ai faamanuiaga ma le fiafia; o le a fai ai oe o se tagata sili ona lelei. O lea, i se aso, o e lata tele mai i a te oe pe iʻu ina latou iloa le poto o lou ala ma fesoasoani ai ia iloa le upu moni foi. O le faamoemoega lena ua faamalosia ai tatou e le Tusi Paia ia talisapaia ma galue ai. (1 Korinito 7:12-16; 1 Peteru 3:1, 2) E moni, o le a manaomia le onosai, faatuatua i le auala a le Atua e silisili, ma, o le lau aluga i mea uma, o le alofa lea. Peitai ua faamaoni mai ma le alofa le Atua lava ia i a te oe o le a lagolagoina ma faamalosia oe pe afai e te tuu faamuamua o ia i lou olaga.—Roma 8:38, 39.

14. (a) Pe finagalo le Atua ia o ese tagata matutua mai lotu sese ae ia faia le tapuaʻiga moni? (e) Po o le a le vaaiga o le a tatalaina mo ia tagata?

¹⁴ I le ma lea foi, pe ua faalogoina e nisi ua tele atu nei tausaga, ma ua faapea ua tuai ona toe suia o latou ala. Ui i lea, ua valaauina e Ieova le Atua, o le ua taʻua ia e ia lava, o “Le ua mai anamuā ona aso,” tagata matutua foi, ia ʻau ai i le viia o ia. (Tanielu 7:9; Salamo 148: 12, 13) Ua faaalia e lana Afioga o le a le faamolemoleina olaga matutua pe afai ua le taulau e se tasi ona vavaeese o ia mai mea ua faatoina e le Atua, peitai “o le pale matagofie le ulu sinā, pe a ua i ai i le ala o le amiotonu.” (Faataoto 16:31; tagai foi i le Esekielu 9:4-6) E le taitai ona faapea ua tuai po ua tautuaaupega i le olaga ona tutu faatasi i le mea ua iloa e se tasi o le upu moni lea, ma faapea ona faatumauina  ai laasaga o le tagata i le auala i le ola faavavau.—Faataoto 10:22.

15. (a) Po o le a le faamanuiaga tatou te olioli ai pe a tatou o ese mai i a i latou o e faia lotu sese? (e) O lea po o ai tatou te faapotopoto i ai?

¹⁵ Afai tatou te gaoioi moʻi ina ia o ese mai i a i latou o failotu sese, ua mafai ona tatou olioli i se faiga aiga manuia ma le fiafia faatasi ma lo tatou Atua, o Ieova. (2 Korinito 6:17, 18) Aua foi e le gata ai iina le mataupu i le o ese mai i a i latou o aʻoaʻo ma fai mea e le tusa i le Afioga a le Atua. Ua tuu mai foi e le Atua le faatonuga faapea e ao ona tatou “le lafoaiina le faapotopotoina o i tatou,” pei ona taʻu mai i a i tatou e le Eperu 10:24, 25. Po o ai la ia tatou faapotopoto i ai? Faatasi ma i latou o e tapuai i le Atua i le agaga ma i le upu moni. O i latou ia ua tulei i ai le Atua: “Ou te nofo i totonu ia te i latou, ou te savali foi i totonu ia te i latou, e fai aʻu mo latou Atua, e fai foi i latou moʻu nuu.”—2 Korinito 6:16, NW.

16. I le au ai i sauniga a molimau a Ieova po o le a o le a e mauaina faatatau (a) I taulafolafoga? (e) i sauniga lava latou? (i) uiga o tagata o aofia ai?

¹⁶ O i latou o e ua faia aʻe ai le faalapotopotoga Kerisiano o molimau a Ieova o tagata o e ua vavaeeseina mai i latou lava mai lotu e tele faapaupau ma Atunuu Lotu Kerisiano. Ua faapea ona latou sosola ese mai Papelonia Tele. I le ʻau ai i sauniga i se tasi o latou Potu o le Malo, e te silafia ai lava e oe le eseesega ua faia i lenei mea. Ua le na o se nofoaga e tauaofia ai, ma o le mea moni e le fai ai ni taulafolafoga o tupe, peitai i le itu muamua o le sauniga lava latou atoa ma uiga o tagata ua aofia ai ua faailoga ai molimau a Ieova e ese lava mai isi lotu. O nei sauniga o suesuega moni lava o le Tusi Paia, o faamamafaina ai le faatatauina o mataupu silisili i o tatou olaga i aso taitasi atoa foi ma le aʻoaʻoina o le faapefea ona aʻoaʻo atu le Afioga a le Atua i isi. O iina o le a tagai i ai ma iloa tagata o e ua matua faamaoni ona “muai saili le malo o le Atua ma lana amiotonu” atoa ma i latou o e ua taumafai aʻiaʻi ia fua mai fua o le agaga o le Atua.—Mataio 6:33; Kalatia 5:22, 23.

17. Pe ai se a e tāua ai ona ʻau ai e le aunoa i nei sauniga?

 ¹⁷ Alu tasi i ai pe faalua ona mafai lea ona faamalieina lou naunau fiailoa, a o oe mo le faia o le agaʻigaʻi i luma auuliuli i le auaunaga a le Atua e manaomia ona ia pei oe o uluai Kerisiano. Sa latou matua faasilisilia le tāua o le upu moni, sa faapea ona latou “tumau pea i latou i le mataupu a le au aposetolo . . . Ua latou nonofo pea ma le loto gatasi i le malumalu i lea aso ma lea aso.” (Galuega 2:42, 46) Na o le ʻau ai e le aunoa i ia sauniga a le faapotopotoga e mafai ona atiina aʻe ai oe i le faatuatua, talisapaia ma le fiafia ma le manatu maumaututu e te manaomia le talia ma le fiafia e le Atua.

18. Po o le a le folafolaga a Ieova o le faataunuuina i a te oe i lou vavaeeseina mai o oe lava mai Papelonia Tele ma ʻau ai atu e le aunoa i le nuu o Ieova?

¹⁸ E ui ina taugata i a te oe le vavaeese mai Papelonia Tele faaona po nei i le itu i le masaniga talu ai, ae o le a e maua sili mamao atu i lou ʻau ai e le aunoa i sauniga a le nuu o Ieova. Pei o uluai soo o Iesu, o e na tuua mea e tele ina ia mulimuli atu i a te ia, o le a e vaaia le faataunuuga o le folafolaga “e maua lava e ia taisautuaselau i lenei olaga,” uso, ma tuafafine ma fale o mea o le a outou maua ma le fiafia. O le a e maua ua avea oe ma vaega o se aiga tele o uso Kerisiano, o latou alofa ma le faauo e moni ma le faamaoni. O le a e maua uma mea faatasi ma le faamoemoe o le ola faavavau “i le faiga o mea o sau.”—Mareko 10:28-30, NW; Salamo 27:10.

19. (a) Po o faaaogaina faapefea e le Atua lana faalapotopotoga mo tatou faamanuiaga? (e) O lea po o le a ua poto mo tatou ona fai nei?

¹⁹ Ua i ai se faalapotopotoga vaaia a Ieova le Atua o loo ua ia faaaogaina i aso nei e aʻoaʻo ma faaauupega ai i tatou mo le ola i lana faiga fou amiotonu. Pe a mavae le faiga amioleaga o aso nei, ona alu atu, o le a malo ala o le Atua i mea uma. O le a na o lona lava malo o toe. (Tanielu 2:44) O lona nuu ua faamaonia o le a na o i latou o totoe i le lalolagi o e ia ʻau faatasi atu i ai. Na o faatulagana a le Atua o mea saʻo ma sese o le a faatagaina. O le a  na o le tasi pe lava le lotu. O lea o le mea poto e fai ia avatua i tatou lava ia laina tutusa ma le ala a le Atua e fai ai mea i aso nei, ia faaaogaina lelei atoatoa le aʻoaʻoina ua saunia e Ieova e ala i Lana afioga tusia le Tusi Paia. I lenei auala, ua tatou faamaonia moni ai i tatou i mea ua tatou faauigaina moni i ai ina ua tatou fai atu ua tatou mananao i le ola faavavau i le faiga fou amiotonu a le Atua.—Salamo 86:10, 11; Faataoto 4:10-13.

[Fesili mo le Suʻesuʻega]