O le Ekalesia Moni ma Lona Faavae
Mataupu 13
O le Ekalesia Moni ma Lona Faavae
1. Pe ai se a ua taua ai ona iloa le faailoga o le ekalesia moni ma lona faavae?
AFAI tatou te mananao e ola faavavau i le faiga fou a le Atua e tatau ona tatou talia le ekalesia moni ma lona faavae. Faatatau i a i latou, na fetalai Iesu: “Ou te ati ae foi laʻu ekalesia i luga o lenei papa.” (Mataio 16:18) Po o le a lenei ekalesia ma po o le a le papa ua ati aʻe ai le ekalesia? Ua aumaia e le Tusi Paia i a i tatou tali saʻo.
2. (a) Pe ua faaaogaina ea e le Tusi Paia le upu “ekalesia” o faasino i se fale? (e) Po o le a le uiga o le upu Eleni?
2 A o tautala tagata e toatele i fale ua feiloai ai tagata mo tapuaiga o falesa “churches,” pe te iloa e le taitai ona faia faapea e le Tusi Paia? Ua faasino pea e le Tusi Paia le upu “church” i tagata, o le mea moni lava, i se aofiaga po o se faapotopotoga o tagata. (Filemoni 2) Ua faaliliuina le upu Eleni ekklesiʻa, “church” po o “faapotopotoga,” o lona uiga faaletino “o le mea ua valaauina atu.” Ua faasino la i se vaega o tagata ua valaauina ae mai isi mo se fuafuaga iloga; peitai ua faaaogaina pei e tutusa i le upu Eperu qahal’, o lona uiga “faapotopotoga” po o “aofiaga.”
3. Pe ai se a ua faatusaina i ai le ekalesia moni i (a) se tino faaletagata? (e) i se taupou ua fai sana faamau?
3 Ua faatusaina le ekalesia moni i se tino faaletagata, aua e tele ona vaega ae na o le tasi le ulu, pei ona i ai i se tino faaletagata. Ua taʻu mai e Tusi Paia faagaeeina, i le Efeso 1:22, 23, (Dy), na faia e le Atua Keriso “ma ulu o mea uma lava i le ekalesia, o lona tino lea.” Ua faatusatusaina foi lenei ekalesia i se taupou ua faamau ma Keriso, auā pei se vaega o tagata o le ekalesia moni ia matua aufaatasi aʻiaʻi i a Keriso, pei se āvā i lana tane. Ina o tusi atu i ni tagata o le ekalesia, na fai atu le aposetolo o Paulo: “Aua ua uma ona ou faufautane ia te outou i le tane e toatasi, ina ia ou momoli ia te outou o le taupou faamaoni ia Keriso.” (2 Korinito 11:2; tagai foi i le Faaaliga 21:2, 9, 10) O lea o se faapotopotoga mamā, ua tuusaolotoina mai mea leaga faalelalolagi ae vilivilitaʻi atu i lona Ulu, o Iesu Keriso.
4. (a) Pe mafai ona “ʻau ai” soo se tasi i le ekalesia moni i le na ona tusia o lona igoa i ni tusi o igoa o tagata faalelalolagi? Ai se a? (e) Pe toafia ua faia aʻe ai le ekalesia moni o le a faatasi ma Keriso i le lagi?
4 Pe mafai ona filifili soo se tasi o i tatou ia “auai” i lenei ekalesia i le na ona tusia o lona igoa i se lisi o tagata iinei i le lalolagi? E leai; pei ona faamatala mai e le Eperu 12:23, Dy, o lenei o le “ekalesia o le au ulumatua e ua tusia i le lagi.” O le Atua lē filifilia tagata. Na te faatulagaina i latou i le faapotopotoga pei ona ia finagalo malie i ai. (1 Korinito 12:18) O i latou ia o e o le a faatasi ma Keriso i le lagi. Ma na faaalia e Iesu faapea, e ese mamao ma le aafia ai o e fia avea ma Kerisiano, ua faamutaina ai i latou i le numera e 144,000.—Faaaliga 14:1-3; Luka 12:32.
5. Pe mo le a le fuafuaga faapito ua valaauina ai tagata o le ekalesia moni?
5 O le mea moni, o i latou ia, o se vaega o tagata ua valaaueseina mai le pogisa faaleagaga mo se fuafuaga faapito. A o latou i ai uma i le lalolagi ua latou faatoatoa “ina ia taʻutaʻu ona lelei” o le Atua Silisili Ese, o Lē na valaaueseina i latou nai le pogisa i lona malamalama ofoofogia. (1 Peteru 2:9) Ma, ina ua mavae lo latou toetu, o le a maua e i latou le faaeaga sili o le pule faatasi ma Keriso i lona malo faalelagi.—Luka 22:28-30.
6. (a) Po o ai tagata muamua o le ekalesia moni, ma pe na molimauina i a i latou faapefea o i latou o atalii faaleagaga o le Atua? (e) Po o ana fea na tatala ai tusiga o tagata mo ē lē ni Iutaia?
6 O uluai tagata o lenei ekalesia moni o tagata Iutaia uma (pei o Iesu ma ana aposetolo) po o tagata liliuina e fai ma Iutaia ua peritomeina. I le aso Penetekoso o le tausaga 33 T.A.—na o le sefulu aso ina ua mavae ona afio Iesu i le lagi ona ia tatala lea le ala mo isi e mulimuli atu ai i le taimi e tatau ai—sa faasinoina mai e Ieova lona filifilia o ia tagata i le liligiina ifo i ai o le agaga paia. O lo latou mauaina o le agaga i lea sauniga na fai ma molimau i a i latou ua avea nei i latou i lea taimi ma atalii faaleagaga o le Atua ma suli foi o le malo faatasi ma Keriso. (Galuega 2:1-4, 16-21, 33; Roma 8:16, 17) Peitai o tagata o le ekalesia moni sa le tumau ai pea na o Iutaia uma. I le tolu ma le afa tausaga ina ua mavae le maliu o Iesu ona tatalaina lea o le ala mo tagata o Nuu ese po o tagata e le ni Iutaia ia aafia ai. (Galuega 10:30-33, 44; Roma 9:23, 24) O lea, i se taimi, o le a i ai i le ekalesia moni tagata o atunuu o le lalolagi.
O LE FAAVAE O LE EKALESIA MONI
7. Pe na faailoaina faapefea e Iesu ma le aposetolo o Paulo le maa tulimanu faavae o le lotu moni?
7 Po o ai le faavae o le ekalesia moni? Sa faamanino atu e Iesu Keriso o ia lava lea faavae. Sa faatatauina o ia e ia lava i le valoaga a le Salamo 118:22, ua faapea mai: “O le maa na lafoaiina e tufuga fai fale, ua fai lea ma maa tulimanu aupitoaluga.” (Mataio 21:42-44) Sa faaopoopo mai foi le aposetolo o Paulo i lona molimau mai o Iesu o “le maa tulimanu aupitoaluga,” ina o tusi atu i tagata Kerisiano i Efeso: “A ua nuu faatasi ma le au paia, o le aiga foi o le Atua, o loo ua atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea.” (Efeso 2:19, 20, Dy) Sa matua patino mai lava le aposetolo e uiga i lea mea, i lona toe faapea mai: “Auā e le mafaia e se tasi ona tuu se isi faavae i le ua uma ona tuuina, o Iesu Keriso lea.”—1 Korinito 3:11, Dy.
8. (a) Pe ai se a na le mafai ai ona i ai se faavae e sili atu ona lelei mo le lotu moni i lo Keriso Iesu? (e) Po o le a la le fesili ua alu aʻe nei?
8 Sa le mafai lava ona i ai se isi faavae e sili ona lelei ma le mautu mo le ekalesia moni i lo Keriso Iesu, a ea? O le mea lea, o lona soifuaga lelei faaletagata na foaiina atu e fai ma togiola ia mafai ai ona faia lenei fuafuaga faaleatua. Ui lea, pe mafai faapefea ona tala feagai lenei molimau a Iesu ma le aposetolo o Paulo ma le mea na fetalai ai Iesu i a Peteru ua i le Mataio 16:18? E mafai ona tatou mautinoa ua leai lava se faasala ese.
“OU TE ATI AE FOI LAʻU EKALESIA I LUGA O LENEI PAPA”
9. (a) Po ua malamalama faapefea ni tagata i fetalaiga a Iesu o i le Mataio 16:18? (e) Pe na malamalama le toatele o uluai “failotu” i le faasinoga a Iesu i le “papa” e faatatau i a Peteru?
9 Na sei faatoa tali atu Peteru o Iesu Keriso (po o le Mesia) o le Alo o le Atua soifua. Ona fetalai atu lea o Iesu: “Ou te fai atu nei aʻu ia te oe: O Peteru oe, ou te ati ae foi laʻu ekalesia i luga o lenei papa.” Ua i ai le malamalamaga o nisi i nei upu e uiga faapea o le ekalesia a Iesu e ati aʻe i a Peteru le faavae. O le tulaga faaleituaiga lenei o le Ekalesia Katoliko Roma. Peitai e manaia lava ona matau mai le faaaliga a Pikopō sili Kenrick, i le tusi An Inside View of the Vatican Council (1870), faapea mai, a itiiti mai e valusefuluono “faifeau” o le uluai ekalesia, a e na o le toa sefulu ma le fitu na malamalama i le faasinoga a Iesu i le “papa” e pei ona faatatau i a Peteru. Pe na e iloa lenei mea?
10. Pe na faapefea ona malamalama Aokusitino i le faasinoga a Iesu i le “papa”?
10 Manatu mai, e fai ma faaaʻoaʻoga, o le vaaiga a Aokusitino (354-430 T.A.) sa masani ona faasino faatatau i a “Sagato Aokusitino.” Ui ina i se tasi taimi, sa ia manatu ma vaai ai ia Peteru o le “papa,” i le olaga mulimuli ane ai na toe faaupuina mai e Aokusitino lona tulaga, ua faapea mai i lona Toe Faafitiga; “Ua ou faamatalaina soo talu ai afioga a lo tatou Alii: ‘O Peteru oe ma o le a ou ati aʻe laʻu Ekalesia i luga o lenei papa,’ i le uiga e ao ona latou malamalama i ai e faasino i a te ia o le na molimautinoina e Peteru ina ona ia faapea atu: ‘O oe o le Keriso, le Alo o le Atua soifua,’ . . . Aua foi o le mea na fetalaia atu i a [Peteru] e lei faapea ‘O le papa oe,’ a o ‘Peteru oe.’ Peitai o le papa o Keriso lea.”
11. Po o ai na malamalama i ai Peteru lava ia o le “papa”?
11 Peitai o le mea sili ona taua—pe na malamalama faapefea Peteru lava ia i afioga a Iesu? Faatatau i le Alii o Iesu, sa fai atu Peteru: “Ua outou o mai ia te ia, o le maa ola o ia na lafoaiina e tagata, a ua filifilia e le Atua, ua taua lava, o outou foi, ua atiina ae outou pei o maa ola, o le fale faaleagaga, o le au ositaulaga paia, e avatu taulaga faaleagaga e malie i le Atua ona o Iesu Keriso. Aua foi ua i le Tusi; Faauta, Ou te tuu i Siona le maa tulimanu ua filifilia, ma le taua; e le ma foi se faatuatua ia te ia. O lenei, ua ia te outou o e faatuatua o lenei mamalu; a o e faalogogata, O le maa na lafoaiina e tufuga fai fale, ua avea lava lea ma maa tulimanu aupitoaluga, ma maa e tausuai ai, ma papa e tautevateva ai; o e tausuai i latou ua faalogogata i le upu, na tofia foi i latou i lea lava mea.” (1 Peteru 2:4-8, Dy) Ua faaalia i ia upu a Peteru o ia foi, pei o le aposetolo o Paulo, na malamalama i a Iesu e avea ma “maa tulimanu aupitoaluga,” o le “papa” o le mea e fausia aʻe ai le ekalesia. O Peteru ua na o se tasi o “maa ola” o le 144,000 na fausia aʻe ai le ekalesia moni.
12. (a) Pe na faapefea ona tatou iloa pe na vaaia Peteru o se ulu “lē ma-sesē” o le ekalesia faalelalolagi pe leai? (e) Po o ai e tumau pea o le ao o le ekalesia moni.
12 Sa olioli Peteru i faaeaga lelei o se aposetolo a Iesu Keriso, ua moni lea. Peitai e leai se mea o faasinoina mai ai na i a te ia se manatu o ia e sili o le au aposetolo. Pe ua tatou faitau i soo se mea faapea ua iloa e isi aposetolo ma le au soo Peteru o se “pope” ma avatu i a te ia le mamalu pei ona faapeaina. I le tasi mea na tatau ai i le aposetolo o Paulo ona aʻoaʻia Peteru (Kefa) i luma o tagata lautele ona o se auala e le tala feagai ai ma le faatuatuaga moni faa-Kerisiano. O le mea moni na sese Peteru i lenei mea ua aafia ai le faatuatua ma amioga ma na lagona foi e Paulo le saolotoga e faatonu i a te ia i luma o tagata lautele e faaalia ai sa le vaavaai i a Peteru o se ulu “le masese” o le au aposetolo po o le uluai ekalesia. (Kalatia 2:11-14) E na o le tasi pe le Ao o le ekalesia moni, o Iesu Keriso, o lē, talu lona toe soifua mai, ua “soifua e faavavau,” ma faapea ona le manaomia ai ni suli.—Eperu 7:23-25, NW.
O SE EKALESIA AU FAATASI
13. (a) Po o a fetalaiga a Iesu ua faaalia ai sa leai se vaevaega o le faapotopotoga i le au failotu ma le au lotu? (e) Pe faapefea ona amio aʻi i latou lava o taʻitaʻi i le faapotopotoga?
13 Ua le vavaeina e Iesu, le Ao, le tino o lana faapotopotoga i se vasega o failotu ma se vasega o le au lotu o “tagata taatele.” Ua ia fetalai i ona soo: “A o outou, aua neʻi taʻua outou o rapi; auā e toatasi la outou aʻoaʻo, o le Keriso lea; a o outou uma o le au uso outou. Aua foi nei tou taʻua se tasi i le lalolagi o lo outou tamā; auā e toatasi lo outou Tamā, o i le lagi ia. Aua foi neʻi taʻua outou o aʻoaʻo, auā e toatasi la outou aʻoaʻo, o le Keriso lea.” (Mataio 23:8-10) Ua faapea ona faaalia e Iesu e leai se vaevaega i a i latou o e ua faia aʻe ai le ekalesia moni. Ui i ia mea, sa ia faatatauina mo tagata ona fai ma taʻitaʻi i le faapotopotoga Kerisiano, e auauna i mea e manaomia faaleagaga e o latou uso ma faaopoopo i le galuega talaʻi o le tala lelei. Na fetalai Iesu i ia tagata ia lē “aliitai” i latou i o latou uso ae ia fai pei o pologa po o tavini i a i latou. (Mataio 20:25-28) Pe ua moni lea i failotu ua e iloa?
14. Pe ai se a e tatau ai i e ua faia aʻe ai le ekalesia moni ona faapotopotoina ia na o le tasi le faapotopotoga mo le tapuaʻiga?
14 Ina ia fetaui ma le faamatalaga o le ekalesia moni, o i latou o e ua faia aʻe ai le ekalesia e tatau ona au faatasia i le latou tapuaiga. I lenei uiga na tusi atu ai le aposetolo o Paulo: “Le au uso e, ou te aioi atu ia te outou i le suafa o lo tatou Alii o Iesu Keriso, ina ia tasi la outou upu uma lava, ina neʻi i ai ni maseiga ia te outou; a ia maopoopo lava i le loto e tasi ma le manatu e tasi.” (1 Korinito 1:10) O lea ua tatou le mafafai ai ona faatalitalia faale-Tusi Paia ona maua i latou o taʻape solo i lotu fetauaʻi uma lava a Atunuu-lotu-Kerisiano. E tatau ona faapotopotoina faatasi i latou i le faalapotopotoga e tasi. Pei ona fai mai le Efeso 4:4,5 i a i latou: “E tasi le tino, . . . e tasi le Alii, e tasi le faatuatuaga.” E tāua lava mo i tatou ona iloa lea mea o le “tasi le faatuatuaga.”
TALISAPAIA O LE EKALESIA MONI MA LONA FAAVAE
15. (a) Pe ua aoga faapefea Keriso ma lana faapotopotoga i isi tagata usiusitaʻi uma? (e) Po o le a le avega tauave na fetalai ai Iesu o le a ia tuu atu i lana ekalesia moni i le taimi o lona afio mai i le mana o le Malo?
15 Fai mai le upu o tagata o le ekalesia moni i lalo o Keriso le ao e avea “o le fanau outou a Aperaamo, o suli foi e tusa ma le mea na folafolaina.” (Kalatia 3:29) O lenei folafolaga ua faapea o isi uma o le fanau a tagata usiusitaʻi o le a faamanuiaina i latou lava e ala i a Keriso ma lana faapotopotoga. (Kenese 22:18) Sa muai taʻuina mai e le Tusi Paia lenei mea i le taimi o le faavaeina o le malo o le Keriso, o le a na o se vaega totoe lea fanau, o le “Ierusalema i lugā,” le faalapotopotoga faalelagi a le Atua, e faatotoe i le lalolagi. (Kalatia 4:26; Faaaliga 12:10, 17) Na faamatalaina e Iesu ia tagata o lana ekalesia i le lalolagi, o se “auauna faamaoni ma le mafaufau.” Ma na ia fetalai o i latou ia faapea o e na maua mai o auauna ma le faamaoni i le taimi o lona afio mai i lana galuega faa-faamasinoga o le a tofia o ia “e pule i ana mea uma,” o lona uiga i luga o mea faalelalolagi uma a le malo o Keriso. O le a latou taimuaina i le talaʻia o le tala lelei o le Malo ua faavaeina i atu nuu uma i le “taimi o le iʻuga.”—Mataio 24:14, 45-47; 25:19-23.
16. Po o a faamanuiaga e oo i a i latou o e ua faaalia le iloa tonu o lenei fuafuaga?
16 O i latou uma o e faamoemoe ia maua le ola faavavau i le faiga fou a le Atua e manaomia ona iloa lelei lenei fuafuaga. Aua foi na fetalai Iesu, i lenei “taimi o le iʻuga,” na te vavaea ai i se tulaga lelei i latou o fai mea lelei e oo i e o totoe o ona “uso” i le lalolagi, o ona suli sosoo o e faia aʻe ai le faapotopotoga faa-Kerisiano. (Mataio 25:31-40) O i latou ia o e totoe o “maa ola” ua atiina aʻe ai se fale faaleagaga po o le malumalu, “o se afioga mo le Atua e afio ai i le agaga.” (1 Peteru 2:5; Efeso 2:20-22, NW) O i latou o ‘fai mea lelei’ i tagata o lenei vasega o le malumalu ua faamatalaina i le tusi o Faaaliga o se “motu o tagata e toatele” o tagata o e i lalo o le puipuiga a le Atua. Matau mai, foi, ua latou auauna ma le fiafia i le Atua “i lona malumalu i le ao ma le po,” o lona uiga, i le ʻauʻau mea faatasi ma le vaega totoe o le vasega o le malumalu faaleagaga, o le faapotopotoga faa-Kerisiano.—Faaaliga 7:9, 10, 15.
17. Po o le a fa a e pei ni mamoe, o le mea moni, i e o totoe o le ekalesia moni.
17 Fai mai nei tagata pei ni mamoe, o le mea moni, i suli o le folafolaga na faia i a Aperaamo: “Tatou te o ma outou, auā ua matou faalogo, o loo ia te outou le Atua.” (Sakaria 8:23) E oo lava i a i latou o le ekalesia moni po o le faapotopotoga o savavali ma le faamaoni i tulaga aao o Keriso ma alagaina le feau a le Malo, ua faapea foi ia tagata pei ni mamoe ona ‘o ma i latou,’ i le auauna atu i le Atua faatasi lelei lava ma i latou. Po o e faia lea mea? Afai e faapea, ua i a te oe le fuafuaga o le mauaina o le ola faavavau i le lalolagi, faatasi ma isi faamanuiaga uma o le a tafe mai le Keriso ma lana faapotopotoga mamalu i lagi.
[Fesili mo le Suʻesuʻega]
