Mataupu 9

O le Pogai ua Ala ai ona Alu se “Lafu Mamoe Itiiti” i le Lagi

1. (a) A o i ai Iesu i le lalolagi, po o le a na ia fetalai atu ai i ona tagata e uiga i le olaga faalelagi? (e) Pe ai se a ua mananaʻo ai le toatele o tagata e o i le lagi?

A O I ai pea Iesu faatasi ma ona tagata iinei i le lalolagi, sa ia fetalai atu i a te i latou e uiga i le ola faalelagi. Sa ia fetalai atu i a te i latou o le a ia alu e sauni se mea mo i latou, ma o le a i ai se taimi o le a latou i ai iina faatasi ma ia. (Ioane 14:1-3) E miliona ma miliona tagata ua tuu atu o latou loto i sea olaga faalelagi. Ua faia lea mea o se mea e faatalitali ai i le tuusaolotoina mai faalavelave o lenei olaga. Ae pe te iloa le pogai ua ala ai ona fuafuaina e le Atua mo nisi tagata ia o i le lagi? Pe te iloa po o le ā o le a latou fai iina?

2. (a) Po o le a le malo o le Atua, ma po o fea e i ai? (e) O lea ina ua fetalai Iesu o le a fai ma tofi o le “lafu mamoe itiiti” “le malo,” po o le a le uiga o lea mea?

² A o feagai ma lana auaunaga faalelalolagi sa tele ona fetalai Iesu e uiga i le “malo o le Atua.” Na ia aʻoaʻo ona tagata ia tatalo faapea e ala i le Malo o le Atua o le a fai ai lona finagalo iinei i le lalolagi. O le a faapea ona avea ai le lalolagi ma se aiga fiafia mo le fanau a tagata. Peitai o le malo lava ia o le malo o le Atua i le lagi, ma o le pogai lenei na faasino soo i ai e Iesu le “malo o lagi.” (Mataio 5:20; 6:9, 10, NW) Ua fesoasoani lenei mea i a i tatou ia malamalama ai i le mea na ia finagalo i ai ina o ia fetalai ane: “Aua e te fefe oe le lafu mamoe itiiti e; auā ua finagalo lo outou Tamā e foai mai le malo ia te outou.” (Luka 12:32) Ioe, o le a tuuina i le  Atua lenei “lafu mamoe itiiti” se sea po o se vaega i le malo faalelagi i luga o le fanau uma a tagata.

3. Po o le a fa le Faaaliga 20:6, i le mea o le a faia e i latou e faatutuina i le olaga faalelagi iina?

³ Ua tatou faitau i le Faaaliga 20:6 e faatatau i a i latou o e o le a toe faatutuina i le olaga faalelagi: “A e avea i latou ma faitaulaga a le Atua ma Keriso, latou te fai ma tupu foi faatasi ma ia i tausaga e afe.” O Iesu Keriso le tupu sili ma le ositaulaga maualuga, ma o nei tagata faatuatua faamaoni na aveina aʻe mai le lalolagi e auauna faatasi ma ia.—Faaaliga 5:9,10.

4. Pe ai se a ua fetaui lelei ai i a i latou o e ua fuafuaina e le Atua ona i ai i le malo faalelagi ona aveina ae mai lenei lalolagi?

⁴ Pe ai se a ua filifilia ai i latou mai le lalolagi mo sea galuega? Aua foi o iinei lava i lenei lalolagi na luʻia ai le pule a Ieova. O iinei foi e mafai ona tofotofoina ai le faatuatua o faamaonia ai le faamaoni atoatoa o Iesu i le Atua i lalo o tofotofoga ma na tuuina atu ai lona soifuaga o se togiola mo le fanau a tagata. O lea la o iinei lava mai lenei lalolagi ua fuafuaina ai e Ieova ia avea se “lafu mamoe itiiti” o tagata e ʻauʻau faatasi ma lona Alo i le malo faalelagi. O i latou o tagata ua faaalia o latou faatuatua atoatoa i sauniuiga a le Atua mo le olataga e ala i a Keriso. O i latou ma o latou olaga ua faamaonia ai le Tiapolo o se pepelo ina ua ia molia tagata faapea ua na ona auauna tagata i le Atua mo na o lo latou lava lelei faapito. Ua fuafuaina ma le ofoofogia e Ieova le Atua e faaaogaina i latou mo lona mamalu.—Efeso 1:9-12.

5. (a) Pe ai se a ua o se fuafuaga alofa ai a le Atua ona tuuina i lea tulaga o i latou o e ua oo i ai i faalavelave taatele i le fanau a tagata? (e) Po o a faamanuiaga o le a olioli ai e mau i le lalolagi pe a faatatauina mai e nei faitaulaga faalelagi aoga o le taulaga togiola a Keriso?

⁵ A fai ma tupu ma ositaulaga i lalo o le faasinoga a Iesu Keriso o le a latou auauna mai o latou tulaga faalelagi i le tauaveina o le finagalo o Ieova i le fanau a tagata. Paga le ofoofogia o le a i ai e fai ma pule i latou ua faamaonia e faatuatua i le Atua! (Faaaliga 20:4)  Maeu le alofa o le Atua i le faanonofoia i ofisa o i latou o e ua oo i ai i ia faalavelave e taatele i le fanau a tagata! E moni, e pei lava i latou o Keriso o le a latou faafeagai ma o latou tagata i se auala malamalama. (Eperu 2:17, 18) Paga se faamanuiaga o le a i ai i tagata e mau i le lalolagi, a o faatatauina e nei ositaulaga faalelagi, i a i latou aoga o le taulaga togiola a Keriso, e faamaloloina ai i latou faaleagaga, faalemafaufau ma faaletino seia oo ina latou taunuu atu i le lelei atoatoa!—Faaaliga 21:2-4.

 PE TOA FIA E O I LE LAGI?

6. Pe toafia e faia aʻe ai le “lafu mamoe itiiti”?

⁶ O i latou o e ua valaauina e le Atua ia ʻau ai i se auaunaga faalelagi, e toaitiiti lava i latou i lo latou faitau aofai. Pei ona fetalai Iesu, o i latou o se “lafu mamoe itiiti.” Ua tausagā talu ina mavae lona toe afio i le lagi, sa faalauiloaina atu e Iesu le numera saʻo i se faaaliga i le aposetolo o Ioane, o le na tusi: “Na aʻu iloa, faauta foi, ua tu mai le Tamai mamoe i le mauga o Siona, ua faatasi foi ma ia tagata e selau afe ma afe e fasefulu ma le fa o afe...o e ua faatauina nai le lalolagi.” (Faaaliga 14:1, 3) Ua faasinoina ma le mea moni lava le “Tamai mamoe” iinei o Iesu Keriso lea; ma o lenei “Mauga o Siona” ua le i le lalolagi, a o i le lagi, o le mea o i ai Iesu. (Ioane 1:29; Eperu 12:22) O lea o le 144,000, o peresona ia na oti i le eleele o ni tagata ma na toe faatutuina aʻe i le olaga faalelagi o mea-fai-ola agaga pei o Iesu. (Roma 6:5) Pe a faatusatusa atu i le afe ma afe o miliona o miliona o tagata o e ola i le lalolagi, o i latou lava, o se “lafu mamoe itiiti.”

7. (a) Pe na o le 144,000 i latou e maua le olataga? (e) Po o le a upu po o le taʻu na faasino i ai e Iesu i latou o e o le a ola i le lalolagi?

⁷ Ui lea, o le “lafu mamoe itiiti” o e o i le lagi e le na o i latou o e maua le olataga. Pei ona ua tatou iloa, o le a i ai ni o latou tagata faalelalolagi fiafia. Sa faasinoina e Iesu i latou ia o ana “isi mamoe,” o le “motu o tagata e toatele” o loo ua latou auauna atu nei i le Atua ma le faamaoni lava.—Ioane 10:16; Faaaliga 7:9, 15.

ILOA FAAPEFEA E SE TASI PO O IA O LE “LAFU MAMOE ITIITI”

8. Pe iloa faapefea e se tasi o ia ua valaauina i le lagi?

⁸ Ua iloa e tagata o le “lafu mamoe itiiti” ua valaauina i latou e le Atua i le olaga faalelagi. Faapefea? E ala i le galuega a le agaga o le Atua, o le mea ua totoina ma atiina aʻe i a i latou le faamoemoe o le olaga faalelagi. Na tusi mai le tasi o le “lafu mamoe itiiti” o le aposetolo o Paulo lea: “O loo molimau mai lea lava Agaga i o tatou agaga, o fanau i tatou a le Atua. Afai foi o fanau i tatou, o suli foi, o suli lava o le Atua, o suli faatasi ma Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia.” (Roma 8:16, 17) E matua suia atoatoa lava le vaai i sea tagata e le galuega a le agaga o le Atua, e faapea ona taulaʻi tonu ai ona manatu ma ana tatalo i le auauna atu i le Atua ma le faamoemoe faalelagi ua taulaʻi i ai le vaai. O le faatasia lava ma Keriso i le lagi ua sili ona tāua i a te ia i lo soo se noataga faalelalolagi.

9. A o lumanai ona mafai e le tagata ona iloiloina le tulaga faatatau i le olaga faalelagi, po o le a e manaʻomia?

⁹ E le taumate ua e mafaufau e uiga i lenei mataupu, ma atonu po o e taumafaufau po o oe o se tasi o e o le a maua le olaga faalelagi. A o lei mafaia e se tasi ona iloiloina ma le saʻo lenei tulaga, e manaomia ona ia malamalama i mea ua aʻoaʻo mai i le Tusi Paia i lenei mataupu. Ai se a? Aua foi o lea lava agaga paia o le Atua e molimau mai o le agaga lava lea ua valaauina ai o ia i le mamalu faalelagi, o le agaga lava lea e tasi ua faatonutonuina le tusia o le Tusi Paia. Pe a i ai i le mafaufau lenei mea, sei o tatou suesuea le tulaga.

10. (a) Po o le a le talitonuga e mafai ona faapogai ai ona faatalitalia e le tagata ia alu i le lagi? (e) Po o a upu moni o le Tusi Paia e lei iloa e i latou o e manatu e o i le lagi tagata lelei uma?

¹⁰ Pe sa e talitonu i aso ua mavae e o i le lagi tagata lelei uma? Afai e faapea, ma afai foi ua e taumafai e ola i se olaga lelei, pe lelei foi ona e faatalitalia ia aafia ai ma oe i a i latou. Pe te faamoemoe ai foi i lenei lava auala e toe faatasia ai ma e ua pele o e na  e leiloaina i le oti. Peitai pe a i a te oe lea faamoemoega, pe na e iloa ua fai mai le Tusi Paia i ia auauna faatuatua a le Atua pei o le Tupu o Tavita ma Ioane le Papatiso na lei o i le lagi? (Galuega 2:29, 34; Mataio 11:11) I lea taimi, pe na e iloa e na o le 144,000 ua filifilia mai le fanau a tagata i le sefuluiva senituri ua mavae o le a maua le olaga faalelagi? Ma pe na e iloa i lea taimi ua taofia e le Tusi Paia le faamoemoe o le ola faavavau i lalo o uiga amiotonu iinei i le lalolagi mo isi tagata uma o e o le a avea foi i latou ma auauna faamaoni a le Atua?—Salamo 37:10, 11, 29.

11. Ona o le a le aʻoaʻoga sese i le agaga ua manatu ai le toatele o tagata faapea latou te o i le lagi?

¹¹ Ina o e mafaufau i lea taimi e uiga i le olaga faalelagi mo oe lava, pe na e talitonu i le ola pea o le tagata ola? Ma le malamalama lava, i lea taimi po ua e faamoemoeina faapea o lou tagata o le a alu i le lagi. Peitai pe afai na i a te oe lea faamoemoe, e le ona o le agaga o le Atua na molimau i a te oe. E le o lena, pei ona e iloa nei fai mai le Afioga faagaeeina a le Atua faapea o le tagata ola e oti ma lē toe i ai. O lea o i latou ua oti e tatau ona faalagolago lava i le Atua e toe faatutuina i latou i le a lava le nofoaga ua ia finagalo ai mo i latou.—Esekielu 18:4; 1 Korinito 15:35-38.

12. (a) Po o ai e faia le filifilia o tagata latou te maua le olaga faalelagi? (e) Po o le a le faamoemoe ua faasinoina sili i ai e le Atua tagata i aso nei?

¹² I lenei mataupu la, ua tatau ona tatou vaai i Tusi Paia mo le taitaiga ma e le tuu atu i faalogona po o ni talitonuga faavae e lē faale Tusi Paia, ua faafenuminumiaʻia ai o tatou mafaufauga. O i latou ua maua le olaga faalelagi ua le o ni tagata na filifilia lea mo i latou lava; o le Atua lē na faia le filifiliga. (2 Tesalonia 2:13, 14) Ua valaauina i latou e tuua o latou aiga ma uo ma mea uma faalelalolagi mo le faaeaga o le ʻau ai o tupu fesoasoani ma ositaulaga fesoasoani faatasi ma Keriso ma fai ma vaega o lana “faatoanofotane.” (Faaaliga 21:2) O le mea lena ua faatuina e le Atua i o latou luma, ma ua latou faaalia le fiafiaga loloto mo lea mea. Peitai ua le tatau ai ona avea ma se tasi o lea vaega faalelagi  ina ia maua le mapusaga mai faalavelave o lenei olaga. E alofa foi le Atua i ana “isi mamoe.” Ua ia folafolaina o le a ia faia lenei lalolagi ma parataiso, ma mea e le toe i ai le tiga ma le faanoanoa. Ua faaalia e mea moni ua faasilisilia lava i lea faamoemoe faalelalolagi o le olaga ua faasinoina mai e le Atua i tagata i tausaga talu ai.

13. (a) Po o ai e tagofia ma le tusa ai le areto ma le uaina i le Faamanatuga faaletausaga o le maliu o Keriso? (e) Po o ai isi e i ai?

¹³ Ui i ia mea, i tausaga taitasi, i le faamanatuga o le maliu o Keriso, ua tausia pea e nai tagata toaitiiti o le “lafu mamoe itiiti” i le lalolagi le Faamanatuga o le maliu o Keriso. Pei ona faatonu e Iesu, ua latou tagofia le falaoa lē faafefeteina ma le uaina mumu o faailoga e sui aʻi le tino aano ma le toto na foaiina atu e Iesu mo le fanau a tagata. Na fetalai Iesu i a i latou na ia faatonuina e tagofia nei faatusa ua na faia ma i latou se ‘feagaiga mo se malo’; o lea o i latou o e le ni suli o le malo faalelagi e lē tagofia faatusa. (Luka 22:19, 20, 29) Ui i ia mea, o i latou o e ua faamoemoe i le olaga faalelalolagi ua latou ʻau ai pea i tausaga taitasi i se aofaiga tele o e maimoaina le talisuaga a le Alii. Pei o se tasi ua naunautaʻi i le olaga i lalo o le malo faalelagi, o oe foi e ao ona ia ʻau ai.

O LE TOE AFIO MAI O KERISO

14. Po o le a le folafolaga na faia e Iesu e uiga i lona toe afio mai?

¹⁴ I le afiafi po lava a o lumanai lona maliu na folafola atu ai e Iesu Keriso i ona soo faamaoni o le “lafu mamoe itiiti,” o le a ia toe afio mai, ua fetalai atu: “Ou te alu e sauni se mea e nonofo ai outou . . . ou te toe sau, ou te talia foi outou ia faatasi ma aʻu; ina ia i ai outou i le mea ou te i ai aʻu.”—Ioane 14:2, 3.

15. (a) Po o le a fa le Faaaliga 1:7, e uiga i le toe afio mai o Keriso, ma pe o le malamalamaga o lenei mea o se uiga vaaia? (e) Pe faapefea ona tatou iloa e le iloa e le lautele o le fanau a tagata Keriso i lona toe afio mai?

¹⁵ Pe se toe afio mai faitino e vaaia lenei mea? Pe faasino mai e nisi faapea na fai mai ai le Faaaliga 1:7: “Faauta, o loo afio mai o ia ma ao, e iloa atu  foi o ia e mata o tagata uma.” Po o le uiga o lenei mea o le a latou vaaia faitino o ia e o latou mata faaletino. Ua tautala le Tusi Paia e le na o le vaai e o tatou mata faaletino, ae vaai foi i le uiga faapea ua tatou malamalama po o le utagia. Na faaalia e Iesu Faresaio faalotu o ona aso e tauaso ui ina latou fai mai, “Matou te vaai.” E tauaso faaleagaga i latou. (Ioane 9:39-41; Isaia 43:8) O se uiga faapea le vaai faaleagaga ia malamalama ai le Faaaliga 1:7. Ua faia mata uma ia “vaaia” o ia, aua e ui lava ina latou mumusu ona faaalia mai le faatuatua nei, ae pe a faasala e Keriso le au amioleaga, o le a latou iloa le mea ua tupu ma oo mai aua na muai taʻu atu ma logoina i latou. Ui lea, e le taitai lava ona toe afio mai vaaia Iesu aua o ia lava na fetalai manino mai, ua faapea mai: “E toe itiiti ona le vaai mai lea o le lalolagi ia te aʻu, a e vaai mai pea outou ia te au; ou te ola aʻu o le mea lea e ola ai outou.” (Ioane 14:19) O le a le toe iloa ma vaaia e le lautele o le fanau a tagata o ia, aua e toe afio o ia i le lagi. Peitai o le a vaaia ma iloa o ia e le “lafu mamoe itiiti” aua e afio o ia e aveina ae i latou ia faatasi ma ia iina.

16. Po o le a le uiga o le toe afio mai o Keriso?

¹⁶ O lea o le toe afio mai o Keriso e le uiga e toe afio mai o se tagata e ola i le lalolagi. A o lona uiga o le a ia tago ma aaoina lana pule faatupu agai mai i le lalolagi ma ia faatutuina ae lana “lafu mamoe itiiti” nai le oti o lo latou taui i lagi. O le a latou ʻauʻau ai iina i le tauaveina o fuafuaga alofa a le Atua e ala i lona malo. Ua e ola ai i le taimi ua e mafai foi ona iloa faamanuiaga mai le pulega a lea Malo.—Faaaliga 11:15-18.

[Fesili mo le Suʻesuʻega]