Mataupu 2

O le Pogai ua Poto ai Ona Ia Suʻesuʻeina Lau Lotu

1. (a) Talu ai ona ua toeitiiti faaleagaina e le Atua lenei faiga o mea, po o le a le fesili tatou te mananaʻo ia fesiligia e uiga i la tatou tapuaʻiga? (e) Afai tatou te mananaʻo ia uia le ala ua faamaonia e le Atua, o le a le tusi tatou te o i ai?

UA I a i tatou mafuaaga lelei ia mafaufau loloto ai e uiga i lo tatou tuufeagai ai ma le Atua. Ai se a? Aua ua faamaonia le faamaoniga toeitiiti faauma e le Atua le amioleaga ae faavae aʻe lana faiga fou amiotonu. O lea ua manaomia ai ona tatou fesili: “Po o ou tapuaʻi i le Atua i le ala ua ia finagalo malie i ai?” E le o soo se tagata a o le Atua, o le faamasino i le mea ua ia finagalo i ai. O le maua la o le finagalo o le Atua, tatou te manaomia ona o i le Tusi Paia. O iina ua ia taʻu mai ai ma le manino i a i tatou le ala ia ui ai pe afai tatou te mananao e fia maua le ola faavavau. (Faataoto 3:1, 2) Afai tatou te avea i fale i loto le mea ua ia tulei i ai ma faatatauina i o tatou olaga, o le a tauia i faamanuiaga ofoofogia mo i tatou, nei atoa ma aso o sau.

2. Po o a faamatalaga o i le Tusi Paia e faaalia ai e le fiafia le Atua i lotu uma?

² Pe a tatou suesue le mea ua fai mai ai le Tusi Paia i lenei mataupu, po o le a tatou te maua? Po o ia aʻoaʻo mai faapea e fiafia le finagalo o le Atua i le selau ma selau o miliona o tagata o faia lotu i ala eseese ua faapea ona tele? Po o ia faaalia mai faapefea o loo lelei lotu uma? Ina ia mafai e i tatou ona iloa po ua faapefea lona finagalo i le mataupu, ua faamauina e le Atua lenei faamatalaga manino i lana Afioga: “Auā e va tele le faitotoa, e lautele foi le ala e tau atu ai i le malaia, e toatele foi i latou o e ui atu  ai. Auā e va apiapi le faitotoa, e lauitiiti foi le ala e tau atu i le ola, e toaitiiti foi i latou o e maua.” (Mataio 7:13, 14) Paga le manino o ia upu ua tali mai i a tatou fesili! Ua latou faaalia ai e toatele tagata ua le o tapuaʻi i le Atua i le ala e finagalo fiafia ai le Atua. Na o le toaitiiti o loo i le auala e taʻitaʻia ai i le ola.

3. Pe i ai ni mea ua faia i le igoa o le lotu e te le faamaonia?

³ Atonu ua e ioe lelei lava oe i le mea moni, o le tele o lotu ua le faamaonia e le Atua. Le tioa ona tele mea ua faia i le igoa o lotu e te le ioe i ai ma faamaonia. Pei o lenei, afai e te tagaʻi faataamilo i lotu ma e maimoa i tagata o e o ola i olaga eleelea, a o e ua uiga ma foliga mai e amiotonu, ua e iloa ua i ai se mea sesē. (2 Timoteo 3:4, 5) Ma pe a e faitau i le nusipepa faapea ua talia ma faamaonia i luma o le lautele e nisi faifeau le nonofo o tagata e lei faaipoipoina ma ua latou faapea mai foi o tauatane ua lelei lava i lalo o nisi uiga, ae ua e malamalama lelei lava i ai, ua le o le mea lea ua tulei i ai le Atua. E te manatua na faaumatia e le Atua aai anamua o Sotoma ma Komoro. Ai se a? Aua sa latou faia ia mea! Ua faapea ona e iloa o le a le faamaonia e le Atua se lotu o taʻu atu i tagata ua lelei ma saʻo ona fai faapea.—Iuta 7.

4. (a) E le gata i amio ma le agalelei, a o le a le isi mea e tatau ona tatou mafaufauina e uiga i lotu, pe a vaai atu i fetalaiga a Iesu o i le Ioane 4:23? (e) Pe ai se a tatou te mananaʻo ai e suesue aʻoaʻoina ai tatou?

⁴ Ui i ia mea, e le taumate ua e faalogo ua tautala tagata: “E le afaina po o le a e te talitonu i ai, tau lava ia e uia se olaga mamā ma ia agalelei i ou tuaoi.” Peitai pe o mea uma ia e ifo ai i le Atua i se auala e talileleia mai ai? O ia mea e tatau ai, ae i ai mea e sili atu ona manaomia e le Atua i lo na mea. Ua aafia ai foi aʻoaʻoga. Ua logoina mai i a i tatou e le Tusi Paia faapea “o e tapuaʻi faamaoni latou te tapuaʻi i le Tamā i le agaga ma le faamaoni.” (Ioane 4:23) Afai la ia talia a tatou tapuaʻiga e le Atua, e tatau ona ia mauaʻa lelei aʻe i le upu moni, le Afioga a le Atua. Sa aʻoaʻia e Iesu i latou o e taofi o auauna i le Atua, a o e faalagolago tele i uputuu a tagata ua latou faasilia i lo le Afioga a le Atua. Na ia faatatauina  i a i latou afioga lava a le Atua o i le Isaia 29:13, ua faapea mai: “E tapuaʻi fua mai i latou ia te au i lo latou fai ma mataupu o poloaiga a tagata.” (Mataio 15:9) Talu ai la ona tatou te le mananao ia iʻuvale la tatou tapuaʻiga, e tāua mo i tatou taʻitoatasi uma ona ia suesue lana lotu.

5. Pe ai se a e ao ai ona suesue, e le na o tatou talitonuga a o aʻoaʻoga foi a soo se faalapotopotoga lotu o tatou ʻau ai?

⁵ Tatou te manaomia ona ia suesue i a lē na o mea ua tatou talitonu faaletagata i ai, ae i le mea ua aʻoaʻoina mai e soo se faalapotopotoga lotu o ʻauʻau atu i ai. Po o tala feagai atoatoa ia aʻoaʻoga ma le Afioga a le Atua, po o faavaeina aʻe i latou i uputuu a tagata? Afai o i tatou o ni tagata alolofa i le upu moni ua augapiu lava la ma se mea e fefe ai mai sea suesuega. E ao ina faia o le faanaunauga faamaoni o i tatou taʻitoatasi uma ia aʻoaʻoina le finagalo o le Atua mo i tatou, ma ia faia i lea taimi.—Ioane 8:32.

6. (a) Po ona o le mea moni faapea ua faaaogaina i nisi taimi le Tusi Paia i se lotu pe faamaonia ai o aʻoaʻoga a le lotu e mai le Tusi Paia? (e) Pe ai se a e tatau ai i le lotu ua faamaonia e le Atua ona ioe i faamatalaga uma faatasi ma le Tusi Paia?

⁶ Ua na ona o se faatagā mea moni le faapea ua maua e tagata o lotu le Tusi Paia po o lea o faitauina mai foi i nisi taimi i a i latou mai pulelaa, a ua le o se mea e faamaonia ai i lea lava mea ona faapea o mea uma ua aʻoaʻoina ai, e mai le Tusi Paia. Ua lelei le i ai o le Tusi Paia; o le mea e ao ina ia tofusia ai ma i tagata taʻitoatasi uma. Peitai e tatau foi ona tatou iloa le mea o fai mai ai le Tusi Paia ma talitonu i ai. Afai e talia moni e se lotu le Tusi Paia o le Afioga a le Atua, ua le faaaogaina la na o nisi vaega ae lafoaʻi isi vaega. “O Tusi Paia uma lava e mai le Agaga o le Atua ia, e aogā foi ia e aʻoaʻo ai, e aʻoaʻi ai, e faatonu ai, e faapoto ai foi i le amiotonu.” (2 Timoteo 3:16) Talu ai ona ua faapea lenei mea, o le lotu la ua talia e le Atua e tatau ona ioe i ona faamatalaga uma faatasi ma le Tusi Paia.

7. Pei ona faaalia e le aposetolo o Paulo, pe avea le faamaoni o tagata tapuaʻi lava latou e faasino mai ai le latou lotu ua faamaonia e le Atua?

⁷ O le tagata e manao e faafiafia le Atua e tatau ona faamaoni. Peitai e le na o le faamaoni o se tasi  e faamaonia ai i fofoga o le Atua lana lotu. Na faagaeeina e le agaga o le Atua le aposetolo o Paulo e tusi faatatau i ni tagata o ona aso: “Auā ou te molimau ia te i latou, ua latou maelega i la le Atua, a e le tusa ma le poto. Auā ua le iloa e i latou le amiotonu mai le Atua, ma ua saili e faatu la latou lava amiotonu, ua latou le usiusitai ai i le amiotonu mai le Atua.” (Roma 10:2, 3) O le iuga la, ua tuu sese lo latou faamaoni. O le faalavelave ua latou vaavaai i le itu sese mo le faatonuina. Ua latou taofi pea i faiga faalotu Iutaia, o le mea na teea le Alo o le Atua ma ua faapea ona lafoaʻia lea lava mea e le Atua.—Galuega 2:36, 40; Faataoto 14:12.

8. Pe na faaalia mai faapefea e Iesu Keriso e le o lotu uma faapea ua taofi e Kerisiano ua tala feagai ma faamaonia e le finagalo o le Atua?

⁸ Ae po o le a, la, lotu o latou tauaveina le suafa o Keriso ma latou faaalialia ua latou talia o ia o lo latou Alii? Pe le avea la latou talaiga i lona suafa e faamaoni ai faapea ua finagalo malie i ai le Atua? I le vaai atu i tusi ua uma ona mafaufauina atonu ua maua ai lau faaiʻuga ua leai. Afai e faapea, o le uiga la i lenei mataupu ua e ioe faatasi ma Iesu Keriso, o le ua tofia e le Atua o se faamasino faalelagi; aua ua ia lapataʻi mai i tatou, ua faapea mai: “E le sao atu i le malo o le lagi i latou uma o e fai mai ia te aʻu, Le Alii e, Le Alii e; na o le na te faia le finagalo o loʻu Tamā o i le lagi. E toatele latou te fai mai ia te aʻu i lea aso, Le Alii e, Le Alii e, matou te lei perofeta ane ea i lou igoa . . . ? Ona ou taʻutino atu ai lea ia te i latou, Ou te lei iloa lava outou; ina o ese ia outou ia te aʻu, o outou o e fai amio leaga.”—Mataio 7:21-23.

9. Po o le a e manaomia ia le gata i le poto i le Tusi Paia mo le lotu a le tagata e fiafia ai le finagalo o le Atua?

⁹ E tāua mo le faamaonia e le finagalo o le Atua le poto i le Tusi Paia ma le finagalo o le Atua. Peitai, e pei ona fetalai Iesu o le faia o lea finagalo e taulia. E tatau i le tagata ona i ai galuega ia tausisi maumauaʻi i ai faatasi ma le mea ua aʻoaʻoina ai. (Iakopo 2:26) O le faafiafiaina la o le finagalo o le Atua, e tatau i le lotu a le tagata ona ia tala feagai lelei  atoatoa ma le Tusi Paia ma ia faatatauina i gaoioiga uma o le olaga.—Luka 6:46-49.

10. Po o le a le fua o le a aumai e le lotu moni e uiga i olaga faale tagata o i latou o e faia lea lotu?

¹⁰ Na fetalai Iesu e te mafai ona e iloa pe o faia e se tagata le lotu moni i ona “fua,” o lona uiga, o mea ua ia fai. (Mataio 7:20) I lea lava ala e tasi, tatou te mafai ona iloa lelei se lotu i le ituaiga tagata na te fua mai. E ao i le lotu moni, ona fuaina mai tagata sili ona lelei—tane ma tamā sili ona lelei, avā ma tinā sili ona lelei. E ao ona aumai ai tagata o ē faamaoni, e tu ese mai latou i isi, aua ua latou fai mea ua tonu. Po ua le o mea ia e te vaaia ma iloa i se lotu ua tosina moni se tasi i le Atua? E silasila foi le Atua mo ia mea, ma latou iloiloina pe se lotu lea e faamaonia e le Atua pe leai.

11. Po o le a le ala na uia e tagata o Perea anamua e lelei pe a tatou mulimuli ai?

¹¹ Ma le mautinoa lava e te le manao ia faavasegaina oe faatasi ma i latou o e ua taofia mai le ulufale atu i le malo o le Atua, aua ua lē taulau ona latou faia le finagalo o le Atua. O le a aoga lelei mo oe, la, ona ia e faamasani lelei i le Tusi Paia. O le tusi o loo e faitauina nei ua fuafuaina e fesoasoani i a te oe ia faia faapea. Mulimuli i le ala o na tagata Perea anamua o e na latou faamaonia le Afioga a le Atua aua na latou “talia le upu ma le fiafia tele, ua saili i Tusi i lea aso ma lea aso, pe moni ia mea.”—Galuega 17:11.

12. (a) Pe mata e tuuina faapefea lo tatou alofa mo le Atua ia tofotofoina, atonu po o au uo ma ou aiga? (e) Po o le faamaoniga mai i a te ai e ao ona sailia pea?

¹² A e suesue le Afioga a le Atua, o le a e iloa o le a tofotofoina lou alofa mo le Atua. E i ai tagata, atonu o ni au uo mamae po o ē tou te aiga, o ē lē fiafia atu i au suesuega o le Tusi Paia. (1 Peteru 4:4; Mataio 10:36, 37) Pe latou te taumafai e faavaivaia oe. Pe latou te faia lenei mea i le faamaoni uma, aua latou te le iloa upu moni ofoofogia ua maua i le Tusi Paia. Atonu e te mafai ona fesoasoani atu i a te i latou. I isi foi mea, o le tetee mai pe faasagatau mai tagata o e leai se alofa mo le Atua. Afai e faapea ona oo mai lea, manatua, o le i ai o le faamaonia e le finagalo o le Atua e sili mamao atu lea ona taua i lo le faamaonia  e tagata. E le o se tagata, a o le Atua o lē o le a ia aumaia i a te oe le ola faavavau pe afai e te alofa i a te ia i luga aʻe o tagata ma isi mea uma.—Mataio 22:37-39.

13. Afai tatou te saili ia fai le finagalo o le Atua, po o le a e ao ona tatou tatalo i ai?

¹³ Vaavaai pea i le Atua mo lona fesoasoani ma le taʻitaʻiga. Ia tatalo pea lava, pei ona faia e le fai salamo: “Ieova e, ia e faafofoga mai i laʻu tatalo . . . Ia e aʻoaʻo mai ia te aʻu e fai lou finagalo, aua o oe lava loʻu Atua.” (Salamo 143:1, 10) Afai e te manao ma le faamaoni ia iloa ma fai le lotu ua ia faamaonia, o le a ia tali mai i lau tatalo. Ma o le a ia aumai oe ia au au faatasi ma i latou o ē faia moni ia “tapuaʻi i le Tamā i le agaga ma le faamaoni.”—Ioane 4:23; tagai foi i le Mataio 7:7, 8.

[Fesili mo le Suʻesuʻega]