Mataupu 8

Pe Aiseā ua Faataga ai Pea e le Atua le Amioleaga Seia oo Mai i o Tatou Aso?

1. Po o le a mea ua oo i ai le fanau a tagata e uiga i le amioleaga?

I LE tala tuufaasolo atoa uma o le tagata ua tele lava le amioleaga. Ma i aso nei, soo se mea lava e te tagaʻi i ai i le lalolagi o loo i ai le toto masaa, fasitagata, ita ma le amioleaga. Ua uiga soo aʻi lava o tagata mamā ma e taualoa ua mafatia i faiga amioleaga a isi. O i latou ua faaumatia e sauaga, atonu po ua leai ni o latou aiga ma fale, o e ua pele po o i latou lava ma o latou ola. Po ua e oo i ai pe leai, ae le taumate na e ui mai ai i mea ua faapogai mai ai ona mafatia faalemafaufau i mea ia e i ai le lē faamasino tonu, agaleaga, le faamaoni po o le taufaaʻoleʻole.

2. O pogai ua faataga ai e le Atua amioleaga e i ai le mea e fai i ai i fesili ua faalaulau tutu mai i le a le taimi?

² Pe ai se a ua faatagaina ai e le Atua sea amioleaga seia oo mai i o tatou aso? E tele ni mafuaaga, ae ina ia malamalama i ia mafuaaga ma le tusa ua tatou manaomia ona suesue finauga na mapuna aʻe i le taimi o le uluai fouvalega. E le taumate ua e faitau i le tala o lenei mea i le Tusi Paia i lona mataupu e tolu o le Kenese. Sei tatou mafaufau mai la, i le uiga moni o ia mea.

3. Taʻu mai sina faamatalaga puupuu i le mea na tupu i le taimi na paʻū ai le tagata i le agasala.

³ E faapuupuu atu le mea na tupu: Na tulei Ieova i le tamaloa e faalagolago lona ola i le usiusitaʻi i Le na faia o ia, o lea o le lē usitaʻi e iʻu i le oti. (Kenese 2:17)  Sa faauigaeseina e le fili o le Atua, o Satani, lenei faamatalaga manino. Na ia taʻu i le āvā a Atamu faapea e mafai ona lē usitaʻi le ulugatagata ma, “Lua te le oti lava.” Sa ia taofi lava o sea le usitaʻi e matua faaleleia ai mea mo i laʻua, e faapogai ai ona pupula o la mata ma o le a faapea ona “pei ni atua o loo iloa le lelei ma le leaga.” (Kenese 3:4, 5) O lenei, po o le a na aafia ai i lenei fouvalega a Satani?

O FINAUGA UA MAPUNA AʻE

4. Taʻu mai nisi o finauga ua mapuna aʻe i le fouvale a le Tiapolo.

⁴ Na faatutuina aʻe ni finauga po o fesili tāua. Muamua, na fesiligia e Satani le moni atoatoa o le Atua. O le mea na oo i ai, na ia taʻua le Atua o le pepelo, o lea mea e uiga i le mataupu o le ola ma le oti. Lona lua, na ia fesiligia foi le faalagolago o le tagata i Le na faia o ia mo le ola ma le fiafia lē uma. Sa ia taofi foi o le ola o le tagata po o lona mafaia o mea ia pulea ana mataupu ma le manuia, e lē faalagolago lea i le usiusitaʻi i a Ieova. Na ia finau mai foi e mafai e le tagata ona tutoatasi i a te ia lava, ae le o Le na faia ia, ma ia pei o le Atua e filifili ia mo ia lava i le mea ua saʻo pe sese, lelei pe leaga. O lona tolu, o le finau faasaga lea i le tulafono ua taʻu atu a le Atua, ua ia faapea ona taofi ai o ala o pulega a le Atua ua sese ma ua le mo le lelei o ana mea-fai-ola ma i lenei auala ua oo ai lava ina ia luia le aia tonu o le pule a le Atua.

5. Pei ona faaalia i le tusi a Iopu i le Tusi Paia, po o le a le isi fesili na faatu aʻe e Satani?

⁵ Peitai ua oso aʻe le isi fesili i gaoioiga a Satani, pei ona ua faaalia mulimuli i le Tusi Paia i le tusi a Iopu mataupu 1 ma le 2. I le tala i le tagata e igoa i a Iopu, ua faaalia ai ua fesiligia e Satani le faatuatua ma le faamaoni i a Ieova le Atua o mea-fai-ola uma. I le tele o upu, ua faapea ona taofi Satani, o i latou o auauna i le Atua, ua latou faapea, e le ona ua latou alolofa i le Atua ma lana pulega amiotonu, ae mo na o mafuaaga manatu faapito pei o faamanuiaga faaletino na avatu e le Atua i a i latou. Ua ia taofi lava, afai e aveesea ia mafuaaga, ona liliu ese ai foi lea e oo lava i se tagata pei o Iopu, mai le Atua. (Iopu 1:6-11; 2:4, 5) Ioe, o le fouvale a Satani i Etena,  na fesiligia ai le faamaoni o mea-fai-ola uma a le Atua i le lagi ma le lalolagi. Afai e tuuina atu i se tofotofoga, pe o le a faamaoni pea o latou alofa mo lo latou Tamā faalelagi ma faaalia ai ua latou faasilisilia lana pule i lo soo se isi lava pulega?

O LE ALA A LE ATUA E FAALELEIA AI FINAUGA

6. Pe na faatu aʻe e Satani se fesili i le mana o le Atua? Po o le a la le ituaiga finauga ia faaleleia?

⁶ Matau mai, faamolemole, e lei faatuina aʻe e Satani soo se fesili i le malosi o le Atua. Sa ia le luʻia Ieova e faaaoga lona malosi e faaleagaina ai o ia, o sē tetee mai. Peitai sa ia luʻia le āiā o le Atua i le pule ma le saʻo o lona ala i ana pulega. Sa ia fesiligia foi le faamaoni o mea-fai-ola a le Atua. O lea o se finauga i le amio ia faaleleia.

7. Faamatala mai se faaaʻoaʻoga e faaalia ai le ala e faaleleia ai se finauga i amioga.

⁷ O moliga sese a Satani faasaga i le Atua po ua faataʻitaʻia mai i se tulaga iloga i ala faaletagata. Faapea o se tagata ua i ai se aiga e toatele ua tuuaʻia e se tasi o ona tuaoi i mea sese e tele e uiga i le auala o ia pulea ai lona aiga. Faapea foi la, ua tautala le tuaoi, e leai se alofa moni o tagata o le aiga o le tagata lea mo lo latou tamā, ae na ona nonofo ma ia ona e maua ai mea e ʻai ma mea faaletino ua ia aumaia i a i latou. Mata la pe faapefea ona tali e le tamā o le aiga ia moliga? Afai na te faaaoga le faasauā i lē ua molia o ia, o le a lē faafetaiaʻia ma talia ai e lea mea le moliga. Ae o le a na ona faapea ai e moni ia mea. Peitai, paga se tali lelei i lea mea o le a maua pe a ia tuu atu i lona lava aiga e fai ma ana molimau e faaalia ai lava lo latou tamā o se ulu amiolelei ma le alofa o lo latou aiga ma ua latou fiafia e ola ma nonofo faatasi pea ma ia, aua ua latou alolofa i a te ia! O le a faapea lava ona matua viia ai o ia.—Faataoto 27:11; Isaia 43:10.

8. Po o le a ua faaaʻoaʻoina mai e le Atua i le faatagaina o le taimi e faaleleia ai le finauga ma le leai o se toe faaletonu?

⁸ Ua faataʻitaʻia i ni uiga iloga o mea ua faia e le Atua, lenei mea. Ua le gata ai, a ua sili ai lava ona  ia faataga le taimi—toe toe ono afe nei tausaga—mo le finauga ia faaleleia e aunoa ma se faaletonu e tasi. Ua ia faatagaina foi lenei taimi, ia le na ona ia faatagaina ai ana mea-fai-ola faamaoni ia faamaonia o latou alofa vilivilitaʻi i a te ia ma lana pule, ae peitai ia faataʻitaʻia mai ai e soo se isi lava ituaiga faiga pulega, e iʻu atu lava na o le leaga. (Faataoto 1:30-33; Isaia 59:4, 8) I le fouvale faasaga i a Ieova le Atua, ua faatuina aʻe ai e Satani ia lava o se pule faivā. I le ui i le auala na fautuaina e Satani, na faaalialia ai le uluai ulugatagata i laʻua ua tū tū matāvao mai i laʻua i le pule a Ieova ma ua la i lalo ai o le tausiga a Satani. (Kenese 3:6; Roma 6:16) Ina ua tuu atu e le Atua i laʻua o Satani ma le tagata e o ia oo atu i le mutaaga o a la taumafaiga e galulue ma tū tū matāvao mai i Le na faia i laʻua, ma o lo la lē taulau atoatoa i le aumaia o se malo lelei, faatasi ma aoga moni mo le fanau uma a tagata, o le a matua faamaonia lava i le lumanai e le mafaafitia. I le taimi nei ua aumaia e Ieova i latou o e alolofa i a te ia e faailoaina lona suafa ma fuafuaga mo le faamalamalamaina o i latou uma o e alolofa ma saili i le mea saʻo.

9. Po o le a na tulei atu i ai le Atua i se Farao o Aikupito e uiga tasi lelei lava ma le tala i a Satani le Tiapolo?

⁹ O lea la, o le tulaga ua pei lava o lea na aafia ai se Farao o Aikupito, o lē na ui foi i se ala e tusa i le ala o Satani le Tiapolo, o lē na tetee atu i a Ieova le Atua, na tulei i ai Ieova: “Auā o le a aʻu faaloaloa nei loʻu lima, ou te taia oe ma lou nuu i le faamaʻi, ina ia fano ai oe i le nuu. E moni lava, o le mea lava lea ua ou faatuina ai oe, ina ia ou faaali ai loʻu mana ia te oe, ma ia taʻua loʻu igoa i le lalolagi uma lava.”—Esoto 9:15, 16.

PO O A UA FAAALIA E IʻUGA?

10. Po ua faaaogaina faapefea e Satani le taimi ua faatagaina atu e le Atua faatatau i le lagi ma le lalolagi?

¹⁰ Ua faaalia e le Tusi Paia ua faaaogaina e Satani le taimi e fausia aʻe ai se faalapotopotoga i le lagi ma le lalolagi, o le mea o ia pule ai. O le tele o lana tausiga o le lalolagi na faailoina ane e le mea moni na mafai ai ona ia ofo atu i a Iesu malo uma o le lalolagi  ae ia ifo ane Iesu. (Mataio 4:8, 9) O le pogai lea ua taʻua ai Satani o le “alii o le lalolagi nei.” (Ioane 16:11) Po o le a le uiga o lenei mea mo le fanau a tagata, ma po o le a le iʻuga o le ala o le tagata e tū tū matāvao mai i le Atua ma lana pule?

11. Po o le a le iʻuga faanoanoa o le ala o le tagata i le tutoatasi ese mai le Atua ma lana pulega?

¹¹ Ua faamaonia mai e tala tuu faasolo lenei mea moni ua le aumaia ai se filemu, loto malie ma le ola faavavau i le fanau a tagata. A ua aumaia le tuufaafeagai: ua afe ma afe tausaga o le mapuitiga, puapuaga ma le oti. O le tala faamaumauina o tala tuu faasolo ma le tulaga mataʻutia o mea i le lalolagi o aso nei, o faamaoniga ia o le lē manuia o pulega a tagata e aunoa ma le Atua. Ua taumafaia e le tagata ituaiga uma o malo, a ua aunoa pea ma se saogalemu ma se fiafiaga tumau e maua. E moni, ua alualu i luma i ala tau mea faitino. Ae pe ua agaʻigaʻi moni i luma pe a auina atu tagata i roketi i le masina, a ua le mafai ona ola faatasi i le filemu i le lalolagi? Po o le a le lelei ua i ai mo i latou ua fausia fale ma ua faatumuina i meaafale mo le lelei uma, ae na ona faia ia taisaeluaina ma malepe i talaga faaipoipoga ma le amioleaga? Po ua avea taua, fetauaʻiga i ala tetele, faatamaʻiaga o olaga ma mea aoga atoa ma le faalauaʻiteleina o le amioleaga atoa ma le lē taupulea ma mea e mitamita ai? E leai lava! Peitai o ia mea o ni fua o le pulega ua le amanaʻia e le Atua. Ua moni lava, e pei ona fai mai le Failauga 8:9, “e pule ai le tasi tagata i le tasi, e leaga ai o ia lava.”

12. (a) Po o le a fa se faatonu lauiloa o le nusipepa e uiga i le mafuaaga o le lē fiafia i le lalolagi? (e) E tusa i le perofeta o Ieremia, pe mafai e le tagata ona faatonu ma le saogalemu ona lava laasaga?

¹² O lea la, o le faatagaina ua loa o le amioleaga e le Atua, ua faamaonia ai ma le leai o se faaletonu o taumafaiga a le tagata e ‘fai ma Atua,’ o se matua lē taulau e faanoanoa ai. (Salamo 127:1) Fai mai se faatonu nusipepa lauiloa: “O le tele o lo tatou saili atu mo se faamaoni, o le tele foi lea o lo tatou le maua o le fiafia i le lalolagi ona o mea e fai e le tagata. O le iʻo o le vaivai, ona ua tatou le faaleleia le  faafitauli o le pulea e le tagata lava ia.” * Ua tautala lava ma le saʻo le tusitala faagaeeina o le Tusi Paia o Ieremia: “Ieova e, ua ou iloa e le o i le tagata lona ala, e le o i le tagata e savali ona faatonuina le mea e ui ai o ia. Ieova e, ia e aoai mai ia te aʻu.”—Ieremia 10:23, 24; tagaʻi foi i le Faataoto 16:25.

13. Talu ai ona ua faamaonia o le lē taulau o pulega a Satani, po o le a ua matua amiotonu atoatoa ai nei le Atua e faia?

¹³ Ua aumaia e le pule a Satani le faiga o mea a le lalolagi, o le amioleaga ma le oti, ma o lana pulega ua faia i auala taufaaʻoleʻole, fao faamalosi ma le manatu faapito. Ua faamaonia o ia e ia lava e lē agavaa e fai ma pule i soo se mea. O lea ua matua amiotonu ai nei Ieova i le faaleagaina uma o lenei fouvale maulalo faatasi ma i latou uma o e ua ʻau ai i ana faiga amioleaga. (Roma 16:20) Ae po o le a le faamaoni o mea-fai-ola uma a le Atua i le pulega alofa a Ieova ma le taofi o Satani faapea o le a liliua ese uma i latou pe afai e tofotofoina?

14. (a) Pe mai le a le pogai lelei ua auauna ai nisi o le fanau a tagata ma le loto i le Atua? (e) Ona o le tausia o lona maelega i le Atua ui lava i le faasoesa mai o Satani, po o le a na faamaonia ai e Iopu le Tiapolo?

¹⁴ Ua silafia e Ieova le Atua “e le uma le alofa” ma na ia silafia foi o le a auauna nisi o le fanau a tagata i a te ia ma le loto, mai le alofa, ae le ona ua faalaeiauina pe faamalosia i latou. (1 Korinito 13:8) Tele afe ma afe tagata ua faia lenei mea i totonu o senituri ma senituri. O Iopu le tasi o i latou. Ui lava ina aumaia e Satani mea faigata tetele ma le mataʻutia faasaga i a te ia, ma na matua tafitafia ai o ia mai mea uma, o lana fanau ma lona soifua maloloina, sa faaalialia pea e Iopu: “Sei oo lava i loʻu oti o le a ou le aveesea loʻu maelega.” (Iopu 27:5, NW) Ua faamaonia ai e Iopu Satani o le pepelo.

15. (a) Pe na tali faapefea e Iesu le luʻi sese faasaga i a Ieova? (e) Pe mata na mafai ona faamaonia Atamu lelei atoatoa i le Atua?

¹⁵ Pei ona tatou vaaia na teea e le tagata lelei atoatoa o Iesu tofotofoga uma a Satani ma faalaeiauga.  E le gata i lea, ae ina o sasaina o ia e fitafita leoleo ma tuʻituʻia i se laau tiga ma le saua ia oti, sa taofi mau pea Iesu i lona faamaoni i le Atua. (1 Peteru 2:23) Ua faamaonia ai i lea mea, sa mafai foi e Atamu lelei atoatoa ona faia foi lea lava mea e tasi pe ana ia manao i ai, ona faapea lea ona le amioletonu ai le Atua i le manaomia o le usiusitaʻi atoatoa mai le tagata. (2 Tesalonia 1:4, 5) Ona o lona faamaoni i a Ieova, na avatu ai e Iesu le tali aupito sili ona lelei i luʻi pepelo a Satani.

16. (a) Ui ina faamaonia atoatoa o se pepelo, pe ai se a na faaauau ai pea e Satani ona faasauā i e alolofa i le Atua? (e) Po o a faamaoni o auauna faatuatua a le Atua ua fai ma faamaoniga maumaututu?

¹⁶ Peitai, ua filia e Satani lona mafaufau i le manatu faapito ma le faamaualuga, ua ia musu ai e alu lemu i lona ala valea. Ui lava ina ua leva talu ai ona faamaonia ua sese o ia, ua ia faaauau pea ona sauaina tagata o le Atua. (Faaaliga 12:17) Talu ai le maliu o Iesu, tele afe ma afe o Kerisiano ua auauna i a Ieova le Atua auā ua latou alolofa i a te ia ma mananao i lana pulega alofa ia i latou. Ma i le taimi nei, ua selau ma selau o afe ma afe e ua alagaina o latou faamaoni i a Ieova le Atua o le pule. (Faaaliga 7:9, 10) O lo latou tausia ma le faamaonia o Afioga a Ieova ma le latou faaaloalo mo lana tulafono, ua mafai ai e i latou ona ola i le loto malie, ui lava i le tele o le tetee mai o Satani. O le ʻaufaatasi, alofa ma le maelega ua faaalia e auauna a le Atua, i le faagasolo mai o senituri, ua aumaia ai se faupuega o faamaoniga o ala o pulega a Ieova o le alofa ma o lea lava le ala saʻo, e mafai ai e tagata ona tumau le faamaoni i a te ia i lalo o tofotofoga aupito mamafa tu, ma ua faapea ai o Satani o le pepelo aupito sili o taimi uma.

PO O LE A LE UMI O LE FAAAUAU O LE TOFOTOFOGA?

17. Po o le a faataga ma le faalemautinoa le amioleaga, ma po ua tali faapefea e le tusi a Tanielu o le Tusi Paia lea fesili?

¹⁷ Ua faatagaina e Ieova le amioleaga sei oo mai i o tatou aso, ina ia faaleleia ai finauga atoa uma ua  faatu aʻe e Satani. Peitai o le a ia le faatagaina le amioleaga e faaauau pea ma le lē iloga. Ua ia tuu le taimi patino o le a ia aumaia lea mea i lona iʻuga. Sa faasinoa mai e le tusitala o le Tusi Paia o Tanielu i lenei mea ua leva, a o ia tusi mai: “Aua e oo lava le iuga i ona po ua atofaina.”—Tanielu 11:27.

18. Ui ina aliali mai o se vaitaimi toeitiiti 6,000 tausaga ua umi i le tagata, pe umi lea i le Atua? O lea pe faapefea ona silasila le Atua i le afe tausaga?

¹⁸ Toeitiiti ono afe tausaga mai le aso o Atamu i o tatou aso, ua pei o se taimi umi pe a faatatau i le vaaiga a e ola tusa e fitusefulu tausaga. Peitai talu ai ona ua tuu e le Atua le taimi, e lelei ona talisapaia lana silafaga i mea. Fai mai le perofeta o Mose i le Salamo 90:4 e uiga i a te ia: “Aua e tusa i ou luma le afe o tausaga ma le aso ananafi ina o mavae atu.” O se taimi umi se tausaga i se tamaitiiti lima tausaga, peitai i se tamaloa e onosefulu ua matua puupuu lava le faatusatusa atu i ai. Faapea foi la i a Ieova, o le soifua e faavavau, o se afe o tausaga ua pei o se aso e tasi.—2 Peteru 3:8.

19. Pe ai se a ua le o se amioletonu i a i tatou le faatagaina e le Atua le amioleaga?

¹⁹ O lenei taimi ua tuu ua faatagaina ai le amioleaga, ua le o se amioletonu lea i a i tatou. Aua, ana fai ae olopalaina loa e le Atua le ola o e na fouvale uma i Etena, po ua le taitai ona tatou fananau mai! Ua le taitai foi ona i ai tatou le avanoa mo le ola faavavau i lana faiga fou o mea. O lea, o le mea moni, na le faapuupuuina e Ieova lona talitiga i se taimi muamua atu, ua tuuina mai ai i a i tatou le avanoa e ola ai nei ma lea e faavavau i le lumanai. (2 Peteru 3:9, 15) I le ma lea foi, ua faaaogaina e le Atua lenei taimi e saunia ai mo le faatauina o le tagata e ala i a Keriso.—Kalatia 4:4, 5.

20. Po ua faamatala mai faapefea e le Tusi Paia i le Roma 9:22-24, le pogai ua faataga ai e le Atua le amioleaga?

²⁰ Ua le gata ai i lea, ua faaaogaina e le Atua le taimi e filifili ai ma sauniunia ai mai le fanau a tagata “ipu o le alofa tunoa.” O i latou ia o e o le a faia aʻe ai le malo amiotonu i luga o i latou o e o le a ola e faavavau i le lalolagi i le faiga fou o mea. Paga faamanuiaga, o uiga o lenei malo faalelagi mo le   fanau a tagata! I le vaitaimi ua saunia ai e le Atua “ipu o le alofa tunoa,” ua ia faaalia ai le tele o lona onosaʻi. Ua ia faapalepale i le amioleaga o “ipu o le toasa.” Ua ia taofia lo latou faaumatiaga. Ai se a? Ua tali manino mai le Tusi Paia: “E faailoa mai ai foi le faulai o lona viiga i ipu o le alofa tunoa.” (Roma 9:22-24, NW) I le malo faalelagi o le Atua o le a oo i ai le viiga o le puipuia o le suafa o le Atua ma le faaumatiaga o e amioleaga, o “ipu o le toasa.” Atoa foi, ma lona faatagaina o le amioleaga e faaauau pea mo se taimi, o tafa o uiga faaperesona o le Atua e lē vaaia e pei ona masani ai: lona alofa ma lona onosaʻi. Ua faatamaoaigaina tele ai e ia mea mo lo tatou fiafia i Le na faia i tatou ma o tatou lava uiga faaletagata, a o tatou faaaʻoaʻo atu i a te ia.—Efeso 5:1.

21. Po o le a le isi aoga ua sau ai i le faatagaina e le Atua o le amioleaga e faauau i lona taimi tuupoina?

²¹ Ua i ai foi ma le isi aoga moni mo le faatagaina e le Atua o le amioleaga i le umi e pei ona ia tuu i ai. Afai i se isi taimi i le lumanai e ao i soo se tasi ona fesiligia auala a le Atua o le faiga o mea, ua le toe tatau ai mo ia ona toe faataga atu lea taimi e tasi e taumafai ai i nisi ala. O tala faamaumau o le ono afe tausaga o le lē taulau o Satani, o ana temoni ma tagata o e ua taumafai e tū tū matāvao mai i le Atua, ua aumai ai le tali ua lava. Ua leai se tasi ua mafai ona taofi ma le saʻo: ‘Latou te lei maua se avanoa,’ pe faapea ane, ‘Afai ana toe tele le taimi latou te maua.’ Ua lava le taimi faatagaina e faamaonia ai le ala o le fouvale faasaga i Le na faia mea ua matua faalavelave! O lea o le a matua taʻuamiotonuina atoatoa le Atua i le olopalaina faavave o soo se fouvalega e faamataʻuina ai le filemu i le lumanai o le vateatea.—Salamo 145:20.

22. Pe toe fia le umi o le a faataga ai pea e Ieova le amioleaga, ma po o le a le avanoa ua aumai e le taimi totoe i a i tatou?

²² Ua na o se aga le taimi o toe a o lei faaumatia e Ieova faiga amioleaga o mea. Ua aumaia ai i a i tatou e lenei taimi o toe le avanoa e auai ma ia ma ia ‘faafiafia lona loto.’ (Faataoto 27:11) Afai tatou te lolo atu ma le loto i lana pulega, o le a ia faamanuia  i tatou i le ola faavavau i lana faiga fou o mea. O le filifiliga la i le talia po o le teea ua faatuina nei i luma o i tatou taitoatasi.—Teuteronome 30:19,20.

23. (a) Pe ao faapefea ona tatou vaaia le usiusitaʻi i le Atua? (e) A maeʻa ona faia e auauna faamaoni a le Atua le galuega o le faalauiloaina o lona suafa ma fuafuaga i le lalolagi uma, po o le a o le a faia e Ieova?

²³ O le usiusitaʻi i le Atua e le matua faigata moni. Afai tatou te talisapaia le atamai o Ieova e sili ona tele lea i lo tatou, ma o mea uma ua ia faia e mo lo tatou lelei aua o ia o le Atua o le alofa, ona tatou usiusitaʻi lea i a te ia i mea uma. Po o le a lava le finagalo o Ieova o le a tatou mananao e fai, po o i taimi faigata po o i mea o le olaga uma. O le ala lena ua faalogoina pea e auauna faamaoni a le Atua. (Tanielu 3:16-18; Salamo 119:33-37) Fai mai nisi o i latou ia i se fale faamasino o le uluai senituri: “E tusa ona sili o lo matou anaana i le Atua i lo matou anaana i tagata.” (Galuega 5:29) O loo ua faaaogaina e Ieova ana auauna faamaoni i aso nei e alagaina lona suafa ma ana fuafuaga i le lalolagi uma. (Mataio 24:14) A malie lona finagalo i le faia o lea mea, ona ia faaali lea i a Satani lona mana e ou le malosi uma lava i le olopalaina o ia ma isi o le ʻau fouvale uma, e aumai ai le iʻuga i lenei faiga o mea leaga. O le a faapea ona faamamaina ai e Ieova o le vateatea i amioleaga ae faaāva le ala mo lana faiga fou amiotonu o mea.

[Faaopoopoga i lalo]

[Fesili mo le Suʻesuʻega]