Pe i ai ni Agaga Leaga?
Mataupu 7
Pe i ai ni Agaga Leaga?
1. (a) Pe sa talitonu Iesu faapea e i ai ni agaga leaga? (e) Po o le a le taʻu a Iesu i le Tiapolo?
NA IOE ma talia e Iesu, o lē na afio mai i le lalolagi mai le malo agaga, le i ai o agaga leaga. E te manatua sa ia fetalai soo i le Tiapolo, ma na ia taʻua o ia “o le tamā o le pepelo” ma o se “fasioti tagata.” (Ioane 8:44) Mo lo tatou lava puipuiga i lenei taimi a o faateleina le pepelo ma le fasioti tagata, e lelei pe a tatou suesueina lenei mataupu.
2. (a) Faasala ese i le mea na aʻoaʻo e Iesu, po o le a ua talitonu i ai isi tagata i le Tiapolo? (e) Po o le a le mea na oo i ai Iesu ma le Tiapolo?
2 E moni lava, e toatele tagata, e le talitonu e i ai ni mea-fai-ola agaga leaga. E oo lava i ni tagata o e taofi ia faaaoga le Tusi Paia ua fai mai faapea o Satani le Tiapolo ua na o se uiga o le leaga, ae le o se peresona agaga le vaaia. Ae pe ioe mea moni i o latou taofi? Po o le a e uiga i mea lava na oo i ai Iesu Keriso ia ina ua faaosoosoina o ia e le Tiapolo? Ua taʻu mai e le Tusi Paia i a i tatou faapea na faaali e le Tiapolo i a Iesu malo uma o le lalolagi ma fai atu i a te ia: “Ou te avatua nei mea uma ia te oe, pe afai e te faapaū ma ifo mai ia te au.” Ona tali atu lea o Iesu i le Tiapolo: “Ina alu ese ia oe Satani; auā ua tusia, E te ifo atu i le Alii lou Atua, ua na o ia lava e te auauna i ai.” Ona tuua ai lea e le Tiapolo o Iesu.—Mataio 4:1-11.
3. (a) Po ua faapefea ona faaalia mai e lea mea na tupu e le mafai ona avea le Tiapolo na o se uiga o le leaga? (e) Po o le a la, Satani le Tiapolo?
3 I lea mea na tupu, po o ai na faaosoosoina Iesu Keriso? E se peresona moni ea? pe na o se uiga o le leaga? Afai na faaosoosoina o ia e na o se uiga o le leaga, po o totonu o ai la na nofo ai lenei uiga o le leaga? Pe na i a Iesu Keriso? Afai ana o lea, po ua le mafai la ona moni lea mea faapea e leai se agasala i totonu i a te ia. A ua faamaninoina mai e le Tusi Paia, le Afioga o le Upu moni lea a le Atua, o Iesu “e le tau faaʻoleʻole, e leai sona leaga, e taumamao ma e agasala.” (Eperu 7:26, NW) Ua fai mai foi le Tusi Paia: “O le na le agasala lava, na le iloa foi se pepelo i lona fofoga.” (1 Peteru 2:22) O lea, po ua le mafai e Iesu ona fai se fesagoaʻiina ma le “leaga” i lona ia lava leaga. Sa ia talanoa i se mea-fai-ola agaga ola. Ua faapea ona faamanino ai e Tusi Paia ma filifiliga tonu o Satani o se peresona ola moni i le malo agaga le vaaia.—1 Peteru 5:8.
O SE TIAPOLO FAIA E IA LAVA
4. Mai lo tatou iloa e uiga i le Atua, pe ai se a ua le mafai ai ona tatou mautinoa na te lei fai se tasi amio leaga?
4 Peitai o le a le ala na amataina ai le Tiapolo? Ma le manino lava, o le Atua “e sao lava lana galuega” na te le foafoaina ma faia se tasi e leaga. (Teuteronome 32:4) Na te le faia ni mea-fai-ola malamalama latou te le mafai ona ʻauʻau faatasi. Ua se mea tulaga ese ma le faatautee i filifiliga ma alofa o le Atua.—Salamo 5:4-6.
5. (a) Pe na faapefea ona uia e le mea-fai-ola agaga o le na avea ma Tiapolo se auala sese? (e) Pe na o sina gata ane na tuuina le mafaufauga fouvale i le mafaufau o Eva?
5 O lea, o le agaga le vaaia o le na avea mulimuli ane ma Tiapolo e tatau ona sa lelei atoatoa i se taimi, e aunoa ma se ila o se foafoaga a le Atua, pei o isi miliona uma o agelu o “atalii o le Atua.” (Iopu 38:7) Faapefea la, ona ia leaga? Ina ua uma ona faia o le uluai tamaloa ma le fafine ona ulufale lea o lenei mea-fai-ola agaga faapitoa i se ala e fouvale ai faasaga i le Atua. Na ia faatupu aʻe se faanaunauga ia ifo atu i a te ia ma na faapea ona faasese ai Atamu ma Eva ia fouvale faasaga i le Atua. Pe na faapefea ona ia fai lenei mea? Ua faaali mai e le Tusi Paia na tautala se gata i a Eva, taʻu ia te ia se pepelo. O le iuga la, na ia lē usitaʻi i le Atua. Ona ia faia foi lea ia faapogai ai ona ʻau ai lana tane ma ia fou faasaga i le Atua. Ae po o ai moni lava na ia tuu le manatu fouvale i le mafaufau o Eva? Pe sa na o se gata ea e leai sona totoga tautala? Leai, sa i ai se isi i tua o le gata e faia ai pei lava o le gata lea sa tautala. Ua tatou iloa e mafai e nisi tagata atamamai ona tautala upu i o latou laugutu a o toetoe lava ina mapuni, e fai ai ia aliali mai pei o se meaola o lata ane po o se faatagata o tautala. Tagai la i le faigofie tele mo se peresona le vaaia sili ona malosi i lo le tagata ona faia lenei mea! Na faatautalaina e le Atua le asini a Palaamo. (Numera 22:28) I Etena, sa faaaoga ai e Satani le gata. Ma ua faapea ona faaali mai ai e le Tusi Paia le Tiapolo, po o Satani, o le “gata tuai,” o ia la lea o le na ia faatomuaina moni mai lava le fouvale ma le amioleaga i le vateatea.—Faaaliga 12:9; 2 Korinito 11:3.
6. Pe na mafai faapefea e se mea-fai-ola lelei atoatoa ona liliu i le leaga?
6 Peitai, po o e tau mafaufau, afai ana lelei atoatoa lenei agaga malamalama maualuga, pe na mafai faapefea la ona liua o ia ia amioleaga pe a leai se tasi e faaosoosoina o ia? Ua tali mai le Tusi Paia ona o lona mafaufau i se mafaufauga sese. (Iakopo 1:14,15) Ua leai se sese i a te ia lava i le vaai atu i le mafaia o se tulaga iloga. Pei o se faaaʻoaʻoga, ua vaaia e se tasi i se fale ese o le isi tagata tupe o taatitia i luga o se laulau. O le mafaia la o lona avea o lea tupe ma tuu i totonu o lana taga o loo ua i ai. Peitai, talu ai ona o lea mea o le gaoi, e ao ona ia le mafaufauina. Po o lea foi, afai e oso aʻe le manatu i lona mafaufau, e ao ona ia faateʻa ese lea mea. Peitai afai na te tausia pea le manatu i lona mafaufau ma faataga i ai ia tupu tupu aʻe, ona ati aʻe lea o le faanaunauga sese. E le pine e mafai e lenei tuʻinanauga ona faagaoioia o ia e faia le gaoioiga o le amioleaga.
7. (a) O lea pe na faapefea ona avea lenei mea-fai-ola agaga ma amioleaga? (e) Po o ai le na faia Satani ma Tiapolo?
7 E faapea foi la, i le mea-fai-ola agaga. Sa i ai iina le mafai o lona faaaogaina o le ulugatagata mo lana lava fuafuaga ae le o le faataunuuina o le mea e finagalo ai le Atua. Ona o ia o se tagata amio saoloto, sa ia le na ona mafaufauina, a ua le taulau ona ia faateʻaina le faanaunauga mai lona mafaufau, ma na taʻitaʻia ai o ia ia agasala. Na o se tagata faamaoni muamua e mafai ona faia o ia e ia lava ma tagata gaoi ina ua gaoi, sa faapea ona faia ai lenei mea-fai-ola agaga e ia lava ma Satani i le gaoioi mai o se tetee atu i le Atua; ma na faia ai o ia lava ma Tiapolo i le avea ma sē taufaaleaga i le Atua, aua o le uiga lea o na igoa.
8. Pe ai se a na le na o se mea sese ai na fai e Satani?
8 E moni, pe a fai mai se tasi, “Mata pe ua le na o se mea sese na ia fai? Pe le mafai ona ia faatoese ma iʻu ai le mataupu iina?” O le tali, e manaomia ona manatua i le mafaufau e ese se tagata lelei atoatoa mai i a i tatou. Pe a ia faaaoga lona lava loto faitalia, o le filifiliga la ua ia faia ua le faia ona o le vaivai po o le lē lelei atoatoa. Ua masani lava tagata lē lelei atoatoa ona faia soo se mea sese talu ai le vaivaiga tuufaasolo. Latou te mafai ona talia o latou sese, faatoese ma sui le auala. Peitai pe a filifili e se mea-fai-ola lelei atoatoa e fai le sese, ua ia faia ma le loto i ai ma e le toe liliu mulimuli mai ai e fai le lelei. O le tala lenei i le na faia o ia e ia lava ma Tiapolo.
UA FAIA ISI MEA-FAI-OLA AGAGA I LATOU LAVA MA TEMONI
9. Pe na faapefea e isi o agelu paia a le Atua ona faia i latou ma temoni?
9 Sa le na o le Tiapolo le mea-fai-ola agaga e liliu atu i le lē usiusitaʻi ma le amioleaga. Na faia e le Atua se anoano e toatele o agelu paia, miliona ma miliona o i latou. Ua faaalia e le Tanielu 7:10, se vaega o i latou e 100,000,000. Ua faamatala mai e tala o le Tusi Paia i le Kenese 6:1-5, a o lumanai le lolo o aso o Noa o nisi o nei agaga o “atalii o le Atua” ua liutino mai pei o tamaloa, o lona uiga na latou tuua o latou nofoaga i le lagi o mea-fai-ola agaga ma faaofuina i latou e i latou lava i tino aano. Ai se a? Ia olioli i faalogona faaletagata i le faiavā i afafine lalelei o tagata. O se gaoioiga o le le usiusitaʻi i le Atua ma ua tuu faatasia lea mea e le Tusi Paia ma gaoioiga a tagata o Sotoma ma Komoro o e na ‘mulimuli atu i tino mo le faaaogaina le tusa ai.’ (Iuta 6, 7, NW) O lea foi na faapea ai ona latou faasaga tau ai i o latou uiga faalelagi mo agelu, ina ia o mai i lalo nei ma sailia tino aano faaletagata ia latou feuiaʻi faaituaiga ai. Na aumaia ai i o latou ala uiga leaga e i ai fanau uiga ese, “o e malolosi” ua taʻua o Nefilimi. I a latou faiga fouvale na liliuina ai i latou e i latou lava e fai ma temoni ma tuuina i latou e i latou lava i le itu a le Tiapolo o le “pule o temoni.”—Mataio 9:34, NW.
10. (a) Ina ua oo mai le lolo i aso o Noa, po o le a na oo i agelu le usiusitaʻi o e na faiāvā ifo i afafine o tamaloa? (e) O le a la e ao ona mataala ai i tatou i le faateleina o amio sesē i o tatou aso?
10 Ina ua faaumatia e le lolo o le lalolagi o aso o Noa tagata amioleaga uma, o agelu le faamaoni sa faamataa i o latou tino aano ma toe foi i le malo agaga. Peitai ua le toe faatagaina i latou e toe avea ma vaega o le faalapotopotoga a le Atua o agelu paia. A ua taofiofia i latou i se uiga maulalo o le pouliuli faaleagaga. (2 Peteru 2:4) Talu mai le Lolo, ua le faatagaina e le Atua ia agelu faatemoni, ia faaliutinoina i le tino pei ona latou faia muamua i lea taimi. Ae latou te mafai pea ona faaaogaina le malosi leaga i luga o tane ma fafine. O le mea moni, o Satani faatasi ma le fesoasoani o ia temoni o loo ua “faasese i le lalolagi uma.” (Faaaliga 12:9) O le faateleina sili i le fai mea sese ua tatou vaaia uma i le lalolagi aoao i aso nei e ao ona lapataia ai i tatou ia manaomia ona leoleoina faasaga i le faaseseina e i latou ia.
O LE TIAPOLO O “LE ALII O LENEI LALOLAGI”
11. Po o le a le tulaga ua taofia e Satani faatatau i atunuu uma?
11 E faatolu lava i le tusi a Ioane o le Tusi Paia, ua tatou faitau o taʻua ai e le Alii o Iesu Keriso le Tiapolo “le alii o lenei lalolagi.” (Ioane 12:31; 14:30; 16:11) Ua taʻua ai o ia i le 2 Korinito 4:4 o “le atua o le lalolagi nei.” Po o le uiga ea o lenei mea, ua i lalo o le pule a Satani le Tiapolo atunuu uma o le lalolagi. Ua tali le Tusi Paia: “A o le lalolagi uma ua nofo toilalo i lē ua leaga.” (1 Ioane 5:19, NW) Ua faapea ona faaaoga ai le malosi tele o le Tiapolo, o “le alii o lenei lalolagi,” e faaaoga le pule tele i tagata, e faaooina atu i a i latou uma ma e oo lava ina pulea faiga malo.—Faaaliga 16:13, 14.
12. (a) E tusa ma le Faaaliga 13:1, 2, po o i le a ua tuu atu i ai e le Tiapolo le malosi ma le pule? (e) Faapefea ona fesoasoani mai i a i tatou le ofo a le Tiapolo i a Iesu e iloa ai le “manu feai” ʻaivao? (i) Talu ai ona o le tala e uiga i le “manu feai” ʻaivao o le Faaaliga 13:1, 2, ma le tala e uiga i manu feai o le faaaliga i a Tanielu e faasino uma ia tala i ituaiga meaola lava e tasi, po o le a e tatau ona avea ai le “manu feai” ʻaivao ma sui?
12 Afai e sue lau Tusi Paia i le Faaaliga 12:9, o le a e iloa ai le Tiapolo o le “tarako tele.” I le isi mataupu, Fal 13 fuaiupu 1 ma le 2, ua taʻuina mai ai lenei tarako, le Tiapolo, na tuu atu le mana ma le nofoalii ma le pule sili i le mea ua taʻua o le “manu feai” na alu aʻe nai le sami. Po o le a lenei “manu feai” faafaatusa? I le ma, i luga o le ā ua pule ai Satani? Po o le a na ia ofo atu i a Iesu Keriso? “Malo uma o le lalolagi ainā.” (Luka 4:5-8, NW) Sa teea vave lava e Iesu lea ofo, ae peitai sa ia lei teea le pulea e le Tiapolo malo faapolotiki o le lalolagi. Ina ia tala feagai ma lenei mea, fai mai le Faaaliga 13:7, faatatau e uiga i le “manu feai” faafaatusa, “ua tuuina atu foi ia te ia e pule i itu aiga uma, ma gagana eseese, ma nuu.” I le ma lea, po o le a na faailoa mai e le perofeta o Tanielu i ni manu feai iloga? O “malo” po o malo faapolotiki. (Tanielu 7:2-7, 17, 23) O manu feai faafaatusa o le faaaliga i a Tanielu ma le “manu feai” o le Faaaliga e tasi lava le uiga o ia mea, ua vaaia lelei lea mea moni i tala e lua e faasino lava i ituaiga e tasi o mea ola: o se leona, o se urosa, o se nameri ma o se manu feai ulu-sefulu. (Faaaliga 13:1,2) O lea, o le “manu feai” ua sui i le faalapotopotoga faafaigamalo aoao a le Tiapolo, ua faia lana pule faamanu i luga o le lalolagi i le faasologa senituri seia oo mai nei. E le tioa fetalai Iesu Keriso: “E le se vaega o lenei lalolagi loʻu malo.” Ma e le tioa foi o ona tagata e le ni vaega o le lalolagi nei i latou, o lona uiga, latou ʻaloʻalo ese neʻi aafia ai i ana faiga.—Ioane 18:36; 17:14-16, NW.
IA AUULIULIGIA MAI FAIGA TAITASI FAAAGAGA LEAGA
13. Po o le a le faiga faaagaga po o le faataulaitu, ma pe ai se a ua lapataʻia ai tatou e le Tusi Paia ia auuliuligia ma lea mea?
13 O le tasi o ala ua taitaiseseina ai e agaga leaga tamaloa ma fafine e ala lea i faiga faataulaitu. Po o le a le faiga faaagaga po o faataulaitu? O le fesootaʻiga ma mea-fai-ola agaga leaga, ua taitaiseseina e i latou pe tuu saʻo pe ala mai se sootaga faaletagata po o isi fesootaʻiga. Ua lapataʻiina tatou e le Tusi Paia ia ʻalo ese mai faiga faaagaga, aua e aumaia ai se tagata i lalo o le malosi o temoni.—Kalatia 5:19-21; Faaaliga 21:8.
14. Po o faiga ā ua ʻauʻau faatasi ma faiga faaagaga ma faataulaitu, ma pe faapefea ona silasila le Atua i a i latou o liliu atu i ia faiga?
14 Ua faamalaiaina e le Atua ituaiga uma o faiga faaagaga po o faataulaitu. Ua taʻu mai e le Tusi Paia i a i tatou nisi o ia mea e le taliaina: valovaloga faaaitu, taulaitu, saili i faailoga, faalauatau, faasioa o isi tagata i upu faataulaitu (faasioaina, togafiti faataulaitu ma isi mea), o le faafesootaia o se ilamutu, po o se tagata iite ma le fesili atu i e ua oti. (Teuteronome 18:10-12; Isaia 8:19) O nei faiga faatemoni uma, ma e ua liliu atu i ia faiga ua faia ai i latou ma fili o le Atua.—Levitiko 19:31; 1 Nofoaiga a Tupu 10:13, 14.
15. (a) Po o le a aitu vavalo, ma po o a ni ala ua faaaogaina i ai tagata i ia mea i aso nei? (e) Po o fea na amata mai ai vaaiga fetu (astrology) ma togafiti faataulaitu?
15 O taulaitu o le tasi lea o faiga taatele o faiga faaagaga. O le taumafaiga ia maua le poto o mea e le iloa po o le lumanai e ala i faailoga po o le malosi faatemoni. (Galuega 16:16) Ua tele ala faataulaitu ua faia i aso nei, pei o tootoo faataulaitu, o fua faatautau, pulatoʻa i polo-tioata-iila, laupapa e tausia ai feau mai agaga, ESP, iloiloina o tosi o alofilima (suega alofilima), suesuega i feleleiga o manu lele iloga, vaavaai mo ni faailoga faataulaitu i miti a le tagata ma isi mea tutupu i le olaga o le tagata ma taumafai ona faafetaui ia mea i le lumanai. E i ai vaaiga-fetu, ua taʻua taatele o astrology. Na amataina mai lava lenei mea mai Papelonia anamua, pei ona faapea ai ituaiga eseese o le atamai faa-faataulaitu. Ua faaali mai e le Tusi Paia o i latou uma o e faaaogaina faiga faataulaitu ua agasala faasaga tau i le Atua.—1 Samuelu 15:22, 23.
16. Po o le a e ao ina tatou fai pe afai tatou te faalogoina se “leo” mai le lalolagi le vaaia o tautala mai i a i tatou?
16 O le tasi o ala taatele ua taʻitaʻiseseina ai tagata e agaga leaga o le tautala lea i a i latou, pe auala atu i se fesootaʻiga faaagaga po o se “leo” mai le lalolagi le vaaia. Ua tau fai lava le “leo” e pei o le leo o se tasi o le aiga ua oti, po o se agaga lelei; peitai o se pepelo lava lenei mea! O le leo o se agaga leaga lea ua tautala moni mai lava! Po o le a e ao ina e fai pe a tautala mai sea “leo” i a te oe? Po o le a na fai e Iesu Keriso ina o tautala atu le pule o agaga leaga i a te ia? Sa tetee atu lava e Iesu manatu o le Tiapolo, i lona fetalai atu: “Ina alu ese ia oe Satani.” (Mataio 4:10) E te mafai foi ona fai lea mea. I le ma lea foi, e te mafai ona valaau i a Ieova mo le fesoasoani, tatalo leo tele ma faaaoga lona suafa. Ia mulimuli i lenei ala poto, ae aua le tuu atu le taliga i ia leo mai le lalolagi le vaaia.—Faataoto 18:10; Iakopo 4:7.
17. Pe mafai faapefea ona faasaolotoina mai se tasi i faiga faataulaitu i aso nei i le mulimuli atu i faaaʻoaʻoga a uluai Kerisiano i Efeso?
17 Peitai po o le a pe afai ua faataaloina se tasi e ni faiga faaagaga a lotu po o saienisi ma ua manao nei ia faasaolotoina mai faiga faaagaga? Ia, po o le a na fai e le toatele o uluai Kerisiano i Efeso ina ua latou mananao ia tuusaolotoina mai le poto faataulaitu? Ua taʻu mai e le Tusi Paia faapea, ina ua uma ona talia le “afioga a le Alii” na talaia atu e le aposetolo o Paulo, “na faapotopoto e i latou a latou tusi ma susunu ai i luma o tagata uma,” ona latou faitau lea i a latou faatusa, ua iloa ai ua limasefulu o afe o tupe ario! (Galuega 19:19, 20) O la latou faaaoaoga la o le faaleagaina o mea e fai ai faiga faataulaitu o se faaaʻoaʻoga poto ia mulimuli ai.
18. (a) Po o le a o le a tupu i agaga leaga uma? (e) Ona o le vaai atu la i lenei mea, po o le a e tatau ona tatou fai pe afai tatou te mananaʻo i le ola faavavau?
18 Aua nei faaseseina i le faateleina o le naunau fiafia i mea faamisiterio ma mea faanimonimo faataulaitu. O loo ua fautuaina e mea-fai-ola agaga leaga ia faiga faaagaga faataulaitu. Peitai o nei malosi faaagaga leaga, e aofia ai ma le Tiapolo o le a faaumatia lava. (Mataio 25:41) Afai e te fia ola e faavavau e manaomia ona e nofo ese ua auuliuligia mai o latou malosi i lou ʻalo ese mai ituaiga taitasi uma o faiga faataulaitu.
UA FAUTUAINA E LE TIAPOLO LOTU SESE
19. (a) Po o le a le mea sili ua faaliliueseina ai e le Tiapolo le fanau a tagata mai le Atua? (e) Po o le a le lotu sese? (i) Afai e lotu sesē se tasi, po a ai ua ia auauna moʻi i ai?
19 E le se mea tatou te ofo ai ona o le tele o ala a le Tiapolo ma ana temoni ua faaseseina ai le fanau a tagata, o faiga faataulaitu la o le tasi lea o ia ala. Po o le a foi la, uiga ma faiga aupito sili ona maualuluga a le Tiapolo, “le tamā o le pepelo,” ua faaliliueseina ai tagata mai le Atua? (Ioane 8:44) O le ala, o lotu sese! O lotu sese o le tapuaiga ua ati ma fausia aʻe i mea sese pepelo ma ua faaututau i le Afioga a le Atua o le upu moni, le Tusi Paia. O le tasi lea pogai ua faasino mai ai e le Tusi Paia a ifo ma tapuai atu se tasi i se ala e lē tala feagai ma le Afioga a le Atua, o le mea moni la, o loo ua ia auauna atu i temoni, aua ua ia faia e tusa ma mea latou te manao ai e faaututau i le Atua.—Teuteronome 32:16, 17; 1 Korinito 10:20.
20. Pei o taitai fasioti tagata, po ua faaseseina faapefea e le Tiapolo tagata?
20 Ui ina tino mai lotu sese e faaaloalogia ma mamalu, ae ao ona tatou iloa lelei ua pei lava le Tiapolo o le tele o taitai o le lalolagi i lalo ifo o le lalolagi faa-ona-po-nei, po o fasiotiga tagata o e ua lalafi i tua o se pa o le mamalu faaaloalogia. Po o le a le isi auala sili ona poto i lo lona ʻoʻoleina o tagata ma faia tagata ia auauna atu i a te ia i lo le faaaogaina o se pa faalotu ua tino mai i fafo e amiotonu? E faapea foi ona taitaiseseina tagata e le Tiapolo i lotu ma taofi i le vaai atu i fafo, o auauna i le Atua ua faaalia lea i le Tusi Paia. (Mataio 7:22, 23) O le mea moni, fai mai le aposetolo o Paulo, “aua o Satani lava, ua liua o ia e ia ma agelu o le malamalama,” ma “ana auauna peiseai o auauna a le amiotonu i latou.”—2 Korinito 11:14, 15.
21. (a) Po o le a ua faaalia e le Tusi Paia i le taimi totoe mo agaga leaga? (e) Pe ai se a e ao ai ona tuusaolotoina ai se tagata mai faiga faataulaitu ma isi lotu sesē uma?
21 O lea e lei na ona mafaufauina e Iesu Keriso se mea ina ua na taʻua le Tiapolo o “le alii o lenei lalolagi.” (Ioane 12:31) Ua moni lava o loo i ai agaga leaga o taitaiseseina “le lalolagi uma.” Peitai e “saasaa ona po” o totoe a o lumanai ona faaumatia galuega a le Tiapolo ma ana agelu leaga. (Faaaliga 12:9, 12) I le taimi nei, ia tausia mama outou ia auuliuligia ma faiga taitasi uma faatemoni ma ia o ese mai outou mai lotu e mata ma tino mamalu mai ae ua matua faavaeina aʻe i mea sese. E te le mafai ona e taofi i faiga faaagaga faataulaitu po o soo se isi mea sese faalotu ma e maua ai le ola faavavau i le faiga fou a le Atua o mea, aua ua na o le upu moni lava e taitaia ai i le ola faavavau.—Efeso 6:12, 16.
[Fesili mo le Suʻesuʻega]
