Mataupu 12

Pule Amiotonu Fai Ai le Lalolagi ma Parataiso

1. (a) Po o a uiga ua faaalia ai le manaʻomia o se pulega amiotonu i luga o le lalolagi? (e) Po o le a faia ea e le Atua le lalolagi o se parataiso?

PAGA le manaomia tele e le fanau a tagata o se pulega amiotonu i luga o le lalolagi uma! E tatau ona ioe tagata uma faapea ua le o avea lenei paneta ma se parataiso. O le mativa ma le fia ʻai o mea ua oo i ai le miliona ma miliona o tagata i aso taitasi. Ua faoa le tele o le matagofie moni o le lalolagi e aai mataga ma ua faaʻonaina le ʻea ma vai o siʻomia ai i latou. Ua tele ma sili ona tele aai ua avea ma ‘vao maoa’ o le fasi tagata, ua fefefe ai tagata e tuua o latou aiga i po. Pagā le ese o lenei mea mai le uluai fuafuaga a le Atua mo le tagata! Peitai maeu le lelei ona iloa e le o tuulafoaia e le Atua lana fuafuaga! Aua ua ia faamaonia mai i a i tatou: “E faapea foi laʻu upu e alu atu ai loʻu gutu, e le foi mai fua ia te au.” (Isaia 55:11; tagai foi i le Kenese 2:8, 15; 1:28) O le a ia faia lava lenei lalolagi o se parataiso mamalu.

2. Pe mafai faapefea ona faasaoina atu tatou i le faiga fou o mea a le Atua?

² Toeitiiti aumaia e Ieova i lona iʻuga faiga amioleaga uma o aso nei. Afai e te maua nei le faamaoniga a Ieova atonu e faaeaina oe e faasao atu i le faiga fou a le Atua. Po o le a le uiga o lenei mea mo oe?

O SE PULEGA AMIOTONU

3. Po o a ala a le Atua mo le toe faafoisia mai o le amiotonu?

³ O le manaoga aupito sili o le fanau a tagata, toeitiiti ono afe tausaga, ia toe aumaia ia tala feagai  lelei atoatoa ma Ieova le Atua, Lē na faia le tagata. (2 Korinito 5:20) Ina ia toe faafoisia le amiotonu i lenei paneta, ua aaoina lava e Ieova le sauniuniga mo “se malo i le mutaaga atoatoa o ona po tuupoina.” O lenei malo po o le pulega e le malo o Keriso. Pei ona tatou vaaia, ua uma ona afio le Malo i le mana i lagi ma toeitiiti tago aao atoatoa i upu fai a le lalolagi. Po o le a lana fuafuaga taua i le faia o lenei mea? “Ina ia toe faapotopotoina mea uma i le Keriso, o mea i lagi ma mea i le lalolagi.” (Efeso 1:9, 10, NW) O lenei malo o le ala a le Atua mo le aumaia o i latou uma o ola i le lalolagi ia tala feagai lelei atoatoa ma lana pulega faalelagi. O le mea lenei ua tatou tatalo ai pe a tatou faapea ane: “Ia oo mai lou malo. Ia faia lou finagalo pei ona faia i le lagi, atoa foi ma luga o le lalolagi.”—Mataio 6:10, NW

4. (a) Po o a suiga o le a aumaia e le Malo i faiā faaletagata? (e) Pe ai se a o le a le toe i ai ni taua, ma po o le a le uiga o lenei mea i le fanau a tagata?

⁴ Po o le a le uiga o lenei mea faatatau i le fesootaʻiga faaletagata? O le aufaatasi atu i le tapuaiga mamā i lo latou Tamā faalelagi, o le a nonofo faatasi ai tagata o ituaiga uma ma atunuu o se aiga e tasi o uso ma tuafafine! (Galuega 10:34, 35; 17:26) Faatasi ma le malo o le Atua o lana “Perenise o le Filemu” e pule i luga o le kelope atoa, o le a le toe vaevaeina ai faafaigamalo le lalolagi. O le a le toe i ai se manatu faamaualuga faa-atunuu e faagaee aʻe ai le ita, taua ma le toto masaa. (Isaia 9:6, 7) Soo se auupega o taua e oti ai e totoe mai pe a mavae Amaketo, toeitiiti ona faaumatia lea e faavavau. (Esekielu 39:9, 10; Salamo 46:8, 9) O lea foi o le a le toe i ai ni lisi a nusipepa o e maliliu o taua, le toe i ai ni fafine ua oti a latou tane po o e matua oti ona o taua, le toe i ai ni fale o aiga ma aai ua tuʻipalaina i faatafunaga. Pagā se faamanuiaga lenei mea o le a i ai mo le fanau a tagata!

5. I lalo o le pule a Keriso, pe ai se a o le a leai ai se faamasinoletonu?

⁵ Mai lona nofoalii faalelagi o le a pulea mai ai e Iesu mataupu a le lalolagi i se auala o le a aumai ai mea aoga tumau. Maeu le ofoofogia ua uma ona ia faataʻitaʻia mai ai ona uiga agavaa, e oo lava i le  tuuina i lalo o lona lava soifua e fai ma sui o i latou o e o le a fai mona tagata! E le gata i lea, ua faaalia i tala faamauina a le Tusi Paia e leai se mea e tasi—tofotofoga, omiga, taufaifaiga, e oo i le oti lava ia—e mafai ona faatafa ai Iesu mai le faia o le mea saʻo. E mafai ona tatou mautinoa ai la, o le a leai ni tiga, amioletonu po o mea leaga i lalo o lana pule.—Isaia 11:2-5.

6. Po o le a le ituaiga tagata e i ai Iesu, ia faapea ai ona tatou fiafia e avea o ia ma Lē Pule?

⁶ Pe e te le talisapaia ea, foi, se pule e saunoa pea i le upu moni? O Iesu le ituaiga o lea tagata. (Ioane 1:14; 18:37) Ma po o ai o le a le faalogoina le tosina atu i se tasi ua faaalia le mafana ma le loto fiafia faamaoni i isi? Ina o femaliuaʻi solo Iesu e talai le tala lelei, ua taʻu mai e le Tusi Paia i a i tatou, na ia saoloto e faaaoga le mana na tuuina atu e le Atua i a te ia e faamalolo ai maʻi, i le auala faaletino ma le faaleagaga. (Mataio 9:35, 36) A o manaia ona ola i le taimi o le auaunaga faalelalolagi a Iesu, o le a sili mamao atu ona matagofie ona ola i le lalolagi pe a ia faaaoga lenei mana e fai ma sui i le fanau a tagata uma.

7. Po o le a le ituaiga tagata o le a pule faatasi ma Iesu i lona malo faalelagi?

⁷ Ua au faatasi ma Iesu i lona malo faalelagi o tupu ma ositaulaga e 144,000 ua aumaia mai le fanau a tagata ma faia ia lelei atoatoa e le Atua. (Faaaliga 5:10) O i latou nei, foi, o tagata o e ua faamaonia o latou alofa i le amiotonu e oo i le oti.—Faaaliga 14:1, 4, 5; 2:10.

8. (a) Pe o le a i ai ni sui vaaia o le malo faalelagi o Keriso? (e) Po o ai o le a filifilia i latou?

⁸ Peitai pe o le a i ai ni sui vaaia o lenei malo faalelagi? Ioe, e moni lava! Auā foi, e oo lava i le taimi nei ua filifilia e le malo faalelagi tane faatuatua o ona sui i le faapotopotoga Kerisiano, ia faia e ala i le agaga paia o le Atua. (Isaia 32:1, 2; Galuega 20:28) O lea ua mafai ona tatou mautinoa ai o le a silasila Keriso i ai i tagata tonu i le lalolagi ia tofia e fai ma sui o le pulega a le Malo, auā o le a ia aaotonuina mataupu a le lalolagi. Aua ua fai ia tagata ma sui o le Tupu i se auala faapito, ua taʻua e le  Tusi Paia i latou o “alo alii.” O le a faamaonia uma i latou ia o latou faamaoni i le Atua ma o latou alofa mo latou uso tagata. O le agaga lava e tasi o le Atua e faagaeeina lo latou Tupu faalelagi o le a taʻitaʻia foi latou.—Salamo 45:16.

9. Po o le a fai le lanu o le paʻu o se tasi po o le mea na fanau ai ma mea e tausia ma pulea ai o ia i lea taimi?

⁹ O le a leai lava se faaituaiga, pe faalanu, po o se faaatunuu e i ai i soo se sootaga i le auala e faatatauina ai e nei sui alo alii tulafono tonu a le Atua. (Teuteronome 10:17; Roma 2:11) I le mulimuli atu i le faaaʻoaʻoga a lo tatou Tupu o le a auauna “alo alii” ma le loto maulalo ma le loto fesoasoani, e aumaia faamalosiaga i o latou uso tagata. Ae o le a latou tumau ma le lē faagaeetia i le taofiina aʻe o le amiotonu a le Atua.—Mataio 11:29; 20:25-28.

10. I le tuufaafeagai ma le lē mautū ma le mataʻu ua faapea ona taatele i aso nei, po o a uiga o le a i ai i lalo o le pulega amiotonu a Keriso?

¹⁰ O le faamamāina o le lalolagi i tagata fai amioleaga uma, o le a lē toe taitai ona faatagaina le fasitagata ia toe mauaa. (Salamo 37:9-11) E le toe taitai ona i ai se manaoga mo leoleo, falepuipui, filifili sai-sai-pagota, faailo-gaoi, sefe, loka ma ki. I lalo o le pulega amiotonu a le Malo, o le a e iloa soo se tasi e tuʻituʻi atu i lou faitotoa o se uo. O le a i ai se saolotoga atoatoa mai le fefe o se mea leaga e tupu. O le a le toe fefe e savalivali ai i se faatoaga laau teuteuina manaia (paka) i le po e maimoa ai i tufuga aao tau fetu a Le na faia mea. E oo lava ina moni lea i le faapotopotoga a le Atua i le aso i se ala faaleagaga, e faapea foi i lea taimi i se ala faaletino, “a e latou te nonofo fifilemu, e leai foi se na te faamatau ia te i latou.”—Esekielu 34:28.

SAOLOTO MAI LE AGASALA E AUMAIA AI LE SOIFUA MALOLOINA MA LE OLA

11. E le gata ina fai ma tupu, po o le a isi tulaga o le a auauna ai tagata o le malo faalelagi o Keriso? Ai se ā?

¹¹ O le uluai polokalame a le Malo o le a ufitia ai se vaitaimi e tasi le afe tausaga. I lea vaitaimi o le a le na ona auauna ai Iesu ma tagata o lona malo  faalelagi o tupu a o ositaulaga foi mo o latou tagata o le malo. (Faaaliga 20:6) Ai se a? Auā foi o le a manaomia e tagata uma i le lalolagi ona “ia le faapologaina e le iu vale” ina ia “oo i le saolotoga o le fanau a le Atua e manuia ai.” (Roma 8:21) Tusa lava pe a mavae le faaumatiaga o le amioleaga, o le a le lelei atoatoa pea tagata na faasaoina mai faalelalolagi ona o le agasala tuu faasolo mai i a Atamu. O tuʻinanauga sese o latou tino aano le lelei atoatoa o le a fetauaʻi pea faasaga i tuʻinanau uiga saʻo o mafaufau ma loto. (Roma 7:21-23) O lea, ina ia talia atoatoa lelei i le aiga o atalii o le Atua, latou te muai manaomia ai le auaunaga a ositaulaga faalelagi a le Atua. Po o le a o le a fai e i latou ia?

12. (a) Po o le a le mana uiga ese o le a maua e tagata o le malo faalelagi? (e) Po o le a le tulaga faamanuiaina e maua e tagata?

¹² O le a i a i latou le malosi e le i ai i malo uma faaletagata seia oo mai i le taimi nei: o le malosi e faamama ai tagata i agasala ma le le lelei atoatoa. Ua nofoi lava lenei malosi i le au ositaulaga faalelagi a le Atua e ala i le taulaga togiola a Iesu. O le a faatatautonuina ai e le Alo o le Atua ma ona ositaulaga lagolago le aoga o le taulaga a Iesu i ē usitaʻi uma. (Ioane 1:29; l Ioane 2:2) Ua faaataina e le Tusi Paia lenei sauniuniga i le “vaitafe o le vai o le ola” faa-faatusa e tafe mai le “nofoalii o le Atua ma le Tamaʻi mamoe” ma “lau o laau . . . mo le faamaloloina o atunuu.” (Faaaliga 22:1,2, NW) O le agai atu pea i luma i le amiotonu faatasi ma le fesoasoani o le au ositaulaga faalelagi, o le a latou tutupu aʻe ai agai atu i luma i le ola talavou ma malolosi, seia oo ina lelei atoatoa i le soifua maloloina i le mafaufau ma le tino. O le a matua faasaolotoina i latou mai le nofo pologa i le agasala ma le oti na tuufaasoloina mai i a Atamu.—Ioane 11:26.

13. (a) Pe faapefea ona faamatala mai e le Faaaliga 21:4 faamanuiaga e aumai e le Malo? (e) Po o le a na fai e Iesu ina o i ai i le lalolagi e faaalia ai na te mafai ona aumaia ia faamanuiaga?

¹³ Ioe, i lenei auala o le a “sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga;  aua ua mavae atu mea muamua.” (Faaaliga 21:4) Maeu le ofoofogia o le a i ai i le olioli i le soifua maloloina lelei atoatoa! E oo foi ina sa faamaloloina e le Alo o le Atua lepela ma savavali pipili ma pupula tauaso a o i ai i le lalolagi le Alo o le Atua, o le a faapea ona aumaia ai e lana pulega amiotonu se mutaaga i gasegase ma puapuaga uma. (Mareko 1:40-42; Ioane 5:5-9; Mataio 9:35) O le a mavae atu le manaoga mo falemaʻi ma inisiua o ola! Pe aveesea maʻi ma le oti, o le pogai i le lalolagi aoao o loimata o le a alu ese. (1 Korinito 15:25, 26) Paga le matagofie o le a i ai i le olioli i le saolotoga atoatoa mai le agasala, ma mafai ona fuafuaina le atoatoa o le amiotonu a le Atua i le tulaga o le tautala, mafaufau ma le amio!

FAAFEILOAIA TAGATA FOI MAI LE OTI

14. Po o le a le vaaiga mo e oti na faaalia e Iesu i le Ioane 5:28,29?

¹⁴ O loo ua i ai foi le vaaiga fiafia i e ua pele i a te outou ua oti, o le a mafai ona olioli i faamanuiaga o le pulega amiotonu a le Alo o le Atua i le lalolagi. Na faasilasilaina e Iesu le faamoemoe mo le miliona e le mafaitauina o e ua oti, ua faapea mai: “Aua tou te ofo i lenei mea, aua e oo mai le aso e faalogo ai i lona leo o i latou uma ua i tuugamau, ma latou o mai ai.” (Ioane 5:28, 29) Paga se taimi o le olioli faagaeeina o le a i ai pe a muai faaemoina mai le tala faataamilo i le lalolagi: “Ua toe faatutuina aʻe e ua oti!”

15. Pe ai se a ua mafai ai ona tatou mautinoa o le a faatu e Iesu e ua oti?

¹⁵ Ua mafai ona tatou matua mautinoa atoatoa o le a moni lava lenei mea. Manatua foi, a o i le lalolagi, sa le faamaloloina e Iesu na o e mamaʻi, ma e pipili; ae na ia toe aumaia foi tagata oti i le ola. (Mataio 11:2-6) Na faataʻitaʻia ai i lenei mea le mana ofoofogia o le Atua i le faatutuina o e ua oti, o se mana na ia tuu atu i a Iesu Keriso. Atonu e te manatua le mea na tupu ina ua afio atu Iesu i le fale o se tamaloa e ona le afafine ua sefulu lua tausaga na oti. Ina o fetalai atu o ia i le teine ua oti, na fetalai atu Iesu: “Funa e, Ou te fai atu i a te oe, Ia e tulaʻi!” Po o le a le iʻuga? Ua taʻu mai i a i tatou e le Tusi Paia: “Ona tulaʻi loa lea o le teine ua savali.” Pe na  faapefea le lagona o ona matua ma isi na vaai i ai i lenei vavega? “Ona segia lea o latou mauli.” I lea lava taimi ua le mataofiofia i latou i le fiafia tele.—Mareko 5:35, 38-42, NW; tagai foi i le Ioane 11: 38-44; Luka 7:11-16.

16. Po o ai o le a faatutuina aʻe mai le oti, ma po o le ā o le a afaina ai e ola?

¹⁶ Pe a toe faafoisia mai parataiso i le lalolagi, o le a toe faaaoga ai e Iesu lona mana e faatutu i e ua oti. Aua ua faamaonia mai e le Tusi Paia i tatou “o le a toe tutu mai e ua oti, o e ua amiotonu atoa ma e ua amioletonu.” (Galuega 24:15) Paga le olioli o le a i ai i le lalolagi aoao pe a toe o mai lea vaega ma lea vaega i le ola! Manatu i faatasiga fiafia o e o aiga pele o le a i ai! Ae le ni lisi o e maliliu, a o ni faasilasilaga fou o e ua toe tutu mai e olioli ai o latou aiga pele.

17. Pe ai se a ua leai ai se faalavelave mo le Atua ona manatua i latou uma a toe faatutuina?

¹⁷ Tele miliona o tagata ua oti, peitai ua le o fai lea o se faalavelave mo le Atua. Na te manatua i latou uma. Ua taʻu mai i a i tatou e le Tusi Paia “o loo  faitaulia e ia le aofaʻi o fetu; ua faaigoaina e ia o latou igoa uma lava.” (Salamo 147:4) Mafaufau i le uiga o lea mea. Fai mai e selau ma selau miliona aniva, ua i ai i aniva taitasi le selau ma selau o miliona o fetu, ma ua silafia lava e le Atua fetu taitasi o latou igoa. O le numera la o tagata uma ua ola ua o se mea laitiiti pe a faatusatusa atu i ai. O lea o le a le faigata ai mo le Atua ona manatua uma e ua oti ma e ua i lalo o le sauniga o le togiola a Keriso. (Mataio 19:26) O le a toe faaolaina mai i latou iinei lava i le lalolagi. Paga se faaeaga faamaniti tino o le a oo mai o le toe faafeiloaʻia aʻe o i latou nai le oti!

18. I le toetu, po o le a e mafai ona iloa i latou na e iloa muamua? Ai se a?

¹⁸ Pe a latou toe o mai, po o i latou o tagata lava ia e tasi? Po o le a tatou iloa i latou? Ioe! Pe na o le tagata ua na mafai ona faasaoina mo aso e le ma iloa ata ma leo i lipine faamaneta mo le faaaogaina mulimuli ane i televise. E mafai e le Atua ona fai mea e sili atu i lena. I le taimi o le toetu na te mafai ona aumai taitoatasi i le tagata lava ia se tino e fetaui lelei ma toe tōtōina i le faiai ia manatunatuga lava o mea uma na aʻoaʻoina e le tagata ma na oo i ai i aso o lona olaga ua mavae. Ona faapea ai lea ona toe foi mai lea tagata faatasi ma uiga tagata lava e tasi na i a te ia ina ua oti, pei ona toe maua lava foi e Iesu ina ua toe soifua mai lona lava uiga tagata. (Eperu 13:8) O le a e iloa lelei i latou na e iloa muamua. Paga se vaaiga ofoofogia!—Iopu 14:13-15.

19. Po o le a ua faaalia e le Faaaliga i e oti? O lea, po o le ā o le a mavae?

¹⁹ Na faaalia i le aposetolo o Ioane se faaaliga o ia mea faaminiti tino o le a oo mai i le taimi o le pule a Keriso, ma ua maua i le tusi o Faaaliga. Ua faaalia mai i lana faaaliga le oti ma Heitisi (tuugamau taatele o le fanau a tagata) o le a “avaʻe foi e le sami e na oti sa i ai.” O le a leai se tasi e faatotoeina iina. I lea taimi o le a mavae atu ai e faavavau le oti ona o le agasala tuufaasolo. (Faaaliga 20:13, 14; Isaia 25:8) O le a mavae atu fale-oti ma maa-faamanatu! Leai ni fanua oti e toe faalavelaveina ai le matagofie o le lalolagi parataiso.

20. (a) Po o le a le avanoa o le a tatalaina i e toe tutu, ma po o le ā o le a latou manaʻomia e fai? (e) I luga o le a le faavae o le a faamasinoina ai i latou? (i) Po o le a faapefea ona faia le suiga i ala o tagata o ē pe sa faigata ma mataʻutia muamua?

 ²⁰ O i latou e faatutuina i le ola i le lalolagi o le a o mai i le avanoa o le mauaina o le ola faavavau i parataiso. O le a avea o se taimi o le aʻoaʻoina mo i latou. O le a tatalaina “tusi taai” o i ai faatonuga mai le Atua, ma o le a latou manaomia ona mulimuli i ia tusi ia faia ai o latou mafaufau ia tala feagai ma le finagalo o le Atua. O le a taitoatasi ona “faamasinoina e tusa ma a latou amio”; o lona uiga, o mea ua latou fai ina ua mavae ona toe faatutuina ma ina ua uma ona aʻoaʻoina o mea ua tusia i “tusi taai.” (Faaaliga 20:11-13) O le tali atu i le aʻoaʻoga ua aumaia, e oo lava i a i latou o e sa faigata ma mataʻutia pei o manu ʻaivao o le a suia o latou ala, pei lava ona faia e le toatele ina ua latou ʻau ʻau mea faatasi ma le faapotopotoga Kerisiano.—Isaia 11:9; 26:9; 35:8, 9.

FAAFOISIA LE LALOLAGI I UIGA PARATAISO

21. Po o le a le faamanuiaga a le pulega o le Malo ua faamatala mai i le Isaia 25:6?

²¹ O le agai i luma i le amiotonu o le a aumai ai foi faamanuiaga faitino. O le a i ai se faataunuuga faaletino o upu faavaloaga a le Isaia 25:6: “E faia e Ieova o ʻau i lenei mauga mo nuu uma le faigaai o mea lelei.” O le a le toe i ai se tasi e toe iloa le tiga matuitui ma le iiva o le matalaina. Ae pe o le a faapefea ona aumai e le Atua lenei taumafataga?

22. (a) Pei ona faaalia i le Tusi Paia po o le a faapefea ona aumaia lenei mau faaletino? (e) I le a le uiga o le a faaliliuina i ai le kelope aoao?

²² A o avea Isaraelu ma nuu filifilia o le Atua, sa faamanuiaina tele i latou e lana faamanuiaga. Sa fua mai o latou laueleele fuata lelei o saito. Sa fua mai o latou togalaau fua lelei tele. Sa tatalaina e Ieova i a i latou lona “fale teuoloa lelei, i lagi, e aumai ai le timu i [lo latou] laueleele i ona tau.” (Teuteronome 28:12, NW; tagai foi i le Te 28 fuaiupu e 8) O ia faamanuiaga lava e tasi o le a faufaulalaʻi i le fua aupito sili ona anoanoaʻi i lalo o le malo o Keriso. (Salamo 67:6, 7) O le a faataunuuina e tagata o le lalolagi o le Malo o  le faatonuga na lei faia e Atamu ma Eva. O le a latou “faatoilalo” le lalolagi, faia le kelope atoa ma parataiso. Faatatau i sea fuafuaga atoa, ma le faamoemoe i le toetu ua vaaia, o le mea na fetalai i ai Iesu i le pagota loto faamafanafana o lē na faasalaina faatasi ma ia: “E moni, ou te fai atu i a te oe i le asō, O le a ta faatasi ma oe i Parataiso.”—Luka 23:39-43, NW.

23. Po ua faamatalaina mai faapefea e Salamo le uiga fiafia o le a malo aoao i le lalolagi?

²³ I lea taimi o le a sulugia ai le lalolagi atoa i le fiafia. O ona fanua ma mauga, ona laau ma fualaau, o ona vaitafe ma sami, pei o le a olioli uma i pulega amiotonu a Ieova. (Salamo 96:11-13; 98:7-9) O le a le toe mafatia le ʻea fou i mea e faaleaga ai. O le a feʻilafi mai vaitafe taitasi ma alia i vai fou, vai mamā. O le a le toe faaleagaina le laueleele.

24. Po o le a le mea o le a faia e le pulega a Keriso mo le fanau a tagata faatatau i mea ola?

²⁴ O le lalolagi uma—o ona vao matua, o ona lau fanua, o ona mauga—o le a avea ma togalaau matagofie e tasi, e ola felanulanuaʻi o ituaiga manu eseese ma manu felelei. O ia mea foi o le a ʻau atu i le pulega poto a le Alo o Ieova. Ma i lea “lalolagi aiinā o sau” o le a ia aumaia i latou uma ia gauai ma le le toe faaleaga mea i le fanau a tagata.—Eperu 2:5-8, NW; Salamo 8:4-8.

TOFOTOFOGA MULIMULI E ILOILOINA AI LE ONO TATAU AI MO LE OLA FAAVAVAU

25. (a) I le iʻuga o le uluai afe o tausaga, po o le ā o le a faataunuuina e le Malo? (e) Po o le a le tofotofoga o le a faia ai, ma pe ai se a?

²⁵ O le a pule le Malo o le Atua i a Keriso mo le faavavau uma. Ui i ia mea, i le iʻuga o le uluai afe o tausaga o le a faataunuuina ai se fuafuaga iloga agai i le lalolagi. O le a aveesea toega taitasi uma o le amioletonu. O le a laulaututu uma le fanau uma a tagata i le lalolagi, o mea-fai-ola lelei atoatoa i luma o le nofoalii o le Faamasino Silisili, o Ieova le Atua. O le a latou tutusa lelei i itu uma ma le uluai ulugatagata lelei atoatoa muamua i Etena. (1 Korinito 15:24) Po o le a ono ai ona tuu atu e le Atua le aiā i  a i latou i le ola faavavau? O le a tala feagai lelei ai ona ia tofotofoina tagata o le Malo, lo latou alofa vilivilitaʻi i le pule amiotonu a le Atua. O le a tuu atu e Ieova i a i latou le avanoa ia faaalia ai lo latou faamaoni. Faapefea? I le tatalaina o Satani ma ana temoni mai o latou uiga o taofia ai i le “to e le gata.” (Faaaliga 20:7) I lenei tofotofoga e taitoatasi ai o le aiga faalelalolagi o le Atua ona maua le faaeaga o le aumaia o se tala faaletagata lava i le luʻi i lo latou Tamā faalelagi e Satani.

26. Po o le a le iʻuga mo (a) i latou o e tumau i le Atua? (e) i latou o e liliu faasagatau i le Atua? (i) Satani ma ana temoni?

²⁶ O i latou o e tumau le faamaoni i le Atua o le a faamasinoina e ono ma tatau ai i le ola faavavau. O le a tuuina atu e Ieova lenei aiā i a i latou, ia tusia o latou igoa i lana “tusi o le ola.” Soo se tasi e liliu ese ma le fouvale faasaga i le Atua o le a faaumatia i le “oti faalua.” Ona faaumatia lea, i lea taimi, o Satani le Tiapolo, faatasi ma ana temoni e faavavau. (Faaaliga 20: 7-10, 15) E le taitai, le taitai lava, ona toe faateʻia le lalolagi po o soo se isi vaega o le vateatea tele e le agasala ma le fouvale. Faia o se parataiso o le mea e malo ai le amiotonu, o le a fai le lalolagi mo taimi uma o sau o se mea taua e viia ai le suafa o Ieova.

27. Afai tatou te mananaʻo moni i le ola i le lalolagi parataiso, po o le a e ao ona tatou fai nei.

²⁷ Pe o fuafuaina e le Atua mo se pulega amiotonu i luga o se lalolagi parataiso e faamausaliina ai o lou faaaloalo mo lana amiotonu? Pe faateleina ai lou talisapaia o lona atamai? Pe faagaeeina ai oe e faaalia lou alofa mo ia? Afai e faapea, e ao la ona ia e faia mea uma lava e te mafaia nei ia auauna ai i a te ia ma le loto atoa. ʻAu ai i le logoina atu i isi o le suafa o Ieova ma fuafuaga. (Salamo 89:14-16; 1 Ioane 4:19) Ola nei e tusa i mataupu silisili amiotonu a le Atua, ma faapea ona sauniuni ai mo le ola faavavau i le lalolagi parataiso i lalo o le pule amiotonu a le Malo.

[Fesili mo le Suʻesuʻega]

[Ata i le itulau 108]

E oo i e oti na toe faatutuina i le ola e Iesu