Mataupu 22

Tapuaiga Moni—o se Auala o le Ola

1. Po o le a le vaaiga ua i o tatou luma nei, ae po o le a e tatau ona tatou fai ia taofia mai ai lea mea?

UA I A te oe i ou lava luma le vaaiga o le ola faavavau i lalo o le malo o le Atua. Pei ona e iloa, ua faavaeina aʻe ma le malosi lenei vaaiga i le upu moni o le Afioga a le Atua. O lona mauaina o loo ua e au atu lava i ai pe afai e te alofa moni i le Atua ma ifo atu i a te ia i le “savavali i le upu moni.”—2 Ioane 1-4.

2. Po o le a le fuaitau na lauiloa ai le tapuaʻiga moni i uluai Kerisiano? Ai se a?

² O le uiga o le tapuaiga moni e sili atu i lo na o le iloa o le upu moni. E sili atu foi lona uiga i lo na o le tautala ma faailo atu le upu moni i isi. O lona uiga ia talitonu ma gaoioi ai i le upu moni, “savavali i le upu moni” i le tuuina atu ia galueaiina i o tatou olaga i aso taitasi uma. (Iakopo 1:22-25) Sa faapea ona pulea ai e le tapuaiga moni olaga o uluai Kerisiano i aso taitasi ma na faapea ona lauiloa ai “o le Ala” ma o “le ala o le upu moni.” (Galuega 9:2, NW; 2 Peteru 2:2) O le “ala” lea na faailogaina mai e le Atua mo ona tagata tapuai uma ia ola ai o latou olaga pei ona latou tausini atu ai i le sini o le ola faavavau.

3. Pe tatau ai se a ona tatou faatatau ai le upu moni o le Afioga a le Atua i gaoioiga taitasi uma o le olaga?

³ O lea, o la tatou tapuaiga i a Ieova le Atua e le mafai ona o se mea e ese mai mea o tatou olaga. Ae ia sili ai, ua tatau ona ia faatatauina i le upu moni o lana Afioga gaoioiga taitasi uma o le olaga. “O lenei, pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua.” (1 Korinito 10:31; tagai foi i le Kolose 3:17) O a tatou gaoioiga taitasi uma e ao ona ia tala feagai ai ma le upu moni o le Afioga a le Atua, ma faapea ona aumai ai le viiga o le Atua. O le a fai lenei mea mo tatou faamanuiaga tumau. E le suia mataupu silisili o lana Afioga amiotonu e tusa i nofoaga e mau ai po o uiga taualumaga faaletagata. E moni pea lava latou, e saʻo pea.—Salamo 119:142.

4. Po o le a ua aafia ai i le faaofuina o le tagata fou?

⁴ Afai e te faaaʻoaʻoa moʻi le tapuaiga moni, po o le ā lona uiga la mo oe nei? O le a aumaia ai lou olaga atoa ia tala feagai ma le ala o le Atua. Ua taʻuina mai e Lana Afioga i a i tatou: “Ia outou to ese le tagata tuai o loo ua leaga, e tusa ma le amioga faaanamua . . . ia toe fuataʻiina manao o outou loto, ma ia oofu outou i le tagata fou ua faia e foliga i le Atua, i le amiotonu ma le amio lelei e faamaoni.” (Efeso 4:22-24) O le uiga o le faaofuina i se tagata fou o le tuuesea lea o mea leaga, tala pepelo; ae ia fiafia i le gagana mama e tumu i le faamaoni. O lona uiga foi ia suia le ōnāga ma le amio faitaaga i le amio saʻo ma le amio mamalu. O lona uiga o le ati aʻe, e le o le faaalualuo faaatuatuvale, a o le lē manatu faapito ma le matamau.—Kolose 3:5-10.

5. Pe mafai ona faaalia uiga faaleatua i taimi uma? Faapefea?

⁵ Pagā le lauusiusi mata faafouina o lea mea pe a faaalia uiga faaleatua i mea uma e feagai ai se tasi ma tagata—po o tagata o le aiga, po o ē faigaluega faatasi, po o ē masani lelei atoa ma tagata ese! (Kolose 3:12-14, 18-23) Peitai, pe te manatu e faigata ona fai o lenei suiga, ma faatumauina i aso taitasi? E te mafai ona fai i le faatasi mai o le fesoasoani o le agaga paia o le Atua. E te mafai foi ona fua mai fua ofoofogia o le agaga o le Atua i lou olaga e ala i le tapuaiga moni.—Kalatia 5:19-24.

6. (a) Pe afaina faapefea le faiga filifiliga a se tasi e le tapuaʻiga moni? (e) Faamatala mai pe afaina faapefea e le tapuaʻiga moni galuega a le Kerisiano ma ana faafiafiaga.

⁶ Pe a avea le tapuaiga moni ma ou ala o le olaga o le a fai lea mou taʻiala e le aunoa. I le faia o filifiliga, tetele pe iti, o le a e iloa ona fesili ifo i a te oe lava: “Po o le ā o le a fiafia i ai Ieova le Atua? Po o a ua faaali mai e mataupu silisili i lana Afioga e saʻo ma o se auala poto?” (Salamo 119:105; Faataoto 3:1-6) O se faaaʻoaʻoga o le a manatu se Kerisiano  moni faapea e lē faalavelave lana galuega faalelalo lagi i lana auaunaga i a Ieova le Atua, pe a aafia ai i le galuega po o faiga e faamalaiaina e le Tusi Paia. (Eperu 13:5, 18; Isaia 2:3, 4; Faaaliga 18:4) Pe a oo foi i taaloga, e ao ona taʻitaʻi le Afioga a le Atua i le filifilia i se mea e tauatiina aʻe e lelei. (Filipi 4:8) Ua leai lava se mea i lou olaga o le a lē pulea i se auala aogā e le tapuaiga moni.

TAUI FIAFIA MO LE ONOSAI

7. (a) Pe mata e le faigofie ai se a ona savali pea i le “ala o le upu moni”? (e) Pe a faafesagai ma faigata faasagatau ma tetee mai, po o le a le auala saʻo ia ui ai, e tusa i le Eperu 10:36?

⁷ Ui ia mea, ona o sauaga ua aumaia e le lalolagi i luga o Kerisiano auuliuli, pe le faigofie ai ona faaauau ona savavali pea ma le faamaoni i le “ala o le upu moni.” Sa lapataʻi mai Iesu i tagata tapuai moni o le a itagia foi i latou ma sauaina, pei ona sa faapeaina foi o ia. (Ioane 15:18-20; 2 Timoteo 3:12) Pe i ai ni mea tutupu e oo ane e tau faamataʻu ai ia faalavelave i au suesuega e le aunoa o le Tusi Paia po o lou au faatasi atu i uso Kerisiano i sauniga faalefaapotopotoga. Pe mafua i le tetee mai ona faafaifaigata ai le galuega talaʻi, e oo lava ina faatetele le mataʻutia. Po o le a e te fai? Ua faatonu mai le Tusi Paia: “Aua ua aoga ia te outou le onosai, ina ia maua e outou le mea na folafolaina, pe a uma ona faia e outou le finagalo o le Atua.” (Eperu 10:36) O lea, na o le auala saʻo e tasi ia uʻunaʻia ma le faamalosi i le auaunaga a le Atua, faatuatua i a te Ia e tausia oe.—Salamo 55:22; Eperu 6:11, 12.

8. Pe ai se a e mafai ai ona tatou maua le olioli moni pe afai tatou te faafesagai ma le tofotofoina o lo tatou faatuatua ua aumaia e faigata ua faasagatau ma tetee mai?

⁸ Sa tusi atu le soo o Iakopo i uluai Kerisiano: “Ia outou manatu, o le mea e fiafia tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai.” (Iakopo 1:2, 3) Ioe, tatou te mafai ona maua le olioli moni pe afai, i lalo o tofotofoga, ia tatou vaavaai aʻe i le tofotofoina o lo tatou faatuatua. Ai se a? Aua foi o lo tatou onosai tatou te lagolagoina aʻe ai le itu a  lo tatou Tamā faalelagi i le finauga sili i luma o le vateatea. E le gata i lea, ua faamaonia mai i a i tatou e le Alo o le Atua: “O lo outou onosai ia maua ai lo outou ola.” Ioe, ona o le onosai o le a e maua ai le taui o le ola faavavau.—Luka 21:16-19; 1 Peteru 2:21-23; 2 Tesalonia 1:4, 5.

9. (a) Pe ai se a ua tatou ola ai i le taimi aupito sili ona faamanuiaina i le tala tuufaasolopito o tagata? (e) Po o le a le vaaiga olioli o i luma mo i latou o ē e le taitai ona lafoaia le ala o le upu moni?

⁹ Ua tatou ola i le taimi aupito sili ona faamanuiaina o le tala tuufaasolopito o le tagata. Ua toeitiiti nei, ona faaumatia lea e Ieova ma lona Alo, o Iesu Keriso le vateatea o fili uma o le malo o le Atua. Paga le olioli o le a i ai, pe a mavae lea taua, ae ola ai i lalo o uiga amiotonu i le lalolagi parataiso, e saoloto ai nai puapuaga, faanoanoaga ma le oti!  E te mafai ona e faatuatua atoatoa i lea faamoemoe, auā o le “Atua . . . e le mafai ona tala pepelo.” (Tito 1:2) Tagai i luma i lea vaaiga faamanuiaina, i lea taimi, ma e le toe taitai ona lafoaiina ai le tapuaiga a Ieova le Atua moni. Ia tumau i le ala o le upu moni, aua “o le a mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea a faavavau.”—1 Ioane 2:17.

[Fesili mo le Suʻesuʻega]