Olaga i se Lalolagi Fou Filemu

Pe a e maimoa i le vaaiga i lenei sāvali, o ā ni faalogona e oo ia te oe? E lē moomoo ea lou loto mo le filemu, fiafia, ma le tamaoaiga o loo vaaia i inā? Ioe, o lea lava. Peitai pe na o se miti ea, pe o se maevaga, e talitonu ai faapea o nei tulaga o le a lē taitai ona iai i le lalolagi?

O le toatele o tagata ai lava o lo latou manatu lena. O mea moni i aso nei o taua, solitulafono, fia taumafa, faamaʻi, aumatuā​—tau o ni nai mea na e taʻua. Peitai o loo iai se mafuaaga mo le faamoemoe. I le tagaʻi atu i le lumanai, ua taʻu mai e le Tusi Paia se ʻlagi fou ma se lalolagi fou o loo tatou faatalitali i ai e pei ona folafolaina mai [e le Atua], e mau ai le amiotonu.’​—2 Peteru 3:13; Isaia 65:17.

O nei “lagi fou” ma le “lalolagi fou” e tusa ai ma le Tusi Paia, e lē o se lagi fou faitino po o se lalolagi fou faaletino. O le lalolagi ma le lagi faitino sa faia ia lelei atoatoa, ma ua faaalia e le Tusi Paia o le a tumau e faavavau. (Salamo 89:36, 37; 104:5) O le “lalolagi fou” o le a avea o se sosaiete amiotonu o tagata o le a ola i le lalolagi, ma o le “lagi fou” o le a avea o se malo po o se pulega faalelagi lelei atoatoa o le a pule i luga o lenei sosaiete faalelalolagi o tagata. Peitai o se mea talafeagai ea le talitonu faapea o le a mafai ona iai se “lalolagi fou” matagofie?

Ia, seʻi manatunatu i le mea moni faapea o na tulaga talafeagai lelei o ni vaega o le uluai fuafuaga a le Atua mo lenei lalolagi. Na ia tuu le uluai ulugatagata i le Parataiso faalelalolagi o Etena ma na avatu ia i laua se tofiga ofoofogia: “Ia fanafanau ia ma ia uluola ma ia tumu ai le lalolagi, ia faatoilalo i ai.” (Kenese 1:28)  Ioe, o le fuafuaga a le Atua mo i laua ia fanafanau ma agaʻi ina faalauteleina atu lo la Parataiso i tuluiga uma o le lalolagi. E ui ina sa mulimuli ane o la filifilia e lē usiusitai i le Atua, ma faamaonia ai le lē tatau ona la ola e faavavau, ae sa leʻi suia ai le uluai fuafuaga a le Atua. Ma e tatau lava ona faataunuuina i se lalolagi fou!​—Isaia 55:11.

O le mea moni, pe a e tatalo i le Tatalo a le Alii, po o Lo Matou Tamā e, ma ole atu ia oo mai le Malo o le Atua, o lona uiga o loo e talosagaina lana pulega faalelagi e soloiesea ai le amioleaga i le lalolagi ma ia pule ai i luga o lena lalolagi fou. (Mataio 6:9, 10) Ma e mafai ona tatou mautinoa o le a tali mai le Atua i lena tatalo, talu ai ua folafolaina mai e lana Afioga: “E fai foi le nuu mo tagata amiotonu, e nonofo ai pea i latou.”​—Salamo 37:29.

Olaga i le Lalolagi Fou a le Atua

O le a aumaia e le Malo o le Atua aogā faalelalolagi e lē ma faatusatusaina, e faataunuuina ai mea lelei uma na fuafuaina e le Atua i le amataga mo ona tagata ia olioli ai i le lalolagi. O le feitagai ma le faailoga tagata o le a aveesea e lē toe iai, ma o le a mulimuli ane ona avea ai lea o tagata taitoatasi i le fogaeleele o uo moni a isi tagata uma. I le Tusi Paia, ua folafola mai ai e le Atua o le a ʻfaaiua e ia o taua e oo lava i tuluiga o le lalolagi.’ “E le sii atu le pelu e le tasi nuu i le tasi nuu, latou te le toe aʻoaʻo foi i taua.”​—Salamo 46:9; Isaia 2:4.

O le lalolagi atoa o le a iʻu ina aumaia i se tulaga parataiso e pei se faatoaga. Ua faapea mai le Tusi Paia: “E olioli ona o i latou le vao lafulafua, ma le nuu naumati; e fiafia le toafa ma fua mai e pei o le aute. . . . Auā e oso mai le vai i le vao lafulafua ma vaitafe i le toafa; e avea foi le serapi ma vailepa, e avea foi le nuu naumati ma vaipuna.”​—Isaia 35:1, 6, 7.

O le a iai mafuaaga uma e fiafia ai i le lalolagi Parataiso. O le a lē toe iai se fia ʻaai ona o le lē lava o mea taumafa. “Ua fua mai e le laueleele ona lava fua,”  ua fai mai ai le Tusi Paia. (Salamo 67:6; 72:16) O le a olioli tagata uma i fua o a latou lava galuega, e pei ona folafolaina mai e Lē na Foafoaina i tatou: “Latou te totō tovine, ma latou aai i o latou fua . . . Latou te le totō ina ia ʻaai ai nisi.”​—Isaia 65:21, 22.

I le lalolagi fou a le Atua, o le a lē toe iai ni tagata e feomaʻi i totonu o fale mau totogi tetele po o nofoaga palapalā e malepelepe fale, auā ua fuafuaina e le Atua: “Latou te fai fale ma latou mau ai . . . Latou te le fai fale, ina ia mau ai nisi.” Ua folafola mai foi e le Tusi Paia: “Latou te le galulue fua.” (Isaia 65:21-23) O lea la o le a iai galuega fua tele mai, e faamalieina ai tagata. O le a lē fiu foi i le soifuaga.

Pe a uma sina taimi, o le a oo lava ina toe faafoisia e le Malo o le Atua le faiā toafimalie sa iai i le faatoaga o Etena i le va o manu, ma i le va o manu ma tagata. Ua fai mai le Tusi Paia: “E nofo faatasi le luko ma le tamaʻi mamoe, e taoto foi le nameri faatasi ma le tamai ʻoti; e faatasi foi le tamai povi ma le leona taanoa atoa ma le manu peti, e taʻitaʻiina foi i latou e le tama itiiti.”​—Isaia 11:6-9; Hosea 2:18.

Seʻi tau ina manatu mai, i le lalolagi Parataiso o maʻi uma atoa ma le tino augavale o le a faapea foi ona faamaloloina! Ua faamautinoa mai ia i tatou e le Afioga a le Atua e faapea: “E le fai mai foi se tasi ua mau ai, Ou te maʻi.” (Isaia 33:24) “E soloiesea foi e le Atua loimata uma i o latou mata; e leai foi se toe oti, po o se faanoanoa, po o se auē, e leai foi se toe puapuaga; aua ua mavae atu mea muamua.”​—Faaaliga 21:4.

 Le Auala e Mafaia ai mo Oe

E mautinoa lava e tatau ona faagaeeina lou loto i folafolaga a le Atua e uiga i le ola i lana lalolagi fou o le amiotonu. Ma a o manatu nisi faapea o le faatinoina o na faamanuiaga ua lelei tele naʻuā e faigata ona talitonuina pe moni, e lē o ni mea ua lelei tele naʻuā e faigata ona aumai e le aao o Lē na Foafoaina i tatou e alofa.​—Salamo 145:16; Mika 4:4.

E moni, o loo iai mea manaomia e tatau ona ausia pe afai tatou te ola e faavavau i le Parataiso o loo sau i le lalolagi. Na faaalia e Iesu se tasi o mea autū i lona faapea mai i le tatalo i le Atua: “O le ola e faavavau foi lenei, ia latou iloa oe, le Atua moni e toatasi, atoa ma le na e auina mai, o Iesu Keriso lea.”​—Ioane 17:3.

O lea afai tatou te mananao moni e ola i le lalolagi fou a le Atua, e tatau ona tatou aʻoaʻoina muamua le finagalo o le Atua ma faia loa. Auā o le mea moni: “O le a mavae atu le lalolagi [lenei] ma lona tuinanau, a o lē fai le finagalo o le Atua e tumau e faavavau,” ina ia olioli e faavavau i faamanuiaga o le a faatotō faaua ifo e Lē na Foafoaina i tatou e alofa.​—1 Ioane 2:17.

O mau sii uma lava o le Tusi Paia e mai le Tusi Paia Samoa, Lomiga 1884.