Olioli i le Olaga Faaleaiga

Pe mafai moni ea ona fiafia aiga?

E mafai faapefea?

Pe e te iloa ea ni aiga e autasi ma fiafia e pei o i latou ia e vaaia i lenei sāvali? Ua matuā malepelepe lava aiga i so o se vaipanoa. O talagā faaipoipoga, leai o ni galuega e tausia ai, o faafitauli i mātua ua nofo toatasi, atoa ma le lē mautonu​—o mea uma na ua mafua ai lenei mala. Na tagi faanoanoa se tagata e tomai i le olaga faaleaiga e faapea: “I le taimi nei, ua iloa uma e tagata valoaga e uiga i le lē taulau o aiga.”

Aiseā ua lutia ai aiga i aso nei i na faafitauli matuiā? E mafai faapefea ona tatou olioli i le olaga faaleaiga?

Le Amataga o le Olaga Faaleaiga

Ina ia taliina na fesili, e manaomia ona tatou iloa le amataga o le faaipoipoga ma le aiga. Auā afai na iai so la Amataga​—Lē na Foafoaina​—e ao la i sui o le aiga ona vaavaai atu ia te ia mo ni taʻiala, ona e mautinoa e sili atu lona silafia o le auala e mafai ai ona tatou olioli atoatoa i le olaga faaleaiga.

Ae o se mea uiga ese, ona e talitonu le toatele faapea e leai se Amataga o le fuafuaga faaleaiga. Fai mai le Encyclopedia Americana: “Ua mafuli atu nisi tagata aʻoga e sue le amataga o le faaipoipoga e ala i le faatusatusaina ma fuafuaga o manu e maualalo ifo i lo le tagata.” E ui i lea, sa fetalai Iesu Keriso e uiga i le foafoaina o le tane ma le fafine. Na ia sii mai uluai faamaumauga a le Tusi Paia e faamaonia ai ma faapea mai: “O e ua faatasia e le Atua, aua neʻi faateaeseina e se tagata.”​—Mataio 19:4-6.

 O lea, e saʻo Iesu Keriso. Sa foafoaina e se Atua atamai uluai tagata ma fuafuaina ai mo se olaga fiafia faaleaiga. Na tuufaatasia e le Atua le uluai ulugalii i le faaipoipoga ma ia fetalai atu ai faapea, e tatau i le tane ona “faatasi ma lana avā; ona avea ai lea o i laua ma tino e tasi.” (Kenese 2:22-24) Po ua lē faapogaia ea la faafitauli i aiga i aso nei ona o le sailiaina o se olaga e solia ai tapulaa ua uma ona faataatitia e Lē na Foafoaina Mea i lana Afioga, le Tusi Paia?

O lē Fea Auala e Manuia?

E lē taumate ua e iloa, o loo faamuamua e le lalolagi faanaunauga ma le faamalieina o le tagata lava ia. Na taʻu atu e se tagata tausi tupe i se vasega faauu mai se kolisi i le Iunaite Setete e faapea: “Ua uluola le matapeapea. E mafai ona e matapeapea ae e lelei lava lou faalogona ia te oe.” Peitai o le sailia o mea faitino e lē taʻitaʻia ai i le manuia. O le mea moni o le pupū i mea faitino, o se tasi lea o mea e sili ona faamataʻuina ai le olaga faaleaiga ona e āfāina ai faiā faaletagata ma alu uma ai le taimi ma tupe a tagata. I le tuufaafeagai, ia manatunatu pe faapefea i na o ni faataoto se lua o le Tusi Paia ona fesoasoani mai ia i tatou ina ia iloa ai le mea e tāua mo le fiafiaga.

 “E sili ona lelei le aai i laau aina ma tagata e te alofa i ai na i lo aano o manu e sili ona lelei a o iai le inoino.”

“E lelei le ʻai i si fāsi falaoa magumagu, a o iai le filemu o le mafaufau na i lo se tausamiga i le fale e tumu i faafitauli.”

Faataoto 15:17; 17:1, “Today’s English Version.”

E malolosi tele na upu, a ea? Seʻi tau ina manatu i le eseesega e iai le lalolagi pe ana tausisi uma aiga i na uluai fautuaga! Ua saunia foi e le Tusi Paia ni taʻiala aogā i le auala e tausia ai e sui o le aiga le tasi ma le isi. Ia manatunatu i na o nisi o taʻiala ua ia aumaia:

Tane: ʻIa alofa atu i lau avā e pei o lou lava tino.’​—Efeso 5:28-30.

E faigofie, ae aogā tele! Ua faatonu foi e le Tusi Paia le tane ina ia ʻāva i lana avā.’ (1 Peteru 3:7) Na te faia lea e ala i le uaʻi totoʻa atu ia te ia, e aofia ai le alofa, malamalama, ma le faamautinoaga. Na te faatāuaina foi manatu o lana avā ma faalogo ia te ia. (Faatusatusa i le Kenese 21:12.) Pe e te lē ioe ea, o le a maua e aiga uma aogā pe afai e tausia ma le faaeteete e le tane lana avā, e pei ona ia manao ai foi e faia faapea ia te ia?​—Mataio 7:12.

Avā: ʻIa faaaloalo loloto mo lau tane.’—Efeso 5:33.

E saosaolaumea le avā i le fiafiaga o le aiga e ala i le fesoasoani i lana tane e faataunuu ana avega tauave mamafa. O le fuafuaga lena na faia ai, auā sa saunia e le Atua le avā e avea ʻo se fesoasoani mo ia, o lona atoaga.’ (Kenese 2:18) Pe mafai ona e talisapaia le faamanuiaina o le olaga faaleaiga pe afai e faaalia e le avā le faaaloalo i lana tane e ala i le lagolago o ana faaiʻuga ma felagolagomai ma ia i le ausia o sini o le aiga?

 Paaga Faaipoipo: “E tatau i tane ma avā ona faamaoni le tasi i le isi.”​—Eperu 13:4, “TEV.”

Afai la te faia faapea, e mautinoa o le a manuia le olaga i le aiga. E masani ona malepelepe se aiga ona o le mulilua. (Faataoto 6:27-29, 32) O lea ua atamai ai ona timaʻi mai le Tusi Paia: “Ia e fiafia i lau avā ma ia e olioli i le tamaitai na lua faaipoipo . . . Aiseā e te alofa ai fua i se isi fafine?”​—Faataoto 5:18-20, TEV.

Mātua: “Ia aʻoaʻoina [lau fanau] e tusa ma o [latou] ala.”​—Faataoto 22:6.

A faaaluina e mātua le taimi ma uaʻi totoʻa atu i le fanau, e mautinoa o le a faaleleia le olaga i le aiga. O lea, ua uunaia ai e le Tusi Paia mātua ina ia aʻoaʻo a latou fanau i mataupu silisili saʻo ʻpe a latou nonofo i o latou fale, pe a latou savavali i le auala, pe a latou taooto ma pe a latou tulai foi.’ (Teuteronome 11:19) Ua fai mai foi le Tusi Paia e ao i mātua ona faailoa atu latou te alolofa i a latou fanau e ala i le aʻoaʻiina o i latou.​—Efeso 6:4.

Fanau: “O outou le fanau, ia outou faalogo i outou mātua i le Alii.”​—Efeso 6:1.

E moni, e lē faigofie ona e usitai i ou mātua i taimi uma, i lenei lalolagi solitulafono. Ae, pe e te lē ioe ea, e atamai ona fai o le mea ua taʻu mai e Lē na Amataina le aiga ia i tatou? Ua ia silafia le mea e sili ona lelei e faafiafiaina ai o tatou aiga. O lea, taumafai e usitai i ou mātua. Ia maumauai e aloese mai tofotofoga e tele o le lalolagi ina ia faia le mea leaga.​—Faataoto 1:10-19.

 O le tele e faatatauina ai le fautuaga a le Tusi Paia e tagata taitoatasi o le aiga, o le manuia foi lea o le a oo i ai le olaga faaleaiga. E lē gata ina o le a olioli ai le aiga i se olaga e sili atu ona lelei i le taimi nei, ae o le a a maua ai foi le faamoemoe o se lumanai matagofie i le lalolagi fou ua folafola mai e le Atua. (2 Peteru 3:13; Faaaliga 21:3, 4) O lea, ia avea ai o se masani a le aiga le suesueina faatasi o le Tusi Paia! E faitau miliona aiga i le lalolagi aoao ua latou iloaina le matuā aogā o taʻiala ua saunia i le tusi ua matagofie ona mamanuina E Mafai ona E Ola e Faavavau i Parataiso i Le Lalolagi.

Seʻi vaganā ua faaalia, o mau uma o le Tusi Paia e mai le Tusi Paia Samoa, Lomiga 1884.