Ae Faapefea “Mau e Faamaonia” le Tolutasi?

UA TAʻUA faapea ua ofoina mai e nisi mau o le Tusi Paia faamaoniga e lagolagoina ai le Tolutasi. Ae peitai, pe a faitau i na mau, e tatau ona teu i o tatou mafaufau faapea e lē o lagolagoina e faamaoniga faale-Tusi Paia ma faatalafaasolopito le Tolutasi.

So o se faasinoga a le Tusi Paia ua ofoina mai e avea ma faamaoniga, e tatau ona malamalama i ai ia ōgatasi ma le aʻoaʻoga tutusa a le Tusi Paia atoa. I le tele o taimi, ua faamaninoina le uiga moni o sea mau e le faamatalaga o fuaiupu o loo siomia ai lea mau.

Toatolu i Totonu o le Toatasi

O LOO ofoina mai e le New Catholic Encyclopedia ni “mau e faamaonia” ai se tolu faapena, ae ua faaalia mai foi: “E lē o aʻoaʻoina le aʻoaʻoga o le Tolutasi Paia i le F[eagaiga] T[uai]. I le F[eagaiga] F[ou], o le faamaoniga aupito leva o loo i tusi a Paulo, ae maise lava le 2 Kori. 13:13 [fuaiupu e 14 i nisi Tusi Paia], ma le 1 Kori. 12:4-6. I Evagelia ua maua manino mai faamaoniga o le Tolutasi i na o le faaupuga faatatau i le papatisoga i le Mata 28.19.”

I na fuaiupu, o loo lisiina faapenei “peresona” e toatolu i Le Tusi Paia Samoa, Lomiga Toe Iloiloina 1969, faamaonia mo le Ekalesia Katoliko Roma. Ua tuufaatasia ai le toatolu e le 2 Korinito 13:13 (14) i lenei auala: “Ia ia te outou uma lava le alofa tunoa o le Alii o Iesu Keriso, ma le alofa o le Atua, atoa ma le mafuta faatasi ma le Agaga Paia.” Ua faapea mai le 1 Korinito 12:4-6: “E matalasi mea alofa, a e tasi lava le Agaga ia; e matalasi foi faiva, a e tasi lava le Alii ia; e matalasi foi mea mamana, a e tasi lava le Atua, o le na te matuā galue i mea uma i tagata uma lava.” Ma ua faitauina faapenei le Mataio 28:19: “O lenei, ia outou o atu e fai nuu uma lava ma soo, ma papatiso atu ia te i latou i le suafa o le Tamā, ma le Atalii, ma le Agaga Paia.”

Pe ua faapea mai na fuaiupu o le Atua, Keriso, ma le agaga paia ua faia aʻe ai se Aoatua Tolutasi, faapea o le toatolu e tutusa i tulaga, le mana, ma le faavavau? E leai, latou te lē o faia faapea, e lē o le lisiina mai o ni tagata se toatolu e pei o Pai, Lafai ma Tui e faapea ai, e toatolu i latou i totonu o le toatasi.

Ua faaalia mai e le Cyclopedia of Biblical, Theological, and Ecclesiastical Literature, a McClintock ma Strong, o lenei ituaiga o faasinoga “ua na ona faamaonia ai faapea ua iai mea e tolu ua faaigoaina, . . . ae ua lē faamaonia e na o ia lava, faapea o le toatolu uma lenei e ā le uiga tauatua, ma latou te mauaina le mamalu tutusa tauatua.”

E ui o se tusi e lagolagoina le Tolutasi, ae ua faapea mai lena tusi e uiga i le 2 Korinito 13:13 (14): “E lē mafai ona matou faaiʻu ma le tonu faapea ua latou maua le pule tutusa, po o le uiga tutusa.” Ma e faatatau i le Mataio 28:18-20 ua faapea mai: “Ae peitai, o lenei mau, i le na o ia lava, e lē faamaonia mautū ai le peresona o nei mea e tolu ua taʻua, po o o latou tulaga tutusa po o le tauatua.”

Ina ua papatisoina Iesu, na taʻua ai foi le Atua, Iesu, ma le agaga paia i le faamatalaga e tasi. O Iesu na “ia iloa atu foi le Agaga o le Atua ua afio ifo e peiseai se lupe, ua oo i ona luga.” (Mataio 3:16) Ae peitai, e lē o faapea mai lenei mau o le toatolu e toatasi. O loo taʻua faatasi i le tele o taimi Aperaamo, Isaako, ma Iakopo, ae ua lē faia ai i latou e lena mea ma tagata e toatasi. O loo faaigoa faatasi Peteru, Iakopo, ma Ioane, ae ua lē faia ai foi e lena mea i latou ma se tagata e toatasi. E lē gata i lea, o le afio ifo o le agaga o le Atua i luga o Iesu i le taimi o lona papatisoga, ua faaalia ai faapea sa leʻi faauuina Iesu e le agaga seia faatoʻā oo mai i lena taimi. Ona o lea le tulaga, ua faapefea la ona avea o ia o se vaega o se Tolutasi lea sa tasi ai pea o ia ma le agaga paia?

O le isi faasinoga o loo taʻua faatasi ai le toatolu o loo maua i nisi o faaliliuga tuai o le Tusi Paia i le 1 Ioane 5:7. Ae peitai, ua faailoa e tagata poto faapitoa e faapea o nei upu sa leʻi iai muamua i le Tusi Paia ae na faatoʻā faaopoopo i se taimi umi mulimuli ane ai. Ua aveesea ma le tonu i le tele o faaliliuga faaonaponei lenei fuaiupu sese.

Ua feagai isi “mau e faamaonia ai” ma na o le faiā i le va o le toalua​—le Tamā ma Iesu. Seʻi o tatou talanoaina nisi o na mau.

 “O Aʻu Nei ma le Tamā, e Tasi Lava i Maua”

UA MASANI ona sii mai lenei mau, i le Ioane 10:30, e lagolagoina ai le Tolutasi, e ui lava e lē o taʻua ai se peresona lona tolu i inā. Ae na faaalia e Iesu lava ia le mea sa ia uiga i ai i le “tasi” o ia ma le Tamā. I le Ioane 17:21, 22, na ia tatalo ai i le Atua e faatatau i ona soʻo “ina ia tasi i latou uma, faapei o oe le Tamā o i totonu ia te au, o aʻu foi o i totonu ia te oe, ina ia tasi i latou i totonu ia te i taua; . . . ina ia tasi o i latou, faapei o i taua ua tasi.” Pe sa tatalo Iesu faapea ia avea ona soʻo uma ma tino e tasi? E leai, e manino lava na tatalo Iesu faapea ina ia latou autasi i manatu ma fuafuaga, e pei ona sa iai o ia ma le Atua.​—Tagai foi i le 1 Korinito 1:10.

I le 1 Korinito 3:6, 8, ua faapea mai ai Paulo: “Na ou totōina, na faasūsūina e Apolo . . . A o lē totō foi ma lē faasūsū, e tasi lava i laua.” Sa leʻi uiga Paulo faapea o ia ma Apolo o ni tagata e toalua i totonu o le toatasi; sa ia uiga faapea sa autasi i laua i le fuafuaga. O le upu Eleni sa faaaogā e Paulo i inei mo le “tasi” (hen) e lē itu-tagata, o lona uiga moni o le “tasi (mea),” ua faaalia ai le autasi i le felagolagomai. O le upu lava foi lea sa faaaogā e Iesu i le Ioane 10:30 e faamatala ai lo la faiā ma lona Tamā. O le upu lava foi lea na faaaogā e Iesu i le Ioane 17:21, 22. O lea, ina ua ia faaaogāina le upu “tasi” (hen) i nei faamatalaga, sa ia fetalai e uiga i le autasi o manatu ma fuafuaga.

E faatatau i le Ioane 10:30, na fai mai ai John Calvin (o lē na lagolagoina le Tolutasi) i le tusi Commentary on the Gospel According to John e faapea: “Na faaaogāseseina e tagata anamua lenei fuaitau e faamaonia ai faapea o Keriso . . . e tutusa i lona tulaga moni ma le Tamā. Auā e lē o finau mai Keriso e uiga i le autasi o le tulaga, ae e uiga i le maliega i le va o ia ma le Tamā.”

I totonu lava o faamatalaga o i fuaiupu e mulimuli mai i le Ioane 10:30, na finau mauaʻi atu ai Iesu faapea o ana upu e leʻi faapea atu ai, o ia o le Atua. Na ia fesili atu i tagata Iutaia o ē na faia lena faaiʻuga sese ma mananao e fetogi ia te ia i maa: “Aiseā ua outou molia mai ai aʻu ua ou upu leaga, ona ua fai atu aʻu, o lē ua faapaiaina ma auina mai e le Tamā i le lalolagi, ʻO aʻu o le atalii o le Atua’?” (Ioane 10:31-36, NE) Ioe, na faapea mai Iesu o ia, e lē o le Atua le Alo, ae o le Alo o le Atua.

 “Ua Ia Faatusa o Ia ma le Atua”?

O LE isi mau ua ofoina mai e lagolagoina ai le Tolutasi o le Ioane 5:18. Ua faapea mai na mananao tagata Iutaia (e pei ona iai i le Ioane 10:31-36) e fasioti ia Iesu auā “ua fetalai mai o ia, o le Atua lona lava Tamā; ua ia faatusa o ia ma le Atua.”

Ae o ai na fai mai na faia e Iesu o ia ia tutusa ma le Atua? E lē o Iesu. Sa puipuia e ia o ia lava faasaga i lenei moliaga sese i le fuaiupu o loo sosoo mai ai (Ioane 5:19): “Ona tali atu lea o Iesu i lenei moliaga: . . . ʻe lē mafai e le Atalii ona fai o se mea na o ia lava; e mafai ona ia faia na o mea lava na te vaai atu i le Tamā o faia.’”​—JB.

E ala i lenei faamatalaga, na faasino atu ai e Iesu i tagata Iutaia faapea sa lē tutusa o ia ma le Atua ma o le mea lea sa lē mafai ai ona faia se mea ona o lona lava manatu. Pe e mafai ona tatou manatu faalemafaufau i se tasi e tutusa ma le Atua e Ona le Malosi Uma Lava o faapea mai e lē mafai “ona fai o se mea na o ia lava”? (Faatusatusa le Tanielu 4:34, 35.) O se mea lelei e mafaufau i ai, ua faaalia e faamatalaga uma e siomia ai le Ioane 5:18 ma le 10:30 faapea sa puipuia e Iesu ia lava faasaga i moliaga sese mai tagata Iutaia o ē, e pei o tagata e talitonu i le Tolutasi, sa latou faia ni faaiʻuga sese!

“Tutusa . . . ma le Atua”?

I LE Filipi 2:6 ua fai mai ai le Douay Version (Dy) Katoliko o le 1609 e uiga ia Iesu: “O lē sa iai i le uiga o le Atua, sa leʻi manatu o ia o se mea faoa ina ia tutusa ia ma le Atua.” Ua tali tutusa le faitauina o le King James Version (KJ) o le 1611 ma le Tusi Paia Samoa o le 1884. O se fuainumera tele foi o faaliliuga faapea o loo faaaogāina pea e nisi e lagolago ai le manatu faapea sa tutusa Iesu ma le Atua. Peitai ia mātau le auala ua faaupuina ai e isi faaliliuga lenei fuaiupu:

1869: “o lē, sa iai i le tulaga o le Atua, sa leʻi manatu i ai o se mea e uʻu mau atu i ai ina ia maua se tulaga tutusa ma le Atua.” The New Testament, a G. R. Noyes.

1965: “O ia​—e moni o i le uiga tauatua!—​sa leʻi faia ma le mautinoa ia te ia lava ia tutusa o ia ma le Atua.” Das Neue Testament, lomiga na toe iloiloina, a Friedrich Pfäfflin.

1968: “o lē, e ui sa iai i le tulaga o le Atua, ae sa leʻi manatu o le tutusa o ia ma le Atua o se mea e tatau ona faia mo ia lava ma le matapeapea.” La Bibbia Concordata.

1976: “Sa iai pea ia te ia le uiga o le Atua, ae sa leʻi manatu o ia e faapea sa tatau ona taumafai e ala i le faamalosia ona tutusa o ia ma le Atua.” Today’s English Version.

1984: “o lē, e ui lava sa iai o ia i le tulaga o le Atua, ae sa leʻi manatu o ia e faatatau i le puʻea, o lona uiga, faapea e tatau ona tutusa o ia ma le Atua.” New World Translation of the Holy Scriptures.

1985: “O lē, sa iai i le tulaga o le Atua, sa leʻi manatu i ai o le tutusa ma le Atua o se mea lea e ao ona uʻu mau i ai.” The New Jerusalem Bible.

Ae peitai, ua faapea mai nisi, e oo lava i nei faasinoga sili ona saʻo ua faaalia ai faapea (1) ua maeʻa ona iai le tutusa o Iesu ma le Atua ae sa leʻi manao o ia e taofi i ai pe faapea (2) sa leʻi manaomia ona ia uʻu i le tutusa ma le Atua auā ua uma ona iai ia te ia.

E tusa ai ma lenei mea, ua faapea mai ai Ralph Martin, i The Epistle of Paul to the Philippians, e uiga i le uluai faa-Eleni: “Ae peitai, e ono fesiligia pe mafai ona see mai le uiga o le veape mai lona uiga moni o le ʻia puʻe’, ʻia fao ma le sauā’ i le uiga o le ʻia taofi mau.’” Ua faapea mai foi The Expositor’s Greek Testament: “E lē mafai ona tatou maua so o se fuaiupu o loo maua ai le uiga o le ἁρπάζω [har·paʹzo] po o se tasi o upu ua maua mai ai, e faapea ʻtaofia o se mea e maua,’ ʻmaua pea’. E foliga mai e iai pea le uiga o le ʻpuʻe,’ ʻfao ma le sauā.’ O lea, e lē faatagaina ai le see mai o le uiga moni o le ʻuʻu i le’ i se tasi uiga e ese atoatoa, le ʻtaofi mau.’”

Mai manatu ua mavae nei, ua manino ai faapea o tagata faaliliu o faaliliuga e pei o le Douay ma le King James ua latou faapioina tulafono ina ia lagolagoina ai itu o le Tolutasi. I le mamao lava mai le faapea atu sa manatu Iesu o se mea talafeagai le tutusa ma le Atua, ua faaalia e le faa-Eleni o le Filipi 2:6, pe a faitauina e aunoa ma se faaituʻau, lona tuufaafeagai, faapea sa leʻi manatu Iesu o se mea talafeagai ona faia faapea.

O faamatalaga a fuaiupu o loo siosiomia ai (Filipi 2:3-5, 7, 8, Dy) ua faamaninoina ai pe ao faapefea ona malamalama i le Filipi 2: fuaiupu e 6. Na uunaia tagata Filipi: “Ma le loto maulalo, ia taitoatasi ona manatu e sili nisi ia te i latou.” Ona faaaogā lea e Paulo Keriso e avea o le faaaʻoaʻoga mataʻina o lenei faalogona: “Ia ia te outou lenei manatu, e pei ona sa iai foi ia Keriso Iesu.” O le ā le “manatu”? Ina ia ʻmanatu e lē o se mea faoa ina ia tutusa ma le Atua’? Leai, o le matuā tuufaafeagai lena o le manatu ua faia! Na i lo o lena, o Iesu, o lē ʻna faamaualugaina le Atua e sili i lo ia,’ o le a lē taitai ona ʻuʻu mau i le tutusa ma le Atua,’ peitai na i lo o lea, “ua faamaulalo e ia ia te ia, ua na anaana ua oo ina maliu.”

E moni lava, e lē mafai ona taʻua ai e lena so o se vaega o le Atua e Ona le Malosi Uma Lava. Sa talanoa e uiga ia Iesu Keriso, o lē na ia faataʻitaʻia ma le lelei atoatoa le manatu o Paulo i inei​—o lona uiga, le tāua o le loto maulalo ma le usiusitai i Lē e Silisili ma Lē na Foafoaina se tasi, o Ieova le Atua.

 “O loo Oʻu Iai”

I LE Ioane 8:58, o loo taʻua ai nisi o faaliliuga e pei o The Jerusalem Bible, le fetalaiga a Iesu faapea: “A o leʻi iai Aperaamo, O loo Oʻu Iai.” Pe sa aʻoaʻoina e Iesu i inā, e pei ona taofi mai ai e le au talitonu i le Tolutasi faapea sa lauiloa ai o ia i le taʻu “O loo Oʻu Iai”? Ma, e pei ona latou taofi, pe o le uiga la o lenei mea faapea o ia o Ieova o Tusitusiga Eperu, talu ai ua taʻua e le King James Version (KJ) i le Esoto 3:14 e faapea: “Sa fetalai atu le Atua ia Mose, O LOO OʻU IAI [LE TULAGA] O LOO OʻU IAI”?

I le Esoto 3:14 (KJ), ua faaaogā le fasi fuaiupu “O LOO OʻU IAI” e avea o se taʻu mo le Atua ina ia faaalia ai faapea o loo soifua moni o ia ma o le a ia faia le mea na ia folafola mai. Ua faapea mai le tusi The Pentateuch and Haftorahs, na faatonuina e Dr. J. H. Hertz, e uiga i le fasi fuaiupu: “Mo tagata Isaraelu o loo noanoatia, o lona uiga e faapea, ʻE ui lava Na te leʻi faaalia Lona mana agaʻi ia te outou, ae o le a Ia faia faapea; e faavavau o Ia ma e mautinoa o le a Ia togiolaina outou.’ O le toatele o tagata faaliliu faaonaponei ua mulimuli atu ia Rashi [o se tagata Falani fai faamatalaga o Tusi Paia ma le Talmud] i le faaupuina o le faaupuga [i le Esoto 3:14] ʻO le a ou iai [i le tulaga] o le a ou iai.’”

E matuā ese le faaupuga i le Ioane 8:58 i lea ua faaaogā i le Esoto 3:14. Sa leʻi faaaogāina lea e Iesu o se igoa po o se taʻu ae o se auala e faamatalaina ai lona iai a o leʻi avea ma tagata. O lea, ia mātau pe ua faapefea ona faaliliuina e nisi faaliliuga o le Tusi Paia le Ioane 8:58:

1869: “Mai lava a o leʻi iai se Aperaamo, ua ou iai.” The New Testament, a G. R. Noyes.

1884: “Sa aʻu i ai, a o lei leai se Aperaamo.” O le Tusi Paia (faa-Samoa).

1935: “Na ou iai a o leʻi fanau mai Aperaamo!” The Bible​—An American Translation, a J. M. P. Smith ma E. J. Goodspeed.

1965: “A o leʻi fanau mai Aperaamo, ua uma ona ou iai e pei ona ou iai nei.” Das Neue Testament, a Jörg Zink.

1969: “O aʻu o lē ola, a o leʻi ola mai Aperaamo.” O le Tusi Paia (faa-Samoa).

1981: “Na ou ola a o leʻi fanau mai Aperaamo!” The Simple English Bible.

1984: “A o leʻi oo ina iai Aperaamo, ua ou iai.” New World Translation of the Holy Scriptures.

O lea, o le manatu moni o le faa-Eleni ua faaaogāina i inei faapea o le “ulumatua” na foafoaina e le Atua, o Iesu, na leva ona iai a o leʻi fanau mai Aperaamo.​—Kolose 1:15; Faataoto 8:22, 23, 30; Faaaliga 3:14.

I inei foi, ua faaalia e le faamatalaga o loo siomia ai lenei faaupuga e faapea o le malamalamaga saʻo lenei. O le taimi lea na mananao ai tagata Iutaia e fetogi Iesu i maa ona o lona taofi faapea na ia ʻiloa Aperaamo’ e ui lava, e pei ona sa latou fai mai, e leʻi oo ina 50 ni ona tausaga. (Ioane 8 Fuaiupu 57) O le tali masani a Iesu o le taʻuina atu o le mea moni e uiga i ona tausaga. O lea, ma le masani na ia fetalai atu ai ia i latou faapea na ia “ola a o leʻi fanau mai Aperaamo!”​—The Simple English Bible.

 “Sa o le Atua le Upu”

I LE Ioane 1:1 ua faitauina faapenei le King James Version: “Sa i le amataga le Upu, ma sa faatasi le Upu ma le Atua, ma sa o le Atua le Upu.” Ua faapea mai le au talitonu i le Tolutasi e uiga i lenei manatu faapea o “le Upu” (faa-Eleni, ho loʹgos), o lē na afio mai i le lalolagi e avea ma Iesu Keriso, o ia lava sa o le Atua e Ona le Malosi Uma Lava.

Ae peitai, seʻi mātau faapea ua toe faataatia ai foi i inei e le faamatalaga o loo siomia ai le faavae mo le malamalamaga saʻo. E oo lava i le King James Version, ua faapea mai, “Sa faatasi le Upu ma le Atua.” (O upu faasisipa o a matou.) O se tasi o lē o loo “faatasi” ma se tasi tagata e lē mafai ona avea ma lena tagata. I le ioe i ai i lenei mea, ua mātauina ai e le Journal of Biblical Literature, na faatonuina e le Jesuit o Joseph A. Fitzmyer, e faapea, afai o le vaega mulimuli o le Ioane 1:1 na faaliliuina ina ia uiga faapea “o le” Atua, “o lona uiga o le a feteenai” lenei “ma le fasi fuaiupu muamua,” lea ua faapea mai sa faatasi le Upu ma le Atua.

Ia mātau foi le auala ua faaliliu e isi faaliliuga i lenei vaega o le fuaiupu:

1808: “ma sa o se atua le upu.” The New Testament in an Improved Version, Upon the Basis of Archbishop Newcome’s New Translation: With a Corrected Text.

1864: “ma o le upu sa o se atua.” The Emphatic Diaglott, faitauina i faaliliuga o upu Eleni taitasi, a Benjamin Wilson.

1928: “ma sa o se meafaiola tauatua le Upu.” La Bible du Centenaire, L’Evangile selon Jean, a Maurice Goguel.

1935: “ma sa tauatua le Upu.” The Bible​—An American Translation, a J. M. P. Smith ma E. J. Goodspeed.

1946: “ma o le Upu sa o se ituaiga tauatua.” Das Neue Testament, a Ludwig Thimme.

1950: “ma sa o se atua le Upu.” New World Translation of the Christian Greek Scriptures.

1958: “ma sa o se Atua le Upu.” The New Testament, a James L. Tomanek.

1975: “ma sa o se atua (pe, o se ituaiga tauatua) le Upu.” Das Evangelium nach Johannes, a Siegfried Schulz.

1978: “ma o le Lokou sa o le ituaiga pei o se atua.” Das Evangelium nach Johannes, a Johannes Schneider.

I le Ioane 1:1 o loo iai ni faaupuga se lua o le nauna Eleni the·osʹ (atua). O le uluai faaupuga e faasino i le Atua e Ona le Malosi Uma Lava, o lē sa faatasi ma ia le Upu (“ma sa faatasi le Upu [loʹgos] ma le Atua [o se ituaiga o le upu the·osʹ]”). O lenei uluai the·osʹ e mulimuli i le upu ton (le), o se ituaiga o le upu faasino faapitoa [definite article] Eleni lea e faasino i se tasi e iloga, i inei o le Atua e Ona le Malosi Uma Lava (“ma sa faatasi le Upu ma [le] Atua”).

I le isi itu, e leai se upu faasino [article] e muamua atu i le the·osʹ lona lua i le Ioane 1:1. O lea o se faaliliuga e tusa ai ma uiga moni o upu taitasi o le a faitauina faapea, “and god was the Word” (“ma sa atua le Upu”). Peitai ua tatou vaaia ua faaliliuina e le tele o faaliliuga lenei the·osʹ lona lua (o se nauna o le talāga [predicate noun]) o le “tauatua,” “pei o le atua,” po o “se atua.” O le ā le pule ua latou faia ai lenei mea?

I le gagana Eleni faa-Koine sa iai le upu faasino faapitoa (“le”), ae sa leai se upu faasino lē faapitoa (“se”). O lea pe afai e lē muamua se upu faasino faapitoa i se nauna o le talāga, o lona uiga la atonu o se nauna lē faapitoa, e faalagolago i le faamatalaga o loo siomia ai.

Ua taʻu mai e le Journal of Biblical Literature e faapea o faaupuga “ua iai se talāga e aunoa ma se upu faasino [anarthrous] e muamua i le veape, i le tele o taimi e faasino i sona uiga.” E pei ona matauina e le Journal, ua faailoa e lenei faapea o le loʹgos e mafai ona faatusa i se atua. Ua faapea mai foi e uiga i le Ioane 1:1: “O le malosi faatatau i se uiga o le talāga ua silisili lava ina ia lē mafai ona manatu i le nauna [the·osʹ] faapea e faapitoa.”

O lea ua faamatilatila ai e le Ioane 1:1 le uiga o le Upu, faapea o ia sa “tauatua,” “pei o se atua,” o “se atua,” ae e lē o le Atua e Ona le Malosi Uma Lava. Ua ōgatasi lenei mea ma le atoaga o le Tusi Paia, lea ua faaalia ai faapea, o Iesu, ua taʻua i inei o “le Upu” i lana matafaioi o le Fofoga Fetalai a le Atua, sa o sē sa usiusitai ma gauai atu na auina mai i le lalolagi e Lē sa Silisili ia te ia, le Atua e Ona le Malosi Uma Lava.

E tele isi fuaiupu o le Tusi Paia ua toetoe lava o tagata faaliliu uma ua latou faaofi atu i ai i se auala tutusa o le upu faasino “se” i le faaliliuina o fuaiupu Eleni ua iai le ituaiga o faaupuga e tasi. Mo se faaaʻoaʻoga, i le Mareko 6:49, ina ua vaai atu le au soʻo ia Iesu o savali i le vai, ua faapea mai le King James Version: “Sa manatu i latou faapea sa o se agaga.” I le gagana Eleni faa-Koine, e lē o iai le “se” i luma o le upu “agaga.” Ae toetoe lava o faaliliuga uma i isi gagana ua faaopoopo i ai le “se” ina ia fetaui le faaliliuga ma le faamatalaga o loo siomia ai. I le auala lava lea e tasi, talu ai ua faaalia i le Ioane 1:1 faapea sa faatasi le Upu ma le Atua, sa lē mafai ona avea o ia ma le Atua ae o “se atua,” pe sa “tauatua.”

Sa taʻua foi e Joseph Henry Thayer, o se tagata poto faapitoa i talitonuga faalotu ma isi mea, o lē na galue i le faaliliuga o le American Standard Version, i se faaupuga faigofie e faapea: “Sa tauatua le Lokou, ae lē o Lē tauatua lava ia.” Ma na tusia e le Jesuit o John L. McKenzie i lana Dictionary of the Bible e faapea: “E tatau ona faaliliuina ma le maumauai le Ioane 1:1 . . . ʻo le upu sa o sē tauatua.’”

 Pe Solia ai se Tulafono?

AE PEITAI, ua faapea mai nisi, o na faaliliuga ua solia ai le tulafono o le kalama Eleni faa-Koine na faasalalauina e le tagata poto faapitoa i le faa-Eleni o E. C. Colwell i tuā i le 1933. Na ia taofi faapea i le faa-Eleni o le nauna o talāga “e iai sona upu faasino [faapitoa] pe a mulimuli mai i le veape; e leai sona upu faasino [faapitoa] pe a muamua atu i le veape.” E ala i lenei faamatalaga sa ia uiga faapea o se nauna o talāga ua muamua atu i le veape e tatau ona malamalama i ai e pei ona iai sona upu faasino faapitoa (“le”) i ona luma. I le Ioane 1:1 o loo muamua atu i le veape le nauna lona lua (the·osʹ), le talāga​—“ma [the·osʹ] sa o le Upu.” O lea, sa taofi Colwell e faapea, e tatau ona faitauina faapea le Ioane 1:1: “ma [o le] Atua sa o le Upu.”

Ae seʻi manatunatu i na o ni faaaʻoaʻoga se lua o loo maua i le Ioane 8:44. I inā ua faapea atu ai Iesu e uiga i le Tiapolo (i faaliliuga faa-Peretania): “O se fasioti tagata ia” ma “o se pepelo ia.” E pei lava ona iai i le Ioane 1:1, o nauna o talāga (“fasioti tagata” ma le “pepelo”) e muamua i veape i le faa-Eleni. E leai se upu faasino lē faapitoa i luma o ia nauna taitasi auā sa leai se upu faasino lē faapitoa i le gagana Eleni faa-Koine. Ae ua faaofi e le tele o faaliliuga le upu “se” auā e manaomia ona faia faapea e le kalama faa-Eleni ma le faamatalaga o loo siomia ai.​—Tagai foi i le Mareko 11:32; Ioane 4:19; 6:70; 9:17; 10:1; 12:6.

Sa manaomia ona faailoa e Colwell lenei mea faatatau i le nauna o talāga, auā na ia faapea mai: “Ua lē faapitoa [“se”] i le na o lenei le tulaga pe a manaomia e le faamatalaga o loo siomia ai.” O lea na oo ina ia ioe faapea pe afai e manaomia e le faamatalaga o loo siomia ai lea mea, e mafai e tagata faaliliu ona faaofi i ai se upu faasino lē faapitoa i luma o le nauna i lenei ituaiga o faaupuga o fuaiupu.

Pe o manaomia e le faamatalaga o loo siomia ai le upu faasino lē faapitoa i le Ioane 1:1? Ioe, auā o le molimau a le Tusi Paia atoa e faapea o Iesu e lē o le Atua e Ona le Malosi Uma Lava. O lea, e lē o le tulafono lē mautinoa o le kalama a Colwell, ae o le faamatalaga o loo siomia ai e tatau ona taʻitaʻiina le tagata faaliliu i tulaga faapena. Ma e manino mai, ona o le tele o faaliliuga ua latou faaofiina i ai le upu faasino lē faapitoa “se” i le Ioane 1:1 ma i isi mau, e toatele tagata poto faapitoa e lē ioe i sea tulafono lē mautinoa, ma ua faapena foi i le Afioga a le Atua.

Leai se Feteenai

PE UA feteenai le faapea atu o Iesu Keriso o “se atua” ma le aʻoaʻoga a le Tusi Paia faapea e na o le toatasi le Atua? E leai, auā i nisi taimi ua faaaogā ai e le Tusi Paia lena upu e faasino ai i meafaiola malolosi. Ua faitauina le Salamo 8:5 (NW) faapea: “Ua e faamaulalo teisi ane o ia [le tagata] i lo ē pei o atua [faa-Eperu, ʼelo·himʹ],” o lona uiga, o agelu. I le tali atu a Iesu faasaga i le tuuaʻiga a tagata Iutaia faapea ua fai atu o ia o ia o le Atua, na ia mātauina ai faapea “na taʻua e ia [i la outou tulafono] o atua i latou e ua i ai le afioga a le Atua,” o lona uiga, o faamasino faaletagata. (Ioane 10:34, 35; Salamo 82:1-6) E oo lava ia Satani ua taʻua o “le atua o le lalolagi nei” i le 2 Korinito 4:4.

Sa iai ia Iesu se tulaga e maualuga atu i lo agelu, tagata lē lelei atoatoa, po o Satani. Talu ai o i latou nei ua faasino atu i ai o ni “atua,” o ē malolosi, e mautinoa lava la e mafai e Iesu ona avea o “se atua” ma o ia o “se atua.” Ona o lona tulaga tutasi i le feagai ai ma Ieova, o Iesu o se “Atua malosi.”​—Ioane 1:1; Isaia 9:6.

Peitai pe o le “Atua malosi,” ua amataina i le mataitusi lapoa, ua lē faaalia ai ea faapea o Iesu ua tutusa ma Ieova le Atua i se tulaga? E leai lava. Ua na ona valoia e Isaia lenei taʻu e avea o se tasi o igoa e fa e taʻuina ai Iesu, ma i le gagana faa-Peretania (ma le faa-Samoa) o igoa faapena ua amata i mataitusi lapopoa. Peitai, e ui sa taʻua Iesu “malosi,” ae na o le toatasi pea lava lē e “Ona le Malosi Uma Lava.” E itiiti sona uiga tāua o le taʻua o Ieova le Atua e “Ona le Malosi Uma Lava” vaganā e iai isi e taʻua foi o atua ae e iai i se tulaga e maulalo ifo.

Ua mātauina e le Bulletin of the John Rylands Library i Egelani faapea e tusa ai ma le manatu o le tagata suesue i talitonuga faalotu Katoliko o Karl Rahner, a o faaaogāina le the·osʹ i mau e pei o le Ioane 1:1 e faasino atu ai ia Keriso, “e leai se tasi o nei faasinoga ua faaaogā ai le ʻtheos’ i se auala ina ia faailoa ai Iesu e faapea, o ia o lē ua taʻua i isi mau o le Feagaiga Fou o le ʻho Theos,’ o lona uiga, o le Atua Silisili.” Ma ua faaopoopo mai le Bulletin: “Afai sa talitonu tusitala o le Feagaiga Fou o se mea matuā tāua faapea e ao i tagata faatuatua ona taʻutino atu o Iesu o le ʻAtua’, e mafai la ona faamatala le mafuaaga e matuā leai lava lena ituaiga patino o taʻutinoga i le Feagaiga Fou?”

 Ae faapefea i upu a le aposetolo o Toma ia Iesu i le Ioane 20:28, “Loʻu Alii e, ma loʻu Atua e!”? O Iesu sa pei o “se atua” ia Toma, ae maise i tulaga faavavega na mafua ai ona ia fai atu nei upu. Ua faamatala e nisi tagata poto faapitoa faapea atonu sa na ona fai atu e Toma na faaupuga o lona ofo tau i faalogona ootia, na fai atu ai ia Iesu ae sa tataʻi atu i le Atua. Po o le ā lava le tulaga, sa leʻi manatu Toma faapea o Iesu o le Atua e Ona le Malosi Uma Lava, auā na iloa e ia ma isi aposetolo uma faapea sa leʻi faapea mai Iesu o ia o le Atua ae na ia aʻoaʻoina faapea e na o Ieova o “le Atua moni e toatasi.”​—Ioane 17:3.

I inei foi, ua fesoasoani mai le faamatalaga o loo siomia ai ina ia tatou malamalama ai i lenei mea. I ni nai aso na muamua atu na taʻu atu ai e Iesu toe faatuina ia Maria le Makatala ina ia taʻu atu i le au soʻo: “Ou te alu ae i loʻu Tamā ma lo outou Tamā, o loʻu Atua ma lo outou Atua.” (Ioane 20:17) E ui lava ua uma ona toe faatuina mai Iesu o se agaga malosi, ae sa avea pea Ieova ma ona Atua. Ma sa faaauau foi ona faasino atu faapena e Iesu ia te Ia e oo lava i le tusi mulimuli o le Tusi Paia, ina ua uma ona faamamaluina o ia.​—Faaaliga 1:5, 6; 3:2, 12.

I le na o le tolu o fuaiupu ina ua mavae le alaga a Toma, i le Ioane 20:31, ua faamanino atili mai e le Tusi Paia le mataupu i lona taʻua faapea: “Ua tusia ia mea, ina ia talitonu ai outou, o Iesu o le Keriso lava ia, o le Alo o le Atua,” e lē o le Atua e Ona le Malosi Uma Lava. Ma sa uiga i le “Alo” i se auala moni, e pei ona iai i le tulaga masani i le tamā ma se atalii, ae lē o se vaega faalilolilo o se Aoatua Tolutasi.

E Tatau ona Ōgatasi ma le Tusi Paia

UA TAOFI faapea e tele isi mau o le Tusi Paia e lagolagoina le Tolutasi. Ae ua tali tutusa nei mau ma mea o loo talanoaina i luga i le faapea, pe a iloiloina ma le faaeteete, latou te lē o ofoina mai se lagolagosua moni. O nei mau ua na ona faataʻitaʻia ai faapea pe a iloiloina so o se faamatalaga e taʻua e lagolagoina ai le Tolutasi, e tatau ona fesili se tasi: Pe o ōgatasi le faamatalaga ma le aʻoaʻoga tutusa a le Tusi Paia atoa​—faapea o Ieova le Atua ua na o ia le Silisili Ese? Afai e leai, o lona uiga la e ao ona sese le faamatalaina.

E manaomia foi ona teu i o tatou mafaufau faapea e leai lava se tasi o “mau e faamaonia ai” mai le Tusi Paia o fai mai ai faapea o le Atua, Iesu, ma le agaga paia e tasi i se Aoatua faalilolilo. E leai lava se mau i so o se mea i le Tusi Paia o faapea mai ai o le toatolu uma e tutusa i le tino, malosi, ma le faavavau. E tutusa le Tusi Paia i le faaalia mai o le Atua e Ona le Malosi Uma Lava, o Ieova, o Lē e na o ia e Silisili Ese, o Iesu o lona Alo na ia foafoaina, ma o le agaga paia o le mana galue o le Atua.

[Faamatalaga faaopoopo i le itulau 24]

“Na faaaogāseseina e tagata anamua [le Ioane 10:30] e faamaonia ai faapea o Keriso . . . e tutusa i lona tulaga moni ma le Tamā.”​—Commentary on the Gospel According to John, a John Calvin

[Faamatalaga faaopoopo i le itulau 27]

O sē e “faatasi ma” se isi tagata e lē mafai ona avea foi o ia o lena lava tagata

[Faamatalaga faaopoopo i le itulau 28]

“Sa tauatua le Lokou, ae lē o Lē tauatua lava ia”​—Joseph Henry Thayer, se tagata poto faapitoa o le Tusi Paia

[Ata i le itulau 24, 25]

Na tatalo Iesu i le Atua faatatau i ona soʻo ʻina ia tasi i latou uma,’ e pei o ia ma le Tamā “ua tasi”

[Ata i le itulau 26]

Sa faaalia e Iesu i tagata Iutaia faapea e lē tutusa o ia ma le Atua, i lona fetalai atu e ʻlē mafai ona ia faia se mea na o ia lava a o mea na te vaai atu i le Tamā o faia’

[Ata i le itulau 29]

Talu ai ona ua taʻua e le Tusi Paia tagata, agelu, e oo lava ia Satani, o “atua,” po o ē malolosi, ua tatau ai la ona taʻua ma le tonu Iesu sili i le lagi o “se atua”