Le Agaga Paia​—Le Mana Galue o le Atua

E TUSA AI ma le aʻoaʻoga o le Tolutasi, o le agaga paia o le peresona lona tolu o le Aoatua, e tutusa ma le Tamā ma le Alo. E pei ona fai mai le tusi Our Orthodox Christian Faith: “O le Agaga Paia ua avea atoa ma le Atua.”

I Tusitusiga Eperu, o le upu e sili ona faaaogāina soo mo le “agaga” o le ruʹach, o lona uiga “mānava; matagi; agaga.” I Tusitusiga Eleni, o le upu o le pneuʹma, e iai sona uiga tutusa. Pe ua faaalia e nei upu faapea o le agaga paia o se vaega o se Tolutasi?

Se Mana Galue

UA FAAALIA e le faaaogāina e le Tusi Paia o le faaupuga “agaga paia” e faapea o se mana (malosi) pulea o loo faaaogāina e Ieova le Atua e faataunuuina ai ana fuafuaga eseese. I sina telē, e mafai ona faatusaina i le eletise, o le malosi e mafai ona faafetaui atu e faia ai gaoioiga eseese e tele.

I le Kenese 1:2 (NW) ua taʻua ai e le Tusi Paia faapea “na fegaoioiai le mana galue [“agaga” (faa-Eperu ruʹach)] o le Atua i le fogatai.” I inei, o le agaga o le Atua o lona mana galue sa galueaiina e faatulagaina ai le lalolagi.

Ua faaaogāina e le Atua lona agaga e faamalamalamaina ai i latou o ē auauna ia te ia. Na tatalo Tavita: “Ia e aʻoaʻo mai ia te au e fai lou finagalo; auā o oe lava loʻu Atua; ia taʻitaʻiina atu aʻu e lou Agaga [ruʹach] lelei i le laueleele laulelei.” (Salamo 143:10) Ina ua tofia tane agavaa e 70 e fesoasoani ia Mose, na fetalai atu le Atua ia te ia: “Ou te avea foi nisi o le agaga [ruʹach] o loo ia te oe, ma ou tuuina atu ia te i latou.”​—Numera 11:17.

Na faamaumauina valoaga o le Tusi Paia ina ua “osofia mai e le Agaga Paia [faa-Eleni, mai le pneuʹma],” tagata o le Atua. (2 Peteru 1:20, 21) I lenei auala sa “faagaeeina e le Atua” le Tusi Paia, o le upu Eleni mo lea o le The·oʹpneu·stos, o lona uiga “ua mānavaina e le Atua.” (2 Timoteo 3:16, NW) Ma na taʻitaʻiina e le agaga paia nisi tagata e vaaia faaaliga pe faia ni miti faavaloaga.​—2 Samuelu 23:2; Ioelu 2:28, 29; Luka 1:67; Galuega 1:16; 2:32, 33.

Sa uunaia Iesu e le agaga paia e alu atu i le vao ina ua mavae lona papatisoga. (Mareko 1:12) O le agaga paia sa pei o se afi i totonu o auauna a le Atua, na mafua ai ona faamalosia i latou e lena mana. Ma na mafua ai foi ona latou mafai ona tautala atu ma le faamalosi ma le loto tetele.​—Mika 3:8; Galuega 7:55-60; 18:25; Roma 12:11; 1 Tesalonia 5:19.

E ala i lona agaga, ua faaoo atu ai e le Atua ana faamasinoga i tagata ma atunuu. (Isaia 30:27, 28; 59:18, 19) Ma e mafai ona oo atu i so o se mea le agaga o le Atua, e gaoioi mo tagata pe faasagatau foi ia i latou.​—Salamo 139:7-12.

 ʻLe Malosi e Sili atu i le Mea e Masani Ai’

E MAFAI foi e le agaga o le Atua ona aumaia “le malosi e sili atu i le mea e masani ai” ia i latou o ē auauna ia te ia. (2 Korinito 4:7, NW) O le mea lenei ua mafua ai ona latou mafai ona tutumau i lalo o tofotofoga o le faatuatua, pe faia foi mea semanū e lē mafai ona latou faia.

Mo se faaaʻoaʻoga, e faatatau ia Samasoni, ua taʻua e le Faamasino 14:6 (JB) e faapea: “Na puʻea o ia e le agaga o Iāuē [Yahweh], ma e ui sa leai sana auupega i lona lima ae na ia saei niniia le leona.” Pe na ulufia pe na puʻea e se peresona tauatua moni Samasoni, ma faaaogāina lona tino ina ia faia le mea sa ia faia? E leai, o le mea moni o “le mana o le ALII [lena] na faamalosia ai Samasoni.”​—TEV.

Ua faapea mai le Tusi Paia ina ua papatisoina Iesu, na afio ifo le agaga paia i ona luga sa foliga mai e pei o se lupe, e leʻi foliga mai o se tagata. (Mareko 1:10) O lenei mana galue o le Atua na mafua ai ona mafai e Iesu ona faamalōlō tagata mamaʻi ma faatutū i ē ua oti. E pei ona fai mai ai le Luka 5:17: “Ua ia te ia [Iesu] foi le mana o le Alii [le Atua] e faamalolo i e mamaʻi.”​—LFK.

Na faamalosia foi e le agaga o le Atua soʻo o Iesu e faia mea faavavega. O loo taʻua i le Galuega 2:1-4 e faapea ina ua faapotopoto faatasi le au soʻo i le Penetekoso sa “faafuasei mai lea o le taalili mai le lagi, peiseai o le matagi ua agi tele mai, . . . Ua faatutumuina foi i latou uma i le Agaga Paia, ua afua ai ona tautala i gagana eseese, pei ona foaiina mai e le Agaga o le gagana ia te i latou.”

O lea na tuuina atu e le agaga paia ia Iesu ma isi auauna a le Atua le malosi ina ia latou faia mea e lē masani ona mafai ona faia e tagata.

E Lē o se Peresona

AE PEITAI, pe lē o iai ea ni fuaiupu o le Tusi Paia o loo tautala e uiga i le agaga paia i ni faaupuga faaperesona? Ioe, ae mātau le mea o loo fai mai ai le tagata suesue i talitonuga faalotu Katoliko o Edmund Fortman e uiga i lenei mea i The Triune God: “E ui e masani ona faamatalaina lenei agaga i ni faaupuga faaperesona, ae foliga mai e matuā manino faapea sa leʻi mafaufauina pe tuuina mai e tusitala paia [o Tusitusiga Eperu] lenei agaga o se peresona maioio.”

I le Tusi Paia e lē o se mea e lē masani ai le faaperesonaina o se mea. Ua faapea mai e uiga i le poto e iai ni ana tama. (Luka 7:35) Ua taʻua o le agasala ma le oti o tupu. (Roma 5:14, 21, NW) I le Kenese 4:7, ua faapea mai The New English Bible (NE): “O le agasala o le temoni o loo faapuna i le faitotoa,” ua faaperesonaina ai le agasala e avea o le agaga leaga o loo faapuna i le faitotoa o Kaino. Ae, o le mea moni, o le agasala e lē o se peresona agaga; e lē o le faaperesonaina foi o le agaga paia e avea ai o se peresona agaga.

 E faapena foi, i le 1 Ioane 5:6-8 (LFK) e lē gata i le agaga ae ua faapea foi ma “le vai, atoa ma le toto” ua avea ma “molimau.” Ae ma le manino lava, o le vai ma le toto e lē o ni peresona, e lē o se peresona foi le agaga paia.

Ua ōgatasi ai ma lenei mea le faaaogāina lautele i le Tusi Paia o “le agaga paia” i se auala e lē faaperesona, e pei o le faatutusa ma le vai ma le afi. (Mataio 3:11; Mareko 1:8) Ua uunaia tagata ina ia faatumuina i le agaga paia ae lē o le uaina. (Efeso 5:18) Ua tautala e uiga ia i latou faapea ua faatumuina i le agaga paia i le auala lava lea e tasi ua faatumuina ai i latou i na uiga e pei o le poto, faatuatua, ma le olioli. (Galuega 6:3; 11:24; 13:52) Ma i 2 Korinito 6:6, o loo aofia ai le agaga paia faatasi ma nisi o uiga. O na faaupuga ua lē taatele pe ana fai moni o le agaga paia o se peresona.

I lea foi, a o faapea mai nisi mau o le Tusi Paia e tautala le agaga, ae ua faailoa mai e isi mau faapea na faia moni lenei mea e ala i tagata po o agelu. (Mataio 10:19, 20; Galuega 4:24, 25; 28:25; Eperu 2:2) O le gaoioiga a le agaga i na taimi ua pei o ni ave o se leitio o loo ona ia faasalalau atu feau mai le tasi tagata i le isi i se mea mamao.

I le Mataio 28:19 (NW) o loo faasino i “le suafa o . . . le agaga paia.” Ae o le upu “suafa [igoa]” e lē uiga i taimi uma o se igoa totino, pe i le faa-Eleni po o le faa-Peretania. Pe a faapea atu tagata faa-Peretania “i le igoa o le tulafono,” e lē o faasino i se peresona. O le mea e uiga i ai faapea o le mea o loo suia e le tulafono, po o lana pule. Ua faapea mai Word Pictures in the New Testament a Robertson: “O le faaaogāina o [le upu] igoa (onoma) i inei o se mea masani i le Septuagint ma le papyri [tusitusiga anamua i pepa na gaosi mai i le vao o le papyrus] mo le malosi po o le pule.” O lea o le papatisoga ʻi le suafa o le agaga paia’ ua mataulia ai le pule a le agaga, lena e mai le Atua ma e galueaiina e ala i le finagalo tauatua.

Le “Fesoasoani”

SA FETALAI Iesu e uiga i le agaga paia o se “fesoasoani,” ma na ia fetalai faapea o le a na aʻoaʻo, taʻitaʻi, ma tautala. (Ioane 14:16, 26; 16:13) O le upu Eleni na ia faaaogā mo le fesoasoani (pa·raʹkle·tos) o loo i le kenera tane (masculine gender). O lea ina ua faasino atu Iesu i mea o le a faia e le fesoasoani, sa ia faaaogā suinauna faaperesona tane. (Ioane 16:7, 8) I le isi itu, ina ua faaaogā le upu Eleni e lē itu-tagata (neuter) mo le agaga (pneuʹma), o le suinauna e lē itu-tagata, o le “ia” [“it”] ua faaaogāina ma le tonu.

Ua nanā lenei mea moni e le toatele o tagata faaliliu ua talitonu i le Tolutasi, e pei ona ioeina e le New American Bible Katoliko e faatatau i le Ioane 14:17: “O le upu Eleni mo le ʻAgaga’ ua lē itu-tagata, ma ona o loo tatou faaaogāina suinauna faaperesona i le gagana faa-Peretania (ʻhe [ia, le tane],’ ʻhis [lana, a le tane],’ ʻhim [ia, le tane]’) ua faaaogāina e le tele o MSS [manusikulipi] Eleni le ʻit [ia, le mea].’”

O lea, pe a faaaogāina e le Tusi Paia suinauna faaperesona tane e fesootai ma le pa·raʹkle·tos i le Ioane 16:7, 8, ua faatalafeagai atu lea i tulafono o le kalama, ae lē o faamatalaina ai se aʻoaʻoga.

E Lē o se Vaega o se Tolutasi

UA FAAILOA mai e pogai eseese e lē o lagolagoina e le Tusi Paia le manatu faapea o le agaga paia o le peresona lona tolu o se Tolutasi. Mo ni faaaʻoaʻoga:

The Catholic Encyclopedia: “E leai lava se mea i le Feagaiga Tuai o tatou maua ai se faaaliga manino o se Peresona Lona Tolu.”

Le tagata suesue i talitonuga faalotu Katoliko o Fortman: “Sa leʻi manatu lava tagata Iutaia i le agaga o se peresona; sa leʻi iai foi se faamaoniga mautū faapea sa iai lea lava manatu i so o se tusitala o le Feagaiga Tuai. . . . O le Agaga Paia ua masani ona faaalia mai i Synoptics [Tusi Evagelia] ma i Galuega e avea o se malosi po o se mana tauatua.”

Le New Catholic Encyclopedia: “Ua manino mai, ua lē o vaai le F[eagaiga] T[uai] i le agaga o le Atua o se peresona . . . O le agaga o le Atua ua na o le mana o le Atua. Afai ua faamatalaina i nisi taimi faapea ua ese mai le Atua, ua faia lenei ona o loo gaoioi i fafo o Ia le mānava a Iāuē [Yahweh].” Ua faapea mai foi: “O le tele o mau o le F[eagaiga] F[ou] o loo faaalia ai le agaga o le Atua o se mea, ae lē o se tasi; ae maise e vaaia lenei mea i le faatusatusaina i le va o le agaga ma le mana o le Atua.”​—O upu faasisipa o a matou.

 A Catholic Dictionary: “I le vaaiga atoa, o loo tautala le Feagaiga Fou, e pei o le [Feagaiga] Tuai, e uiga i le agaga o se mana po o se malosi tauatua.”

O lea la, sa leʻi manatu tagata Iutaia po o uluai Kerisiano foi i le agaga paia o se vaega o se Tolutasi. O lena aʻoaʻoga na oo mai i senituri mulimuli ane. E pei ona mātauina ai e A Catholic Dictionary: “O le Peresona lona tolu sa faatu mai i se Fonotaga i Alesania i le 362 . . . ma mulimuli ane i le Fonotaga i Constantinople i le 381”​—pe tusa e tolu ma le afa senituri ina ua mavae ona faatumuina soʻo i le agaga paia i le aso Penetekoso!

E leai, o le agaga paia e lē o se peresona ma e lē o se vaega o se Tolutasi. O le agaga paia o le mana galue o le Atua na te faaaogāina e faataunuuina ai lona finagalo. E lē tutusa ma le Atua ae o loo mafai pea ona faaaogāina e le Atua ma o loo gauai pea ia te ia.

[Faamatalaga faaopoopo i le itulau 22]

“I le vaaiga atoa, o loo tautala le Feagaiga Fou, e pei o le [Feagaiga] Tuai, e uiga i le agaga o se mana po o se malosi tauatua.”​—A Catholic Dictionary

[Ata i le itulau 21]

I se tasi taimi na aliaʻi mai ai le agaga paia e pei o se lupe. I se isi taimi na aliaʻi mai ai e pei o ni laulaufaiva afi​—ae lē taitai o se peresona