Na Faapefea ona Tuputupu aʻe le Aʻoaʻoga o le Tolutasi?

I LE taimi nei atonu e te fesili mai: ʻAfai e lē o se aʻoaʻoga faale-Tusi Paia le Tolutasi, na faapefea ona avea o se aʻoaʻoga a Kerisinetoma?’ Ua manatu le toatele faapea sa uluai faia le faamatalaga i le Fonotaga i Nicaea i le 325 T.A.

Ae peitai, e lē moni atoatoa lena mea. Na faaofi faamalosi mai e le Fonotaga i Nicaea faapea o Keriso ua tutusa lona tulaga ma le Atua, lea na faataatia ai le faavae mo aʻoaʻoga faalotu faa-Tolutasi mulimuli ane. Ae na ia leʻi faavaeina le Tolutasi, auā sa leʻi taʻua ai i lea fonotaga le agaga paia e faapea o le peresona lona tolu o le Aoatua tolutasi.

 Le Vaega a Konesetatino i Nicaea

MO LE tele o tausaga, sa iai ni teteega tele i faavae faale-Tusi Paia i le tuputupu aʻe o le manatu faapea o Iesu o le Atua. Ina ia taumafai e foia le finauga, na valaaulia ai e le emeperoa o Roma o Konesetatino epikopo uma i Nicaea. O le mea moni, e tusa ma le 300, o le vaega itiiti o le aofaiga atoa, na auai.

Sa lē o se Kerisiano Konesetatino. Sa masalomia na liliu o ia i se vaitaimi mulimuli ane o le olaga, ae sa leʻi papatisoina o ia seia oo i le taimi sa taoto o ia ua toeitiiti maliu. E faatatau ia te ia, fai mai Henry Chadwick i The Early Church: “Sa tapuai atu Konesetatino, e pei o lona tamā, i le La Lē Mafaatoilaloina; . . . o lona faaliliuina e lē tatau ona faauigaina faapea na faia ona o se faalogona alofa i totonu ia te ia . . . Sa o se mataupu faafitafita. O lona malamalamaga e uiga i aʻoaʻoga Kerisiano sa lē taitai ona manino tele, ae sa ia mautinoa faapea o le manumalo i le taua e faalagolago atu i le meaalofa a le Atua o Kerisiano.”

O le ā le vaega na faia e lenei emeperoa e leʻi papatisoina i le Fonotaga i Nicaea? Ua taʻua e le Encyclopædia Britannica e faapea: “Sa pule Konesetatino lava ia, i le taʻitaʻia ma le tiotio o talanoaga, ma faatū e ia lava . . . le faaupuga tāua tele e faamatalaina ai le sootaga o Keriso i le Atua i le faamatalaga o talitonuga na tuuina mai e le fono, ʻe tulaga e tasi o ia ma le Tamā’ . . . Ona o le matuā matataʻu i le emeperoa, na sainia ai e epikopo uma, vagana ai na o le toalua, le faamatalaga, ae o le toatele o i latou na matuā tetee faasaga i o latou lava mafaufauga i le faia faapea.”

O lea, sa tāua tele le vaega a Konesetatino. Ina ua mavae le lua masina o felafolafoaiga aasa faalotu, ona faalaa ane lea o lenei tagata faipolotiki faapaupau ma filifili ai ina ia talia i latou o ē na faapea mai o Iesu o le Atua. Ae aiseā? Ma le mautinoa lava e lē ona o se talitonuga faale-Tusi Paia. Ua fai mai A Short History of Christian Doctrine: “O le mea autū, sa matuā leai se malamalamaga o Konesetatino e uiga i fesili na fesiligia i le aʻoaʻoga faalotu Eleni.” O le mea sa ia malamalama i ai faapea na avea le fevaevaeaiga faalotu o se faamataʻu i lona emepaea, ma sa ia manao e faamautuina lana pulega.

Ae peitai, e leai lava se epikopo i Nicaea na laga se Tolutasi. Sa filifilia e i latou na o le natura o Iesu ae lē o le matafaioi a le agaga paia. Afai sa avea se Tolutasi ma upu moni manino a le Tusi Paia, pe sa lē tatau ea la ona latou faatu ane i lena taimi?

 Tuputupu aʻe Atili

INA UA mavae le Fono i Nicaea, sa faaauau pea felafolafoaiga i le mataupu mo le faitau sefulu o tausaga. Sa oo ina toe talia mo sina taimi i latou o ē sa talitonu faapea e lē tutusa Iesu ma le Atua. Ae mulimuli ane sa iʻu le filifiliga a Emeperoa Theodosius e faasagatau ia i latou. Na ia faavaeina le faamatalaga o talitonuga a le Fonotaga o Nicaea o le tulaga mo lona malo ma fuafuaina le Fonotaga a Constantinople i le 381 T.A. e faamaninoina ai le faamatalaga.

Na ioe lena fonotaga e tuu atu le agaga paia i le tulaga tutusa ma le Atua ma Keriso. Mo le uluai taimi, na amata ai ona aliali manino mai le Tolutasi a Kerisinetoma.

Peitai, e oo lava ina ua maeʻa le Fono a Constantinople, sa leʻi avea ai le Tolutasi o se faamatalaga o talitonuga ua talia lautele. Na tetee i ai le toatele ma i lea na aumaia ai ia i latou sauaga aasa. Na o senituri mulimuli ane sa faaupuina ai le Tolutasi i ni faamatalaga o talitonuga mautu. Ua mātauina e The Encyclopedia Americana: “O le tuputupu aʻe atoatoa o le Faa-Tolutasi na tupu i le itu i Sisifo, i Tulaga faaleaʻoaʻoga o Tausaga Tutotonu, ina ua faia se faamalamalamaga i faaupuga faafilosofia ma suesuega tau i le mafaufau (psychology).”

Le Faamatalaga Faa-Athanasius

SA SILI ona atoatoa le faamalamalamaina o le Tolutasi i le Faamatalaga faa-Athanasius. O Athanasius o se taʻitaʻi lotu o lē na lagolagoina Konesetatino i Nicaea. O le faamatalaga o loo taʻu ai lona igoa ua faalauiloa e faapea: “Matou te tapuai i le Atua e toatasi i le Tolutasi . . . O le Tamā o le Atua, o le Alo o le Atua, ma o le Agaga Paia o le Atua; peitai e lē o i latou o ni atua e toatolu, ae o le Atua e toatasi.”

Ae peitai, ua ioe tagata poto faapitoa ua logologoina lelei e faapea, sa leʻi fatuina e Athanasius lenei faamatalaga. Ua faapea mai The New Encyclopædia Britannica: “Sa leʻi iloa le faamatalaga i le Lotu i Sasae seia oo i le senituri lona 12. Talu mai le senituri lona 17, ua ioe le toatele o tagata poto faapitoa faapea sa lē tusia e Athanasius (na maliu i le 373) le Faamatalaga faa-Athanasius, ae ai lava na fatuina i Falani i saute i le senituri lona 5. . . . Ua foliga mai na iai muamua taaʻiga a le faamatalaga i Falani i saute ma Sepania i senituri lona 6 ma lona 7. Sa faaaogāina i tapuaiga i sauniga a le lotu i Siamani i le senituri lona 9 ma sina taimi mulimuli ane i Roma.”

O lea na alu le tele o senituri mai le taimi o Keriso faatoʻā talia ai i le lautele i Kerisinetoma le Tolutasi. Ma i nei mea uma, o le ā na taʻitaʻiina filifiliga? Pe o le Afioga a le Atua, po o manatu faataʻitaʻi lotu ma faapolotiki? Ua tali mai E. W. Hopkins i Origin and Evolution of Religion e faapea: “O le faamalamalamaga masani mulimuli o le tolutasi, sa avea tele o se mataupu o faiga faapolotiki a le lotu.”

Sa Valoia le Aposetasi

UA FETAUI lelei lenei talafaasolopito taʻuleagaina o le Tolutasi ma le mea na valoia e Iesu ma ona aposetolo o le a mulimuli mai i o latou taimi. Na latou faapea mai o le a iai le aposetasi, le liliuese, le paʻū ese mai le tapuaiga moni seia toe afio mai Keriso, pe a toe faafoisia le tapuaiga moni a o leʻi oo mai le aso a le Atua o le faaumatiaga o lenei faiga o mea.

E tusa ai ma lena “aso,” na faapea mai le aposetolo o Paulo: “O le a lē oo mai vagana ua oo mai muamua le aposetasi ma faaalia le tagata lē taupulea.” (2 Tesalonia 2:3, 7, NW) Mulimuli ane, na ia valoia: “Pe a mavae ona ou alu, e oo mai ia te outou luko saua o e le faasaoina le lafu mamoe. E tupu mai foi ia te outou lava tagata e tautala mai i mea faapiopio, e fetoso ese ai le au soo ia mulimuli ia i latou.” (Galuega 20:29, 30, LFK) Na tusi foi isi soʻo o Iesu e uiga i lenei aposetasi ma lona vasega o taʻitaʻi lotu ʻlē taupulea.’​—Mo faaaʻoaʻoga, tagai i le 2 Peteru 2:1; 1 Ioane 4:1-3; Iuta 3, 4.

Na tusi foi Paulo: “E mautinoa le oo mai o le taimi, na i lo o le faamalieina i aʻoaʻoga aogā, o le a matuā naunau tagata i le mea fou faatoʻā amata ma faapotopoto mo i latou lava se faasologa atoa o faiaʻoga e tusa ma o latou lava tuinanau; ona liliu atu lea o i latou i tala faafagogo, na i lo o le faalogologo atu i le upu moni.”​—2 Timoteo 4:3, 4, Jerusalem Bible Katoliko (JB).

Na faamatala e Iesu lava ia le mea sa i tua o lenei paʻū ese mai le tapuaiga moni. Na ia fetalai faapea na ia luluina fatu saito lelei ae o le fili, o Satani, o le a na toe luluina le fanua i titania. O lea faatasi ai ma uluai lau o saito, na aliali mai ai foi ma titania. O lea la, o le liliuese mai le Faa-Kerisiano mamā sa faatalitalia seia oo i le seleselega, pe a faasaʻo ai mea e Keriso. (Mataio 13:24-43) Ua faapea mai The Encyclopedia Americana: “Sa leʻi faaatagia mai ma le tonu e le faa-Tolutasi o le senituri lona fa aʻoaʻoga muamua faa-Kerisiano e faatatau i le natura o le Atua; ae i le faafeagai ai, o le liliuese mai i lenei aʻoaʻoga.” O fea, la, na amata ai lenei liliuese?​—1 Timoteo 1:6.

 Mea na Taaʻina Ai

I LE lalolagi atoa anamua, i tuā lava i Papelonia, sa taatele ai le tapuaiga i atua faapaupau sa faatasia taitolu, po o ni tasitolu. Sa taatele foi lena taaʻiga i Aikupito, Eleni, ma Roma i senituri muamua atu, i le vaitaimi o Keriso, ma ina ua mavae Keriso. Ma ina ua mavae le maliliu o aposetolo, sa amata ai ona aʻea le Faa-Kerisiano e talitonuga faapaupau faapena.

Na mātauina e le tusitala o talafaasolopito o Will Durant: “Sa leʻi faaumatia e le Faa-Kerisiano le talitonuga faapaupau; na ia faaaogāina. . . . Sa mai Aikupito manatu e uiga i se tolutasi tauatua.” Ma i le tusi Egyptian Religion, ua mātauina ai e Siegfried Morenz e faapea: “Sa manatunatu tele ai aʻoaʻo faalotu Aikupito i le tolutasi . . . Ua tuufaatasi atua e toatolu ma avea e pei o se mea e tasi, e taʻua foi i le numera tasi. I lenei auala sa faaalia ai se sootaga tuusaʻo o le malosi faaleagaga o le lotu Aikupito ma aʻoaʻoga faalotu faa-Kerisiano.”

I lea, i Alesania, Aikupito, na faaatagia ai e tagata lotu, e pei o Athanasius, i le faaiʻuga o le senituri lona tolu ma le amataga o le senituri lona fa lenei taaʻiga a o latou fatuina manatu na ua taʻitaʻiina atu ai i le Tolutasi. Na salalau atu a latou lava taaʻiga, ma o lea ua manatu ai Morenz faapea “ua avea aʻoaʻoga faalotu a Alesania ma puluvaga i le va o tofi tuufaasolo a lotu Aikupito ma le aʻoaʻoga faalotu Kerisiano.”

I upu amata o le History of Christianity a Edward Gibbon, ua tatou faitau ai e faapea: “Afai na faatoilaloina le Tapuaiga Faapaupau e le Faa-Kerisiano, ua tutusa lona moni e faapea na faafilogiaina e le Tapuaiga Faapaupau le Faa-Kerisiano. O le Aʻoaʻoga mamā e uiga i le Atua a uluai Kerisiano . . . na suia, e le Lotu a Roma, i le aʻoaʻoga lavelave o le tolutasi. O le tele o talitonuga faapaupau, na faia muamua e tagata Aikupito ma faatāuaina e Plato, sa taofi mau i ai e faapea o ni mea e ao ona talitonu i ai.”

Ua mātauina e A Dictionary of Religious Knowledge ua fai mai le toatele faapea o le Tolutasi “o se aʻoaʻoga iʻuvale na nonō mai i lotu faanuupo, ma faaofi i le faatuatuaga Kerisiano.” Ma ua faalauiloa mai e The Paganism in Our Christianity: “O le amataga o le [Tolutasi] e faapaupau atoa lava.”

O le pogai lena, na tusi ai James Hastings i le Encyclopædia of Religion and Ethics: “I lotu Initia, mo se faaaʻoaʻoga, tatou te feiloai ma le vaega faaletolutasi a Brahmā, Siva, ma Viṣṇu; ma i lotu Aikupito tatou te feiloai ma le vaega faaletolutasi a Osiris, Isis, ma Horus . . . E lē na o i lotu faatalafaasolopito ia ua tatou maua ai le manatu i le Atua o se Tolutasi. Ua manatua faapitoa le manatu faa-Plato faafouina e uiga i le Mea Moni Silisiliese pe Mulimuli Aʻe,” lea e “faamatalaina i le tulaga tasitolu.” O le ā le faiā i le va o le tagata faifilosofia Eleni o Plato ma le Tolutasi?

Le Faa-Plato

UA MANATU faapea, na ola Plato mai i le 428 e oo i le 347 T.L.M. Sa na leʻi aʻoaʻoina le Tolutasi i le tulaga o loo iai nei, ae na faaava atu ai e ana aʻoaʻoga faafilosofia le auala mo le Tolutasi. Mulimuli ane, na mapuna aʻe faalapotopotoga faafilosofia ia sa aofia ai talitonuga faatasitolu, ma na taaʻina ai e manatu o Plato e uiga i le Atua ma natura.

Ua taʻu mai e le Nouveau Dictionnaire Universel faa-Falani (Lomifefiloi Fou Aoao) e uiga i taaʻiga a Plato e faapea: “O le tolutasi faa-Plato, lea ua na o se toe faatulagaina o tolutasi anamua i tuā i tagata anamua, ua foliga mai o le tolutasi faafilosofia faalemafaufau o uiga, lea ua fanauina mai hypostases po o peresona tauatua e tolu ia ua aʻoaʻoina e lotu Kerisiano. . . . E mafai ona maua i lotu [faapaupau] uma o aso anamua . . . le manatunatuga a lenei tagata faifilosofia Eleni e uiga i le tolutasi tauatua.”

Ua faaalia i The New Schaff-Herzog Encyclopedia of Religious Knowledge le taaʻiga a lenei faafilosofia Eleni: “O aʻoaʻoga e uiga i le Lokou ma le Tolutasi na maua lo latou tulaga mai Tamā Eleni, o ē . . . na matuā taaʻina tuusaʻo pe lē tuusaʻo, i filosofia faa-Plato . . . E faapea o mea sese ma aʻoaʻoga iʻuvale na sosolo mai i totonu o le Lotu mai lenei puna e lē mafai ona faafitia.”

Ua faapea mai The Church of the First Three Centuries: “Sa auau malie mai le aʻoaʻoga o le Tolutasi ma sa iai sina tuai i lona tuputupu aʻe; . . . o lona amataga sa mai se puna e matuā ese mamao mai puna a Tusitusiga Iutaia ma Kerisiano; . . . na tupu aʻe, ma na faatasia i totonu o le Faa-Kerisiano, e ala i lima o Tamā ua faaauilumaina le faa-Plato.”

E oo i le faaiʻuga o le senituri lona tolu T.A., na autasia ma le lē toe mavaevae le “Faa-Kerisiano” ma filosofia fou faa-Plato. E pei ona taʻua e Adolf Harnack i Outlines of the History of Dogma, o aʻoaʻoga a le lotu ua oo ina “matuā mauaa i le eleele o Hellenism [manatu faapaupau faa-Eleni]. I lea auala na oo ai ina avea o se mea lilo i le anoanoai tele o Kerisiano.”

Na faapea mai le lotu o ana aʻoaʻoga fou sa faavae i le Tusi Paia. Ae ua fai mai Harnack: “O le mea moni ua faamaonia i lona lotolotoi taumatematega faa-Eleni, o manatu uputuu ma tu o le tapuaiga faale-mea lilo faapaupau.”

I le tusi A Statement of Reasons, ua faapea mai Andrews Norton e uiga i le Tolutasi: “E mafai ona tatou iloiloina le talafaasolopito o lenei aʻoaʻoga, ma iloa ai lona puna, e lē i le faaaliga Kerisiano, ae i le filosofia faa-Plato . . . O le Tolutasi e lē o se aʻoaʻoga a Keriso ma ona Aposetolo, ae o se tala fatu o le aʻoga a tagata faa-Plato mulimuli ane.”

O lea, i le senituri lona fa T.A., na matuā lauolaola ai atoatoa le aposetasi lea na valoia e Iesu ma ona aposetolo. O le tuputupu aʻe o le Tolutasi sa na o le faamaoniga e tasi lea o lenei mea. Na amata ai foi e lotu aposetate ona talia faatasi isi manatu faapaupau, e pei o le afi i hele, le lē mafai ona oti o le solu, ma le ifo i tupua. I le tautala faaleagaga, na ulu atu ai Kerisinetoma i ona tausaga pogisa na valoia, ua pulea e le vasega o le “tagata lē taupulea” o taʻitaʻi lotu, lea na tuputupu aʻe.​—2 Tesalonia 2:3, 7, NW.

 Aiseā na Lē Aʻoaʻo ai e Perofeta a le Atua?

AISEĀ, mo le faitau afe o tausaga, na lē aʻoaʻo ai e perofeta a le Atua ona tagata e uiga i le Tolutasi? I se vaitaimi aupito lata mai, pe o le a lē faaaogāina ai e Iesu lona tomai i le avea o le Faiaʻoga Sili e faamanino ai le Tolutasi i ona soʻo? Pe o le a faagaeeina e le Atua le faitau selau o itulau o le Tusi Paia ae lē faaaogāina nisi o nei faatonuga e aʻoaʻo ai le Tolutasi pe ana fai sa avea o le “aʻoaʻoga autū” o le faatuatuaga?

Pe tatau i Kerisiano ona talitonu faapea i senituri ina ua mavae Keriso ma ina ua uma ona faagaeeina le tusia o le Tusi Paia, na lagolagoina ai e le Atua le faaupuina o se aʻoaʻoga sa leʻi iloa e ana auauna mo le faitau afe o tausaga, le aʻoaʻoga o le “mea lilo e lē mafai ona malamalama i ai” “e lē ma tāea e le mafaufau o le tagata,” se aʻoaʻoga ua na faaalia sa iai sona talaaga faapaupau ma sa “avea o se mataupu tele o faiga faapolotiki a lotu”?

E manino le molimau a talafaasolopito: O le aʻoaʻoga o le Tolutasi o se liliuese mai le upu moni, o se faaaposetateina mai ai.

[Faamatalaga faaopoopo i le itulau 8]

ʻO le faa-Tolutasi o le senituri lona fa o le liliuese mai aʻoaʻoga muamua faa-Kerisiano.’​—The Encyclopedia

Americana

[Pusa i le itulau 9]

“Le Tasitolu o Atua Sili”

I le tele o senituri a o leʻi oo i aso o Keriso, sa iai tasitolu, po o tolutasi, o atua i Papelonia ma Asuria anamua. Ua mātauina e le tusi faa-Falani “Larousse Encyclopedia of Mythology” se tasi o tasitolu faapena i lena ogaeleele o Mesopotamia: “Sa vaevaeina ai le vateatea i vaega e tolu ma o ia vaega taitasi sa pulea e se atua. O le vaega a Anu o le lagi. Sa avatu le lalolagi ia Enlil. Na avea Ea ma pule o vai. Na latou fausia faatasi aʻe le tasitolu o Atua Sili.”

[Pusa i le itulau 12]

Tolutasi Hinitu

Ua faapea mai le tusi “The Symbolism of Hindu Gods and Rituals” e faatatau i se tolutasi Hinitu lea na iai i le tele o senituri a o leʻi afio mai Keriso: “O Siva o se tasi o atua o le Tolutasi. Ua faapea o ia o le atua o le faaumatiaga. O isi atua e toalua o Brahma, o le atua o le foafoaga ma Vishnu, o le atua o le tausiaina. . . . Ina ia faailoa faapea o nei faatulagaga e tolu e tasi ma tutusa, ua faatasia atua e toatolu i le foliga e tasi.”​—Faasalalauina e A. Parthasarathy, Bombay.

[Ata i le itulau 8]

“O le mea autū, sa matuā leai se malamalamaga o Konesetatino e uiga i fesili na fesiligia i le aʻoaʻoga faaloto Eleni.”​—A Short History of Christian Doctrine

 [Ata i le itulau 10]

1. Aikupito. Tasitolu o Horus, Osiris, Isis, meleniuma lona 2 T.L.M.

2. Papelonia. Tasitolu o Ishtar [Eseta], Sin, Shamash, meleniuma lona 2 T.L.M.

3. Pamira. Tasitolu o le atua o le masina, le Alii o le Lagi, le atua o le la, pe tusa ma le senituri 1 T.A.

4. Initia. Aoatua tolutasi faa-Hinitu, pe tusa ma le senituri lona 7 T.A.

5. Kamupesia. Aoatua tolutasi faa-Puta, pe tusa ma le senituri lona 12 T.A.

6. Nōue. Tolutasi (Tamā, Alo, agaga paia), pe tusa ma le senituri lona 13 T.A.

7. Falani. Tolutasi, pe tusa ma le senituri lona 14 T.A.

8. Italia. Tolutasi, pe tusa ma le senituri lona 15 T.A.

9. Siamani. Tolutasi, pe tusa ma le senituri lona 19 T.A.

10. Siamani. Tolutasi, senituri lona 20 T.A.