Pe Ao ona E Talitonu i Ai?

PE E te talitonu i le Tolutasi *? O le toatele o tagata i Kerisinetoma ua faia faapea. Ia, ua avea o le aʻoaʻoga autū a lotu mo senituri.

Ona o lenei mea, atonu e te manatu ai faapea e lē mafai ona iai se fesili i ai. Ae e iai, ma i ona po nei e oo lava i nisi ua lagolagoina lenei aʻoaʻoga, ua latou faaopoopo atu le aasa i le fefaloaiga.

Aiseā e ao ai i se mataupu e pei o lenei ona manatu mamafa i ai na i lo le mafaufau puupuu i ai? Auā na fetalai Iesu lava ia: “O le ola faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.” O lea o lo tatou lumanai atoa e faalagolago i lo tatou iloa o le natura moni o le Atua, ma o lona uiga ia oo atu i le aa o le fefaloaiga i le Tolutasi. O lea la, aiseā e lē iloilo ai e oe lava?​—Ioane 17:3, LFK. *

Ua iai manatu eseese e uiga i le Tolutasi. Peitai i le tulaga lautele o le aʻoaʻoga o le Tolutasi Paia e faapea i le Aoatua e tolu peresona, o le Tamā, le Alo, ma le Agaga Paia; peitai, o i latou uma faatasi e na o se Atua e toatasi. Ua faapea mai le aʻoaʻoga, o le toatolu e tutusa, e ona le malosi uma lava, e leʻi foafoaina e se tasi, ma ua iai mai le vavau i le Aoatua.

Ae peitai, ua faapea mai nisi e sese le aʻoaʻoga o le Tolutasi, o le Atua e Ona le Malosi Uma Lava e tutasi o sē e ese ai, e faavavau, ma e aoao lona malosi. Ua latou faapea mai o Iesu i lona muai iai a o leʻi avea ma se tagata, sa pei o agelu, o se peresona agaga e ese ai na foafoaina e le Atua, ma ona o lenei mafuaaga e tatau ona iai sona amataga. Ua latou aʻoaʻo faapea sa leʻi tutusa lava Iesu ma le Atua e Ona le Malosi Uma Lava i so o se tulaga; ua gauai atu pea o ia i le Atua ma o loo faapena lava. Latou te talitonu foi faapea o le agaga paia e lē o se peresona ae o le agaga o le Atua, o lona mana galue.

O ē lagolagoina le Tolutasi latou te faapea mai ua faavaeina e lē gata i uputuu faalotu ae faapea foi ma le Tusi Paia. O tagata faitio i le aʻoaʻoga ua faapea mai e lē o se aʻoaʻoga a le Tusi Paia, ua oo lava ina folafola e se tasi tusi o talafaasolopito: “O le amataga o le [Tolutasi] e faapaupau atoatoa.”​—The Paganism in Our Christianity.

Afai e moni le Tolutasi, o se mea taʻufaatauvaaina ai ia Iesu le faapea mai sa leʻi tutusa lava o ia ma le Atua i le avea o se vaega o le Aoatua. Ae afai e sese le Tolutasi, o se mea taʻufaatauvaaina ai foi la i le Atua e Ona le Malosi Uma Lava ona taʻua so o se tasi e tutusa ma ia, ma e sili atu ona leaga le taʻua o Maria o le “Tinā o le Atua.” Afai e sese le Tolutasi, ua lē faaaloalo la i le Atua le faapea atu, e pei ona mātauina i le tusi Catholicism: “Seʻi vagana ua tausia atoatoa e [tagata] lenei Faatuatuaga ma ia lē faaleagaina, e aunoa ma se masalosalo o le a faaumatia [i latou] e faavavau. Ma o le Faatuatuaga Katoliko lenei: matou te tapuai i le Atua e toatasi o le Tolutasi.”

O lea, ua iai mafuaaga lelei e ao ai ona e manao ia iloa le upu moni e uiga i le Tolutasi. Ae, a o leʻi iloiloina lona amataga ma lona fai mai e moni, o le a avea o se fesoasoani le faamatala ia sili ona maʻoti lenei aʻoaʻoga. O le ā tonu lava le Tolutasi? Ua faamatalaina faapefea e ē lagolagoina?

[Faaopoopoga i lalo]

[Ata i le itulau 2]

Itu Tauagavale: O le faatagata Aikupito o le meleniuma lona lua (T.L.M.) o le Tasitolu o Amon-Ra, Ramses II, ma Mut. Itu Taumatau: O le faatagata o le Tolutasi o Iesu Keriso, le Tamā, ma le agaga paia i le senituri lona sefulufa (T.A.). Mātau, o peresona e toatolu ae na o le fa vae.