Pe Manino o se Aʻoaʻoga a le Tusi Paia?

AFAI ua moni le Tolutasi, e tatau la ona manino ma ia tausisia lona aumaia i le Tusi Paia. Aiseā? Auā e pei ona ioeina e aposetolo, o le Tusi Paia o le faaaliga lea a le Atua o ia lava i le fanau a tagata. Ma talu ai e manaomia ona tatou iloa le Atua ina ia tapuai atu ia te ia i le auala e talia, e ao ai i le Tusi Paia ona manino i lona taʻuina mai ia i tatou po o ai tonu o ia.

Na talia e tagata talitonu o le uluai senituri le Tusi Paia o le faaaliga moni lea a le Atua. O le faavae mo o latou talitonuga, le pule mulimuli. Mo se faaaʻoaʻoga, ina ua talaʻi atu le aposetolo o Paulo i tagata i le aai o Perea, na “latou talia le upu ma le fiafia tele, ua saili i Tusi [Paia] i lea aso ma lea aso, pe moni ia mea.”​—Galuega 17:10, 11.

O le ā le aiā na faaaogā e tane lauiloa o le Atua i lena taimi? Ua taʻu mai e le Galuega 17:2, 3 (NW) ia i tatou: “E tusa ai ma le masani a Paulo . . . na ia felafolafoai ma i latou mai le Tusi Paia, ua faamatala ma faamaonia e mau sii [mai le Tusi Paia].”

Sa faataatia e Iesu lava ia le faaaʻoaʻoga i le faaaogāina o le Tusi Paia o le faavae mo lana aʻoaʻoga, i lona fetalai atu faalausosoo: “Ua tusia.” “Ona faamatala ai lea e ia ia te i laua o mea ua tusia ia te ia i Tusi [Paia] uma.”​—Mataio 4:4, 7; Luka 24:27.

I lea, sa faaaogā ai e Iesu, Paulo, ma ē na talitonu o le uluai senituri le Tusi Paia o le faavae mo a latou aʻoaʻoga. Na latou iloa faapea “o Tusi Paia uma lava e faagaeeina e le Atua ma e aogā e aʻoaʻo ai, e aʻoaʻi ai, e faasaʻo ai mea, e aʻoaʻi ai i le amiotonu, ina ia atoatoa ona tomai le tagata o le Atua, ia faaauupegaina atoatoa mo galuega lelei uma.”​—2 Timoteo 3:16, 17, NW; tagai foi i le 1 Korinito 4:6; 1 Tesalonia 2:13; 2 Peteru 1:20, 21.

Talu ai e mafai ona “faasaʻo ai mea” e le Tusi Paia, e ao ona faaalia manino mai ai faamatalaga e uiga i se mataupu faavae e pei ona fai mai ai i le Tolutasi. Peitai, pe o faapea mai ea le au aʻoaʻo faalotu ma le au tusitala o talafaasolopito lava latou faapea e manino o se aʻoaʻoga a le Tusi Paia?

“Tolutasi” i le Tusi Paia?

UA TAʻUA i se lomiga Porotesano: “E lē maua i le Tusi Paia le upu Tolutasi . . . Na te leʻi maua se tulaga aloaia i aʻoaʻoga faalotu a le lotu seia oo i le senituri lona 4.” (The Illustrated Bible Dictionary) Ma ua faapea mai se molimau Katoliko e faapea o le Tolutasi “e lē . . . [o le] afioga tuusaʻo ma moni a le Atua.”​—New Catholic Encyclopedia.

Ua taʻua mai foi The Catholic Encyclopedia: “I le Tusi Paia e lē o iai lava se upu e tasi e taʻu mai ai le tuufaatasia o Peresona Tauatua e Toatolu. O le upu τρίας [triʹas] (lea ua faaliliuina i ai le upu Latina trinitas) na uluai maua i tusitusiga a Teofilo o Anetioka pe ā ma le T. A. 180 . . . E leʻi pine mulimuli ane ae aliali mai i lona faaupuga Latina o le trinitas i tusitusiga a Tetuliano.”

Ae peitai, e lē o se faamaoniga lea ia te ia lava faapea na aʻoaʻoina e Tetuliano le Tolutasi. Mo se faaaʻoaʻoga, o le tusi Katoliko Trinitas​—A Theological Encyclopedia of the Holy Trinity, ua mātauina faapea o nisi upu a Tetuliano sa mulimuli ane faaaogā e isi tagata e faamatala ai le Tolutasi. Ona lapatai mai lea: “Ae e lē mafai ona fai se faaiʻuga faanatinati ona o le faaaogāina, auā na te lē o faatatauina upu i le aʻoaʻoga faalotu o le Tolutasi.”

 Molimau a Tusitusiga Eperu

E UI ina lē maua le upu “Tolutasi” i le Tusi Paia, ae pe tau o le manatu o le Tolutasi e aʻoaʻoina manino mai ai? Mo se faataʻitaʻiga, o le ā ua faaalia e Tusitusiga Eperu (“Feagaiga Tuai”)?

Ua faaalia e The Encyclopedia of Religion: “Ua ioe aʻoaʻo faalotu i aso nei faapea e lē o iai i le Tusi Paia Eperu se aʻoaʻoga o le Tolutasi.” Ma ua faapea mai foi le New Catholic Encyclopedia: “O le aʻoaʻoga o le Tolutasi Paia e lē o aʻoaʻoina i le F[eagaiga] T[uai].”

I se auala tutusa, ua faaalia mai e Jesuit Edmund Fortman i lana tusi The Triune God: “O le Feagaiga Tuai . . . e leʻi tuusaʻo maia ia i tatou se iʻuga maʻoti po o se sootaga tatau, e uiga i se Atua Tolutasi o ia o le Tamā, le Alo ma le Agaga Paia. . . . E leai se faamaoniga faapea sa oo ina masalomia e so o se tusitala paia le iai o se [Tolutasi] i le Aoatua. . . . E oo i le iloa foi i [le “Feagaiga Tuai”] ni fautuaga po o ni faaataata po o ni ʻfaailoga natia’ o le tolutasi o peresona, ua i tala atu o faaupuga ma uiga o tusitala paia.”​—O upu faasisipa o a matou.

O se iloiloga o Tusitusiga Eperu lava latou o le a lagolagoina nei faamatalaga. I lea, e leai se aʻoaʻoga manino o se Tolutasi i uluai tusi e 39 o le Tusi Paia lea ua faia aʻe ai le kanona moni o Tusitusiga Eperu faagaeeina.

Molimau a Tusitusiga Eleni

IA, O LEA, pe o tautala mai ma le manino Tusitusiga Kerisiano Eleni (“le Feagaiga Fou”) e uiga i se Tolutasi?

Ua faapea mai The Encyclopedia of Religion: “Ua ioe aʻoaʻo faalotu faapea e lē o maua foi i le Feagaiga Fou se aʻoaʻoga maʻoti o le Tolutasi.”

Ua taʻua e Jesuit Fortman e faapea: “Ua lē o aumaia e tusitala o le Feagaiga Fou . . . ia i tatou se aʻoaʻoga saunia pe fatuina ai le Tolutasi, leai ni aʻoaʻoga ua faamatalaina maʻoti faapea i le Atua e toatasi e iai ni peresona tauatua se toatolu e tutusa. . . . E leai lava se mea o tatou maua ai so o se aʻoaʻoga faatolutasi e uiga i ni peresona mavaevae se toatolu o le olaga ma gaoioiga tauatua i totonu o le Aoatua e tasi.”

Ua mātauina e The New Encyclopædia Britannica: “E lē o aliali mai i le Feagaiga Fou le upu Tolutasi po o le aʻoaʻoga ua faamatalaina maʻoti.”

Ua faapea mai Bernhard Lohse i A Short History of Christian Doctrine: “E tusa ai ma le Feagaiga Fou, e lē o maua ai i totonu e se tasi se aʻoaʻoga moni o le Tolutasi.”

Ua taʻua tutusa foi e The New International Dictionary of New Testament Theology e faapea: “E lē o iai i le F[eagaiga] F[ou] le aʻoaʻoga ua tuputupu aʻe o le Tolutasi. ʻE lē o iai se faamatalaga tuusaʻo i le Tusi Paia e faapea o le Tamā, le Alo, ma le Agaga Paia e tutusa i le uiga autū’ [na fai mai ai le aʻoaʻo faalotu Porotesano o Karl Barth].”

Ua ioeina e le polofesa o E. Washburn Hopkins o le Iunivesite o Yale e faapea: “Ua foliga mai sa leʻi iloa lava e Iesu ma Paulo le aʻoaʻoga o le Tolutasi; . . . e leai se mea na la fai mai ai e uiga i ai.”​—Origin and Evolution of Religion.

Ua mātauina foi e le tusitala o talafaasolopito o Arthur Weigall: “Sa leʻi taʻua lava e Iesu Keriso se tulaga faapena, ma e leai se mea o le Feagaiga Fou o aliali mai ai le upu ʻTolutasi.’ Sa faatoʻā talia e le Lotu le manatu i le tolu selau tausaga ua mavae talu le maliu o lo tatou Alii.”​—The Paganism in Our Christianity.

O lea, e lē o aumaia e tusi e 39 o Tusitusiga Eperu po o le kanona o tusi faagaeeina e 27 o Tusitusiga Kerisiano Eleni so o se aʻoaʻoga manino o le Tolutasi.

Na Aʻoaʻoina e Uluai Kerisiano?

PE SA aʻoaʻoina e uluai Kerisiano le Tolutasi? Mātau faamatalaga o loo mulimuli mai a tusitala o talafaasolopito ma aʻoaʻo faalotu:

“I le Faa-Kerisiano amata sa leʻi iai se aʻoaʻoga maʻoti o le Tolutasi e pei ona mulimuli ane faamatalaina atili i faamatalaga.”​—The New International Dictionary of New Testament Theology.

“Ae peitai, i le amataga sa leʻi manatu uluai Kerisiano i le faatatauina o le manatu [o le Tolutasi] i lo latou lava faatuatuaga. Sa tuuina atu lo latou tuutoina i le Atua le Tamā ma ia Iesu Keriso, le Alo o le Atua, ma sa latou iloatino . . . le Agaga Paia; ae sa leai se manatu i nei toatolu o se Tolutasi moni, e tutusa ma e autasi i le Tasi.”​—The Paganism in Our Christianity.

“Muamua sa lē faa-Tolutasi le faatuatuaga Kerisiano . . . Sa lē faapena foi i taimi o aposetolo ma vaitaimi ina ua mavae le au aposetolo, e pei ona faaatagia mai i le F[eagaiga] F[ou] ma isi tusitusiga Kerisiano i le amataga.”​—Encyclopædia of Religion and Ethics.

“O le faaupuga ʻe toatasi le Atua i Peresona e toatolu’ sa lē mauaa lona faavae, e mautinoa foi sa matuā lē talia atoatoa i le olaga Kerisiano ma ona taʻutinoga o le faatuatua, a o leʻi oo i le iʻuga o le senituri lona 4. . . . Sa leai se mea i Tamā Faaaposetolo e oo i le latalata atu itiiti i sea mafaufauga po o vaaiga.”​—New Catholic Encyclopedia.

 Mea na Aʻoaʻoina e Tamā i Luma atu o Nicaea

SA LAUILOA Tamā i luma atu o Nicaea i le avea o faiaʻoga faalotu taʻimua i uluai senituri ina ua mavae le soifua mai o Keriso. O mea na latou aʻoaʻoina ua lelei ona mafaufau i ai.

Na taʻua e Justin Martyr, o lē na maliu pe ā ma le 165 T.A., e faapea o Iesu a o leʻi avea ma tagata, sa o se agelu na foafoaina, o lē e “ese mai na i lo le Atua o lē na foafoaina mea uma lava.” Na ia faapea mai o Iesu sa maulalo ifo i lo le Atua ma “na te leʻi faia lava se mea e tasi seʻi vagana ai mea na . . . finagalo Lē na Foafoaina na te faia ma taʻu atu.”

O Irenaeus, o lē na maliu pe ā ma le 200 T.A., na faapea mai a o leʻi avea Iesu ma tagata, sa ese lona soifua mai le Atua ma sa maulalo ifo i lo o ia. Na ia faasino faapea e lē tutusa Iesu ma le “Atua moni e Toatasi ua na o ia le Atua,” o lē e “silisili i mea uma lava, ma e leai se isi e tusa ma ia.”

Na taʻua le Atua e Clement o Alesania, o lē na maliu pe ā ma le 215 T.A., e faapea “o le Atua moni e toatasi e lē mafoafoaina ma e lē mafaaumatia.” Na ia faapea mai o le Alo “e pito atu i le Tamā o lē toatasi e ona le malosi uma lava” ae lē tutusa ma ia.

Na aʻoaʻo e Tetuliano, o lē na maliu pe ā ma le 230 T.A., le silisili ese o le Atua. Na ia mātauina: “E ese le Tamā mai le Alo (o le isi [peresona]), auā e sili atu o ia; faapei o ia o lē ua na faia se tasi e ese mai lē na ia faia; o ia ua aauina mai, e ese mai lē ua ia auina mai.” Na ia faapea mai foi: “Sa iai se taimi na lē iai le Alo. . . . Sa na o le Atua, a o leʻi iai mea uma lava.”

Na faapea mai Hippolytus, o lē na maliu pe ā ma le 235 T.A., o le Atua “o le Atua e toatasi, o Lē muamua ma na o Ia, o Lē na Faia ma o le Alii o mea uma lava,” o lē “e leai sē tusa ma ia [i tausaga] . . . Ae sa Toatasi o ia, sa na o ia lava; o lē, ina ua finagalo i ai, sa faia ina ia iai le mea sa lē iai muamua,” e pei o Iesu, o lē na foafoaina, a o leʻi avea ma tagata.

Na faapea mai Origen, o lē na maliu pe ā ma le 250 T.A., “o le Tamā ma le Alo o ni mea eseese se lua . . . o ni mea se lua e tusa ma o la uiga autū,” ma faapea “pe a faatusatusa atu i le Tamā, [o le Atalii] o se malamalama itiiti lava.”

I le aotelega o faamaoniga o talafaasolopito, ua faapea mai ai Alvan Lamson i The Church of the First Three Centuries: “O le aʻoaʻoga lauiloa faaonaponei o le Tolutasi . . . e lē maua ai le lagolagoina mai le faamatalaga a Justin [Martyr]: ma o lenei faamatalaga e mafai ona faalauteleina atu i Tamā uma i luma atu o Nicaea; o lona uiga, i tusitala Kerisiano uma mo le tolu senituri ina ua mavae le soifua mai o Keriso. E moni, ua latou taʻua le Tamā, le Alo, ma le . . . Agaga paia, ae leʻi faapea e tutusa, e leʻi faauigaina i se tulaga faafuainumera e tasi, e lē o se Toatolu i le Toatasi, i so o se uiga ua talia nei e tagata talitonu i le Tolutasi. O le faafeagai lava o le mea moni lea.”

I lea, ua faamanino ai e le molimau a le Tusi Paia ma talafaasolopito faapea sa leʻi iloa le Tolutasi i vaitaimi o le Tusi Paia ma i le tele o senituri mulimuli ane ai.

[Faamatalaga faaopoopo i le itulau 7]

“E leai se faamaoniga faapea sa oo ina masalomia e so o se tusitala paia le iai o se [Tolutasi] i le Aoatua.”​—The Triune God