Tapuai i le Atua i Ana Tuutuuga

NA OLE atu Iesu i le Atua i le tatalo: “O le ola e faavavau foi lenei, ia latou iloa [ia latou maua le poto o, NW] oe le Atua moni e toatasi, atoa ma le ua e auina mai, o Iesu Keriso lea.” (Ioane 17:3) O le ā le ituaiga o poto? O le “finagalo [o le Atua] ina ia faasaoina ituaiga uma o tagata, ma ia oo ina latou maua le poto saʻo lelei o le upu moni.” (1 Timoteo 2:4, NW) Ua faaliliuina faapenei le fasi fuaiupu mulimuli e The Amplified Bible: “Ia iloa maʻoti ma saʻo lelei le Upu Moni [tauatua].”

O lea ua finagalo le Atua ia i tatou ina ia iloa ma le saʻo lelei o ia ma ana fuafuaga, i le ōgatasi ma le upu moni tauatua. Ma o le Afioga a le Atua, le Tusi Paia, o le puna o lena upu moni. (Ioane 17:17; 2 Timoteo 3:16, 17) Pe a aʻoaʻoina ma le saʻo lelei e tagata mea o fai mai ai le Tusi Paia e uiga i le Atua, ona mafai lea ona latou alofia le pei i latou o tagata na o loo taʻua i le Roma 10:2, 3 (NW), o ē e “maelega i la le Atua; ae lē tusa ma le poto saʻo lelei.” Pe e pei o tagata Samaria, o ē na fetalai atu i ai Iesu: “Tou te tapuai ma le lē iloa.”​—Ioane 4:22.

O le mea lea, afai tatou te mananao i le faamaoniga a le Atua, e manaomia ona tatou fesili ifo ia i tatou lava: O le ā o fai mai ai le Atua e uiga ia te ia lava? E faapefea ona ia finagalo e tapuaia o ia? O ā ana fuafuaga, ma e ao faapefea ona tatou ofi atu i ai? O le poto saʻo lelei i le upu moni ua aumaia ai ia i tatou tali saʻo i na fesili. Ona mafai lea ona tatou tapuai i le Atua i ana aiaiga.

Lē Āva i le Atua

“AO Ē āva ia te aʻu, ou te āva ia te i latou,” ua fetalai mai ai le Atua. (1 Samuelu 2:30, NW) Pe o se āva i le Atua le taʻua o se tasi e tutusa ma ia? Pe o se āva ia te ia le taʻua o Maria “o le tinā o le Atua” ma o le “Puluvaga fafine . . . i le va o Lē na Foafoaina Mea ma Ana meafaiola,” e pei ona taʻua ai e le New Catholic Encyclopedia? E leai, o na manatu e faalumaina ai le Atua. E leai se tasi e tutusa ma ia; e leai foi sona tinā faaletino, talu ai o Iesu sa lē o le Atua. Ma e leai foi se “Puluvaga fafine,” auā ua uma ona tofia e le Atua e na o le “toatasi foi le puluvaga i [le va o] le Atua ma tagata,” o Iesu.​—1 Timoteo 2:5; 1 Ioane 2:1, 2.

E aunoa ma se masalosalo, o le aʻoaʻoga o le Tolutasi ua faafenuminumiai ma faavaivaia ai le malamalamaga o tagata e uiga i le tulaga moni o le Atua. Ua na taofia tagata mai le iloa saʻo lelei o le Pule Silisili Ese Aoao, o Ieova le Atua, ma mai le tapuai atu ia te ia i ana aiaiga. E pei ona taʻua ai e le tagata suesue i talitonuga faalotu o Hans Küng: “Aiseā e manao ai se tasi e faaopoopo se mea i le talitonuga e uiga i le toatasi o le Atua ma le tutasi lena e na ona mafai ona faavaivaia pe faaleaogāina ai lena toatasi ma le tutasi?” Ae ua faia lena mea e le talitonu i le Tolutasi.

O i latou o ē talitonu i le Tolutasi latou te lē o “taofi i le poto saʻo lelei e uiga i le Atua.” (Roma 1:28, NW) Ua faapea mai foi lena fuaiupu: “Ua tuuina atu ai i latou e le Atua i le loto leaga, latou te fai ai mea e le tusa.” Roma 1 Fuaiupu e 29 e oo i le 31 ua lisiina mai ai nisi o na mea ʻe lē tusa,’ e pei o le ʻfasioti tagata, misa, faaʻoleʻole, le leai o se lotoaiga, ma le lē alofa.’ Ua faia na lava mea e lotu ua taliaina le Tolutasi.

Mo se faataʻitaʻiga, e masani lava i tagata talitonu i le Tolutasi ona latou sauaina e oo lava i le fasiotia o i latou o ē tetee i le aʻoaʻoga o le Tolutasi. Ma ua mamao lava lo latou oo atu atili. Ua latou fasiotia o latou uso talitonu i le Tolutasi i taimi o taua. O le ā e aupito sili ona ʻlē tusa’ na i lo o le fasiotia e tagata Katoliko isi Katoliko, fasiotia e Orthodox isi Orthodox, fasiotia e Porotesano isi Porotesano​—ua faia nei mea uma i le igoa lava e tasi o le Atua o le Tolutasi?

Peitai, na fetalai manino lava Iesu: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) Ua faalauteleina e le Afioga a le Atua lenei mea, i le faapea mai: “O le mea lea ua iloa ai le fanau a le Atua ma le fanau a le tiapolo. O i latou uma o e le fai le amiotonu, e le mai le Atua i latou, atoa ma ē le alolofa i o latou uso.” Ua na faatusaina i latou o ē fasiotia o latou uso faaleagaga ia “Kaino na i loo leaga [Satani], na fasioti foi i lona lava uso.”​—1 Ioane 3:10-12.

O lea, o le aʻoaʻoina o aʻoaʻoga fenuminumiai e uiga i le Atua ua taʻitaʻiina atu ai i le faia o ni gaoioiga ua solia ai ana tulafono. O le mea moni, o le mea ua tupu i Kerisinetoma atoa, o le mea na faamatalaina e le tagata Tenemaka e suesue i talitonuga faalotu o Søren Kierkegaard e faapea: “Ua aveesea e Kerisinetoma le Faa-Kerisiano e aunoa ma lona iloa.”

Ua fetaui le tulaga faaleagaga o Kerisinetoma ma le mea na tusia e le aposetolo o Paulo: “Ua latou taʻu ane ua latou iloa le Atua, a e faafiti ia te ia i a latou galuega, o inosia i latou ma faalogogata, latou te le faamaoni foi i se galuega lelei e tasi.”​—Tito 1:16.

Toeitiiti, pe a aumaia e le Atua lenei faiga amioleaga o mea i lona iʻuga, o le a manaomia ona tala atu ai Kerisinetoma faa-Tolutasi. Ma o le a faamasinoina o ia i le faasalaina ona o ana gaoioiga ma aʻoaʻoga lē āva i le Atua.​—Mataio 24:14, 34; 25:31-34, 41, 46; Faaaliga 17:1-6, 16; 18:1-8, 20, 24; 19:17-21.

 Teena le Tolutasi

E MATUĀ lē mafai ona iai se faagutugutulua i upu moni a le Atua. O lea, ina ia tapuai i le Atua i ana aiaiga o lona uiga ia teena le aʻoaʻoga o le Tolutasi. E feteenai lea mea ma le mea na talitonu ma aʻoaʻoina e perofeta, Iesu, le au aposetolo, ma uluai Kerisiano. E feteenai ma le mea na fetalai mai ai le Atua e uiga ia te ia i lana lava Afioga faagaeeina. O lea la, ua ia fautua mai ai: “Ia faailoa atu ua na o aʻu lava le Atua ma e leai se tasi e pei o aʻu.”​—Isaia 46:9, TEV.

E lē lagolagosua i manaoga a le Atua le faafenuminumiaia o ia ma faaliloliloina. Na i lo o lea, o le sili atu ona fenuminumiai o tagata e uiga i le Atua ma ana fuafuaga, o le sili foi lea ona fetaui lelei mo le Fili o le Atua, o Satani le Tiapolo, le ʻatua o lenei lalolagi.’ O ia lē na siitia na aʻoaʻoga sese ina ia ʻfaatauasoina ai manatu o tagata lē talitonu.’ (2 Korinito 4:4) Ma ua lagolagoina foi e le aʻoaʻoga o le Tolutasi manaoga o taʻitaʻi lotu o ē mananao ina ia tausisia la latou pule i tagata, auā ua latou faafoliga mai e pei ua na o tagata suesue i talitonuga faalotu e mafai ona malamalama i ai.​—Tagai i le Ioane 8:44.

E aumaia e le poto saʻo lelei e uiga i le Atua le mapusaga tele. Na te faasaʻolotoina i tatou mai aʻoaʻoga o loo feteenai ma le Afioga a le Atua ma mai faalapotopotoga ua avea ma aposetate. E pei ona fetalai Iesu: “E iloa foi e outou le mea moni, e tuusaʻoloto foi outou e le upu moni.”​—Ioane 8:32.

E ala i le āva i le Atua o lē silisili ese ma i le tapuai ia te ia i ana tuutuuga, o le a mafai ai ona tatou alofia le faasalaga ua lē o toe umi ae ia aumaia i luga o Kerisinetoma aposetate. Na i lo o lea, ua mafai ona tatou tulimataʻia le finagalo malie o le Atua pe a faaiʻuina lenei faiga o mea: “O le a mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.”​—1 Ioane 2:17.

[Ata i le itulau 31]

O lenei faatagata ua faitau senituri lona leva i Falani ua faaatagia ai le faauuina o le “taupou” o Maria e le Tolutasi. O le talitonu i le Tolutasi ua taʻitaʻiina ai i le faamamaluina o Maria e avea o le “Tinā o le Atua”