Vaega 8

Agaʻi atu le fuafuaga a le Atua i lona faataunuuga

1, 2. Sa faapefea ona faia e le Atua le sauniuniga e aveesea ai puapuaga?

UA AVEA pulega a tagata ma temoni fouvale ma itu ua matuā pagatia ai lava le aiga faaletagata mo le tele o senituri. E ui i lea, ua lē o faagaloina ai e le Atua o tatou puapuaga. Na i lo lena, i le gasologa atoa o senituri, sa ia faia ai le sauniuniga mo le faasaolotoina o tagata mai amioleaga ma puapuaga.

² I le taimi o le fouvalega i Etena, na amata faaalia mai ai e le Atua lana fuafuaga ina ia faatuina se pulega na te saunia lenei lalolagi e fai ma aiga parataiso mo tagata. (Kenese 3:15) Mulimuli ane, ona o Iesu o le fofoga fetalai sili a le Atua, na avea ai lenei pulega o loo fotuai mai a le Atua ma matua o ana aʻoaʻoga. Sa ia fetalai e faapea, na pau lea o le faamoemoe o le fanau a tagata.​—Tanielu 2:44; Mataio 6:9, 10; 12:21.

3. O ā taʻu a Iesu i le pulega o loo fotuai mai i le lalolagi, ma aiseā?

³ Na taʻua e Iesu lena pulega o loo fotuai mai a le Atua o “le malo o le lagi,” talu ai e pule mai i le lagi. (Mataio 4:17) Sa ia taʻua foi o “le malo o le Atua,” ona o le Atua o Lē na fuafuaina. (Luka 17:20) I le tele o senituri, sa faagaeeina ai e le Atua ona tagata tusitala ina ia tusia i lalo valoaga e uiga ia i latou o ē o le a faia aʻe ai lena pulega, atoa ma le mea o le a ia faataunuuina.

Le Tupu Fou o le Lalolagi

4, 5. Sa faaalia faapefea e le Atua e faapea o Iesu o lana Tupu tofia?

⁴ Na taunuu ia Iesu le tele o valoaga e uiga i lē o le a avea ma Tupu o le Malo o le Atua, toeitiiti lava lua afe tausaga ua mavae. Sa faamaonia o ia lea na filifilia e le Atua e fai ma Pule o lena pulega faalelagi i luga o le fanau a tagata. Ma ina ua mavae lona maliu, na toe faatuina ai e le Atua Iesu i le ola i le lagi o se foafoaga agaga e sili ona malosi, e lē mafai ona toe oti. E toatele ē na molimauina lona toetū mai.​—Galuega 4:10; 9:1-9; Roma 1:1-4; 1 Korinito 15:3-8.

⁵ Ona “nofo lea o [Iesu] i le itu taumatau o le Atua.” (Eperu 10:12) O i inā na ia faatali ai mo le taimi e tuuina atu ai e le Atua le malosi ia te ia e gaoioi ai o se Tupu o le Malo faalelagi o le Atua. Na faataunuuina i lena mea le valoaga i le Salamo 110:1, lea o loo fetalai atu ai le Atua ia te ia: “Ia e nofo i loʻu itu taumatau, seia ou faia e ua ita ia te oe ma mea e tu ai ou vae.”

6. Sa faaalia faapefea e Iesu lona agavaa e avea ma Tupu o le Malo o le Atua?

⁶ Sa faaalia e Iesu lona agavaa mo lena tulaga, a o iai i le lalolagi. E ui i ni sauaga, ae na ia filifili lava e faatumauina lona faamaoni i le Atua. I le faia faapea, na ia faaalia ai sa pepelo Satani i lona fai mai e leai se tagata e faamaoni i le Atua i lalo o tofotofoga. Sa faaalia ai foi e Iesu, o se tagata lelei atoatoa, o le ʻAtamu lona lua,’ faapea sa lē sesē le Atua i le foafoaina o tagata lelei atoatoa.​—1 Korinito 15:22, 45; Mataio 4:1-11.

7, 8. O ā mea lelei na faia e Iesu a o iai i le lalolagi, ma o le ā na ia faaalia ai?

⁷ O ai se isi pule sa mafai ona faataunuuina le tele o mea lelei e pei ona sa faia e Iesu i ni nai tausaga o lana faiva? E ala i le malosiaga mai le agaga paia o le Atua, na faamalōlōina ai e Iesu ē na mamaʻi, pipili, tauaso, tutuli, ma ē gūgū. Na ia toe faatutūina foi ē sa maliliu! Sa ia faaalia ai i sina fua itiiti le mea o le a ia faia mo le fanau a tagata i le lalolagi atoa pe a afio mai o ia i le mana o le Malo.​—Mataio 15:30, 31; Luka 7:11-16.

⁸  Ona o le tele o mea lelei sa faia e Iesu a o iai i le lalolagi, na faapea mai ai lona soʻo o Ioane: “O isi mea foi e tele na faia e Iesu, afai e tusia uma lava, o laʻu taofi e le mafai ona ofi i le lalolagi ia tusi pe a tusia.”​—Ioane 21:25. *

9. Aiseā na lolofi atu ai tagata loto faamaoni ia Iesu?

⁹ Sa agalelei ma alofa fua Iesu, e matuā tumu i le alofa i tagata. Na fesoasoani o ia i ē matitiva ma ē mafatia i avega, ma na te leʻi faailogaina foi i latou o ē tamaoaiga pe faaaloalogia. Sa talilelei ane tagata loto faamaoni i le valaau alofa a Iesu ina ua ia fetalai atu: “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga. Auā e avegofie laʻu amo, o laʻu avega foi e māmā ia.” (Mataio 11:28-30) Sa lolofi atu ia te ia tagata o ē matataʻu i le Atua ma tepa taulai atu i lana pulega.​—Ioane 12:19.

Pule Lagolago

10, 11. O ai o le a auai ma Iesu i le puleaina o le lalolagi?

¹⁰ E pei lava ona iai o pule lagolago i pulega faaletagata, e faapena foi i le Malo faalelagi o le Atua. O loo iai isi e ese mai ia Iesu o le a auai i le puleaina o le lalolagi, auā na folafola atu e Iesu i ana aumea vavalalata e faapea, o le a latou pule faatasi ma ia o ni tupu i le fanau a tagata.​—Ioane 14:2, 3; Faaaliga 5:10; 20:6.

¹¹ O lea, ina ia faatasi ma Iesu, ua toe faatutūina ai foi se aofaiga patino o tagata i le ola faalelagi. Ua faia aʻe ia i latou na le Malo o le Atua lea o le a aumaia ai faamanuiaga e faavavau i le fanau a tagata. (2 Korinito 4:14; Faaaliga 14:1-3) O lea, i le gasologa mai o tausaga, ua faataatia ai e Ieova le faavae mo se pulega o le a faapea ona aumaia faamanuiaga e faavavau i le aiga faaletagata.

Faamutaina Pulega Fia Tutoatasi

12, 13. O le ā ua fotuai mai nei le Malo o le Atua e faia?

¹² I lenei senituri, ua faia ai e le Atua se gaoioiga tuusaʻo i mea o loo faia i le lalolagi. E pei ona o le a talanoaina i le Vaega 9 o lenei tusi, ua faaalia i valoaga o le Tusi Paia, sa faavaeina le Malo o le Atua i aao o Keriso i le 1914 ma ua fotuai mai nei e nutililiia le faiga aoao o mea a Satani. Ua sauni atu lena Malo e “pule . . . i totonu o e ita ia [Keriso].”​—Salamo 110:2.

¹³ Ua faapea mai le valoaga i le Tanielu 2:44 e uiga i lena mea: “O ona po o ia tupu [o loo iai nei] e faatuina ai e le Atua o le lagi se malo [i le lagi] e le faaumatia e faavavau,  pe tuuina atu foi ia i se isi nuu [o pulega faaletagata e lē toe faatagaina]. Na te [le Malo o le Atua] tuʻimomomoina ma faaumatia ia malo uma, a o ia e tumau lava e faavavau.”​—Revised Standard Version.

14. O ā nisi o aogā o le a maua ona o le faamutaina o pulega a tagata?

¹⁴ A maeʻa ona aveesea o pulega uma e tutoatasi ese mai le Atua, ona atoatoa loa lea o le pulega a le Malo o le Atua i luga o le lalolagi. Ma talu ai e pule mai le Malo mai le lagi, e matuā lē mafai la e tagata ona faaleagaina. O le a iai le malosi e puleaina i le mea sa iai muamua, i le lagi, faatasi ma le Atua. Ma talu ai o le a faatonutonuina e le pulega a le Atua le lalolagi uma, o le a lē toe i ai la se tasi e taʻitaʻiseseina e lotu sese po o aʻoaʻoga faafilosofia ma faiga faapolotiki a tagata e lē faamalieina ai. E aunoa ma se tasi o na mea o le a faatagaina ina ia iai.​—Mataio 7:15-23; Faaaliga mataupu e 17 e oo i le 19.

[Faaopoopoga i lalo]

[Fesili mo le Suʻesuʻega]

[Ata i le itulau 18]

A o iai i le lalolagi sa faamalōlōina e Iesu ē na mamaʻi ma toe faatutūina ē na maliliu e faaalia ai le mea o le a ia faia i le lalolagi fou

[Ata i le itulau 19]

O le a nutililiia e le Malo faalelagi o le Atua ituaiga uma o pulega e tutoatasi ese mai ia te ia, ia lē toe iai