Vaega 4

Faailoa mai e le Atua ia i tatou ana fuafuaga

1, 2. Tatou te iloa faapefea e aumaia e le Atua tali ia i latou o ē ole atu ma le loto faamaoni?

O LE mea moni ua faailoa mai e le Atua alofa ana fuafuaga i ē loto faamaoni o loo saili atu ia te ia. Ua ia saunia mo tagata o loo fia iloa, ni tali i fesili e pei o le pogai ua ia faatagaina ai puapuaga.

² Fai mai le Tusi Paia: “Afai e te saili atu [i le Atua], ona e maua ai lea o ia.” “O i ai le Atua i le lagi, o le na te faaalia mea ua lilo.” “E le faia lava se mea e le Alii o Ieova, a e faaalia lona finagalo i ana auauna o perofeta.”​—1 Nofoaiga a Tupu 28:9; Tanielu 2:28; Amosa 3:7.

O Fea e Maua ai Tali?

3. O fea e mafai ona tatou maua ai le pogai o le faatagaina e le Atua o puapuaga?

³ O tali i fesili e pei o le pogai ua faatagaina ai e le Atua puapuaga ma o le ā o le a ia faia e uiga i ai, o loo maua i le tusi na ia faagaeeina mo lo tatou lelei. O lena tusi, o lana Afioga lea, le Tusi Paia. “O Tusi Paia uma lava e mai le Agaga o le Atua ia, e aoga foi ia e aʻoaʻo ai, e aoai ai, e faatonu ai, e faapoto ai foi i le amiotonu, ina ia atoatoa ona lelei ai o le tagata o le Atua; ia saunia lava ia i galuega lelei uma lava.”​—2 Timoteo 3:16, 17.

4, 5. O le ā ua avea ai le Tusi Paia ma tusi tulagaese?

⁴ O le Tusi Paia o se tusi e matuā tulagaese lava. O loo iai faamaumauga e sili atu ona saʻo o talafaasolopito o le tagata ma o loo aofia ai foi tala i tua atu o le foafoaga o tagata. E ōgatasi foi ma mea o loo tutupu i aso nei, auā e faatatau ona valoaga i mea o loo tutupu i o tatou aso, atoa foi ma le lumanai ua tau lata mai.

⁵ E leai se isi tusi o iai ni faamaoniga faapena, o le saʻo aʻiaʻi o talafaasolopito. Mo se faaaʻoaʻoga, e na o ni nai manusikulipi lava a le au tusitala faaanamua o loo iai. Peitai, e tele manusikulipi o le Tusi Paia o loo iai, o nisi e na o ni vaega ae o isi e atoatoa: e tusa ma le 6,000 manusikulipi o Tusitusiga Eperu (po o tusi e 39 o le “Feagaiga Tuai”) ae e tusa ma le 13,000 manusikulipi o Tusitusiga Kerisiano Eleni (po o tusi e 27 o le “Feagaiga Fou”).

6. Aiseā tatou te mautinoa ai o loo tutusa pau lava le Tusi Paia i aso nei ma le taimi na faagaeeina ai e le Atua?

⁶ Ua faamautinoa e le Atua e Ona le Malosi Uma lava, o lē na faagaeeina le Tusi Paia, ua faasaoina le faamaoni o faamatalaga o loo i kopi o na manusikulipi. O lea, o loo tutusa pau lava a tatou Tusi Paia i aso nei ma uluai tusitusiga na faagaeeina. O se isi mea e fesoasoani ia i tatou ina ia talisapaia ai lenei itu, ona o nisi kopi o manusikulipi o Tusitusiga Kerisiano Eleni, na saunia mai i tusitusiga sa faia i totonu o le selau tausaga talu mai le taimi o uluai tusitusiga. E itiiti lava kopi o manusikulipi a le au tusitala i aso anamua o loo iai pea, ma atonu sa kopiina mulimuli ane ina ua mavae senituri na soifua ai i latou na muai tusia.

Le Meaalofa a le Atua

7. O le ā le tele ua faasalalauina atu ai le Tusi Paia?

⁷ O le Tusi Paia, o se tusi ua sili ona faasalalauina atu i le gasologa mai o talafaasolopito. Pe tusa ma le tolu piliona kopi ua lomia. E leai se isi tusi ua lomia e tau lalata atu i lena aofaiga. Ma ua faaliliuina le Tusi Paia po o ni ona vaega i ni gagana e tusa ma le 2,000. O lea, e pe a ma le 98 pasene o le faitau aofai o tagata o lo tatou lalolagi ua mafai ona mauaina le Tusi Paia.

8-10. O ā nisi mafuaaga e alagātatau ai sa tatou iloiloga o le Tusi Paia?

⁸ E mautinoa la, ua alagātatau sa tatou iloiloga i se tusi e manatu i ai e mai le Atua ma ua iai faamaoniga uma i fafo ma totonu o lona moni aʻiaʻi. *  O loo faamatalaina ai le fuafuaga o le ola, le uiga o tulaga o le lalolagi, atoa ma le mea o loo fotuai mai i le lumanai. E leai ma se tusi e mafai ona faia lena mea.

⁹ Ioe, o le Tusi Paia o se fesootaiga lea a le Atua ma le aiga faaletagata. Sa ia faatonutonuina lona tusiaina e ala i lona malosi galue, po o lona agaga, faatasi ma ni tagata e toʻa 40 na faamaumauina i lalo. O lea ua fetalai mai ai le Atua ia i tatou e ala i lana Afioga, le Tusi Paia. Na tusia e le aposetolo o Paulo e faapea: “Na talia e outou le afioga a le Atua na outou faalogo mai ai ia i matou, ua le talia e outou o le upu a tagata, a e peitai o le upu a le Atua.”​—1 Tesalonia 2:13.

¹⁰ Na taʻua e le peresitene lona 16 o le Iunaite Setete o Abraham Lincoln, le Tusi Paia e faapea “o le meaalofa silisili lea a le Atua ua foaiina mai i tagata . . . Auā o lea ua mafai ai ona tatou iloa le mea saʻo ma le mea sese.” O lea la, o le ā ua taʻu mai ia i tatou e lenei meaalofa silisili e uiga i le amataga o puapuaga, le pogai ua faatagaina ai e le Atua, ma o le ā o le a ia faia e uiga i ai?

[Faaopoopoga i lalo]

[Fesili mo le Suʻesuʻega]

[Ata i le itulau 10]

O le Tusi Paia, na faagaeeina e le Atua, o lana fesootaiga lea ma le aiga faaletagata