Vaega 5

Le meaalofa ofoofogia o le filifiliga saoloto

1, 2. O le ā le meaalofa ofoofogia o loo avea ma vaega o i tatou?

INA ia malamalama i le pogai ua faatagaina ai e le Atua puapuaga ma o le ā o le a ia faia e uiga i ai, e manaomia ona tatou talisapaia le auala na ia faia ai i tatou. Sa ia faia e sili atu na i lo le foafoaina o i tatou e tau o se tino ma se faiai. Na ia foafoaina foi i tatou faatasi ma ni uiga faapitoa tau le mafaufau ma faalogona ootia.

² O se vaega autū ua faia aʻe ai o tatou mafaufau ma faalogona ootia, o le filifiliga saoloto. Ioe, sa totōina e le Atua ia i tatou le tomai e uiga i le saolotoga e filifili ai. O le mea moni, o se meaalofa ofoofogia lea mai ia te ia.

Le Auala na Faia ai i Tatou

3-5. Aiseā tatou te talisapaia ai le filifiliga saoloto?

³ Seʻi tatou iloiloina le auala o loo aafia ai le filifiliga saoloto i le faatagaina e le Atua o puapuaga. Ina ia amataina, manatu i le mea lenei: Faamata e te talisapaia le mauaina o le saolotoga e filifili ai i mea o le a e faia ma tautala ai, i mea taumafa ma lavalava, le ituaiga o galuega o le a e faia, ma le nofoaga ma le auala o le a e ola ai? Pe e te manao i se tasi na te faatonuina au upu ma gaoioiga uma i taimi taitasi o lou olaga?

⁴ E leai se tagata ola e manao e matuā aveesea atoatoa le puleaina o lona olaga. Aiseā? Ona o le auala na faia ai i tatou e le Atua. Ua taʻu mai e le Tusi Paia ia i tatou e faapea, sa foafoaina e le Atua le tagata i lona ʻfaatusa ma ona foliga,’ ma o se tasi o tomai o loo iai i le Atua lava ia, o le saolotoga lea e filifili ai. (Kenese 1:26; Teuteronome 7:6) Ina ua ia foafoaina tagata, sa ia tuuina atu i ai lena lava tomai ofoofogia​—le meaalofa o le filifiliga saoloto. O se tasi lena o mafuaaga tatou te faanoanoa ai ona o le faapologaina e taʻitaʻi sauā.

⁵ O lea, o le faanaunauga mo le saolotoga e leʻi tupu faafuaseʻi, auā o le Atua o se Atua o le saolotoga. Ua faapea mai le Tusi Paia: “O le mea o i ai le [agaga o Ieova], o i ai le saʻolotoga.” (2 Korinito 3:17)  O le pogai lea na aumai ai e le Atua ia i tatou le filifiliga saoloto o se vaega o mea na faia aʻe ai i tatou. Talu ai sa ia silafia lelei le auala o le a gaoioi ai o tatou mafaufau ma faalogona ootia, na ia silafia ai foi o le a sili atu ona tatou fiafia i le filifiliga saoloto.

6. Sa faapefea ona foafoaina e le Atua lo tatou faiai ina ia gaoioi e ōgatasi ma le filifiliga saoloto?

⁶ Ina ia ōgatasi ma le meaalofa o le filifiliga saoloto, na foaiina mai ai e le Atua ia i tatou le tomai e mafaufau ai, fuafua ai mataupu, faia ai faaiʻuga, ma iloa ai le lelei ma le leaga. (Eperu 5:14) O lea, o le filifiliga saoloto, e tatau ona faavae i se filifiliga atamai. Sa leʻi faia i tatou e pei o ni masini (robots) e leai ni mafaufau, e leai ni o latou manatu. E leʻi foafoaina foi i tatou ina ia gaoioi e ala i le masani e pei o ni manu. Na i lo lena, sa fuafuaina lo tatou faiai ofoofogia ina ia gaoioi e ōgatasi ma lo tatou saolotoga e filifili ai.

Le Amataga Sili ona Lelei

7, 8. O le ā le amataga lelei na avatu e le Atua i o tatou uluai mātua?

⁷ Ina ia faaalia le auala na alofa mai ai le Atua, e faatasi ma le meaalofa o le filifiliga saoloto, na foaiina atu foi i o tatou uluai mātua, o Atamu ma Eva, mea uma lava sa la manaomia moni. Na faanonofo i laʻua i se paka telē e pei o se parataiso. Sa fau ma soloi a la mea faitino. O o la mafaufau ma tino sa lelei atoatoa, e lē tatau ai ona la ola matutua pe mamaʻi pe maliliu​—sa mafai ona la ola e faavavau. Semanū e maua ni a la fanau e lelei atoatoa o ē sa mafai foi ona maua se lumanai fiafia e faavavau. Ma na semanū e faia e le anoanoai o tagata le galuega faamalie loto o le faafoisiaina faasolosolo o le lalolagi atoa e avea ma parataiso.​—Kenese 1:26-30; 2:15.

⁸ Fai mai le faamatalaga a le Tusi Paia e uiga i mea na saunia: “Ua silasila atu le Atua i mea uma ua na faia, faauta foi, ua matuā lelei lava.” (Kenese 1:31) Ua fai mai foi le Tusi Paia e uiga i le Atua: “E sao lava lana galuega.” (Teuteronome 32:4) Ioe, na tuuina mai e Lē na Foafoaina mea se amataga lelei atoatoa i le aiga faaletagata. E leai se isi mea e sili atu ona lelei i lo lena. Maeu se Atua alofa e iai o ia!

Tapulaa o le Saolotoga

9, 10. Aiseā e tatau ai ona pulea lelei le filifiliga saoloto?

⁹ Peitai, pe sa fuafuaina ea e le Atua le filifiliga saoloto e aunoa ma ni ona tapulaa? Seʻi mafaufau i se aai e felavasaʻi solo ai auala e aunoa ma ni tulafono, ma e mafai lava e tagata uma ona oso atu i so o se itu ma so o se saosaoa e manao ai. Faamata e te fia ui atu i ni tulaga faapena? Leai, o le a avea lena ma mea e lē pulea ai taavale ma e mautinoa o le a iʻu ai i le tele o faalavelave faafuaseʻi.

¹⁰ E faapena foi i le meaalofa a le Atua o le filifiliga saoloto. O le saolotoga e lē faatapulaaina, e mafai ona iʻu ai i le lē pulea o tagata. E tatau lava ona iai ni tulafono e faatonutonuina ai gaoioiga a tagata. Ua faapea mai le Tusi Paia: “Ia amio e pei o tagata saoloto, ae aua neʻi avea lou saolotoga ma faamolemolega mo le amioleaga.” (1 Peteru 2:16, JB) O le finagalo o le Atua, ia puleaina le filifiliga saoloto mo le lelei o tagata lautele. O lana fuafuaga mo i tatou, ia tatou maua le saolotoga e fuafua tatau, ina ia gauai atu ai i le taʻitaʻiga a tulafono, ae e lē o le saolotoga atoatoa.

Tulafono a Ai?

11. O tulafono a ai sa fuafuaina i tatou e usiusitai i ai?

¹¹ O tulafono a ai sa fuafuaina i tatou ina ia usiusitai i ai? Ua faapea mai le isi vaega o le mau i le 1 Peteru 2:16 (JB): “Tou te lē auauna i se tasi a o le Atua.”  E lē uiga lenei mea i se faiga sauā e faapologaina ai, ae na i lo lena, na fuafuaina i tatou ina ia sili atu ona fiafia a o gauai atu i tulafono a le Atua. (Mataio 22:35-40) Ua saunia e ana tulafono se taʻiala e sili ona lelei, e sili atu na i lo o tulafono na fuafuaina e tagata. “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai.”​—Isaia 48:17.

12. O le ā le saolotoga e filifili ai ua tatou maua i totonu o tulafono a le Atua?

¹² I le taimi lava e tasi, ua faatagaina e tulafono a le Atua le saolotoga tele e filifili ai i totonu o ona tuaoi. O lona iʻuga, ua iai mea eseese e faamatagofie ai le aiga faaletagata. Seʻi manatu i ituaiga eseese o mea taumafa, lavalava, musika, ata, ma fale i le lalolagi atoa. E mautinoa tatou te mananao e faia sa tatou filifiliga i na mea na i lo le filifilia e se isi tagata mo i tatou.

13. O ā tulafono faaletino e tatau ona tatou usiusitai i ai mo lo tatou lava lelei?

¹³ O lea, na foafoaina i tatou ina ia sili atu ona tatou fiafia i le gauai atu i tulafono a le Atua e uiga i amioga faaletagata. E tali tutusa lava ma le gauai atu i tulafono faaletino a le Atua. Mo se faataʻitaʻiga, afai tatou te lē amanaia le tulafono o le kalave ma oso ifo ai mai se nofoaga maualuga, o le a tatou manunuʻa ai la pe maliliu ai. Afai tatou te lē amanaia tulafono i totonu o o tatou tino ma taofia ai le taumafaina o meaʻai, le inuina o vai, po o le mānavaina o le ea, o le a tatou maliliu ai foi.

14. E faapefea ona tatou iloa sa leʻi foafoaina tagata ina ia tutoatasi ese mai le Atua?

¹⁴ E pei ona mautinoa sa foafoaina i tatou ma le manaoga ina ia gauai atu i tulafono faaletino a le Atua, sa foafoaina foi la i tatou ma le manaoga ina ia gauai atu i tulafono tau amio ma tulafono faavafealoai a le Atua. (Mataio 4:4) Sa leʻi foafoaina tagata ina ia tutoatasi ese mai i Lē na faia i latou ma taulau ai. Ua faapea mai le perofeta o Ieremia: “E le o i le tagata e savali ona faatonuina le mea e ui ai o ia. Ieova e, ia e aoai mai ia te au.” (Ieremia 10:23, 24) O lea, i mea uma lava, sa foafoaina tagata ina ia ola i lalo o le pulega a le Atua, ae e lē o i latou lava.

15. Pe sa avea tulafono a le Atua o se avega mamafa mo Atamu ma Eva?

¹⁵ Sa lē avea le usiusitai i tulafono a le Atua ma avega mamafa i o tatou uluai mātua. Na i lo lena, semanū e aogā mo lo la lelei, atoa ma le lelei o le aiga uma faaletagata. Ana faapea e tumau le uluai ulugalii i totonu o tapulaa o tulafono a le Atua, semanū tatou te manuia uma ai lava. O le mea moni, semanū o le taimi lenei o loo tatou ola ai i se parataiso matagofie o fiafiaga i le avea o se aiga alofa, autasi faaletagata! Semanū e leai ni amioleaga, puapuaga, ma le oti.

[Fesili mo le Suʻesuʻega]

[Ata i le itulau 11]

Na avatu e Lē na Foafoaina mea i tagata se amataga lelei atoatoa

[Ata i le itulau 12]

Pe e te manao ea e ui atu i le putuputu o taavale pe afai e leai ni tulafono o le auala?