Vaega 6

Le pogai ua faatagaina ai e le Atua puapuaga

1, 2. Sa faapefea ona faaleagaina e o tatou uluai mātua le amataga lelei na tuuina atu e le Atua ia i laʻua?

O LE Ā le mea na sese? O le ā na tupu ua faaleagaina ai le amataga lelei na tuu atu e le Atua i o tatou uluai mātua i le Parataiso o Etena? Aiseā ua uluola ai le amioleaga ma puapuaga mo le faitau afe o tausaga, na i lo o le filemu ma le autasi i le Parataiso?

² O le mafuaaga, ona sa faaaogāseseina e Atamu ma Eva lo la filifiliga saoloto. Na galo ia i laʻua le mea moni faapea sa leʻi foafoaina i laʻua ina ia ola fiafia pe a vavaeese mai le Atua ma ana tulafono. Sa la filifili ina ia tutoatasi ese mai le Atua, i le manatu faapea o le a faaleleia ai o la olaga. O lea, na la sopo atu ai i tua o tapulaa na faataatia e le Atua mo le filifiliga saoloto.​—Kenese, mataupu e 3.

 Le Finauga o le Pule Silisiliese o le Vateatea

3-5. Aiseā sa lē tau ina faaumatia ai loa Atamu ma Eva ae toe amata?

³ Aiseā sa lē tau ina faaumatia ai loa e le Atua Atamu ma Eva ae toe amata i se isi ulugalii faaletagata? Talu ai ona sa luʻia ai lana pule silisiliese i le vateatea, o lona uiga, o lana aiā moni e pule ai.

⁴ O le fesili na lagā: O ai e iai le aiā e pule ai, ma o le pulega a ai e tonu? Ona o ia o lē ona le malosi uma lava, ma o Lē na Foafoaina foafoaga uma, ua avatu ai i le Atua le aiā e pule ai ia i latou. Talu ai ona ua ia te ia le atamai uma lava, ua sili atu ai le lelei o lana pulega mo foafoaga uma. Ae o lea la ua luʻia nei le pule a le Atua. E lē gata i lena, pe sa iai ea se mea na faaletonu ai lana foafoaga​—o le tagata? O lea, seʻi tatou taliina mulimuli le auala ua aafia ai le fesili e uiga i le faamaoni o le tagata.

⁵ Ona o le tutoatasi ese o le tagata mai le Atua, na lagā ai se isi fesili: Pe e sili atu ea le manuia o tagata pe afai e lē pulea e le Atua? E mautinoa sa silafia lelei e Lē na Foafoaina mea le tali, ae o se auala mautinoa e iloa ai e tagata, o le faaavanoaina lea mo i laʻua o le saolotoga atoa sa la mananao ai. Sa la filifilia lena auala i la laʻua lava filifiliga saoloto, o lea na faatagaina ai e le Atua.

6, 7. Aiseā ua faatagaina ai e le Atua le saolotoga atoa i tagata mo se taimi umi?

⁶ I le faatagaina i tagata o se taimi e lava ma totoe e iloiloina ai le saolotoga atoa, o le a faamautūina ai e le Atua mo taimi uma pe faamata e sili atu le manuia o tagata i lalo o le pulega a le Atua po o a latou lava pulega. Ma e tatau ona lava le umi o le taimi e faatagaina, ina ia tuuina atu ai i tagata latou te ausia mea ua latou manatu i ai o ni ausiaga o a latou faiga faapolotiki, fale gāosimea, mea faasaienisi, ma vailaau.

⁷ O le mea lea, ua tuu atu ai e le Atua i le tagata se saolotoga e pule ai, seia oo mai lava i o tatou aso ina ia faaalia ai e aunoa ma le masalosalo pe faamata e mafai ona manuia pulega a tagata e tutoatasi ese mai ia te ia. E mafai ai la e le tagata ona filifili i le agalelei po o le sauā, i le alofa po o le inoino, i le amiotonu po o le amiolētonu. Ae e fesagai foi o ia ma āuga o lana filifiliga: o le mataalofa ma le filemu po o le amioleaga ma puapuaga.

Fouvalega a Foafoaga Agaga

8, 9. (a) Sa faapefea ona lagā le fouvalega i le nofoaga o agaga? (e) O ai isi e ese mai ia Atamu ma Eva na taaʻina e Satani ina ia fouvale?

⁸ O loo iai foi se isi mea e ao ona iloiloina. E lē na o o tatou uluai mātua sa fouvale i le pulega a le Atua. Ae o ai isi sa iai i lena taimi? O foafoaga ­agaga. A o leʻi foafoaina e le Atua tagata, sa ia foafoaina muamua se ituaiga o foafoaga e sili atu ona maualuga, le aofaiga tele o agelu, ina ia ola i le nofoaga faalelagi. Sa foafoaina foi i latou faatasi ma se filifiliga saoloto, atoa foi ma le manaoga ina ia gauai atu i le pulega a le Atua.​—Iopu 38:7; Salamo 104:4; Faaaliga 5:11.

⁹ Ua faaalia e le Tusi Paia faapea, na muai lagā le fouvalega i le nofoaga o agaga. Na iai se foafoaga agaga na manao i le saolotoga atoa. Sa ia manao foi i tagata e tapuai atu ia te ia. (Mataio 4:8, 9) Na avea lenei agaga fouvale ma mea na taaʻina ai Atamu ma Eva ina ia fouvale, i le manatu sese e faapea sa taofia e le Atua se mea lelei mai ia i laʻua. (Kenese 3:1-5) O lea na taʻua ai o ia o le Tiapolo (Taufaaleaga) ma Satani (Lē Tetee). Mulimuli ane, sa ia uunaia foi isi foafoaga agaga ina ia fouvale. Na avea ai i latou na ma temoni.​—Teuteronome 32:17; Faaaliga 12:9; 16:14.

10. O le ā le iʻuga o le fouvalega a tagata ma foafoaga agaga?

¹⁰ Ona o le fouvale o tagata i le Atua, na faaavanoaina ai i latou lava i taaʻiga a Satani ma ana temoni. O le pogai lena ua taʻua ai e le Tusi Paia Satani o ʻle atua o lenei faiga o mea,’ o lē “ua faatauasoina manatu o i latou o e le talitonu.” O lea, ua faapea mai ai le Afioga a le Atua, “o le lalolagi uma o loo nofo toilalo i loo leaga.” Na taʻua e Iesu lava ia Satani o “le alii o lenei lalolagi.”​—2 Korinito 4:4; 1 Ioane 5:19; Ioane 12:31.

E Lua Finauga

11. O le ā le isi finauga na luʻia ai e Satani le Atua?

¹¹ Na lagā foi e Satani se isi finauga na luʻia ai le Atua. O le iʻuga, na ia tuuaʻia ai le Atua e faapea sa sese le auala na Ia foafoaina ai tagata ma o le a leai se tasi o i latou e manao e faia le mea saʻo pe a oo i ai omiga. O le mea moni, na ia faapea mai, o le a oo foi ina latou upu leaga i le Atua, pe a tofotofoina. (Iopu 2:1-5) I lenei auala, sa fesiligia ai e Sa­tani le faamaoni o le foafoaga faaletagata.

12-14. E faapefea i le gasologa o taimi ona faaalia ai le mea moni e uiga i finauga e lua na lagā e Satani?

¹² O le mea lea, ua faatagaina ai e le Atua se taimi umi e lava ma totoe mo foafoaga atamamai uma, ina ia iloa ai pe faapefea ona foia lenei finauga, atoa foi ma le finauga e uiga i le pule silisiliese a le Atua. (Faatusatusa i le Esoto 9:16.) O le a faaalia e mea tutupu mulimuli ane i talafaasolopito o tagata le mea moni e uiga i nei finauga e lua.

¹³ Muamua lava, o le ā o le a faaalia e le gasologa o taimi e uiga i le finauga i le pule silisiliese, le tonu o le pulega a le Atua? Pe mafai ea e tagata ona pulea i latou lava e sili atu ona lelei na i lo le Atua? Faamata o le a mafai e so o se faiga o pulega faaletagata e ese mai le Atua ona aumaia se lalolagi fiafia e aunoa ma ni taua, solitulafono, ma le lē faamasinotonu? Po o le a iai ea so o se pulega e mafai ona foia le mativa ae aumaia le tamaoaiga mo tagata uma? Po o le a iai ea so o se pulega e mafai ona aveesea maʻi, olaga matua, ma le oti? Sa fuafuaina le pulega a le Atua na te faia na mea uma.​—Kenese 1:26-31.

¹⁴ E faatatau i le finauga lona lua, o le ā o le a faaalia e le gasologa o taimi e uiga i le aogā o le foafoaga faaletagata? Pe sa sese ea le Atua ina ua ia foafoaina tagata i le auala na ia faia ai? Po o le a iai ea nisi o i latou e faia le mea saʻo pe a tofotofoina? Po o le a faaalia ea e ni tagata latou te mananao i le pulega a le Atua na i lo o pulega fia tutoatasi a tagata?

[Fesili mo le Suʻesuʻega]

[Ata i le itulau 13]

Ua faatagaina e le Atua le taimi mo tagata ina ia ausia ai le tumutumuga o a latou ausiaga

[Ē Ana le Ata]

Shuttle: Mai le ata a le NASA