Vaega 7

O le ā ua iʻu i ai le fouvalega?

1-3. Ua faapefea ona faamaonia le moni o Ieova i le gasologa o taimi?

E FAATATAU i le finauga e uiga i le aiā a le Atua e pule ai, o le ā ua iʻu i ai pulega a tagata e tutoatasi ese mai le Atua i nei senituri uma? Po ua faamaonia ai ea e tagata o i latou o ni pule e sili atu ona lelei na i lo le Atua? E mautinoa, e leai, pe afai tatou te fua atu i tala o faiga sauā a tagata i isi tagata.

² Ina ua teena e o tatou uluai mātua le pulega a le Atua, na sosoo mai ai loa ni mala. Na la aumaia ai puapuaga ia i laʻua lava, atoa ma le aiga uma faaletagata na maua mai ia i laʻua. Ma sa leai se tasi la te tuuaʻia, a o i laʻua lava. Fai mai le Afioga a le Atua: ʻUa la gaoioi i se auala e fano ai i laʻua lava; e lē o i laʻua o sana fanau, o le ila, o i laʻua lava.’​—Teuteronome 32:5.

³ Ua faaalia e talafaasolopito le moni aʻiaʻi o le lapataiga a le Atua ia Atamu ma Eva e faapea afai la te ō ese mai sauniuniga a le Atua, o le a faavaivaia ai i laʻua ma faasolo atu ai ina maliliu. (Kenese 2:17; 3:19) Ae sa ō ese lava i laʻua mai le pulega a le Atua, ma i se taimi sa oo lava ina vaivai i laʻua ma maliliu ai.

4. Aiseā ua tatou fananau uma mai ai ma le lē lelei atoatoa, ua iʻu ai i maʻi ma le oti?

⁴ E pei ona faamatala mai i le Roma 5:12, o le mea lenei na tupu mulimuli ane i a la fanau uma: “Faapei ona oo mai o le agasala i le lalolagi i le tagata e toatasi [o Atamu, le ulu o le aiga faaletagata], o le oti foi ona o le agasala, ona oo mai ai lea o le oti i tagata uma lava.”  O lea, ina ua fouvale o tatou uluai mātua i le tulaga pule o le Atua, sa avea ai i laʻua o ni ē agasala ua lē lelei atoatoa. I le ōgatasi ma tulafono e uiga i le gafa, na pau lava le mea sa mafai ona la faasoloina mai i a la fanau, o le iʻuga o le lē lelei atoatoa. O le pogai lena ua tatou fananau uma mai ai lava ma le lē lelei atoatoa, ua iʻu ai i maʻi ma le oti.

5, 6. O le ā ua faaalia e talafaasolopito e uiga i taumafaiga a tagata ina ia aumaia le filemu moni ma le manuia?

⁵ E tele senituri ua mavae. Ua tutū mai malo ma toe fāi atu. Ua faatinoina foi ituaiga uma o pulega e mafai ona fai. Peitai, o loo tutupu pea mea mataʻutia i le aiga faaletagata. E faapea lava tatou a mavae atu le ono afe tausaga, ona agaʻigaʻi ai lea i luma o tagata i le tulaga o le faavaeina o le filemu, faamasinotonu, ma le tamaoaiga i le lalolagi ma o le taimi lenei ua tatau ai ona latou maua atoatoa aogā mautinoa o le agalelei, o le alofa, ma le felagolagomai.

⁶ Peitai, o le mea moni, e matuā tuufaafeagai lava. E leai ma se ituaiga o pulega faaletagata ua faatūina e mafai ona aumaia le filemu moni ma le manuia i tagata uma. I na o lenei lava senituri lona 20, ua tatou vaaia ai le fasiotia faasolosolo o le faitau miliona o tagata Iutaia e Hitila ma le faatamaʻia o le sili atu i le 100 miliona i taua. I o tatou aso, e lē mafaitaulia le toatele o tagata ua sauāina, fasiotia, ma faafalepuipuiina ona o le taofiofi mamau ma feeseeseaiga faapolotiki.

Le Tulaga i Aso Nei

7. E mafai faapefea ona faamatalaina le tulaga o le aiga faaletagata i aso nei?

⁷ E faaopoopo atu i ai, ia manatunatu i le aotelega o tulaga o le aiga faaletagata i aso nei. Ua faatupulaia pea solitulafono ma faiga sauā. O loo taatele le faaaogāseseina o fualaau faasāina. Ua pipisi atu faamaʻi e feaveaia i feusuaiga lē mamā. E faitau miliona tagata ua aafia i le faamaʻi mataʻutia o le AIDS. Ua maliliu le faitau sefulu miliona o tagata i le fiaaai, po o faamaʻi i tausaga taitasi, ae o loo tele pea oa a nisi tagata e toaitiiti. Ua faaoonaina ma faaleagaina e tagata le laueleele. I so o se mea, ua malepelepe ai olaga faaleaiga ma tulaga tau amio. E moni lava, ua faaalia i le olaga i aso nei le matagā o le pulega a ʻle atua o le lalolagi nei,’ o Satani. O le lalolagi o loo ia pulea, e lē alofa, e sauā, ma ua faaleagaina atoatoa.​—2 Korinito 4:4.

8. Aiseā e lē mafai ai ona tatou taʻua ausiaga a le fanau a tagata o se agaʻigaʻi moni i luma?

⁸ Ua lava ma totoe le taimi na faatagaina e le Atua i tagata, ina ia ausia ai le tumutumuga o lo latou agaʻigaʻi i luma i mea faasaienisi ma mea faaletino. Ae po o se agaʻigaʻi moni ea i luma le suia o aufana ma fuluaū i fana taavili, tane tau, vaalele tau, ma roketi faaniukelea? Po o se agaʻigaʻi ea i luma, le mafai ona malaga atu o tagata i le vanimonimo ae e lē o mafai ona ola faatasi i le filemu i le lalolagi? Po o se agaʻigaʻi ea i luma, le matataʻu o tagata e savavali i magaala i le po, po o nisi foi nofoaga i le ao?

 Mea ua Faaalia i le Gasologa o Taimi

9, 10. (a) O le ā ua faaalia manino i le taimi o senituri ua mavae? (e) Aiseā o le a lē aveeseina ai e le Atua le filifiliga saoloto?

⁹ O le mea ua faaalia e le tofotofoga i le tele o senituri, o le lē mafai lea e tagata ona faatonutonuina o o latou lava ala ma le manuia e ese mai i le pulega a le Atua. E sili atu le faigata ona latou faia o lena mea na i lo o lo latou mafaia ona ola e aunoa ma le taumafa, inu, ma le mānava. Ua manino le faamaoniga: Sa fuafuaina i tatou ina ia faalagolago i taʻiala a Lē na Foafoaina i tatou e pei foi ona mautinoa sa foafoaina i tatou ina ia faalagolago i mea taumafa, vaiinu, ma le ea.

¹⁰ E ala i le faatagaina o le amioleaga, ua faaalia ai nei e le Atua, ma mo taimi uma lava, iʻuga faanoanoa o le faaaogāseseina o le filifiliga saoloto. Ma ona o le filifiliga saoloto o se meaalofa tautele, na i lo la o le aveesea mai tagata, ua faatagaina ai e le Atua i latou ina ia vāai i iʻuga o lona faaaogāseseina. Ua moni ai le Afioga a le Atua ina ua faapea mai: “E le o i le tagata e savali ona faatonuina le mea e ui ai o ia.” Ua moni foi i lona faapea mai: “E pule ai le tasi tagata i le tasi, e leaga ai o ia lava.”​—Ieremia 10:23; Failauga 8:9.

11. Ua iai ea se ituaiga o pulega faaletagata ua na faamutaina puapuaga?

¹¹ O le faatagaina e le Atua o pulega faaletagata mo le ono afe tausaga, ua matuā faaalia ai e lē mafai e le tagata ona taofia puapuaga. E leai se taimi ua mafai ai ona ia faia faapena. Mo se faataʻitaʻiga, i ona po o le Tupu o Solomona o Isaraelu, sa lē mafai e lona atamai uma, le tamaoaiga, ma le malosi, ona foia ai mafatiaga ua mafua ona o pulega a tagata. (Failauga 4:1-3) E faapena foi i o tatou aso, ua lē mafai e taʻitaʻi o le lalolagi ona faamutaina puapuaga, e ui lava i ni o latou tomai faaonaponei. Ae e sili atu ona leaga, ua faaalia i talafaasolopito le faateleina o puapuaga o tagata e fia tutoatasi ese mai le pulega a le Atua, na i lo o le faamutaina.

Le Silafaga Mamao a le Atua

12-14. O ā aogā tumau e maua ona o le faatagaina e le Atua o puapuaga?

¹² Ua avea le faatagaina o puapuaga e le Atua ma itu tatou te tigaina ai. Peitai, sa ia te ia le silafaga mamao, ona o taunuuga lelei sa ia silafia o le a oo mai mo se taimi umi. O le a aogā le silafaga a le Atua i foafoaga, e lē mo na o ni nai tausaga po o ni nai afe o tausaga, ae mo le faitau miliona o tausaga, ioe mo le faavavau uma lava.

¹³ Afai e toe tulai mai le tulaga i so o se taimi i le lumanai faapea ua faaaogāseseina e se tasi le filifiliga saoloto e fesiligia ai le auala o loo faia ai mea e le Atua, o le a lē manaomia la ona tuuina atu ia te ia se taimi e taumafai ai e faamaonia ona manatu. Ona ua uma ona faatagaina fouvalega mo le faitau afe o tausaga, ua faavaeina ai nei e le Atua se faiga faaletulafono e mafai ona faaaogāina e faavavau i so o se mea i le lagi ma le lalolagi.

¹⁴  Ona ua faatagaina e Ieova le amioleaga ma puapuaga i lenei taimi, ua maeʻa ai la ona matuā faamaonia, e leai ma se mea e fulitua ia te ia e mafai ona manuia. Ua faamaonia ai foi e aunoa ma le masalosalo faapea, e leai ma se fuafuaga fia tutoatasi a tagata po o foafoaga agaga e mafai ona aumaia ni aogā tumau. O lea, o le a taʻumamāina atoatoa ai le Atua e ala i le vave nutililiia o so o se fouvalega. “E fano ia te ia o e amio leaga.”​—Salamo 145:20; Roma 3:4.

[Fesili mo le Suʻesuʻega]

[Ata i le itulau 15]

Ina ua uma ona filifili o tatou uluai mātua e tutoatasi ese mai le Atua, sa faasolosolo loa ina ola matutua ma oti

[Ata i le itulau 16]

Ua faamaonia le malaia o pulega a tagata e tuese mai le Atua

[Ē Ana le Ata]

Ata o le U.S. Coast Guard