Vaega 1

Po o silasila alofa mai ea le Atua ia i tatou?

1, 2. O le ā le fesili a tagata e uiga i le Atua, ma aiseā?

I NISI taimi o lou olaga, atonu e te fesili ai faapea: ʻAfai o soifua se Atua e silasila alofa mai ia i tatou, aiseā la ua ia faatagaina ai le tele o puapuaga?’ O i tatou uma lava ua oo iai puapuaga po ua iloa foi se tasi o faapena ona puapuagatia.

² O le mea moni, i le gasologa atoa o talafaasolopito, ua mafatia ai tagata i tigā ma le loto momoia ona o taua, faiga sauā, solitulafono, faamasinoga lē tonu, mativa, faamaʻi, ma le toesea o ē pele i le oti. I lo tatou lava 20 o senituri, e sili atu i le 100 miliona tagata ua fasiotia i taua. E faitau selau miliona isi ua manunuʻa po ua leai ni fale ma ni mea totino. O le tele naʻuā o mea mataʻutia ua tutupu i o tatou aso, ua mafua ai le tele o faanoanoaga ma loimata maligi, atoa ma le lagona o le leai o se faamoemoe o le lē mafaitaulia o tagata.

3, 4. O ā manatu o le toatele e uiga i le faatagaina e le Atua o puapuaga?

³ Ua oo i nisi le loto tigā ma manatu ai faapea, afai o soifua se Atua, ailoga o silasila alofa mai o ia ia i tatou. Pe atonu foi latou te manatu faapea e leai se Atua. Mo se faataʻitaʻiga, na fesili se tamaloa o lē na puapuagatia i sauaga faailoga lanu, ma iʻu ai ina maliliu ana uo ma lona aiga i le Taua Muamua a le Lalolagi, e faapea: “O fea sa iai le Atua ina ua matou manaomia o ia?” O se isi foi o lē na sao mai le fasiotiga o le faitau miliona o tagata e le vaega a Nazi i le Taua Lona Lua a le Lalolagi, sa faanoanoa tele i puapuaga na ia vaai i ai ma faapea mai ai: “Ana e lagona le mea sa i loʻu fatu, semanū e te tigā ai foi.”

⁴ O lea, e toatele tagata e lē o malamalama i le pogai ua faatagaina ai e se Atua lelei mea leaga ia tutupu. Ua latou fesiligia po o silasila alofa mai ea o ia ia i tatou ma po o soifua foi o ia. Ma ua manatu le toatele o i latou e faapea, o le a avea pea puapuaga ma vaega o le olaga o tagata.

[Fesili mo le Suʻesuʻega]

 [Ata i le itulau 2, 3]

Po ua latalata mai ea se lalolagi fou e aunoa ma ni puapuaga?