Vaega 9

Vala tatou te iloa ai ua tatou ola i “aso e gata ai”

1, 2. E mafai faapefea ona tatou iloa po ua tatou ola i aso e gata ai?

E MAFAI faapefea ona tatou mautinoa o loo tatou ola i le taimi o le a gaoioi ai le Malo o le Atua agaʻi i lenei faiga o pulega faaletagata o loo iai? E mafai faapefea ona tatou iloa ua tatou lalata tele atu i le taimi o le a aumaia ai e le Malo o le Atua le iʻuga i amioga leaga ma puapuaga uma?

² Sa fia iloa e le au soʻo o Iesu Keriso na mea. O lea na latou fesili atu ai ia te ia po o le ā “le faailoga” o lona faatasi mai i le mana o le Malo ma ʻle faaiʻuga o le faiga o mea.’ (Mataio 24:3) Na tali atu Iesu e ala i le auiliiliina o mea tutupu e gatete ai le lalolagi, atoa ma tulaga o le a tuufaatasia e faaalia ai ua ulu atu le fanau a tagata i “ona po o le iuga,” po o “aso e gata ai” o lenei faiga o mea. (Tanielu 11:40; 2 Timoteo 3:1) Po ua tatou vaaia ea i lenei senituri lena faailoga tuufaatasi? Ioe, e anoanoai mea ua tatou vaaia!

Taua a le Lalolagi

3, 4. Ua fetaui faapefea taua o lenei senituri ma le valoaga a Iesu?

³ Na valoia e Iesu faapea ʻo le a sii le taua e le tasi nuu i le tasi nuu ma le tasi malo i le tasi malo.’ (Mataio 24:7) I le 1914, na aafia ai le lalolagi i se taua na vaaia ai le faagaoioia o atunuu ma malo i se auala sa ese mai so o se taua na muamua atu. Ona o lena mea moni, na taʻua ai e le au tusitala o talafaasolopito, o le Taua Tele. O le uluai taua lea o lena ituaiga o taua i talafaasolopito, o le taua muamua a le lalolagi. Na maliliu ai le tusa ma le 20,000,000 fitafita ma tagata sivili, e toatele mamao atu na i lo o so o se taua na faia muamua.

⁴ Sa avea le Taua Muamua a le Lalolagi ma faailoga o le amataga o aso e gata ai. Na fetalai Iesu faapea o lena taua, atoa ma isi mea tutupu, o le a avea ia ma “amataga o puapuaga.” (Mataio 24:8) Ua faamaonia le moni o lena mea, auā sa sili atu ona mataʻutia le Taua Lona Lua a le Lalolagi, e tusa  ma le 50,000,000 fitafita ma tagata sivili na maliliu ai. I lenei senituri lona 20, e sili mamao atu ma le 100,000,000 tagata ua fasiotia i taua, ua faafa ona toatele atu ai na i lo o tausaga e 400 muamua atu pe a tuufaatasia! Pagā le maoaʻe o le taʻusalaina o pulega a tagata!

Isi Faamaoniga

5-7. O ā nisi o faamaoniga o lo tatou ola i aso e gata ai?

⁵ Sa faaaofia ai foi e Iesu isi vala e ō mai faatasi ma aso e gata ai: “E i ai mafuie tetele i lea mea ma lea mea, o oge foi, ma faamai [faamaʻi pipisi].” (Luka 21:11) Ua fetaui lelei lea, ma mea na tutupu talu mai le 1914, auā sa matuā faateteleina lava puapuaga ona o na mala.

⁶ Ua lūlūina soo mafuie tetele, ma maliliu ai le toatele o tagata. E tusa ma le 20,000,000 tagata na maliliu i le fulū Sepania ina ua mavae le Taua Muamua a le Lalolagi​—ae e fai mai nisi e 30,000,000 pe sili atu foi. E faitau selau afe ua maliliu i le AIDS ma e mafai ona aafia atili ai le faitau miliona i le lumanai lata mai. Ua maliliu le faitau miliona o tagata i tausaga taitasi ona o maʻi o le fatu, kanesa, ma isi faamaʻi. E faitau miliona atili isi ua faasolosolo lemū ona maliliu ona o le molemanava. E aunoa ma le masalosalo ua avea ʻtagata tietie solofanua o le Faaaliga’ faatasi ma a latou taua, oge, ma faamaʻi pipisi ma itu ua matuā pagatia ai lava le aiga faaletagata talu mai le 1914.​—Faaaliga 6:3-8.

⁷ Na valoia foi e Iesu le faatuputeleina o solitulafono ua oo i atunuu uma. E faapea lana fetalaiga: “E maalili foi loto o tagata e toatele, ona ua tupu tele o [solitulafono].”​—Mataio 24:12.

8. Ua fetaui faapefea le valoaga i le 2 Timoteo mataupu e 3 i o tatou aso?

⁸ E lē gata i lena, na valoia foi i valoaga o le Tusi Paia le fāiifo o amioga ua faaalia i le lalolagi atoa i aso nei: “O ona aso e gata ai e oo mai ai aso faigata; auā e avea tagata ma e alolofa i latou ia i latou, o ē mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei, o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua; o e ua peiseai ua amio Atua, a e o le mana ua i lea mea ua latou teena; . . . O tagata amio leaga ma e taupelopelo, e alualu pea lava lo latou leaga.” (2 Timoteo 3:1-13) Ua faamaonia e o tatou lava mata le moni o na mea uma.

O se Isi Mea

9. O le ā na tupu i le lagi e ōgatasi ma le amataga o aso e gata ai i le lalolagi?

⁹ O loo iai se isi mea ua mafua ai ona matuā faateteleina puapuaga i lenei senituri. I le ōgatasi ma le amataga o aso e gata ai i le 1914, sa iai se mea na tupu ua atili ai ona matuā lamatia le fanau a tagata. I lena taimi, e pei ona faamatala mai e se valoaga i le tusi mulimuli o le  Tusi Paia e faapea: “Ua tau foi le taua i le lagi; o Mekaeli [o Keriso i le mana faalelagi] ma ana agelu ua latou tau ma le tarako [o Satani], ua ʻau foi le tarako ma ana agelu [o temoni] e tau ai le taua, a ua latou le manumalo, e le toe maua foi i le lagi se mea latou te nonofo ai. Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma; ua lafo ifo i le lalolagi, ua lafo foi ana agelu faatasi ma ia.”​—Faaaliga 12:7-9.

10, 11. Sa faapefea ona aafia le fanau a tagata ina ua lafoina mai Satani ma ana temoni i le lalolagi?

¹⁰ O ā ona iʻuga mo le aiga faaletagata? Ua faaauau mai le valoaga: “O i talofa ia te outou o e nonofo i le fanua ma le sami, auā ua alu ifo ia te outou le tiapolo ua lotoa tele, auā ua na iloa ua saasaa ona po.” Ioe, ua iloa e Satani ua latalata mai le iʻuga o lana faiga o mea, o lea ua ia faia ai mea uma lava na te mafaia ina ia liliu ai tagata e faasagatau atu i le Atua a o leʻi tafiesea o ia ma lana lalolagi. (Faaaliga 12:12; 20:1-3) Pagā le amio piʻopiʻo o na foafoaga agaga ona o lo latou faaaogāseseina o la latou filifiliga saoloto! Pagā le mataʻutia o tulaga ua iai i le lalolagi ona o a latou taaʻiga, ae maise lava talu mai le 1914!

¹¹ E lētioa la a valoia e Iesu e uiga i o tatou aso e faapea: “O i le lalolagi foi le atuatuvale o nuu i le fememeai; . . . e oti foi tagata i le matatau ma le faatalitali i mea e oo mai i le lalolagi.”​—Luka 21:25, 26.

Latalata le Iʻuga o Pulega a Tagata ma Temoni

12. O le ā se tasi o valoaga faaiʻu o loo totoe e ao ona faataunuuina a o leʻi faaiʻuina lenei faiga o mea?

¹² E toe fia nisi valoaga o loo totoe o le Tusi Paia e ao ona faataunuuina a o leʻi faaumatiaina e le Atua lenei faiga o mea o loo iai? E itiiti lava! O se tasi o valoaga faaiʻu o loo totoe, o le 1 Tesalonia 5:3, lea o loo faapea mai: “A o latou talanoa i le filemu ma le saogalemu, ae oo faafuaseʻi mai le faaumatiaga ia i latou uma.” (The New English Bible) E faaalia ai i lena, o le a amata le iʻuga o lenei faiga o mea “a o latou talanoa” i ai. O le a faateia le lalolagi, i le oo mai o le faaumatiaga e lē o faatalitalia, i le taimi o loo taulai atu ai manatu o tagata i lo latou lava faamoemoe mo le filemu ma le saogalemu.

13, 14. O le ā le taimi o faalavelave na valoia e Iesu, ma o le a faapefea ona faaiʻuina?

¹³ E lē o toe umi se taimi o totoe o lenei lalolagi o loo taaʻina e Satani. Ua toeitiiti ona oo atu lea i lona iʻuga, i le taimi o faalavelave na fetalai ai Iesu: “O ia ona po e oo ai le puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli.”​—Mataio 24:21.

¹⁴ O le taualuga o le “puapuaga tele,” o le taua lea a le Atua ia Amaketo. O le taimi lena na taʻua e le perofeta o Tanielu o le a ʻtuʻimomomoina ma faaumatia ai malo uma lava’ e le Atua. O le a avea lena ma iʻuga o pulega uma faaletagata o loo tutoatasi ese mai le Atua. Ona pulea ai lea e le pulega a lona Malo mai le lagi o mea uma lava e faia e tagata. E pei ona valoia e Tanielu, o le a lē taitai ona toe ʻtuuina atu i se tasi nuu,’ le aiā e pule ai.​—Tanielu 2:44; Faaaliga 16:14-16.

15. O le ā o le a tupu i taaʻiga a Satani ma ana temoni?

¹⁵ O le taimi foi lena o le a aveesea ai taaʻiga uma faasatani ma ana temoni. O le a tafiesea na foafoaga agaga fouvale ina ia lē toe mafai ai ona latou “faasese i le lalolagi uma.” (Faaaliga 12:9; 20:1-3) Ua faasalaina i latou i le oti ma faatalitali atu ai mo le faaumatiaga. Maeu se mapusaga o le a maua e le fanau a tagata, o le faasaoloto mai lea i a latou taaʻiga leaga!

O Ai o le a Faasaoina? A o Ai o le a Lē Faasaoina?

16-18. O ai o le a faasaoina i le iʻuga o lenei faiga o mea, ma o ai o le a lē faasaoina?

¹⁶ Pe a faaooina mai faasalaga a le Atua i lenei lalolagi, o ai o le a faasaoina? A o ai o le a lē faasaoina? Ua faaalia e le Tusi Paia e faapea, o i latou o ē mananao i le pulega a le Atua, o le a puipuia ma o le a faasaoina. A o i latou o ē lē mananao i le pulega a le Atua o le a lē puipuia, ae o le a faaumatia faatasi ma le lalolagi a Satani.

¹⁷ O loo faapea mai le Faataoto 2:21, 22: “O e amio saʻo [i latou o ē gauai i le pulega a le Atua],  latou te mau i le [lalolagi]; ma e ua sao a latou amio, e faatotoeina ai i latou; a e vavaeeseina o e amio leaga [i latou o ē e lē gauai i le pulega a le Atua] i le laueleele, e liaiina ai foi o e amio pepelo.”

¹⁸ Ua fai mai foi le Salamo 37:10, 11: “E toe itiiti, ona leai lea o le tagata amio leaga; . . . A o e agamalu, e fai mo latou le [lalolagi]; e faafiafia foi i latou ia te i latou ona o le manuia e tele.” Ua faaopoopo mai le Salamo 37 fuaiupu e 29: “E fai lava le [lalolagi] mo tagata amiotonu, e nonofo ai pea i latou.”

19. O le ā le fautuaga e ao ona teu mau i o tatou loto?

¹⁹ E ao ona teu mau i o tatou loto le fautuaga a le Salamo 37:34, o loo faapea mai: “Ia e faatalitali ia Ieova, ma e tausi i lona ala; ona faaeaina lea o oe e ia ina ia fai mou le [lalolagi]; e te iloa atu le fanoga o e amio leaga.” Fai mai le Salamo 37 fuaiupu e 37 ma le Salamo 37 fuaiupu 38: “Ina mafaufau ia i le ua sao lana amio, ma vaavaai i le ua amiotonu; auā o le iuga o lea tagata o le manuia lava lea. A e fano faatasi o e solitulafono; o le iuga o e amio leaga o le malaia lava lea.”

20. Aiseā e mafai ai ona tatou faapea atu, o ni aso faafiafia loto nei e ola ai?

²⁰ Maeu le faamafanafanaina, ioe, maeu le faagaeeina i le iloaina faapea o loo silasila alofa mai lava le Atua, ma ua toeitiiti ona ia faaiʻuina lea o amioga leaga ma puapuaga uma! Maeu le faafiafia loto i le iloaina ua toe o se aga ona oo mai lea o le faataunuuga o na valoaga ofoofogia!

[Fesili mo le Suʻesuʻega]

[Ata i le itulau 20]

Na valoia e le Tusi Paia mea tutupu e fai aʻe ai “le faailoga” o aso e gata ai

[Ata i le itulau 22]

Toeitiiti, ona aveesea lea ia Amaketo o i latou o ē lē gauai i le pulega a le Atua. A o i latou o ē gauai atu i ai o le a faasaoina atu i se lalolagi fou amiotonu