Mataupu Sefuluono

Ua Lata le Iʻuga o Tupu Feteenaʻi

1, 2. Na faapefea ona suia le tupu o le itu i mātū ina ua mavae le taua lona lua a le lalolagi?

I LE tōmanatu i le tulaga faaupufai o le Iunaite Setete ma Rusia, na tusia ai e le faifilosofia Falani, ma o se tusitala o talafaasolopito o Alexis de Tocqueville i le tausaga 1835 e faapea: “O le tasi ua avea le saʻolotoga ma faavae o ana gaoioiga; a o le isi ua faapologaina ma saisaitia ai tagata. O a la . . . auala e gaoioi ai e matuā eseese lava; ae ui i lea, e foliga mai ua taʻitasi ma valaauina e se fuafuaga lilo tauatua, e iai le taimi i le lumanaʻi o le a la taʻitoʻatasi ma pulea ai le ʻafa o le lalolagi.” Na faapefea ona taunuu moni lenei manatu ina ua uma le Taua Lona Lua a le Lalolagi? Na tusi le tusitala o talafaasolopito o J. M. Roberts e faapea: “I le iʻuga o le Taua Lona Lua a le Lalolagi, e faapena tonu lava le tulaga na foliga mai ai le lumanaʻi o le lalolagi, na aliali mai o le a puleaina e malo tetele e lua e matuā eseese lava auala e faagaoioi ai, o le isi e i le vaipanoa sa taʻua muamua o Rusia, ae o le isi e i le Iunaite Setete o Amerika.”

² A o faagasolo taua e lua a le lalolagi, na avea ai Siamani ma fili autū o le tupu o le itu i toga—le malo Malosi o le Lalolagi o Amerika ma Peretania—ma tulaʻi mai ai o le tupu o le itu i mātū. Peitaʻi, na vaevaeina le malo o Siamani ina ua mavae le Taua Lona Lua a le Lalolagi. Na ʻau Siamani i Sisifo i le tupu o le itu i toga, a o Siamani i sasaʻe, na ʻau atu ma se isi malo malosi po o le tuufaatasiga o malo faa-Komunisi sa taʻitaʻia e le Iuni faa-Sovieti. O malo tuufaatasi faapolotiki nei, na tulaʻi mai e  avea ma tupu o le itu i mātū, e tetee malosi atu iā Amerika ma Peretania. Na avea foʻi feteenaʻiga i le va o tupu e toʻalua o se Taua Faaupufai, lea na amata i le 1948 e oo mai i le 1989. Muamua atu, a o avea Siamani ma tupu o le itu i mātū, na “ita foʻi o ia i le feagaiga paia.” (Tanielu 11:28, 30) E faapefea ona gaoioi malo faa-Komunisi faasaga i le feagaiga?

E UI INA PAʻŪʻŪ KERISIANO AE FAAMALOLOSI PEA

3, 4. O ai i latou ua “agasala i le feagaiga,” ma o le ā le ituaiga faiā sa iā i latou ma le tupu i le itu i mātū?

³ Na faapea mai le agelu a le Atua: “O ē agasala i le feagaiga e leaga i latou iā te ia [tupu o le itu i mātū] i faaoleolega.” Ona toe faapea atili mai lea: “A o le nuu o ē ua iloa lo latou Atua latou te faamalolosi ma fai mea tetele. O ē ua popoto i le nuu latou te aʻoaʻoina atu i tagata e toʻatele; a o aso e tele e paʻūʻū ai i latou i le pelu ma le afi, ma le tafeaga, ma le veteina.”—Tanielu 11:32, 33.

⁴ O ē “agasala i le feagaiga,” e mautinoa lava o taʻitaʻi lotu ua taʻua o Kerisiano, i latou ua faapea mai o Kerisiano ae o a latou gaoioiga ua faalumaina ai le Faa-Kerisiano moni. Na taʻua e Walter Kolarz i lana tusi faa-Peretania Lotu i le Iuni faa-Sovieti: “[I le taimi o le taua lona lua a le lalolagi], na taumafai ai le Malo faa-Sovieti ina ia maua le lagolagosua ma le fesoasoani tau tupe mai i Lotu mo le puipuiina o le atunuu.” Ina ua mavae le taua, na taumafai taʻitaʻi lotu e faatumauina lenā faauōga, e ui lava i āiāiga e faavae i le lē talitonu i le Atua, sa faia e le malo ua avea nei ma tupu o le itu i mātū. Ua avea atili ai lava lotu ua taʻua o lotu Kerisiano ma vaega o lenei lalolagi—o se tulaga mataʻutia ma matuā inosia i le silafaga a Ieova.—Ioane 17:16; Iakopo 4:4.

5, 6. O ai ‘ē ua iloa lo latou Atua,’ ma o ā mea na oo iā i latou i le pulega a le tupu o le itu i mātū?

⁵ Ae faapefea Kerisiano moni, “le nuu o ē ua iloa lo  latou Atua” ma “ē ua popoto”? E ui lava sa latou ‘usiusitai i faipule silisili,’ ae e leʻi avea ai Kerisiano sa ola i le pulega a le tupu o le itu i mātū, ma vaega o lenei lalolagi. (Roma 13:1; Ioane 18:36) A o magafagafa i le avatuina ‘o mea a Kaisara iā Kaisara,’ sa latou avatu foʻi ‘mea a le Atua i le Atua.’ (Mataio 22:21) Ona o lo latou faia faapea, na luʻia ai lo latou faamaoni.—2 Timoteo 3:12.

⁶ O le iʻuga, na ‘paʻūʻū’ ma na ‘faamalolosi’ foʻi Kerisiano moni. Na latou paʻūʻū ona o sauāga mamafa, na oo lava ina fasiotia ai nisi. Ae peitaʻi na latou faamalolosi ona e toʻatele lava sa tutumau i le faamaoni. Na latou manumalo i le lalolagi e pei o Iesu. (Ioane 16:33) E lē gata i lea, e leʻi taofia ai la latou talaʻiga, e ui lava na faafalepuipuiina ai i latou po o le tuu foʻi i nofoaga mataʻutia mo faasalaga. O le faia faapea, ua latou ‘aʻoaʻoina ai tagata e toʻatele.’ E ui lava i sauāga i le tele o atunuu sa pulea e le tupu o le itu i mātū, ae na faatoʻateleina pea le aofaʻi o Molimau a Ieova. Ona o galuega faamaoni a “ē ua popoto,” ua sili atu ai ona faatoʻateleina le vaega o le “motu o tagata e toʻatele” o loo iai i na atunuu.—Faaaliga 7:9-14.

UA TOFOTOFOINA TAGATA O IEOVA

7. O le ā “se fesoasoani itiiti” na maua e Kerisiano faauuina sa pulea e le tupu o le itu i mātū?

⁷ Na faapea mai le agelu: “A paʻūʻū foʻi i latou, latou te maua se fesoasoani, o se fesoasoani itiiti.” (Tanielu 11:34a) O le manumalo mai o le tupu o le itu i toga i le taua lona lua a le lalolagi, na maua ai sina mapusaga o  Kerisiano sa soifua ai i le pulega a le tupu faatavā. (Faatusatusa i le Faaaliga 12:15, 16.) Sa faapena foʻi ona maua sina mapusaga mai lea taimi i lea taimi, e i latou sa sauāina e le tupu na sosoo atu ai. A o faasolo ina fai ifo le Taua Faaupufai, e toʻatele taʻitaʻi na oo ina latou malamalama i Kerisiano moni, e lē o ni tagata tetee i le malo ma o lea na faatagaina faaletulano ai la latou galuega. E tele foʻi se fesoasoani na maua mai i le motu o tagata e toatele lea ua faateleina lo latou faitau aofaʻi, o ē na tali mai i le talaʻiga faamaoni a le ʻaufaauuina.—Mataio 25:34-40.

8. Na faapefea ona pipii atu nisi i tagata o le Atua, ‘e ala i faaoleolega’?

⁸ E lē o tagata uma na faamaoni i lo latou faapea mai e fia auauna i le Atua a o faagasolo le Taua Faaupufai. Na lapataʻi mai le agelu e faapea: “E toʻatele e pipii atu iā te i latou ma faaoleolega.” (Tanielu 11:34e) E toʻatele sa faaalia le fiafia i le upu moni, peitaʻi latou te leʻi naunau e fai se tuuina atu i le Atua. E lē gata i lenā, o isi o ē na foliga mai latou te talia le tala lelei, o ni sipai mo le malo. Ua faapea mai se lipoti mai i se tasi atunuu: “O nisi o nei tagata taufaalata, o ni tagata Komunisi aʻiaʻi lava sa ō ane faalēiloga i totonu o le faalapotopotoga a le Alii, na latou maelega ma oo lava foʻi ina tofia i ni tofiga taualoa.”

9. Aiseā na faataga ai e Ieova nisi Kerisiano moni “e paʻūʻū” ona o tagata faalēiloga?

⁹ Na faaauau mai le agelu: “E paʻūʻū foʻi nisi o ē popoto, e tofotofoina ai i latou, ma faamamāina ai, ma faasinasinaina ai, seʻia oo i ona pō o le iʻuga; auā e leʻi oo i ona pō ua tuupōina.” (Tanielu 11:35) O taumafaiga a le ʻaufaaleiloga na māfua ai ona puʻeina nisi o tagata faamaoni e leoleo o malo. Sa faatagaina e Ieova lea tulaga mo le tofotofoina ma le faamamāina o ona tagata. E pei lava o le tulaga o Iesu “o mea sa tigā ai o ia na aʻoaʻoina ai o ia ia usiusitai,” na faapena foʻi ona aʻoaʻoina e nei Kerisiano  faamaoni le onosai mai le tofotofoina o lo latou faatuatua. (Eperu 5:8; Iakopo 1:2, 3; faatusatusa i le Malaki 3:3.) I lea tulaga, ua ‘tofotofoina, faamamāina ma faasinasinaina’ ai i latou.

10. O le ā le uiga o le faaupuga “seʻia oo i ona pō o le iʻuga”?

¹⁰ Sa tatau ona paʻūʻū ma faamamāina tagata o Ieova “seʻia oo i ona pō o le iʻuga.” E mautinoa lava, latou te faatalitalia sauāga seʻia oo i le iʻuga o lenei faiga amioleaga o mea. Peitaʻi, o le faamamāina ma le faasinasinaina o tagata o Ieova ona o sauāga mai le tupu o le itu i mātū, e mo “ona pō ua tuupōina.” O lea la, o “ona pō o le iʻuga” o loo taʻua i le Tanielu 11:35, e tatau ona fesootaʻi atu ma le iʻuga o le vaitaimi o taimi manaʻomia mo tagata o Ieova e faamamāina ai a o onosaia sauāga mai le tupu o le itu i mātū. E aliali mai sa faaiʻuina le paʻūʻū o i latou i le taimi na tuupōina e Ieova.

UA FAASILISILI E LE TUPU IA LAVA

11. O le ā le faamatalaga a le agelu e faatatau i uiga o le tupu o le itu i mātū agaʻi i le pule silisili ese a Ieova?

¹¹ Ua faapea atili mai le agelu e faatatau i le tupu o le itu i mātū: “O le tupu foʻi na te faia e tusa ma lona loto, ma faamaualuga o ia e ia, ma faasili iā te ia i atua uma; na te faia upu faasausili [e tetee i le pule silisili a Ieova] i le Atua o atua, e manuia foʻi o ia seʻia atoatoa le toʻasa; auā e faia lava le mea ua tuu i ai le pule. Na te lē manatu i le Atua o ona tamā, na te lē manatu i le manaʻo i fafine, na te lē manatu foʻi i se tasi atua; auā e faasilisili o ia e ia i mea uma.”—Tanielu 11:36, 37.

12, 13. (a) I le ā le auala na tetee atu ai le tupu o le itu i mātū “i le Atua o ona tamā”? (e) O ai “fafine” ia e leʻi manatu i ai le tupu o le itu i mātū i o latou “manaʻo”? (i) O ai le “atua” na avatu i ai e le tupu o le itu i mātū le viiga?

¹² I le faataunuuina o nei upu faavaloaga, na tetee atu le tupu o le itu i mātū i “le Atua o ona tamā,” e pei o le  atua Tolutasi paia a lotu ua taʻua o Kerisiano. Na faaauilumaina e malo faa-Komunisi le talitonuga e leai se Atua. O lea na fai ai e le tupu o le itu i mātū ia lava ma atua, ona ‘faasilisilia lea o ia e ia i mea uma.’ E ala i lona lē manatu “i le manaʻo [o] fafine,” po o atunuu maulalo ifo e pei o Vietiname i Mātū, o atunuu na ʻau atu i le tupu o mātū, na faia ai e le tupu “e tusa ma lona loto.”

¹³ Na faamatala atili mai e le agelu le valoaga e faapea: “E āva o ia i le atua o ʻolo i le mea e nofo ai o ia; o le atua foʻi sa lē iloa e ona tamā na te āva i ai, ma avatu i ai auro, ma ario, ma maa tāua, atoa ma mea matagofie.” (Tanielu 11:38) O le tulaga moni, na faamoemoe atu le tupu o le itu i mātū i meatau faaonapōnei, “le atua o ʻolo.” Ua ia saʻilia le faaolataga e ala i le “atua” lenei, i le faaaogāina o se vaegāʻoa tele mo le fatafaitaulaga o lenei atua.

14. Na faapefea ona ‘faia lava lea’ e le tupu o le itu i mātū?

¹⁴ “E faia lava lea e ia i ʻolo e sili ona malolosi, i le atua ese, o lē e manatua e ia ma faasilisili ona āva i ai; na te tuuina atu foʻi iā te i latou le pule i tagata e toʻatele, na te vaevaeina foʻi le laueleele e maua ai le taui.” (Tanielu 11:39) O le faatuatua atu i lona “atua ese” faavaegāʻau, na ‘faia ai lava’ e le tupu o le itu i mātū, ma avea ai o ia o se malo malosi faavaegāʻau i “ona pō o le iʻuga.” (2 Timoteo 3:1) O i latou sa lagolagoina ona manatu, na tauia i le mauaina o le lagolagosua a le malo, tau tamaoaiga ma faavaegāʻau i nisi foʻi o taimi.

‘SII TAU’ ATU I ONA PŌ O LE IʻUGA

15. Na faapefea ona ‘sii tau’ atu le tupu o le itu i toga agaʻi i le tupu o le itu i mātū?

¹⁵ Na taʻu atu e le agelu iā Tanielu: “A oo i ona pō o le iʻuga, ona sii atu lea iā te ia o le taua e le tupu o le itu i toga.” (Tanielu 11:40a) Po ua ‘sii tau’ atu ea le tupu o le itu i toga faasaga i le tupu o le itu i mātū “i ona pō o le  iʻuga”? (Tanielu 12:4, 9) O lea lava. Ina ua mavae le taua muamua a le lalolagi, o le feagaiga o le filemu e faasala aʻi lea na faamalosia iā Siamani le tupu o le itu i mātū i lenā taimi, e mautinoa lava o se ‘sii tau’ atu, auā o se gaoioiga e faatupu ai le fia tauimasui. Ina ua uma ona manumalo i le taua lona lua a le lalolagi, ona sauniuni lea e le tupu o le itu i toga o auupega mataʻutia faaniukilia e faasagatau ai i lona fili faatavā, ma faatulaga agaʻi i lea fili se faalapotopotoga malosi tele tau vaegāʻau, le Faalapotopotoga mo le Feagaiga o le Atalani i Mātū (NATO). E tusa ai o le matafaioi a le NATO, na faapea mai se tusitala o talafaasolopito mai Egelani: “O se auala autū lenā mo le ‘taofiofia’ o le USSR, (po o le Iuni faa-Sovieti) lea na avea o se taufaamataʻu sili i le filemu o Europa. O le umi o lenei gaoioiga e 40 tausaga o faia, ma na taunuu ma le manuia lea faamoemoe.” A o faagasolo tausaga o le Taua Faaupufai, na aofia ai i le ‘sii tau’ atu a le tupu o le itu i toga le atamai faaonapōnei i le mauaina o faamatalaga faananā, aemaise o le taufaamataʻu atu mo se taua e ala i upu ma gaoioiga.

16. Na faapefea ona tali mai le tupu o le itu i mātū i le sii tau atu a le tupu o le itu i toga?

¹⁶ Na faapefea ona tali mai le tupu o le itu i mātū? “E pei se afā ona oso atu iā te ia o le tupu o le itu i mātū ma kariota, ma ē o tiʻetiʻe i solofanua, atoa ma vaa e tele; na te oo atu foʻi i nuu, ma lolofi i ai, ma ui ane ai.” (Tanielu 11:40e) Ua faailoa mai e talafaasolopito o ona pō o le iʻuga, le faalautelega ua faia e le tupu o le itu i mātū. I le taimi o le taua lona lua a le lalolagi, na lofia ai e le “tupu” o le ʻau Nasi ona tuaoi i atunuu na lata ane. I le faaiʻuga o le taua lenā, na faavaeina ai e le tupu na sosoo ane ai se emepaea malosi tele. I le taimi o le Taua Faaupufai, na tau faasaga ai le tupu o le itu i mātū i le tupu sa tetee ane, e ala  i le lagolagoina o isi atunuu i a latou taua, o taua ma fouvalega i Aferika, Asia, ma Amerika Latina. Na ia sauāina Kerisiano moni ma faalavelavea la latou galuega talaʻi, ae e leʻi mafai ona ia taofia. O lana osofaʻiga malosi faavaegāʻau ma faaupufai foʻi, na mafai ai ona ia pulea le tele o atunuu. O le mea tonu lava lea na valoia mai e le agelu: “E oo atu foʻi o ia i le nuu matagofie [le tulaga faaleagaga o tagata o Ieova], e faaumatia foʻi nuu e tele.”—Tanielu 11:41a.

17. O fea na gata mai ai le faalauteleina o malo o le tupu o le itu i mātū?

¹⁷ Peitaʻi, e leʻi manumalo le tupu o le itu i mātū i le lalolagi. Na valoia mai e le agelu e faapea: “E sao nai lona lima o nuu ia, o Etoma, ma Moapi, atoa ma ē ua sili i le fanauga a Amoni.” (Tanielu 11:41e) I aso anamua, o Etoma, Moapi, ma Amoni sa i le va o malo o le tupu Aikupito o le itu i toga ma le tupu Suria o le itu i mātū. I aso nei, ua latou faaataina mai atunuu ma faalapotopotoga, na manaʻo i ai le tupu o le itu i mātū na te pulea ae e leʻi mafai.

E LĒ SAO AIKUPITO

18, 19. Na faapefea ona mafatia le tupu o le itu i toga i le pule a lē na faatavā mai iā te ia?

¹⁸ Ua faaauau mai le agelu a le Atua: “Na te [le tupu o le itu i mātū] faaoo atu lona lima i nuu, e lē sao foʻi le nuu o Aikupito. A e pule o ia i oloa, o auro, ma ario atoa ma mea matagofie uma o Aikupito; e mulimuli atu foʻi iā te ia o Lipua ma Aitiope.” (Tanielu 11:42, 43) E oo foʻi i le tupu o le itu i toga o “Aikupito,” e leʻi sao mai i aafiaga o āiāiga o le faalauteleina a le tupu o le itu i mātū.  O se faataʻitaʻiga, na matuā tigā le tupu o le itu i toga i lona toʻilalo matilatila i Vietename. Ae faapefea “Lipua ma Aitiope”? O tuaoi nei o Aikupito anamua, atonu ua talafeagai ona faaata mai ai atunuu o loo tuaoi ma “Aikupito” faaonapōnei (le tupu o le itu i toga). E iai taimi sa latou ‘⁠mulimuli atu ai’ i le tupu o le itu i mātū.

¹⁹ Po ua pulea ea e le tupu o le itu i mātū le ‘⁠oloa lilo o Aikupito’? E mautinoa sa iai lana pule malosi i le auala na faaaogā ai e le tupu o le itu i toga lona tamaoaiga. Ona o lona fefe tele i lona fili, na faaaogā ai e le tupu o le itu i toga se vaegātupe tele e faaleleia ai le ʻautau tele i le laueleele, i le sami ma le ʻea. O le auala lenā na ‘pule’ pe āiā ai le tupu o le itu i mātū i le tamaoaiga o le tupu o le itu i toga.

LE TAUIVIGA FAAIʻU

20. Na faapefea ona faamatalaina e le agelu le tauiviga faaiʻu a le tupu o le itu i mātū?

²⁰ O le feteenaʻiga i le va o le tupu o le itu i mātū ma le tupu o le itu i toga—pe feteenaʻi faavaegāʻau, pe o le itu tau tamaoaiga po o isi auala—ua toe nei o se aga ona uma loa lea. Na faamatala mai e le agelu a Ieova vaega o le feteenaʻiga lea e leʻi oo i ai i lona faapea mai: “A o tala mai sasaʻe, ma le itu i mātū e atuatuvale ai o ia [le tupu o le itu i matū]; ona alu atu ai lea o ia ma le ita tele ia faaumatia ma fasiotia tagata e toʻatele. Na te faatūina fale ie o lona maota i le va o sami, i le mauga matagofie ma le paia; a e oo atu i lona iʻuga, e leai foʻi se tasi e fesoasoani iā te ia.”—Tanielu 11:44, 45.

21. O le ā le mea tatou te leʻi iloaina e faatatau i le tupu o le itu i mātū?

²¹ I le faataapeina o le Iuni faa-Sovieti iā Tesema i le 1991, na matuā toilalo ai le tupu o le itu i mātū ona o lenei mea. O ai la lenei tupu pe a oo i le taimi e faataunuuina  ai le Tanielu 11:44, 45? Pe o ia ea o se tasi o atunuu sa avea muamua o se vaega o le Iuni faa-Sovieti? Pe o le a suia atoatoa foʻi i se isi malo e pei ona tupu i le tele o taimi muamua atu? Pe o le a avea ea le atinaʻeina o meatau faaniukilia e isi malo, ma māfuaaga o le a tulaʻi mai ai se feteenaʻiga tau i auupega malolosi, ma iloa ai loa po o ai lenā tupu? O le a tatou faatali seʻia oo i le taimi tatou te maua ai tali o nei fesili. E lē atamai ona tatou taumateina po o ai. Pe a alu atu le tupu o le itu i mātū mo lana tauiviga mulimuli, o le a manino lelei ai tagata uma o loo iai lo latou malamalamaga faale-Tusi Paia, i le faataunuuga o lenei valoaga.—Tagaʻi i “Tupu o loo Taʻua i le Tanielu Mataupu 11,” i le itulau e 284.

22. O ā fesili ua tulaʻi mai e uiga i le osofaʻiga mulimuli o le a faia e le tupu o le itu i mātū?

²² Ae ui lava i lea, ua tatou iloa le gaoioiga ua lē o toe umi ona faia loa lea e le tupu o le itu i mātū. Ona o tala “mai sasaʻe, ma le itu i mātū,” o le a ia faia ai se tauiviga ‘ia faaumatia ai tagata e toʻatele.’ O ai o le a faasaga i ai lenei tauiviga? O ā “tala” o le a faapogaia ai lenei osofaʻiga?

ATUATUVALE ONA O TALA E POPOLE AI

23. (a) O le ā le mea mataʻina e ao ona tupu a o leʻi oo mai Amaketo? (e) O ai “tupu mai nuu e alu aʻe ai le lā”?

²³ Seʻi mātau le faamatalaga a le tusi o Faaaliga e faatatau i le iʻuga o Papelonia le Aai Tele, le emepaea o lotu sesē. A o leʻi oo mai Amaketo, “le taua i le aso tele o le Atua e ona le malosi uma lava,” o le a ‘susunuina i le afi’ lenei fili sili o le tapuaʻiga moni. (Faaaliga 16:14, 16; 18:2-8) Ua faaataina mai lona faaumatiaga i le liligiina atu o le ipu lona ono o le toʻasa o le Atua i le vaitafe faafaatusa o Eufirate. Ua faapaʻumātūina le vaitafe ina ia “saunia le ala o tupu mai nuu e alu aʻe ai le lā.” (Faaaliga 16:12, LT)  O ai tupu nei? E na o Ieova le Atua ma Iesu Keriso e fetaui i ai!—Faatusatusa i le Isaia 41:2; 46:10, 11.

24. O le ā le gaoioiga a Ieova lea atonu o le a faateʻia ai le tupu o le itu i mātū?

²⁴ Ua faamatalaina mai ma le manino e le tusi o Faaaliga le faaumatiaga o Papelonia le Aai Tele, i le faapea mai: “O nifo foʻi e sefulu na e iloa [o tupu o loo pule i taimi o le iʻuga] i le manu feʻai [Malo Aufaatasi], latou te ʻinoʻino i le fafine talitane, ma faasaunoa iā te ia; ma tō ese ona ofu, latou te aai foʻi i lona tino, ma susunu iā te ia i le afi.” (Faaaliga 17:16) Aiseā o le a faaumatia ai e tupu Papelonia le Aai Tele? Auā “ua tuuina atu e le Atua i o latou loto ia faia lona finagalo.” (Faaaliga 17:17) E aofia ai i tupu nei, le tupu o le itu i mātū. O tala o le a ia faalogo i ai ‘⁠mai le itu e oso aʻe ai le lā,’ atonu e faasino atu i le gaoioiga lenei a Ieova, i le taimi na te tuuina ai i loto o taʻitaʻi faaletagata e faaumatiaina le fafine talitane sili faalotu.

25. (a) O ai o le a taulaʻi faapitoa i ai osofaiga a le tupu o le itu i mātū? (e) O fea o le a ‘faatūina ai fale ie o le maota’ o le tupu o le itu i mātū?

²⁵ Peitaʻi, e iai le tāulaʻiga faapitoa o le ita o le tupu o le itu i mātū. Ua faapea mai le agelu: “Na te faatūina fale ie o lona maota i le va o sami, i le mauga matagofie ma le paia.” I vaitaimi o Tanielu, o le sami tele sa faasino atu lea i le Metitirani, a o le mauga paia o Siona, lea sa iai muamua le malumalu o le Atua. O lea la, i le faataunuuga o le valoaga, e faia ai e le tupu lotoa o le itu i mātū se osofaʻiga faasaga i tagata o le Atua. I se uiga faaleagaga, o le vaipanoa ‘i le va o sami ma le mauga matagofie ma le paia,’ ua faaata mai ai le tulaga faaleagaga o auauna faauuina a Ieova. Ua latou ō mai nai “le sami” o tagata ua faaesea i latou mai le Atua, ma maua le faamoemoe o le pule faatasi ma Iesu Keriso i le Mauga o Siona i le lagi.—Isaia 57:20; Eperu 12:22; Faaaliga 14:1.

26. E pei ona faaalia mai i le valoaga a Esekielu, atonu o ai e faapogai mai ai tala ‘mai i mātū’?

 ²⁶ Na valoia foʻi e Esekielu, o sē e tupulaga ma Tanielu, le osofaʻiga faasaga i tagata o le Atua i “ona aso amuli.” Na fai mai a ia, e amataina lenei osofaiga e Koku o Makoku, po o Satani le Tiapolo. (Esekielu 38:14, 16) I se uiga faafaatusa, o fea le itulagi e sau ai Koku? Ua faapea mai Ieova e ala mai iā Esekielu: ‘E sau mai i le itu i mātū.’ (Esekielu 38:15) Po o le ā lava le mataʻutia o nei osofaʻiga, ae o le a lē mafai ona faaumatia ai tagata o Ieova. O le a tupu lenei osofaiga maoaʻe ona o se gaoioiga tāua ua faia e Ieova, ina ia faaumatia atoatoa ai ʻau a Koku. Ona faapea atu ai lea o Ieova iā Satani: “Ou te . . . tuuina mama i ou auvae, ma ou taʻitaʻi atu iā te oe.” “Ou te faaaʻe mai foʻi iā te oe ai le itu i mātū, ma aumai iā te oe i mauga o Isaraelu.” (Esekielu 38:4; 39:2) O lea la, o tala ‘mai i mātū’ lea o le a atuatuvale ai le tupu o le itu i mātū, e māfua mai iā Ieova. Peitaʻi, o mea o le a aofia i nei tala “mai sasaʻe, ma le itu i mātū,” e na o Ieova na te silafia ma o le a tatou iloa a o faagasolo le taimi.

27. (a) Aiseā o le a faamaopopoina ai e Koku nuu, e aofia ai ma le tupu o le itu i mātū, e osofaʻia tagata o Ieova? (e) O le ā le iʻuga o le a oo i ai le osofaʻiga a Koku?

²⁷ Ae o Koku, na te faamaopopoina lana toe osofaʻiga ona o le tulaga manuia o “le Isaraelu o le Atua,” o i latou ia, faatasi ai ma le “motu o tagata e toʻatele” o “isi mamoe.” e lē o toe avea o se vaega o lana lalolagi. (Kalatia 6:16; Faaaliga 7:9; Ioane 10:16; 17:15, 16; 1 Ioane 5:19) E vaai faatauvaa Koku i le “nuu . . . ua faapotopotoina nai nuu ese, ua i ai manu ma oloa [faaleagaga].” (Esekielu 38:12) O lona manatu i le tulaga faaleagaga o Kerisiano e pei o se “aai e lē nofo ʻolo” e faigofie ona faatoʻilaloina, e faia ai e Koku se taumafaiga sili e faaumatia atoatoa ai lenei toʻatugā o loo faalavelavea ai lona pulea atoatoa  o tagata. Peitaʻi o le a lē manuia ana taumafaiga. (Esekielu 38:11, 18; 39:4) Pe a osofaʻia tagata o Ieova e tupu o le lalolagi, e aofia ai ma le tupu o le itu i mātū, ona ‘oo uma ai lea o i latou i lo latou iʻuga.’

‘O LE A OO MAI LE IʻUGA O LE TUPU’

28. O le ā ua tatou iloa e faatatau i le lumanaʻi o le tupu o le itu i mātū, atoa ai ma le tupu o le itu i toga?

²⁸ O le tauiviga mulimuli lava a le tupu o le itu i mātū, o le a lē fasaga tau atu i le tupu o le itu i toga. O lea la, e lē faaumatiaina le tupu o le itu i mātū e lana tupu faatavā sili. E faapena foʻi ona lē faaumatiaina le tupu o le itu i toga e le tupu o le itu i mātū. O le a faaumatia le tupu o le itu i toga e le Malo o le Atua ‘a e lē se lima [o se tagata].’ * (Tanielu 8:25) O le mea moni lava ia, o le a aveesea e le Malo o le Atua tupu uma o le lalolagi, i le taua iā Amaketo, ma e manino mai o le mea lenā o le a oo i le tupu o le itu i mātū. (Tanielu 2:44) Ua faamatala mai e le Tanielu 11:44, 45 mea o le a tutupu a o leʻi oo mai lenā taua faaiʻu. E lētioa lava a “leai foʻi se tasi e fesoasoani” i ai pe a oo i le iʻuga o le tupu i mātū!

[Faaopoopoga i lalo]

O Ā MANATU AOGĀ NA E MAUA MAI?

• Na faapefea ona suia le tupu o le itu i mātū ina ua mavae le taua lona lua a le lalolagi?

• O le ā o le a iʻu iai le tupu o le itu i mātū ma le tupu o le itu i toga?

• Ua faapefea ona aogā iā te oe lou uaʻi totoʻa atu i le valoaga a Tanielu e faatatau i le feteenaʻiga i le va o tupu e toʻalua?

[Fesili mo le Suʻesuʻega]

 [Siata/Ata i le itulau 284]

TUPU O LOO TAʻUA I LE TANIELU MATAUPU 11

Le Tupu o le Le Tupu o le

itu i Mātū itu i Toga

Tanielu 11:5 Seluko I Nikatora Tulomaio I

Tanielu 11:6 Atioko II Tulomaio II (lona

(lana avā o Laotika) afafine o Perenike)

Tanielu 11:7-9 Seluko II Tulomaio III

Tanielu 11:10-12 Atioko III Tulomaio IV

Tanielu 11:13-19 Atioko III Tulomaio V

(lona afafine Lē na sosoo ai:

o Keleopatara I) Tulomaio VI

O ē na sosoo ai:

Seluko IV ma Atioko IV

Tanielu 11:20 Aokuso

Tanielu 11:21-24 Tiperio

Tanielu 11:25, 26 Uliano Tupu Tamaʻitaʻi o

Le malepe o le Sinoia

Emepaea o Roma

Tanielu 11:27-30a Emepaea o Siamani Peretania, sosoo ai

(Taua Muamua a le Amerika-Peretania,

Lalolagi) Malo Malosi i le Lalolagi

Tanielu 11:30e, 31 Pulega Lona Tolu a Amerika-Peretania,

Hitila (Taua II a le Lalolagi) Malo Malosi i le Lalolagi

Tanielu 11:32-43 Malo faa-Komunisi Amerika-Peretania,

(Taua Faaupufai) Malo Malosi i le Lalolagi

Tanielu 11:44, 45 E leʻi tulaʻi mai * Amerika-Peretania,

Malo Malosi i le Lalolagi

[Faaopoopoga i lalo]

 [Ata i le itulau 271]

 [Ata i le itulau 279]

“Ua aofia ai i le ‘sii tau’ atu a le tupu o le itu i toga le atamai faaonapōnei i le mauaina o faamatalaga faananā ma le taufaamataʻu atu mo se taua