MATAUPU 8

E Faapefea Ona Ou Maua ni Uō Lelei?

“Pe a ou ita, ou te manaʻo e faailoa atu i se isi oʻu faalogona. Pe a ou faanoanoa, ou te manaʻomia se tasi e faamalosiau mai. Pe a ou fiafia, ou te manaʻo e ma te fiafia faatasi ma se isi. Ou te manatu e tatau lava ona iai ni uō.”​—Brittany.

E MANATU nisi, e manaʻomia e le fanau lāiti ni ē e latou te taaalo, ae e manaʻomia e tagata matutua ni uō. O le ā le eseesega?

O se tasi e lua te taaalo, o se tasi lea e lua te toʻalua.

O le uō, o se tasi e tutusa mea e lua te fiafia ai.

E lē gata i lea, o loo faapea mai le Tusi Paia, “o le uō moni e alofa i taimi uma, ma o ia o se uso ua fanau mo taimi o puapuaga.” (Faataoto 17:17) Atonu o loo faamatala mai i inei se ituaiga faauōga e māfana atu, nai lo o au uō na tou taaalo a o e laʻitiiti!

O mea moni: A o faasolo ina avea oe ma tagata matua, e te manaʻomia ni uō e

1. Faaalia uiga tausaafia

2. Ola e tusa ma tapulaa aogā

3. Iai ni aafiaga lelei iā te oe

Fesili: E faapefea ona e maua ni uō faapena? Seʻi o tatou iloiloina taʻitasi na vala.

Mea Moni i se Faigāuō #1—Uiga Tausaafia

O mea e tatau ona e iloa. E lē o tagata uma e tatou te faauō i ai e mafai ona avea ma ni uō moni. O loo faapea mai foʻi le Tusi Paia, “e iai uō e toe lavea le tasi i le isi.” (Faataoto 18:24) Atonu e faateʻia oe i lenā manatu. Ae ia fesili ifo: Pe na iai se tasi na “faauō” atu iā te oe ina ia maua ai se mea na manaʻo ai? Ae ā se uō na faia ni tala taufaaleaga pe faasalalau ni tala sesē e uiga iā te oe? Pe a tupu lenā mea, o le a faigatā ona e toe talitonuina se tasi. * Ia e manatua, pe a filifilia ni au uō, e sili atu ona tāua le iai o ni uō faamaoni, nai lo le tele o uō!

Le mea e ao ona e faia. Ia filifili uō e iai ni uiga lelei e mafai ona e faaaʻoaʻo i ai, ma maua ai aogā.

“E fiafia tagata uma i laʻu uō o Fiona. Ou te manaʻo foʻi e fai e tagata ni tala lelei e uiga iā te aʻu, ma ia iai soʻu talaaga lelei e pei o ia. Na ia faaalia uiga tausaafia.”​—Yvette, 17.

Faataʻitaʻi mea nei.

1. Faitau le Kalatia 5:22, 23.

2. Ia fesili ifo iā te oe, ʻPo o faaalia e aʻu uō uiga e aofia i “le fua o le agaga”?’

3. Ia tusi i lalo igoa o au uō mamae. I autafa o igoa taʻitasi, tusi ai se uiga e faamatala ai lenā tagata.

Igoa

․․․․․

Uiga

․․․․․

Sina fautuaga: Pe afai e na o uiga lē lelei lava na e tusia i lalo, atonu ua tatau la ona saʻili ni au uō lelei!

Mea Moni i se Faigāuō #2—Tapulaa Aogā

O mea e tatau ona e iloa. O lou naunau tele e maua ni au uō, e te ono filifilia ai ni uō lē lelei. Ua faapea mai le Tusi Paia: “O lē e faifaimea faatasi ma tagata vālea, e leaga ai lava o ia.” (Faataoto 13:20) O le faaupuga “tagata vālea,” e lē o faasino atu i tagata e lē lelei ni tulaga tauaʻoaʻoga pe vaivai le mafaufau. Nai lo o lea, o loo faamatalaina ai i latou e teena fautuaga aogā, ae mulimuli i le ala sesē o amioga leaga. O ituaiga uō na e tatau ona e ʻalofia!

Le mea e ao ona e faia. Nai lo o le faauō atu i so o se tasi lava, ia e faautauta. (Salamo 26:4) E lē faapea ai ua e faailoga tagata. O le uiga o le faautauta i inei, o le mafai lea ona e iloa atu “le eseesega o le tagata amiotonu ma le tagata amioleaga, o le eseesega foʻi o lē o loo auauna i le Atua ma lē e lē o auauna iā te ia.”​—Malaki 3:18.

“Ou te talisapaia le fesoasoani a oʻu mātua ina ia ou maua ni uō. O ni uō e matou te tupulaga o loo agaʻigaʻi i luma faaleagaga.”​—Christopher, 13.

Tali fesili o loo sosoo mai:

Pe a ou faatasi ma aʻu uō, po ou te popole neʻi o latou uunaʻia aʻu e faia se mea ou te iloa e sesē?

□ Ioe

□ Leai

Po ou te musu e faailoa atu aʻu uō i oʻu mātua, ina neʻi o la lē fiafia iā i latou?

□ Ioe

□ Leai

Sina fautuaga: Afai o lau tali i fesili o loo i luga o le ioe, ia saʻili la ni uō e ola i tapulaa maualuluga. O ni ē o loo avea ma faaaʻoaʻoga lelei i le auala e ola ai o se Kerisiano.

Mea Moni i se Faigāuō #3—Aafiaga Lelei

O mea e tatau ona e iloa. Ua faapea mai le Tusi Paia: “O aumea leaga, e leaga ai uiga lelei.” (1 Korinito 15:33, Today’s English Version) Na faapea mai se talavou e igoa iā Laura: “Sa talia aʻu e aʻu uō, pe afai ou te faia mea e latou te mananaʻo ai. Sa ou lagona le tuua toʻatasi, ma na ou filifili ai loa e gaoioi e pei o i latou, ina ia latou talia ai aʻu.” Na iloa mulimuli ane e Laura, pe a e lolo atu tapulaa a isi tagata, ua pei ai oe o se maa o le mū. E latou te feaveaʻia solo oe i le mea e latou te mananaʻo ai. E lē tatau ona vaai faapena se isi iā te oe!

Le mea e ao ona e faia. Aua le faauō atu iā i latou e mananaʻo e sui le auala e te ola ai, ina ia e pei o i latou. Pe a e faia faapea, atonu o le a lē tele ai ni au uō, ae o le a lelei ai ou faalogona, ma e maua ai ni uō e sili atu. O ni uō e iai ni aafiaga lelei iā te oe.​—Roma 12:2.

“O laʻu uō o Clint, o se tagata e faautauta ma malamalama, ma ua avea o ia ma faalaeiauga sili mo aʻu.”​—Jason, 21.

Ia fesili ifo iā te oe i fesili nei:

Po ua suia le auala e fai ai oʻu lavalava, tautala, po o le gaoioi i se auala lē lelei ina ia faafiafia ai aʻu uō?

□ Ioe

□ Leai

Po o ou iai i nofoaga e ono faia ai ni amioga lē talafeagai, ona o loo iai foʻi aʻu uō?

□ Ioe

□ Leai

Sina fautuaga: Afai o lau tali i fesili o loo i luga o le ioe, talanoa i ou mātua po o se isi tagata matua mo se fautuaga. Pe afai o oe o se Molimau a Ieova, e mafai foʻi ona e talanoa atu i se toeaina, ma faailoa i ai o loo e manaʻomia se fesoasoani i le filifilia o ni uō e iai ni aafiaga lelei iā te oe.

FAITAU ATILI E FAATATAU I LENEI MATAUPU I LE MATAUPU 9, TUSI 2

I LE MATAUPU E SOSOO AI

Po o uunaʻia oe e sau uō po o oe lava ia, e faia se mea leaga? Mātau pe faapefea ona e tetee atu!

[Faaopoopoga i lalo]

MAU AUTŪ

“E iai foʻi le uō e sili ona alofa faamaoni nai lo o le uso.”​—Faataoto 18:24.

FESOASOANI

Pe a e ola e ōgatusa ma tapulaa amiotonu, o le a faauō atu foʻi iā te oe tagata o loo taumafai foʻi e faia faapea. O le a avea i latou o ni uō e sili ona lelei!

E TE SILAFIA . . . ?

E lē faailoga tagata le Atua, ae e na te filifili lelei tagata e ‘fai ma mālō i lona faleʻie.’​—Salamo 15:1-5.

MEA O LE A OU FAIA!

Ina ia ou maua ni uō lelei, o le a ou ․․․․․

Ou te manaʻo e faauō atu iā i latou e matutua atu iā te aʻu e pei o ․․․․․

O ā ni mea ou te fia fesili atu ai i oʻu mātua e faatatau i lenei mataupu? ․․․․․

O LE Ā SOU MANATU?

● O ā uiga e te manaʻo e iai i sau uō, ma aiseā?

● O ā uiga e tatau ona e galue e faaleleia ina ia avea ai oe o se uō lelei?

[Faamatalaga faaopoopo]

Ina ua talanoa mai oʻu mātua e tatau ona ou ʻalofia nisi o aʻu uō, na ou mafaufau e na o le pau ia o aʻu uō ou te fiafia ai. Peitaʻi, na saʻo le fautuaga a oʻu mātua, ma na ou iloa mulimuli ane ai, e tele uō lelei e mafai ona maua.”​—Cole.

[Pusa]

Faataʻitaʻi Fautuaga Nei

Talanoa i ou mātua e faatatau i faauōga. Ia fesili i ai e faatatau i ituaiga uō na latou faia a o laiti e pei o oe. Pe na latou salamō i nisi o a latou filifiliga i aumea? Aiseā? Ia fesili i ai pe faapefea ona e ʻalofia nisi o faafitauli na latou fesagaʻia.

Ia faailoa atu au uō i ou mātua. Pe afai e te faatalatū e faailoa atu au uō i ou mātua, ia fesili ifo, ‘Aiseā ou te faatalatū ai?’ Pe e iai ni amioga po o uiga o au uō e te iloa e lē taliaina e ou mātua? Afai e iai, atonu la e manaʻomia ona e filifili lelei au uō.

Ia faalogologo lelei. Ia faaalia le naunau i mea o loo mafaufau ma popole ai au uō.​—Filipi 2:4.

Ia faamagalo atu. Aua e te faatalitalia e lelei atoatoa mea uma. “E sesē i tatou uma e mea e tele.”​—Iakopo 3:2.

Ia tuu se avanoa i au uō. E lē manaʻomia ona e pipii atu iā i latou i taimi uma. O uō moni o le a latou fesoasoani atu i taimi e te manaʻomia ai.​—Failauga 4:9, 10.

[Ata]

Pe a e lolo atu i tapulaa a isi ina ia fiafia mai ai iā te oe, ua pei oe o se maa o le mū, o loo feaveaʻi solo i le mea latou te mananaʻo ai