I ULUAʻI gagana o le Tusi Paia, e silia i le 70 taimi o loo taʻua ai le upu Eperu sheʼohlʹ ma le upu Eleni haiʹdes. O upu uma nei e fesootaʻi atu i le oti. Ua faaliliuina e nisi faaliliuga o le Tusi Paia Samoa upu nei i le “tuugamau” po o “seoli.” Peitaʻi, i le tele o gagana, e leai ni upu e faamatala ai le uiga moni o nei upu i le gagana Eperu ma le gagana Eleni. O lea, e faaaogā ai e le Faaliliuga a le Lalolagi Fou upu “Seoli” ma “Heitisi” i faamatalaga pito i lalo. O le ā le uiga moni o nei upu? Seʻi o tatou mātauina auala eseese ua faaaogā ai nei upu i le Tusi Paia.

Ua faapea mai le Failauga 9:10: “E leai se galuega, po o ni fuafuaga, po o le poto, po o le atamai i le Tuugamau [“Seoli,” faamatalaga pito i lalo] o loo e alu atu i ai.” Po o faasino atu ea Seoli i se tuugamau maʻoti e tanu ai se tagata pele ua maliu? E leai. Auā o loo faaaogā i le Tusi Paia isi upu Eperu ma Eleni pe a faasino atu i se tuugamau maʻoti, ae lē o le sheʼohlʹ ma le haiʹdes. (Kenese 23:7-9; Mataio 28:1) E lē o faaaogā e le Tusi Paia le upu “Seoli” mo se tuugamau e tanu faatasi ai ni tagata, e pei o se loa o se aiga.—Kenese 49:30, 31.

O le ā la le uiga o le upu “Seoli”? Ua taʻu mai e le Tusi Paia o le upu “Seoli” e lautelē atu lona faatatauga na i lo le faasino i se tuugamau patino. O se faaaʻoaʻoga, ua faapea mai le Isaia 5:14 “ua faalautele ai e le Tuugamau [po o Seoli] o ia lava ma faamaga lona gutu e leai se mea e gata mai ai.” E ui lava ua folo e Seoli le toʻatele o tagata ua maliliu, ae e aliali mai o loo fia ʻai pea. (Faataoto 30:15, 16) E lē pei o se tuugamau patino po o se fanuatanu e faatapulaa tagata maliliu e tanu ai, ae ʻo le Tuugamau e lē malie ia.’ (Faataoto 27:20) E lē mafai ona tumu Seoli. E leai se mea e gata ai. O lea la, o Seoli e lē faasino atu i se tuugamau maʻoti po o se fanuatanu. Ae i se gagana faafaatusa, o Seoli o le nofoaga lea ua tofafā ai e toetoe o tagata uma lava ua maliliu.

Tatou te malamalama atili i le uiga o “Seoli” ona o le aʻoaʻoga a le Tusi Paia i le toe tū. I le Tusi Paia, e iai se fesootaʻiga  o Seoli ma tagata ua feoti o ē e mafai ona toe tutū mai. * (Faaaliga 20:13) Ua faaalia foʻi i le Tusi Paia o loo iai i Seoli tagata na auauna iā Ieova ma le toʻatele o tagata e leʻi auauna iā te ia. (Kenese 37:35; Salamo 55:15) O le pogai lenā ua aʻoaʻo ai e le Tusi Paia, “e toetutū mai tagata amiotonu ma tagata amiolētonu.”—Galuega 24:15.