1, 2. Aiseā e te alofa ai iā Ieova le Atua?

PE E te alofa i le Atua? Pe afai ua uma ona tuuina atu lou ola iā Ieova le Atua, o lau tali la i lenā fesili, o le ioe! O se mea e tatau mo i tatou ona alolofa iā Ieova. E tatou te alolofa i le Atua, auā o la tatou tali atu lea i lona alofa mo i tatou. O le tala lenei a le Tusi Paia: “Ua tatou alolofa auā na muaʻi alofa mai [Ieova] iā i tatou.”​—1 Ioane 4:19.

² O Ieova na muamua faaalia lona alofa iā i tatou. Ua ia saunia le lalolagi matagofie ina ia tatou nonofo ai. Ua ia tausia foʻi o tatou manaʻoga faaletino. (Mataio 5:43-48) Ae e sili atu i lenā, ua ia tausia o tatou manaʻoga faaleagaga. Ua ia tuuina mai iā i tatou lana Afioga le Tusi Paia. E lē gata i lea, ua ia valaaulia i tatou e tatalo atu iā te ia, ma ua ia folafola mai o le a ia faafofoga i a tatou tatalo, ma foaʻi mai lona agaga paia e fesoasoani iā i tatou. (Salamo 65:2; Luka 11:13) A o le sili o na mea uma, na ia auina mai lona Alo pele e fai ma Lē e Togiolaina i tatou, ina ia laveaʻi i tatou mai le agasala ma le oti. Maʻeu le tele o le alofa o Ieova iā i tatou!​—Faitau le Ioane 3:16; Roma 5:8.

3. (a) O le ā le mea e tatau ona tatou faia ina ia tumau ai i le alofa o le Atua? (e) O le ā se fesili tāua e ao ona tatou mafaufau i ai, ma o fea e maua ai le tali?

³ E finagalo Ieova ina ia tatou maua aogā e faavavau mai lona alofa. Ae e faalagolago lava iā i tatou pe tatou te  maua aogā pe e leai. Ua timaʻi mai le Afioga a le Atua iā i tatou: “Ia outou faatumau iā te outou i le alofa o le Atua . . . lea e iʻu ai i le ola e faavavau.” (Iuta 21) O le faaupuga “ia outou faatumau iā te outou,” e faaalia ai e tatau ona fai sa tatou gaoioiga ina ia tumau ai i le alofa o le Atua. E tatau ona tatou tali atu i lona alofa i ni auala maʻoti. O se fesili tāua la e tatou te mafaufau i ai, ʻE faapefea ona faaalia loʻu alofa i le Atua?’ E maua le tali i upu a le aposetolo o Ioane: “O le alofa lenei i le Atua, ia tatou tausi i ana poloaʻiga; ma e lē mamafa ana poloaʻiga.” (1 Ioane 5:3) Seʻi o tatou iloiloina totoʻa le uiga o na upu, ona e tatou te mananaʻo e faaali atu i lo tatou Atua le tele o lo tatou alofa iā te ia.

4, 5. (a) O le ā o loo faasino atu i ai le faaupuga “o le alofa . . . i le Atua”? (e) Ia faamatala pe na faapefea ona amata tuputupu aʻe i lou loto le alofa iā Ieova.

⁴ O le ā na manatu i ai le aposetolo o Ioane ina ua ia faapea mai “o le alofa . . . i le Atua”? O lenā faaupuga, o loo faasino atu i o tatou faalogona loloto mo le Atua. Pe e te manatua le taimi na amata ai ona tuputupu aʻe i lou loto le alofa iā Ieova?

⁵ Seʻi manatunatu ifo i le uluaʻi taimi na e aʻoaʻoina ai le upu moni iā Ieova ma lona finagalo, ma amata ona e faatuatua i ai. Na e malamalama ai, e ui ina e fanau mai o se tagata agasala ua vavaeese mai i le Atua, ae na tatala e Ieova le avanoa e ala iā Keriso, ina ia mafai ona e toe maua ai le ola lelei atoatoa na leiloa iā Atamu, ma ulu atu ai i le ola e faavavau. (Mataio 20:28; Roma 5:12, 18) Na amata ai foʻi ona e talisapaia le telē o le faataulaga na faia e Ieova, i le auina mai o lona Alo pele e maliu mo oe. Na faagaeetia ai lou loto, ma e lagona ai le alofa i le Atua o lē e matuā alofa iā te oe.​—Faitau le 1 Ioane 4:9, 10.

6. E faapefea ona faatino le alofa moni, ma o le ā le mea na faapogaia oe e fai ona o le alofa i le Atua?

⁶ Ae peitaʻi, o lenā faalogona ua na o se amataga o le alofa moni iā Ieova. O le alofa, e lē na o se faalogona; e lē na o ni upu foʻi. O le alofa i le Atua e aofia ai mea e sili atu nai lo o le faapea atu, “ou te alofa iā Ieova.” E pei o le faatuatua, ua faaalia le alofa moni e ala i gaoioiga. (Iakopo 2:26) E faatinoina le alofa e ala i galuega e fiafia i ai lē ua tatou alolofa i ai. O lea la, ina ua mauaa i lou loto le alofa iā Ieova, na uunaʻia ai oe e ola i se auala e faafiafia ai lou Tamā o i le lagi. Po o oe o se Molimau ua papatisoina? Afai o lea, o lenei faalogona loloto ma lou faamaoni, na faapogaia ai oe ina ia faia le filifiliga aupito i sili ona tāua i lou olaga. Na e tuuina atu oe lava iā Ieova e  faia lona finagalo, ma faailogaina lou tuuina atu e ala i le papatisoga. (Faitau le Roma 14:7, 8.) O le faataunuuina o lenā tautoga tāua iā Ieova, e aofia ai le isi mea ua taʻua e le aposetolo o Ioane.

7. O ā nisi o poloaʻiga a le Atua, ma o le ā e aofia ai i le tausia o na poloaʻiga?

⁷ Ua faamatala e Ioane le uiga o le alofa i le Atua: “Ia tatou tausi i ana poloaʻiga.” O ā poloaʻiga a le Atua? Ua tuuina mai e Ieova iā i tatou poloaʻiga maʻoti e ala i lana Afioga le Tusi Paia. O se faaaʻoaʻoga, ua ia faasāina amioga e pei o le onā, faitaaga, ifo i tupua, gaoi ma le pepelo. (1 Korinito 5:11; 6:18; 10:14; Efeso 4:28; Kolose 3:9) O le tausia o poloaʻiga a le Atua, e aofia ai le usiusitaʻi i tapulaa manino tau amio a le Tusi Paia.

8, 9. E faapefea ona tatou iloa mea e fiafia i ai Ieova e oo lava i tulaga e lē o iai se tulafono maʻoti o le Tusi Paia? Ia fai se faataʻitaʻiga.

⁸ Ae ina ia faafiafiaina Ieova, e iai isi mea e tatau ona tatou faia e ese mai i le usiusitaʻi i ana poloaʻiga maʻoti. E lē saisaitia e Ieova i tatou i tulafono e puleaina vala uma o o tatou olaga i aso faisoo. O le mea lea, tatou te ono fetaiaʻi ai ma le tele o tulaga i aso taʻitasi, e lē o iai ni poloaʻiga maʻoti o le Tusi Paia. E faapefea la ona tatou iloa po o ā mea e fiafia i ai Ieova? O loo taʻua manino i le Tusi Paia le finagalo o le Atua. A o tatou suʻesuʻe i le Tusi Paia, tatou te aʻoaʻoina ai mea e fiafia i ai Ieova ma mea e inosia e ia. (Faitau le Salamo 97:10; Faataoto 6:16-19) Tatou te mātauina ai uiga ma gaoioiga e tāua iā te ia. O le tele o lo tatou aʻoaʻoina o uiga ma ala o Ieova, o le a atili taaʻina ai e ona mafaufauga a tatou filifiliga ma gaoioiga. E oo lava i tulaga e lē o iai se tulafono maʻoti o le Tusi Paia, e mafai ona tatou malamalama “po o le ā le finagalo o Ieova.”​—Efeso 5:17.

 ⁹ O se faaaʻoaʻoga, e leai se tulafono maʻoti o le Tusi Paia, e faasā ai ona tatou matamata i ata po o polokalame o le TV e iai sauāga ogaoga ma feusuaʻiga lē mamā. Ae pe e tatou te manaʻomia moni se tulafono maʻoti e faasā ai le matamata i na mea? Ua tatou iloa le silafaga a Ieova i mataupu faapena. Ua taʻu saʻo mai i lana Afioga: “E inosia lava e [Ieova] le tagata e fiafia i le faasauā.” (Salamo 11:5) Ua toe faapea mai foʻi: “E faamasino e le Atua o ē e faitaaga.” (Eperu 13:4) O le manatunatu i na mau o le Tusi Paia, e tatou te malamalama lelei ai i le finagalo o Ieova. O lea la, tatou te filifili e aua neʻi matamata i ata matagā o mea e inosia e le Atua. Tatou te iloa e faafiafia ai Ieova pe a tatou ʻalofia amioga matagā o loo faaauiluma e lenei lalolagi o ni faafiafiaga lelei. *

10, 11. Aiseā e tatou te filifili ai e usiusitaʻi iā Ieova, ma e faapeʻī lo tatou usiusitaʻi iā te ia?

¹⁰ O le ā le māfuaaga autū e tatou te tausia ai poloaʻiga a le Atua? Aiseā e tatou te naunau ai e ola i aso faisoo e ōgatusa ma mea ua tatou iloa o le finagalo lea o le Atua? Tatou te lē filifilia lea ala e tau ina ia ʻalofia ai se faasalaga, pe e ʻalofia ai āuga leaga e oo i ē e lē amanaʻia le finagalo o le Atua. (Kalatia 6:7) Peitaʻi, e tatou te manatu i le usiusitaʻi iā Ieova, o se avanoa tāua lea e faaalia ai lo tatou alolofa iā te ia. E pei ona naunau se tamaitiiti ina ia faamalie lona tamā, e faapena foʻi ona tatou naunau ina ia maua le finagalo malie o Ieova. (Salamo 5:12) O ia o lo tatou Tamā, ma e tatou te alolofa iā te ia. E leai se isi mea e tatou te maua ai le fiafiaga sili pe e faamalieina ai foʻi i tatou, nai lo le iloa o loo tatou “maua le finagalo malie o Ieova” i le auala o loo tatou ola ai.​—Faataoto 12:2.

¹¹ O lea la, tatou te lē usiusitaʻi ma le musuā; pe e filifili  i mea e usiusitaʻi ai, pe e iai foʻi ni tuutuuga o lo tatou usiusitaʻi. * E tatou te lē filifili e faapea e pau le taimi e usiusitaʻi ai, pe a talafeagai ma i tatou, pe e lē faigatā foʻi mo i tatou. Nai lo lea, tatou te “usiusitaʻi ma o [tatou] loto.” (Roma 6:17) E pei o tatou faalogona o faalogona o le faisalamo i le Tusi Paia, o lē na tusi e faapea: “Ou te fiafia lava i au poloaʻiga ua ou naunau i ai.” (Salamo 119:47) Ioe, tatou te naunau e usiusitaʻi iā Ieova. E tatou te amanaʻia ua ono ma tatau iā Ieova lo tatou usiusitaʻi atoatoa e aunoa ma ni tuutuuga. (Teuteronome 12:32) E tatou te mananaʻo e fetalai Ieova e uiga iā i tatou, e pei o le tala a lana Afioga e uiga iā Noa. Ua faapea mai le Tusi Paia e faatatau i lenā augātamā faatuatua, o lē na faaalia lona alofa i le Atua e ala i lona usiusitaʻi mo le tele o tausaga: “Ua faia e Noa mea uma lava e pei ona poloaʻi mai ai le Atua iā te ia. Ua faapea lava ona ia faia.”​—Kenese 6:22.

12. E faapefea ona faafiafiaina le finagalo o Ieova i lo tatou usiusitaʻi?

¹² O ā faalogona o Ieova i lo tatou usiusitaʻi ma le loto? Ua fai mai le Tusi Paia e tatou te “faafiafia ai [lona] loto.” (Faataoto 27:11) Ae pe e fiafia moni lava le finagalo o le Alii Pule Silisili Ese i le aoao o mea, pe a tatou usiusitaʻi iā te ia? Ioe, ma e iai māfuaaga lelei e fiafia ai o ia! Na faia i tatou e Ieova o ni tagata saʻoloto. O lona uiga e iai lo tatou saʻolotoga e filifili ai; e mafai ona tatou filifili e usiusitaʻi i le Atua, ae e mafai foʻi ona tatou filifili ina ia lē usiusitaʻi iā te ia. (Teuteronome 30:15, 16, 19, 20) Pe afai la e tatou te filifili ma le loto e usiusitaʻi iā Ieova, ma e uunaʻia i tatou e filifili faapena ona o se loto ua tumu i le alofa i le Atua, e tatou te matuā faafiafiaina lo tatou Tamā  o i le lagi. (Faataoto 11:20) Ua tatou filifili foʻi le ala e sili ona lelei e ola ai.

13, 14. Aiseā e faapea atu ai ʻe lē mamafa poloaʻiga’ a le Atua, ma e faapefea ona faataʻitaʻia lenā mea?

¹³ Ua faailoa mai e le aposetolo o Ioane iā i tatou se mea e matuā faamāfanafanaina ai, e uiga i mea ua faafinagaloina e Ieova: “E lē mamafa ana poloaʻiga.” * Ua faapenei ona faitauina se isi faaliliuga o le Tusi Paia: “E tatou te lē mafatia i ana poloaʻiga.” (New English Translation) O mea e faafinagaloina e Ieova e lē faigatā naʻuā pe e mamafa foʻi. E lē faigatā ana tulafono, e lē faapea e lē mafai e tagata lē lelei atoatoa ona usiusitaʻi i ai.

¹⁴ Seʻi fai se faataʻitaʻiga o lenā mea. Ua talosaga atu se uō mamae iā te oe ina ia fesoasoani iā te ia e siitia atu i se isi nofoaga. E tele ni pusa e tatau ona aveina. O nisi o na pusa e māmā, e mafai e se tagata e toʻatasi ona ave, a o isi pusa e mamafa e manaʻomia ai ni tagata se toʻalua e siiina. E filifili e lau uō pusa e manaʻo e te aveina. Po o le a fai atu e te aveina ni pusa ua ia iloa e mamafa tele mo oe? E leai. E lē manaʻo o ia e te tigāina i le aveina o pusa na o oe. E faapena foʻi lo tatou Atua alofa ma le agalelei, e lē talosaga mai o ia ina ia tatou tausia ni poloaʻiga e matuā faigatā ona faatinoina. (Teuteronome 30:11-14) E lē taitai fai mai o ia ina ia tatou aveina se avega mamafa faapena. E malamalama Ieova i le mea e gata mai ai lo tatou malosi, auā “ua silafia lelei e ia le mea na faia ai i  tatou, ua ia manatua o le efuefu lava i tatou.”​—Salamo 103:14.

15. Aiseā tatou te mautinoa ai e matuā lelei poloaʻiga a Ieova mo i tatou?

¹⁵ E lē mamafa poloaʻiga a Ieova, ma e matuā lelei mo i tatou. (Faitau le Isaia 48:17.) O le mea lenā na fai atu ai Mose iā Isaraelu anamua: ʻNa poloaʻi mai Ieova iā i matou ia tausia nei tulafono uma, ia matataʻu foʻi iā Ieova lo tatou Atua mo lo tatou lelei i aso uma, ma ola ai pea e pei ona tatou ola i le asō.’ (Teuteronome 6:24) E mafai foʻi ona tatou mautinoa o lona tuuina mai o ana tulafono iā i tatou, e naunau o ia ina ia lelei ai i tatou, e mo lo tatou lelei e faavavau. O lona faanaunauga moni lenā! O Ieova o le Atua e ona le atamai uma. (Roma 11:33) O lea la, e silafia e ia le mea e sili ona lelei mo i tatou. O Ieova foʻi o le alofa lava ia. (1 Ioane 4:8) O le alofa o lona uiga sili lea, e taaʻina ai mea uma e fetalai ai o ia ma faia. O le faavae lea o poloaʻiga uma ua ia tuuina mai i ana auauna.

16. Aiseā e mafai ai ona tatou mulimuli i se ala usiusitaʻi e ui i taaʻiga a lenei lalolagi amioleaga ma tuʻinanauga o le tino lē lelei atoatoa?

¹⁶ E lē faapea ai la o le usiusitaʻi i le Atua o se ala faigofie e mulimuli ai. E tatau ona tatou tau faasaga i taaʻiga a lenei lalolagi amioleaga, o loo “nofo toʻilalo i le pule a lē o loo leaga.” (1 Ioane 5:19) E tatau foʻi ona tatou tauivi ma le tino lē lelei atoatoa, lea ua tatou maʻau ai i le solia o tulafono a le Atua. (Roma 7:21-25) Ae e mafai ona manumalo lo tatou alofa i le Atua. E faamanuia e Ieova i latou e mananaʻo e faamaonia lo latou alofa iā te ia i lo latou usiusitaʻi. E foaʻi mai e ia lona agaga paia “iā i latou e usiusitaʻi iā te ia, o le pule.” (Galuega 5:32) E faatupuina e lenā agaga le fua matagofie iā i tatou, o uiga tāua e mafai ona fesoasoani iā i tatou ina ia mulimuli i se ala usiusitaʻi.​—Kalatia 5:22, 23.

17, 18. (a) O ā mea o le a tatou iloiloina i lenei tusi, ma o le ā e tatau ona teu i o tatou mafaufau a o tatou faia faapea? (e) O le ā le mea o le a talanoaina i le mataupu e sosoo mai?

 ¹⁷ I lenei tusi, o le a tatou iloiloina ai mataupu silisili * ma tapulaa tau amio a Ieova ma le tele o isi faailoaga o lona finagalo. A o tatou iloiloina na mea, e manaʻomia ona tatou manatua le tele o mea tāua. Seʻi o tatou manatua e lē faamalosia e Ieova i tatou e usiusitaʻi i ana tulafono ma mataupu silisili; e finagalo o ia ina ia tatou usiusitaʻi mai i o tatou loto. Aua neʻi galo o loo talosaga mai Ieova ina ia tatou ola i se ala e maua ai le tele o faamanuiaga i le taimi nei, ma oo atu ai i le ola e faavavau i le lumanaʻi. Seʻi manatu i lo tatou usiusitaʻi ma le lotoatoa, o se avanoa tāua lea e faaali ai iā Ieova le tele o lo tatou alofa iā te ia.

¹⁸ Ua tuuina mai ma le alofa e Ieova iā i tatou le lotofuatiaifo, ina ia fesoasoani iā i tatou e iloa le saʻo ma le sesē. Ae ina ia avea o se taʻiala maufaatuatuaina, e manaʻomia ona aʻoaʻoina o tatou lotofuatiaifo, e pei o lea o le a talanoaina i le mataupu e sosoo mai.