1, 2. Aiseā e mafai ai ona faapea atu e lē o se mea fou i le tupu o Tavita le fetaia‘i ma faiga lē faamaoni?

 E LĒ o se mea fou i le tupu o Tavita le fetaia‘i ma faiga lē faamaoni. I se tasi taimi na fesaga‘i ai lana nofoaiga ma se taupulepulega, o tagata o lona lava nuu na faufau e tetee ane iā te ia. Na faalataina fo‘i Tavita e nisi o ē sa faapea o ni ana uō mamae. Se‘i manatu fo‘i iā Mekala, le ulua‘i avā a Tavita. I le taimi muamua, sa ‘manamea [pe alofa faamama‘i] o ia iā Tavita,’ ma e mautinoa sa ia lagolagoina tiutefai a Tavita i le avea ma tupu. Peita‘i, mulimuli ane, ona “‘ino‘ino lea o ia iā [Tavita] i lona loto,” na oo lava ina manatu o ia iā Tavita ‘e pei o sē ua valea.’—1 Samuelu 18:20; 2 Samuelu 6:16, 20.

² Ona iai lea o Aitofele, le faufautua sili a Tavita. Na matuā tāua lava ana fautuaga e peisea‘ī o ni fetalaiga tuusa‘o mai iā Ieova. (2 Samuelu 16:23) Peita‘i, o lenei tulafale o lē sa mua‘i maufaatuatuaina, na mulimuli ane avea o sē faalata ma auaufaatasi e fouvale mai iā Tavita. Ae o ai na faaosoa le faufauga? O Apisaloma, le atalii lava o Tavita! Na taumafai pea lenā tagata faufau leaga e ‘faaliliu loto o tagata o Isaraelu,’ i lona faatula‘i atu o ia e avea ma tupu. Na faifai tetele le fouvalega a Apisaloma, ma i‘u ai ina sola ese le tupu o Tavita mo le faasaoina o lona ola.—2 Samuelu 15:1-6, 12-17.

3. O le ā le lagona mautinoa sa iā Tavita?

³ Pe e le‘i iai lava se tasi na tumau ona faamaoni iā Tavita? I taimi uma lava o ona mafatiaga, sa iloa lelei e Tavita, e iai lava se tasi o loo faamaoni mai pea iā te ia. O ai? E na o Ieova le Atua. Na faapea mai Tavita e faatatau iā Ieova: “E te faamaoni i le tagata faamaoni.” (2 Samuelu 22:26, NWT) O le ā le alofa faamaoni, ma ua faapefea ona saunia e Ieova le faaa‘oa‘oga silisili o lenei uiga?

4, 5. (a) O le ā le “faamaoni”? (e) E faapefea i le uiga maufaatuatuaina o loo faaalia e mea e leai ni ola, ona ese mai le faamaoni lea e faaalia e se tagata?

⁴ O le upu “faamaoni” e pei ona faaaogā ai i Tusitusiga Eperu, o le uiga agalelei lea o loo faaali atu ma le alofa i se mea, ma e lē mafai ona toe suia se‘iloga ua faataunuu le fuafuaga na māfua ai ona faaali atu i lenā mea. O se tagata e faamaoni, e iā te ia uiga alofa. Se‘i mātau mai, o loo ta‘ua e le faisalamo le masina o “le molimau i le lagi e faamaoni lava,” ona e aliali mai pea i pō uma lava. (Salamo 89:37) O lona uiga, e mafai ona maufaatuatuaina le masina. Peita‘i e lē mafai e le masina ona faamaoni e pei ona faamaoni le tagata. Aiseā? Talu ai o le faamaoni o le tagata, o se faailoga lea o lona alofa—o se uiga e lē mafai e mea e leai ni ola ona faaalia.

⁵ I le uiga faale-Tusi Paia, o le faamaoni o se uiga e mātaulia i lagona alofa. O lona faaalia mai e faamaonia ai, o loo iai se faiā i le va o le tagata o loo faaalia lea uiga, ma lē o loo faaali atu i ai. O le ituaiga o faamaoni lenā e lē suia faafuase‘i. E lē pei lenā uiga o galu o le sami e fesoua‘iina solo pe a agi le matagi. Peita‘i, o loo iai i le faamaoni, se uiga mautū ma  se uiga malosi, lea e mafai ona fo‘ia ai e tusa lava po o ni to‘atugā mata‘utia.

6. (a) O le ā le tele o toe faaalia ai e tagata le faamaoni, ma ua faapefea ona faaalia mai lenei mea i le Tusi Paia? (e) O le ā le auala sili e iloa ai po o ā mea o loo patino i ai le faamaoni, ma aiseā?

⁶ O le mea moni, ua seāseā toe iai se faamaoni faapena i aso nei. Ua masani pea i le va o ni uō mamae, ona ‘i‘u ane ua tigāina le tasi i le isi.’ O loo tatou faalogo pea lava pea i nisi ua tia‘i e a latou paaga faaipoipo. (Faataoto 18:24; Malaki 2:14-16) Ua matuā taatele le taufaa‘ole‘ole, e i‘u ai lava ina tatou toe faaleo atu upu a le perofeta o Mika e faapea: ‘Ua fano lē ua faamaoni nai le nuu.’ (Mika 7:2) E ui ina tele taimi e lē faaalia ai e tagata le faamaoni, peita‘i o loo matilatila pea ona faaalia mai e Ieova lenā uiga tautele. O le auala sili lava e iloa ai po o ā mea o loo patino i ai le faamaoni, o le iloiloina lea o le auala o loo faaalia ai e Ieova lenei vala sili o lona alofa.

7, 8. E faapefea ona faapea atu, ua na o Ieova lava e faamaoni?

⁷ Ua faapea mai le Tusi Paia e uiga iā Ieova: “Ua na o oe lava e faamaoni.” (Faaaliga 15:4, NWT) E faapefea ona moni lenā manatu? Pe lē o faaalia ea fo‘i e tagata ma agelu le faamaoni i nisi taimi? (Iopu 1:1; Faaaliga 4:8) Ae faapefea Iesu Keriso? Pe lē o ia ea o ‘lē faamaoni’ sili a le Atua? (Salamo 16:10, NWT) E faapefea la ona faapea atu, ua na o Ieova lava e faamaoni?

⁸ Muamua lava, ia manatua o le faamaoni o se vala o le alofa. Talu ai “o le Atua, o le alofa lava ia”—o ia lava le faatinoga autū o lenei uiga—o ai la se isi e mafai ona sili atu ona atoatoa lona faaalia mai o le faamaoni na i lo Ieova? (1 Ioane 4:8) E mautinoa, e mafai e agelu ma tagata ona faaatagia maia uiga autū o le Atua, peita‘i ua na o Ieova lava e matuā silisili lona faaalia maia o le faamaoni. Ona o ia o “Lē ua mai anamuā ona aso,” ua sili atu ai ona umi se taimi o ia faaalia mai le faamaoni na i lo se isi lava foafoaga, i le lalolagi  pe i le lagi. (Tanielu 7:9) Ioe, ua matuā atoatoa iā Ieova le faatinoga o le faamaoni. E na te faaalia mai lenei uiga i se tulaga e lē taitai ona faatusatusa atu i ai foafoaga uma. Se‘i manatu i ni faaa‘oa‘oga.

9. Ua faapefea ona “faamaoni [Ieova] i ana mea uma lava na faia”?

⁹ E “alofa [pe faamaoni Ieova] i ana mea uma lava na faia.” (Salamo 145:17) I le ā le itu? O loo tali mai i ai le Salamo 136 (NWT). O loo ta‘u maia le tele o ni gaoioiga faasaoola a Ieova, e aofia ai le faasaoina mata‘ina o le fanauga a Isaraelu i le Sami Ulaula. O le itu e mata‘ina, ona o fuaiupu uma lava o lenei salamo ua faamamafa mai ai le fuaitau faapea: “E tumau e faavavau lona alofa faamaoni.” O loo aofia lenei salamo i “ Fesili e Mafaufau Loloto i Ai” i le itulau e 289. Pe a e faitauina na fuaiupu, e te matuā maofa ai i le tele o auala o loo faata‘ita‘ia mai ai e Ieova le alofa faamaoni i ona tagata. Ioe, e faaalia e Ieova le faamaoni i ana auauna faamaoni, e ala i lona faafofoga mai i a latou alaga mo se fesoasoani, ma gaoioi mai i lana taimi atofaina. (Salamo 34:6) E lē faalotolotolua le faamaoni o Ieova i ana auauna, pe afai e tumau pea ona latou faamaoni atu iā te ia.

10. Ua faapefea ona faata‘ita‘ia mai e Ieova lona faamaoni e tusa ai o ana tulafono?

¹⁰ E faaalia fo‘i e Ieova le faamaoni i ana auauna, e ala i lona tausisi pea i ana tulafono. E lē pei Ieova o nisi tagata femoumoua‘i, o ē fua a latou filifiliga i le po o le ā lava se mea e oso a‘e i le mafaufau, pe i lagona ootia. E lē faaluafesasi lana silafaga i le mea e sa‘o ma le mea e sesē. A o faagasolo le faitau afe o tausaga, o loo tumau pea ona inosia i lana silafaga faiga faataulāitu, le ifo i tupua, ma le fasioti tagata. Na ia fetalai e ala mai i lana perofeta o Isaia: “E oo ina e toeaina, o a‘u lava o ia.” (Isaia 46:4) O lea, e mafai ona tatou mautinoa o le a tatou maua manuia pe a usitaia ta‘iala manino i amioga tatau, na o loo maua i le Afioga a le Atua.—Isaia 48:17-19.

11. Ta‘u mai ni faaa‘oa‘oga e faaalia ai le tausisia pea e Ieova o ana folafolaga.

¹¹ E faaalia fo‘i e Ieova le faamaoni e ala i lona tausisia pea  o ana folafolaga. Pe a ia valoia maia se mea, e mautinoa lava e taunuu. Ua faapea ai ona fetalai mai Ieova: “[O] la‘u upu e alu atu ai lo‘u gutu, e lē fo‘i mai fua iā te a‘u; a e peita‘i e faia le mea ou te loto i ai, e manuia fo‘i i le mea ou te auina atu ai.” (Isaia 55:11) O le tausisia pea e Ieova o ana folafolaga, ua faaalia ai lona faamaoni i ana auauna. E na te lē faanofo tatalia i latou i se mea e na te lē o fuafua e fai. E matuā matilatila le talaaga o Ieova i lenei itu, o le māfuaaga lea na mafai ai e lana auauna o Iosua ona faapea mai: “E le‘i i‘uvale se upu i upu lelei uma na fetalai mai ai Ieova i le aiga o Isaraelu; ua taunuu uma lava.” (Iosua 21:45) O lea la, e tatou te mautinoa o le a lē taitai ona tatou faanoanoa, auā o le a faataunuu lava e Ieova ana folafolaga.—Isaia 49:23; Roma 5:5.

12, 13. O ā itu e tumau ai e faavavau le alofa faamaoni o Ieova?

¹² E pei ona mātauina i le taimi ua fano, o loo ta‘u mai e le Tusi Paia iā i tatou e faapea “e tumau e faavavau” le alofa faamaoni o Ieova. (Salamo 136:1, NWT) E faapefea? Talu ai, e tumau le faamagaloina e Ieova o agasala. E pei ona talanoaina i le Mataupu e 26, e lē toe lāgā maia e Ieova ni mea sesē na faia i taimi ua tuana‘i, lea ua uma ona faamagaloina. Talu ai “ua agasala tagata uma lava, ma ua lē oo i le mamalu o le Atua,” e tatau la ona tatou lotofaafetai ona e tumau e faavavau le alofa faamaoni o Ieova.—Roma 3:23.

¹³ Peita‘i e iai fo‘i se isi uiga e faasino atu i ai le tumau e faavavau o le alofa faamaoni o Ieova. Ua faapea mai lana Afioga, o le tagata amiotonu o le a “faapei o le laau ua totō i tafatafa ane o vaitafe, e fua mai ona fua i ona lava tau; e lē to‘ulu fo‘i ona lau; e manuia fo‘i mea uma na te faia.” (Salamo 1:3) Se‘i manatu i se laau o loo tupu lauolaola ma e lē taitai ona to‘ulu ona lau! E faapena fo‘i i tatou, pe afai tatou te naunau moni i le Afioga a le Atua, o le a faafualoaina o tatou ola, o le a filemu, ma fuatele mai. E faavavau faamanuiaga e faasafua mai ma le alofa e Ieova i ana auauna faamaoni. O le mea moni, i totonu o le lalolagi fou amiotonu o le  a aumaia e Ieova, o le a faavavau ona tofo tagata usiusitai i lona alofa faamaoni.—Faaaliga 21:3, 4.

14. Ua faaalia faapefea e Ieova lona talisapaia o le faamaoni o ana auauna?

¹⁴ Ua faaalia soo mai e Ieova lona faamaoni. E maumaua‘i pea Ieova i ana fuafuaga, o lea, e lē taitai ona mou ese lona faamaoni i ana auauna faamaoni. Na tusi le faisalamo: “Ua ou toeaina a‘u nei, sa a‘u taule‘ale‘a; a ou te le‘i iloa se tagata amiotonu na lafoa‘iina, po o ana fanau ua ‘aiisi i latou. Auā e fiafia Ieova i le faamasinoga, na te lē tuua fo‘i ona tagata amio Atua [“faamaoni,” NWT].” (Salamo 37:25, 28) Ua tatau ma onomea ona tatou tapua‘ia Ieova, auā o Ia o Lē na Foafoaina Mea. (Faaaliga 4:11) E ui i lea, o le faamaoni o Ieova, e na te faatāuaina ai pea a tatou galuega faamaoni.—Malaki 3:16, 17.

15. Faamatala pe faapefea i feutaga‘iga a Ieova ma le fanauga a Isaraelu ona faamatilatila ai lona faamaoni.

¹⁵ Ua fesoasoani mai le alofa faamaoni o Ieova i ana auauna i o latou mafatiaga. Ua ta‘u mai e le faisalamo iā i tatou: “O loo tausi e ia i agaga o ona tagata amio Atua [“faamaoni,” NWT]; na te lavea‘iina i latou ai lima o ē amio leaga.” (Salamo 97:10) Manatu fo‘i i ana feutaga‘iga ma le nuu o Isaraelu. Ina ua mavae le lavea‘iina faavavega o i latou mai le Sami Ulaula, ona alagaina ai lea e Isaraelu se pese iā Ieova: “O lou alofa faamaoni na e taʻitaʻia ai le nuu na e laveaʻiina.” (Esoto 15:13, NWT) E mautinoa lava o le faasaoina mai le Sami Ulaula, o se gaoioiga o le alofa faamaoni o Ieova. Ona faapea atu lea o Mose i le fanauga a Isaraelu: “E lē ona ua sili ona to‘atele outou i nuu uma na mana‘o ai Ieova iā te outou, ma na filifilia outou, auā na sili ona to‘aitiiti outou i nuu uma lava; a e peita‘i ona ua alofa lava Ieova iā te outou, ona o lona tausi fo‘i o le tautōga na ia tautō ai i o outou tamā, ua au mai ai outou e Ieova i le aao malosi, na ia faaolaina fo‘i oe ai le mea sa nofo pologa ai, ai le lima o Farao le tupu o Aikupito.”—Teuteronome 7:7, 8.

16, 17. (a) O le ā le uiga leaga na faaalia e le fanauga a Isaraelu, ae na faaalia faapefea e Ieova le mutimutivale o lona alofa iā i latou? (e) Na faaalia faapefea e le to‘atele o tagata Isaraelu ua “leai se fofō” mo i latou, ma o le ā le lapata‘iga mai lenei mea mo i tatou?

 ¹⁶ E le‘i talisapaia e le nuu o Isaraelu le alofa faamaoni o Ieova, auā ina ua uma ona lavea‘iina i latou, sa “faaopoopo ona toe agasala atu i latou ia [Ieova], i lo latou faaonoono i lē Silisili ese.” (Salamo 78:17) A o faagasolo taimi, sa latou fouvale pea, na tuua Ieova ae saga‘i atu i atua sesē ma faiga faapaupau. O le i‘uga, na o malaia na aumaia ai. Peita‘i, e le‘i suia ai lava e Ieova lana feagaiga na fai. Na i lo lea, na augani mai Ieova e auala i lana perofeta o Ieremia e faapea: “Isaraelu e, o lē ua fouvale, inā foʻi mai ia . . . ou te lē vaavaai ifo ma le ita iā te outou, auā ou te faamaoni lava.” (Ieremia 3:12, NWT) Ae pei ona mātauina i le Mataupu e 25, o le to‘atele o tagata Isaraelu sa lē manana‘o e fai ni suiga. O le mea moni, na “latou faatauemu i ē na aauina mai e le Atua, ma ua ‘ino‘ino i ana afioga, ma ua ula i ana perofeta.” O le ā le i‘uga? Na i‘u “ina tupu le to‘asa o Ieova i lona nuu, ua oo ina leai se fofō.”—2 Nofoaiga a Tupu 36:15, 16.

¹⁷ O le ā se lesona mo i tatou i lenei mea na tupu? Ua tatou a‘oa‘o mai ai, e lē tauaso ma e lē mafai fo‘i ona faavalea e se tasi le faamaoni o Ieova. O le mea moni, o Ieova e “tele le alofa ma le faamaoni,” ma e fiafia o ia e faaalia le alofa mutimutivale pe a iai se māfuaaga talafeagai. Ae faapefea pe afai ua faamaonia le matuā amioleaga lava o se tasi? O lona uiga, e tausisi pea Ieova i ana tulafono amiotonu, ma faaoo mai se faasalaga. E pei ona ta‘u atu iā Mose, “e lē faasaoina lava e [Ieova] o ē agasala.”—Esoto 34:6, 7.

18, 19. (a) Ua avea faapefea le faasalaina e Ieova o ē amioleaga, o se gaoioiga o le faamaoni? (e) O le ā le auala o le a faaalia ai e Ieova lona faamaoni i ana auauna o ē o loo sauāina se‘ia oo i le oti?

¹⁸ O le faasalaina e le Atua o ē amioleaga, o se gaoioiga fo‘i o le faamaoni. E faapefea? O se tasi o faamaoniga, o loo maua i le tusi o Faaaliga i faatonuga na foa‘i mai e Ieova i agelu e to‘afitu: “Ō ia, inā liligi atu ipu o le to‘asa o le Atua i  le lalolagi.” Ina ua liligi e le agelu lona tolu lana ipu “i vaitafe ma puna o vai,” ona liu toto ai lea o na vai. Ona faapea atu lea o le agelu iā Ieova: “Ua amiotonu oe, auā ua faapea ona e faasalaina, o lē soifua, o lē na soifua, o le Paia [“o lo tatou Atua faamaoni,” NWT]. Auā na latou faamaligiina le toto o tagata paia ma perofeta, i le ua e avatu ai iā te i latou le toto e inu ai; auā ua tatau lea mo i latou.”—Faaaliga 16:1-6.

¹⁹ Se‘i mātau, ina ua momoli atu lenā fe‘au o le faamasinoga, o loo ta‘ua ai e le agelu Ieova e faapea “o Lē faamaoni.” Aiseā? Auā o le faaumatiaina e Ieova o ē amioleaga, ua ia faaalia ai lona faamaoni i ana auauna, o le to‘atele o i latou o loo sauāina se‘ia oo i le oti. Ona o lona faamaoni, e mautinoa ai o loo manatua pea e Ieova i latou na ua maliliu. E faanaunau o ia e toe silasila mai i nei auauna faamaoni ua maliliu, ma ua faamautinoa mai e le Tusi Paia lana fuafuaga, ina ia tauia na auauna i le toetū. (Iopu 14:14, 15) E lē o galo iā Ieova ana auauna faamaoni e ui ua latou maliliu. Na i lo lea, “ua ola uma [i latou] iā te ia.” (Luka 20:37, 38) O le faamaoniga malosi o le faamaoni o Ieova, o lana fuafuaga lea ina ia toe faatutūina mai i latou uma o loo ia manatua.

20. O ai “ipu o le alofa,” ma ua faapefea ona faaalia le faamaoni o Ieova iā i latou?

²⁰ I le faagasologa o tausaga, ua faaalia ai e Ieova se faamaoni uigaese i tagata faamaoni. O le mea moni, ua faitau afe tausaga o ‘matuā faapalepale mai pea Ieova i ipu o le to‘asa ua faatatauina i le malaia.’ Aiseā? “E faailoa mai ai fo‘i le faula‘i o lona viiga i ipu o le alofa, na ia mua‘i saunia e oo i le manuia.” (Roma 9:22, 23) O nei “ipu o le alofa” o i latou ia ua saunia, o ē ua faauuina i le agaga paia e avea ma suli faatasi ma Keriso i lona Malo. (Mataio 19:28) E ala i le tatalaina o le ala mo le faaolataga mo nei ipu o le alofa, na faamaoni ai pea Ieova iā Aperaamo, o lē na ia folafola mai i ai lenei feagaiga: “O lau fanau fo‘i e manuia ai atu nuu uma lava o le lalolagi; auā ua e usiusitai i la‘u upu.”—Kenese 22:18.

21. (a) Ua faapefea ona faaalia mai e Ieova lona faamaoni i “le motu o tagata e to‘atele” o ē o loo faamoemoe e sao mai le “puapuaga tele”? (e) O le ā ua faagaeetia oe e fai ona o le faamaoni o Ieova?

 ²¹ E faapena fo‘i le faamaoni lea e faaalia e Ieova i “le motu o tagata e to‘atele” o ē o loo faamoemoe e sao mai “le puapuaga tele” ma ola ai e faavavau i se lalolagi parataiso. (Faaaliga 7:9, 10, 14) E ui ina lē lelei atoatoa ana auauna, ae o loo foa‘i mai pea ma le faamaoni e Ieova iā i latou le avanoa e ola ai e faavavau i se lalolagi parataiso. Ua faapefea ona ia faia lenā mea? E ala i le togiola—le faailoaga silisili o le faamaoni o Ieova. (Ioane 3:16; Roma 5:8) O le faamaoni o Ieova ua tosina mai ai ē o loo naunau o latou loto mo le amiotonu. (Ieremia 31:3) Pe e te lē lagona ea le vavalalata atu iā Ieova, ona o le tele o le faamaoni o loo ia faaali mai, ma o le a ia toe faaali mai fo‘i? Talu ai o lo tatou faanaunauga ina ia faalatalata atu i le Atua, o lea, se‘i o tatou tali atu i lona alofa, e ala i le faamausalī pea o la tatou filifiliga ia auauna iā te ia ma le faamaoni.