1-3. O ā nisi o vala ua lē taitai ai tutusa le maliu o Iesu i se isi lava maliu na iai?

 I SE aso o le tau e totogo ai mea i le toetoe 2,000 tausaga ua mavae, na faia ai le faamasinoga o se alii sa leai sana sala, na moliaina o ia i ni soligatulafono e na te leʻi faia ma sauāina seʻia maliu. E lē o se taimi muamua lenā ua faia ai ni faasalaga ogaoga ma le lē saʻo faapea; ae faanoanoa foʻi, ona e lē o se taimi mulimuli foʻi lenā. Peitaʻi, o lenā maliu sa lē tutusa lava ma se isi maliu.

² A o faasolo ifo pea mafatiaga o lenā alii i ona toe taimi mulimuli, na aliaʻi ai i le lagi se mea uigaese na faailogaina ai lenā mea na tupu. E ui o le tutonu o le lā lea na tupu ai, ae na faafuaseʻi lava ona ufitia le vaipanoa atoa i se pōuliuli. E pei ona faaupu ai e se tasi o tusitala, “ua faapōuliuliina foʻi le lā.” (Luka 23:44, 45) A o toetoe lava tō le mānava a lenei tagata, ae fetalai loa o ia i nei upu e lē mafaagaloina: “Ua taunuu!” O le mea moni lava, e ala i le faataulagaina o lona soifua, na ia faataunuuina ai se mea ofoofogia. O lana taulaga o le gaoioiga pito i sili lea o le alofa ua faatinoina e se tagata.—Ioane 15:13; 19:30.

³ E mautinoa, o lenā alii, o Iesu Keriso lea. Ua lauiloa ona puapuaga ma lona maliu i lenā aso faanoanoa, iā Nisani 14, 33 T.A. Ae peitaʻi, o loo masani pea ona galo le mea moni e sili ona tāua. E ui i le ogaoga o puapuaga o Iesu, ae e iai se tasi na sili atu ai ona ogaoga ona mafatiaga. O le mea moni, e iai se isi na ia faia se taulaga e sili atu ona telē i lenā aso—se gaoioiga silisili o le alofa sa leʻi faia muamua e se isi lava i le lagi ma le lalolagi. O le ā lenā gaoioiga? O le tali i ai, e saunia ai se faatomuaga fetaui i le mataupu e silisili ona tāua i mataupu uma lava: le alofa o Ieova.

4. Na faapefea ona iloa e se fitafita Roma faapea o Iesu sa lē pei o isi tagata, ma o le ā le faaiʻuga na faia ai e le fitafita?

⁴ Sa matuā faateʻia se taʻitaʻiʻau Roma na vaavaaia le faasalaina i le oti o Iesu, e lē gata i le pouliuli lea na iai a o leʻi maliu, ae faapena foʻi i le mafuiʻe mataʻutia na sosoo ane ina ua maliu. Na ia faapea mai: “E moni, o le Alo lava lenei o le Atua.” (Mataio 27:54) E manino mai e leʻi pei Iesu o isi tagata. O lea sa fesoasoani lenā fitafita i le fasiotia o le Alo pele e toʻatasi o le Atua e Silisili Ese! Ae o le ā le tele o le alofa o le Tamā mo lenei Alo?

5. E fia tausaga na faatasi ai le Alo ma lona Tamā i le lagi a o leʻi maliu mai i le lalolagi?

⁵ O loo taʻua e le Tusi Paia Iesu “o le ulumatua o mea uma lava ua faia.” (Kolose 1:15) Seʻi manatu—sa muaʻi soifua le Alo o le Atua a o leʻi faia le vateatea aoao. O le ā la le umi na iai faatasi le Tamā ma le Alo? E tau fuafua e nisi saienitisi faapea ua tusa ma le 13 piliona tausaga talu ona iai le vateatea aoao o mea. Faamata e mafai ona e malamalama i lenā vaitaimi umi? Peitaʻi, e tusa lava pe saʻo lenei fuafaatatau, ae o lenā 13 piliona tausaga o le a lē lava lona umi pe a faatusa atu i le umi na soifua ai le Alo o Ieova! O ā la ni galuega sa ia faia i lenā taimi atoa?

6. (a) O ā mea sa faia e le Alo o Ieova i le taimi atoa sa muaʻi soifua ai o ia a o leʻi avea ma tagata? (e) O le ā le ituaiga o fusi o loo iai i le va o Ieova ma lona Alo?

⁶ Sa auauna fiafia le Alo e fai ma “tufuga” a lona Tamā. (Faataoto 8:30) Fai mai le Tusi Paia: “E leai foʻi se mea e tasi na faia e leʻi faia e [le Alo].” (Ioane 1:3) Na galulue faatasi la Ieova ma lona Alo e faia uma isi mea. Maʻeu ni taimi fiafia sa la mauaina faatasi! E toʻatele tagata o le a ioe mai faapea, e malosi tele le alofa e iai i le va o se matua ma sana tama. O le alofa foʻi “o le fusi lea e atoatoa ona lelei ai.” (Kolose 3:14) O ai la se isi o i tatou e mafai ona malamalama i le malosi o le fusi lea sa iai i lenā taimi sili ona umi? E manino lava, ua autasia Ieova le Atua ma lona Alo i le fusi e sili ona malosi o le alofa, lea e leʻi iai muamua lava.

7. Ina ua papatiso Iesu, na faapefea ona faaalia mai e Ieova ona faalogona e faatatau i lona Alo?

⁷ E ui i lea, na aauina mai e le Tamā lona Alo i le lalolagi ina ia  soifua mai o se pepe. Ina ia faataunuu lea fuafuaga, sa tatau ai iā Ieova ona motusia mo le faitau sefulu o tausaga, se la faatasiga māfana ma lona Alo pele sa iai i le lagi. Sa ia naunau lava e silasila mai le lagi a o tuputupu aʻe Iesu e avea o se tagata lelei atoatoa. I le pe tusa o le 30 tausaga o lona matua, na papatisoina ai Iesu. E tatou te lē taumateina po o ā faalogona o Ieova na iai e faatatau i lona Alo. Sa fetalai mai le Tamā lava ia mai le lagi e faapea: “O loʻu Atalii pele lenā, ua ou fiafia lava iā te ia.” (Mataio 3:17) Talu ai sa faia ma le faamaoni e Iesu mea uma lava na valoia po o mea uma na faatalitalia o ia e fai, e lē taumatea la sa matuā faafiafiaina le finagalo o lona Tamā!—Ioane 5:36; 17:4.

8, 9. (a) O le ā na fesagaʻi ma Iesu iā Nisani 14, 33 T.A., ma na faapefea ona aafia ai lona Tamā faalelagi? (e) Aiseā na faataga ai e Ieova lona Alo ina ia faapuapuagatia ma oo i le maliu?

⁸ Peitaʻi, sa faapeʻī faalogona o Ieova iā Nisani 14, 33 T.A.? Na faapeʻī ona faalogona ina ua faalataina Iesu, puʻea o ia e se motu o tagata i le pō, tuua e ana uō ma molia i se faamasinoga lē tonu? Ae faapeʻī le taimi na amusia ai o ia, tuufeanu i ai, taufaituʻi i ai ma sasaina faamoʻamoʻa lea sa ali mai ai aano o lona papatua? O ā lagona o lona Tamā ina ua tutuʻiina i fao lima ma vae o Iesu i se laau ma faatautau ai a o tauemu atu i ai tagata ma faafofogaina alaga tigā a lona Alo pele? Na faapeʻī lagona o Ieova ina ua tō le mānava a lona Alo pele ma toesea o ia mo le uluaʻi taimi talu mai le amataga o le foafoaga?—Mataio 26:14-16, 46, 47, 56, 59, 67; 27:38-44, 46; Ioane 19:1.

⁹ E leai se faamatalaga e mafai ona tatou faia. Talu ai o Ieova e iai ona faalogona, e matuā lē mafai lava la e a tatou upu ona faamatala le matuitui o tigā na mafatia ai o ia i le maliu o lona Alo. O le mea e mafai ona faamatalaina, o le māfuaaga na faatagaina ai e Ieova lenei mea ina ia tupu. Aiseā na faatigāina ai le Tamā i na faalogona? O loo faaali mai e Ieova iā i tatou se mea ofoofogia i le Ioane 3:16—o se fuaiupu o le Tusi Paia ua avea ma aotelega o tusi uma o le Evagelia. Ua faapea mai: “Ua faapea lava ona alofa mai o le Atua i le lalolagi, ua ia au mai ai lona Atalii e toʻatasi, ina ia lē fano se tasi e faatuatua iā te ia, a ia maua e ia le ola faavavau.” O le māfuaaga la a Ieova e aotele uma i le upu  lenei: o le alofa. O le meaalofa a Ieova—le aauina mai o lona Alo ina ia puapuagatia ma maliu mo i tatou—o le gaoioiga pito sili lea o le alofa ua mafai ona faaalia.

10. O le ā le manaʻoga o iai i tagata, ma o le ā ua tupu i le uiga o le upu o le “alofa”?

¹⁰ O le ā le uiga o lenei upu o le “alofa”? Ua faamatalaina le alofa faapea, o le manaʻoga silisili lea o loo iai i tagata. Mai lava i le fanau mai seʻia oo i le taimi e maliu ai, e tauivi pea tagata ina ia maua le alofa. E latou te olioli i le māfana o lea uiga, e oo lava foʻi ina vaivai ma feoti ai pe a lē mauaina. E ui i lea, e fai lava sina faigatā ona faamatalaina lea uiga. O le mea moni, e talanoa soo tagata e uiga i le alofa. Ua lē masino le tele o tusi, o pese, ma solo ua fatuina i le alofa. Ae lē o mafai lava ona faamanino mai ai le uiga o le alofa. E mautinoa ua soona faaaogā solo le upu, lea ua foliga mai ua matuā mou atu ai lona uiga moni lava.

11, 12. (a) O fea e mafai ona tatou aʻoaʻoina ai le tele o mea e faatatau i le alofa, ma aiseā ua maua ai i inā? (e) O ā ituaiga o alofa sa faamaʻoti mai i le gagana a Eleni anamua, ma o le ā le upu mo le “alofa” lea o loo tele ina faaaogā i Tusitusiga Eleni? (Tagaʻi foʻi i le faaopoopoga.) (i) O le ā e masani ona faasino atu i ai le upu a·gaʹpe i le Tusi Paia?

¹¹ Peitaʻi, o loo manino lava le aʻoaʻoina mai e le Tusi Paia o le uiga o le alofa. Ua taʻua i le Expository Dictionary of New Testament Words a Vine e faapea: “E faatoʻā iloa lava le alofa i gaoioiga o loo mapuna mai ai.” Ua tatou aʻoaʻoina le tele o mea e faatatau i le alofa o Ieova mai tala o loo i le Tusi Paia e faatatau i ana gaoioiga, o ona faalogona alofa lea mo ana foafoaga ola. Mo se faaaʻoaʻoga, o le ā se isi mea e sili atu ona faaalia mai i lenei uiga na i lo le gaoioiga silisili lava ia a Ieova o lona alofa lea na faamatalaina i le amataga o lenei mataupu? I mataupu o loo sosoo mai, o le a tatou iloa ai le tele o isi faaaʻoaʻoga o le alofa o Ieova o loo faaalia mai i ana gaoioiga. E lē gata i lea, e mafai ona tatou maua sina malamalamaga mai uluaʻi upu sa faaaogā i le Tusi Paia mo le “alofa.” I le gagana Eleni i aso anamua, e fā upu sa faaaogā ai  mo le “alofa.” a Mai nei upu e fā, o le upu ua sili ona faaaogā soo i Tusitusiga Eleni, o le upu a·gaʹpe. O loo taʻua i se tasi lomifefiloi o le Tusi Paia lenei upu faapea “o le upu sili lea ona malosi e mafai ona faatatau atu i le alofa.” Aiseā?

¹² E pei ona faaaogā i le Tusi Paia, o le a·gaʹpe e masani ona faasino atu i le alofa lea e taʻitaʻia e mataupu silisili. O lona uiga e sili atu na i lo na o se tali atu tau faalogona i le isi tagata. E lautele atu lona uiga, e faapogaia ai mafaufauga loloto ma gaoioi i se auala talafeagai. Ae laualuga i mea uma, o le alofa faa-Kerisiano e matuā lē manatu faapito. Seʻi toe tagaʻi foʻi i le Ioane 3:16. O le ā “le lalolagi” lea ua matuā alofa i ai le Atua ma foaʻiina mai i ai lona Alo pele e toʻatasi? O tagata i le lalolagi e mafai ona faaolaina. E aofia ai le toʻatele o tagata o loo ola pea i ni olaga agasala. Pe alofa mai ea Ieova i tagata taʻitoʻatasi e pei o ni ana uō mamae, e pei o le auala na ia alofa ai i lana auauna faamaoni o Aperaamo? (Iakopo 2:23) E leai, peitaʻi ua faaalia mai ma le alofa e Ieova lona agalelei i tagata uma lava, e ui i le tele o mafatiaga na oo iā te ia. O lona finagalo ina ia salamō tagata uma ma suia a latou amio. (2 Peteru 3:9) E toʻatele tagata ua latou faia lenā mea. E fiafia o ia e taʻua i latou na o ana uō.

13, 14. O le ā e faaalia ai o le alofa faa-Kerisiano e masani ona aofia ai faalogona māfana?

¹³ Peitaʻi, e iai nisi o loo sesē o latou manatu i le faauigaina e le Tusi Paia o le a·gaʹpe. E iai lo latou manatu faapea, o se ituaiga o alofa e lē māfana, e lē māfua mai i le loto. O le mea moni lava, o le alofa faa-Kerisiano e masani ona aofia ai ni lagona māfana totino. Mo se faaaʻoaʻoga, ina ua tusia e Ioane “E alofa le Tamā i le Alo” na ia faaaogā se upu e maua mai i le upu a·gaʹpe. Po o lona uiga ea e leai se lagona māfana i lenā alofa? E leai. I le Ioane  5:20 i le uluaʻi gagana, na faaaogā ai e Iesu se upu e maua mai le upu phi·leʹo (lagona māfana). (Ioane 3:35) E masani ona aofia i le alofa o Ieova le lagona māfana. Peitaʻi, e lē taitai ona taaʻina lona alofa i ni faalogona alofa valea. E taʻitaʻia pea i mataupu silisili atamai ma le tonu.

¹⁴ E pei ona tatou iloa, o uiga uma lava o Ieova, e silisili, e lelei atoatoa, ma mananaia. Ae silisili ai lava ona manaia le uiga lea o le alofa. E leai se isi mea e sili atu ona tatou tosina ai iā Ieova na i lo lona alofa. O le alofa, o lona uiga autū foʻi lea. E faapefea ona tatou iloa?

15. O le ā le faamatalaga o loo taʻua e le Tusi Paia e faatatau i le uiga o Ieova o le alofa, ma o le ā le itu ua tutasi ai lenei faamatalaga? (Tagaʻi i le faaopoopoga.)

¹⁵ Ua taʻua e le Tusi Paia se faamatalaga e faatatau i le alofa, lea e lē o faia lava e faatatau i isi uiga autū o Ieova. E lē o faapea mai le Tusi Paia o le Atua o le mana lava ia, pe faapea o le Atua o le faamasinotonu pe faapea foʻi, o le Atua o le atamai lava o ia. O loo iai iā Ieova nei uiga e tolu, o ia foʻi le Puna o na uiga ma e lē mafaatusalia i ai o ia. Peitaʻi, e tusa ai o le uiga lona fā, e iai se isi mea e sili atu ona mataʻina: “O le Atua, o le alofa lava ia.” b (1 Ioane 4:8) O le ā le uiga o lenā faamatalaga?

16-18. (a) Aiseā ua faapea mai ai le Tusi Paia, “O le Atua, o le alofa lava ia”? (e) Mai foafoaga uma o loo iai i le lalolagi, aiseā ua fetaui ai ona avea le tagata e fai ma faailoga o le uiga o Ieova o le alofa?

¹⁶ “O le Atua, o le alofa lava ia” ua lē o se faaupuga e fai ane ai, e peiseaʻī o loo faapea atu, “e tutusa le Atua ma le alofa.” E lē mafai ona tatou toe fesuiaʻia lenā faamatalaga ma faapea atu “o  le alofa, o le Atua lava ia.” E tele atu isi mea e faatatau iā Ieova na i lo na o se uiga e lē faigofie ona malamalama i ai. E anoanoaʻi ona faalogona ma ona uiga loloto e faaopoopo atu i le alofa. Peitaʻi, e sili ona laualuga le alofa i na uiga uma o Ieova. Ua faapea mai se tasi tusi e faatatau i lenei fuaiupu: “O le uiga moni o le Atua, o le alofa.” I se tulaga lautele, atonu tatou te manatu iā te ia faapenei: O le mana o Ieova ua mafai ai ona gaoioi o ia. O lona faamasinotonu ma lona atamai e taʻitaʻia ai le auala o loo gaoioi ai o ia. Peitaʻi o le alofa o Ieova e uunaʻia ai o ia e gaoioi ma e iai i mea uma o loo ia faatinoina ai isi ona uiga.

¹⁷ Ua masani ona faapea atu, o Ieova o le faatinoga moni lava lea o le alofa. O lea la, afai tatou te fia malamalama atili i le alofa e taʻitaʻia e mataupu silisili, e tatau ona tatou aʻoaʻoina muamua mea e faatatau iā Ieova. O le mea moni, e mafai foʻi ona tatou iloa atu lenei uiga matagofie i tagata. Ae aiseā ua māfua ai ona iā i latou lenā uiga? I le taimi o le foafoaga, e foliga mai na fetalai atu ai e Ieova nei upu i lona Alo e faapea: “Seʻi o ta faia le tagata i lo taʻua faatusa ia pei o i taʻua.” (Kenese 1:26, NWT) Mai foafoaga uma lava o loo iai i lenei lalolagi, e na o tane lava ma fafine e mafai ona filifili e alolofa atu ma i lenei auala ua latou faataʻitaʻi atu ai i lo latou Tamā faalelagi. Manatua, na faaaogā e Ieova manu eseese e fai ma faailoga o ona uiga autū. Peitaʻi, na filifilia e Ieova lana foafoaga silisili o i le lalolagi, o le tagata lea, e fai ma faailoga o Lona lava uiga autū, o le alofa.—Esekielu 1:10.

¹⁸ Pe a tatou alolofa atu i se auala lē manatu faapito, e faavae i mataupu silisili, o lona uiga ua tatou faaatagia atu ai le uiga autū o Ieova. E pei ona tusi mai le aposetolo o Ioane e faapea: “O i tatou, ua tatou alolofa, auā na ia muaʻi alofa mai iā te i tatou.” (1 Ioane 4:19) Ae i ā auala na muaʻi alofa mai ai Ieova iā i tatou?

19. Aiseā e mafai ai ona faapea atu, sa iai se vaega tele a le alofa i galuega o le foafoaga a Ieova?

¹⁹ E lē fou le alofa. Manatua, o le ā na uunaʻia ai Ieova e amata ona foafoaina mea? E lē faapea sa mafatia o ia i se lagona tuua toʻatasi ma ia manaʻomia ai se tasi la te auaumea faatasi. E atoatoa mea uma iā Ieova ma e leai se mea e oge ai o ia, e na te  lē manaʻomia se tasi e foaʻi maia ni mea. Peitaʻi o lona alofa, o se uiga e olaola, e masani lava ona uunaʻia ai o ia e fia faasoa atu le olioli o le olaga i ana foafoaga atamamai o ē mafai ona latou talisapaia lenā meaalofa. “O le amataga o mea na faia e le Atua” o lona Alo pele e toʻatasi. (Faaaliga 3:14) Ona faaaogā ai lea e Ieova lenei Matai Tufuga na te faia isi mea uma e pei ona iai nei, e amata mai lava i agelu. (Iopu 38:4, 7; Kolose 1:16) Ona sa foaʻi atu i ai le saʻolotoga, le atamai, ma faalogona, na maua ai e nei foafoaga agaga malolosi le avanoa e atiina aʻe ai ni a latou lava faiā vavalalata—o le tasi ma le isi, aemaise le faiā ma Ieova le Atua. (2 Korinito 3:17) O lea, ua latou alolofa ai, ona sa muaʻi alofagia foʻi i latou.

20, 21. O ā mea na iloa e Atamu ma Eva e la te mautinoa ai e alofa Ieova iā i laʻua, peitaʻi na faapefea ona la tali atu i ai?

²⁰ E faapena foʻi le tulaga o tagata. Mai lava i le amataga, na mautinoa le matuā alofagia o Atamu ma Eva. So o se mea lava na la vaavaai atu i ai i totonu o la aiga Parataiso i Etena, sa mafai ona la vaaia ai faamaoniga o le alofa o le Tamā iā i laʻua. Mātau mai foʻi le faamatalaga a le Tusi Paia: “Ua faia foʻi e Ieova le Atua o le faatoʻaga i Etena i sasaʻe; ona ia tuuina lea i lea mea o le tagata na na faia.” (Kenese 2:8) Pe na e iai ea i totonu o se faatoʻaga po o se paka matagofie? Po o le ā le mea na sili ona e fiafia i ai? Po o le malamalama o loo faasolo ona sulugia atu ai lau o laau o loo i se nofoaga paolo? Po o le felanulanuaʻi solo mai o le matalasi o lanu o fugalaau? Ae ā le paʻōʻō mai o le tafe o se vaitafe, le tausani a manufelelei, ma le fetagisi o iniseti ninii? Ae faapefea le sasala mai o le manogi manaia o laau, o fua o laau ʻaina suamalie, ma fugalaau? Po o le ā lava lenā matalasi, ae leai se faatoʻaga i aso nei e mafai ona faatusatusa atu i le faatoʻaga i Etena. Aiseā?

²¹ O Ieova lava ia na totōina lenā faatoʻaga! Atonu sa matuā uigaese le matagofie. Na maua uma ai lava i inā so o se laau sa matagofie i le vaai, po o so o se laau ʻaina e iai fua suamalie. Na lelei ona faasūsūina le faatoʻaga, sa telē le avanoa, ma faaauleleiina atili i le anoanoaʻi o manuvaefa eseese. Na maua e Atamu ma Eva mea uma lava ina ia faafiafiaina ma faamalieina ai o la  olaga, e aofia ai galuega faamalieloto ma se faauōga lelei atoatoa. Na muaʻi alofa mai Ieova iā i laʻua ma sa tatau ona la toe alolofa atu iā te ia. Peitaʻi, la te leʻi faia faapea. Na i lo o le usiusitai ma le alofa atu i lo la Tamā faalelagi, sa la fouvale ma le manatu faapito iā te ia.—Kenese, mataupu 2.

22. Na faapefea i le tali mai a Ieova i le fouvalega lea na tupu i Etena ona faamaonia ai, e faamaoni lona alofa?

²² Pagā se lagona tigā na oo iā Ieova! Ae pe na avea lenā fouvalega ma itu e liliu ai lona finagalo alofa? E leai! “E faavavau lava lona alofa [“alofa faamaoni,” NWT].” (Salamo 136:1) O lea, na ia fuafuaina loa e faia ni sauniuniga alofa mo le togiolaina o fanau a Atamu ma Eva ua tatau i ai. E pei ona tatou iloa, o na sauniuniga sa aofia ai le taulaga togiola a lona Alo pele, lea sa matuā mafatia ai le Tamā.—1 Ioane 4:10.

23. O le ā se tasi o māfuaaga ua taʻua ai Ieova o “le Atua fiafia,” ma o le ā le fesili matuā tāua o le a talanoaina i le mataupu o loo sosoo mai?

²³ Ioe, mai lava i le amataga, o loo tausolomua pea Ieova i le faaalia mai o le alofa i le fanau a tagata. E lē mafaitaulia auala ua ʻmuaʻi alofa mai ai o ia iā te i tatou.’ O le alofa e aumaia le autasi ma le olioli, e lētioa lava la faamatalaina Ieova e faapea o ia o “le Atua manuia.” (1 Timoteo 1:11) Ae peitaʻi, ua lāgā se fesili tāua. Pe alofa moni ea Ieova iā i tatou taʻitoʻatasi? O le a talanoaina lenā fesili i le mataupu o loo sosoo mai.