1, 2. O le ā le fuafuaga a Ieova mo le aso lona fitu, ma na faapefea ona tofotofoina ai lona atamai i le amataga o lenā aso?

 UA FAALEAGAINA! O le tagata, le tumutumuga sili o le aso lona ono o le foafoaga, ua faafuaseʻi lava ona paʻū mai le tulaga maualuga na iai, i se tulaga e sili ona faatauvaa. Sa folafola mai e Ieova le “matuā lelei lava” o “mea uma ua na faia,” e aofia ai ma le tagata. (Kenese 1:31) Peitaʻi i le amataga o le aso lona fitu, na filifili ai Atamu ma Eva e mulimuli iā Satani i le faia o se fouvalega. Ona la malaia ai lea i le agasala, le lē lelei atoatoa, ma le oti.

² I le mātau atu i ai, e foliga ua faaleagaina le fuafuaga a Ieova mo le aso lona fitu. O lenā aso, e pei o le aso lona ono lea sa faatoʻā mavae atu, e faitau afe tausaga lona umi. Ua uma ona faapaiaina e Ieova lea aso ma o le a faasolo ina avea ai le lalolagi atoa ma parataiso e faatumulia i tagata lelei atoatoa. (Kenese 1:28; 2:3) Peitaʻi ina ua tupu le fouvalega mataʻutia, o le a faapefea la ona toe mafai ona faia se mea faapena? O le ā o le a faia e le Atua? O se tofotofoga lenei o le atamai o Ieova—atonu o le tofotofoga silisili lava lea.

3, 4. (a) Aiseā ua avea ai le gaoioiga a Ieova i le fouvalega lea na tupu i Etena, o se faaaʻoaʻoga e matuā maofa ai o lona atamai? (e) O le ā le upu moni e tatau i lo tatou lotomaulalo ona uunaʻia ai i tatou e manatua, a o suʻesuʻeina le atamai o Ieova?

³ Na vave ona gaoioi mai Ieova. Sa ia faasilasila mai le faasalaga o le ʻaufouvale i Etena, ma i lea lava taimi, na ia tau faaataata mai ai se mea ofoofogia: o lana fuafuaga ina ia aveesea faiga leaga ua amata ona iai i lenā taimi. (Kenese 3:15) Na amata le fuafuaga mamao a Ieova mai Etena ma faasolo mai ai i le faitau afe o tausaga o le talafaasolopito o tagata ma o le a agaʻi mamao atu i le lumanaʻi. O lenei fuafuaga e faamalamalama gofie, ae ona e loloto foʻi e mafai ona faafiafiaina ai se tagata  faitau o le Tusi Paia a o faaaluina se taimi umi e suʻesuʻe ma mafaufau i ai. E lē gata i lea, o le fuafuaga a Ieova e matuā mautinoa lava lona taulau manuia. O le a faaiʻu ai amioga leaga uma, le agasala, ma le oti. O le a faaoo atu ai le tulaga lelei atoatoa i tagata faamaoni. E faataunuuina nei mea uma a o leʻi iʻu le aso lona fitu, ina ia mafai ai e Ieova i le taimi tonu ua ia faatulagaina, ona faataunuu lana fuafuaga mo le lalolagi ma tagata!

⁴ O se atamai e matuā maofa ai lava, a ea? Na faagaeeina Paulo e tusi mai: ʻMaʻeu le tele o le atamai o le Atua!’ a (Roma 11:33, NWT) A o tatou suʻesuʻeina vala eseese o lenei uiga tauatua, e uunaʻia ai i tatou e le lotomaulalo e manatua se upu moni e matuā tāua lava—e faapea, e na o sina vaega o le atamai uigaese o Ieova e mafai ona oo i ai so tatou iloa. (Iopu 26:14) Muamua, seʻi o tatou faamatalaina lenei tomai e sili ona ofoofogia.

5, 6. O le ā le fesootaʻiga a le iloa ma le atamai, ma o le ā le tele o mea ua silafia e Ieova?

⁵ E lē tutusa le atamai ma le iloa. E mafai e komepiuta ona teuina se aofaʻiga tele o faamatalaga mai mea ua iloa e tagata, ae lē taitai ona taʻua na masini faapea e atamamai. Peitaʻi, e iai le fesootaʻiga a le iloa ma le atamai. (Faataoto 10:14) Mo se faataʻitaʻiga, pe afai e te manaʻomia ni fautuaga atamai i le auala e togafitia ai se maʻi matuiā, po o le a e faafesootaʻia ea se tasi e itiiti pe leai foʻi sona iloa i faiga faafomaʻi? E leai! E manaʻomia tele la le iai o se iloa lelei ina ia maua ai le atamai moni.

⁶ E leai se mutaaga o le tele o mea ua silafia e Ieova. Ona o ia o “Le Tupu o augātupulaga,” ua na o ia lava la e soifua pea e faavavau. (Faaaliga 15:3, LF) A o faagasolo mai na tausaga e lē mafaitaulia, o loo silafia ai pea e ia mea uma lava. Ua faapea mai le Tusi Paia: “E lē lilo foʻi se tasi mea na faia i ona luma, a  ua taatia fua ma ua aliali mai o mea uma lava i lana silafaga, tatou te taʻu atu iā te ia a tatou amio.” (Eperu 4:13; Faataoto 15:3) Ona o ia o Lē na Foafoaina Mea, ua malamalama atoatoa ai foʻi Ieova i mea ua ia faia, ma o loo ia mātauina mea uma o loo fai e tagata mai lava i le amataga. E na te silafiaina loto o tagata taʻitoʻatasi, ma e leai se mea e lilo i lana silafaga. (1 Nofoaiga a Tupu 28:9) Talu ai sa ia foafoaina i tatou o nisi e iai le filifiliga saʻoloto, ua fiafia ai lona finagalo pe a silasila mai o loo tatou faia ni filifiliga atamai i le olaga. Ona o ia o le “faafofoga tatalo,” e faafofoga mai o ia i le tele o tatalo i le taimi e tasi! (Salamo 65:2) E mautinoa le matuā atoatoa o le manatuaina e Ieova o mea uma.

7, 8. Ua faapefea ona faaalia e Ieova lona malamalama, lona faautauta, ma lona atamai?

⁷ E iai foʻi ma isi tomai o Ieova. E na te silafia foʻi le auala e fesootaʻi ai mea moni, ma silafia le ata atoa lea e fafau aʻe ai le anoanoaʻi o mea taʻitasi. E na te iloiloina totoʻa mea ma faia faaiʻuga e faaeseese ai le lelei mai le leaga, le mea tāua mai le mea e lē tāua tele. E ati lana silafaga i tua atu o foliga mai luma, ma e silasila o ia i le loto. (1 Samuelu 16:7) O lea la, ua iai iā Ieova le malamalama ma le faautauta, o uiga na e sili atu na i lo le iloa. Peitaʻi e silisili ai lava le atamai i le faasologa o na tomai uma.

⁸ O le atamai, o lona uiga o le faatatauina lea o le iloa, le faautauta, ma le malamalama, ina ia mafai ona iʻu i ni āuga lelei. O le mea moni, o nisi o upu mai le uluaʻi gagana na tusia ai le Tusi Paia, lea ua faaliliuina i le “atamai,” o lona uiga moni lava o le “galue ina ia iai ni iʻuga aogā” po o le “atamai faatino.” O le atamai la o Ieova, ua lē na o se mea e tau ina avane ai, ae e mafai ona faatinoina, ma e aogā. I le faatinoina o le lautele o lona silafia ma le loloto o lona malamalama, e faia pea e Ieova ni filifiliga e sili ona lelei, ma faatino na filifiliga i se auala e lelei atoatoa. O le atamai moni lenā! Ua faaalia mai ai e Ieova le moni o le fetalaiga a Iesu: “E taʻuamiotonuina le poto i ana galuega.” (Mataio 11:19) O galuega a Ieova i le lagi ma le lalolagi o se molimau malosi lenā iā i tatou o lona atamai.

9, 10. (a) O le ā le ituaiga o atamai ua faataʻitaʻia mai e Ieova, ma ua faapefea ona ia faaalia? (e) E faapefea ona faamaonia mai i le sela le atamai o Ieova?

⁹ Po ua e maofa ea i le atamai o se tufuga, ona o le mananaia o mea o loo ia faia? O se ituaiga o atamai lenā e matuā maofa ai. (Esoto 31:1-3) O Ieova lava ia, o le Puna ma o Lē e ana lenā atamai. Na faapea mai le tupu o Tavita e uiga iā Ieova: “Ou te vivii atu iā te oe, auā na faia aʻu e ala ai ona mataʻutia ma ofo tele ai; o mea na e faia, o mea mamana ia; ua ou matuā iloa e aʻu nei mea.” (Salamo 139:14) E mautinoa lava, o le tele o mea tatou te aʻoaʻoina e uiga i le tino o le tagata, o le atili foʻi lea ona tatou maofa i le atamai o Ieova.

¹⁰ Seʻi fai se talafaatusa: Na e amata mai i le na o sina sela e tasi—o se fuāsela mai lou tinā, ua amata ona afuafua ina ua sao i ai le sua mai lou tamā. E lē umi, ae amata ona toe taape lenā sela i ni vaega se tele. O oe la lea ua maua mai i lenā faagasologa, ua fafau aʻe i ni sela e tusa ma le 100 tiliona. E matuā ninii lava na sela. E tusa ma le 10,000 sela e mafai ona ofi i le mata o le nila. Peitaʻi, o tagata uma taʻitoʻatasi o se foafoaga na maua mai i se mea e sili ona lavelave. E sili atu ona lavelave le sela na i lo se isi lava masini po o se falegaosimea e faia e tagata. Ua faapea mai saienitisi o le sela ua pei o se aai nofo ʻolo—e pulea mea e ulufale atu ma ulufafo mai, e iai faiga tau femalagaaʻiga ma tau fesootaʻiga, fale eletise, falegaosimea, se faiga e aoina ai le otaota ma le toe faafou o mea ua leaga. E pei foʻi o loo iai ni ona fitafita e leoleoina, ma sona palemene, o inā e aumai ai faatonuga uma. E lē gata i lea, e mafai e le sela ona toe faia se isi ona sela e tutusapau i ni nai itula!

11, 12. (a) O le ā e māfua ai ona eseese mea e faia e sela o loo iai i se pepe ua afuafua, ma e faapefea ona ōgatusa ma le mea o loo taʻua i le Salamo 139:16? (e) I ā auala ua faaalia ai e le faiʻai o le tagata, e “mataʻutia ma ofo tele” le auala na faia ai i tatou?

¹¹ O le mea moni, e eseese uma lava sela. A o vaevaeina pea i vaega eseese sela o se pepe fou lea ua afuafua, e matuā eseese foʻi gaoioiga o le a latou faatinoina. O sela o neula, sela o ponaivi, sela o maso, sela o le toto, po o sela o mata. O na eseesega  uma ua faapolokalameina i totonu o se mea e pei o se “faletusi” o sela, o le ata o uiga ma le tino o se tagata, ua taʻua o le DNA. Ia mātau, na faagaeeina Tavita e faapea atu iā Ieova: “Na silasila mai ou fofoga i oʻu tino uma ina o afuafua; ua tusia foʻi uma lava i lau tusi.”—Salamo 139:16.

¹² O nisi vaega o le tino e fai lava sina lavelave. Seʻi manatu foʻi i le faiʻai o le tagata. Ua taʻua e nisi faapea, o le vaega sili lea ona lavelave o le foafoaga i le lalolagi e leʻi malamalama lava i ai se tasi. O loo iai le tusa ma le 100 piliona sela o neula—atonu e tusa ma le tele o fetu i lo tatou aniva. O nei sela taʻitasi o loo tutupu mai ai le faitau afe o vaega e fesootaʻi atu ai i isi sela. E taofi saienitisi e mafai e le faiʻai o le tagata ona ofi ai faamatalaga uma o tusi i faletusi uma o le lalolagi, ma e foliga mai e lē mafaatapulaaina le taliaina o isi faamatalaga. E ui i le faitau sefulu o tausaga o suʻesuʻeina lenei totoga ʻmataʻutia,’ ae ua ioe saienitisi, atonu o le a lē taitai lava ona latou malamalama atoatoa i le faagaoioia o lea totoga.

13, 14. (a) Ua faapefea ona faaalia mai e loi ma isi foafoaga, o i latou ua ʻsili ona atamamai,’ ma o le ā ua taʻu mai ai iā i tatou e uiga i Lē na Foafoaina na mea? (e) Aiseā tatou te ono faapea atu ai o na foafoaga e pei o le faamoega apogaleveleve e faia “i le atamai”?

¹³ Peitaʻi, o tagata, ua na o se tasi lenā o faaaʻoaʻoga o le atamai o Ieova e foafoaina ai mea. Ua faapea mai le Salamo 104:24: “Ieova e, ua matuā tele au galuega. Ua e faia ia mea uma i le poto; ua tumu le lalolagi i au oloa.” E manino mai le atamai o Ieova i foafoaga uma lava o loo tatou vaaia. E pei o le loi, o se meaola e ʻsili ona poto.’ (Faataoto 30:24) O nofoaga e faapotopoto ai loi, e matuā maopoopo lelei. O nisi faaputuga o loi, e latou te tausia, pei ni lafumanu ni iniseti e taʻua o aphid ina ia maua mai ai meaʻai. O isi loi e gaoioi e pei o ni faifaatoʻaga, o loo totō ma tausia a latou “meaʻai” o mea ua legalegā. E tele isi foafoaga ua uma ona faapolokalameina ina ia faia mea ofoofogia e ala i o latou tomai e lagona ai mea. E feleleaʻi se lago ma faia ni gaoioiga faatāfiti, lea e lē taitai mafai ona fai e se vaalele ua sili ona atamai lona fausiaina. E taʻitaʻia faiga malaga a manufelelei e ala i fetu, e ala i le faataamilosaga a le lalolagi, pe ala i nisi o vaega o o latou lava mafaufau. E fia tausaga o  suʻesuʻeina e tagata o loo saʻiliʻili i olaga o meaola, uiga ma amioga lavelave ua uma ona faapolokalameina i nei meaola. Maʻeu lava la le matuā atamai o Lē na Faapolokalameina na mea!

¹⁴ E tele ni lesona ua aʻoaʻoina e saienitisi mai le atamai o Ieova e foafoaina ai mea. Ua iai foʻi se matātā ua taʻua o le biomimetic, lea e taumafai e matuā malamalama ma faataʻitaʻi ai i fausaga o mea o loo iai. Mo se faataʻitaʻiga, pe a e tilotilo atu i le faamoega o se apogaleveleve, e te matuā maofa lava i le manaia mai o lona foliga. Peitaʻi a tilotilo i ai le saienitisi, o le a sili ona maofa o ia i le ofoofogia o le fausaga o le faamoega. O nisi mea e pei o ni filo o loo felavasaʻi i le faamoega e foliga mai e matuā vaivai lava, ae mautinoa le sili atu ona malolosi na i lo uʻamea, ma sili atu ona malō na i lo filo ia o loo faia ai ofu mo le tatalia o pulufana. O le ā tonu lava le malosi? Seʻi faapea ua oo le lautelē o se faamoega apogaleveleve ua tutusa ma le telē o se upega fagota. E mafai e lenā faamoega ona lavelavea ai se vaalele laʻu pasese a o lele atu! Ioe, ua faia e Ieova na mea uma ʻi le atamai.’

15, 16. (a) O le ā le faamaoniga o le atamai o Ieova, lea e iloa i le lagi ua faatumulia i fetu? (e) E faapefea i le avea o Ieova ma Taʻitaʻiʻau Sili i se aofaʻiga tele o agelu, ona fai ma molimau i le atamai o lenei Pule?

¹⁵ Ua manino mai le atamai o Ieova i ana galuega i le lagi ma le lalolagi. O le lagi ua faatumulia i fetu, lea na auʻiliʻili ona tatou talanoaina i le Mataupu e 5, e lē faapea o soona taapeape solo i le vanimonimo e aunoa ma se puleaina lelei. Ona o le atamai o “tulafono i le lagi” a Ieova, ua mafai ai ona faavasega lelei fetu o le lagi i ni aniva seʻia oo ina avea ma faaputuga o aniva, ma iʻu ai ina tuufaatasia na faaputuga o aniva i nisi faaputuga ua tetelē atu. (Iopu 38:33) E lētioa lava taʻua e Ieova fetu o le lagi o se “ʻau”! (Isaia 40:26) Ae o loo iai se isi ʻau, lea e sili atu ona manino le faataʻitaʻia mai ai o le atamai o Ieova.

 ¹⁶ E pei ona tatou mātauina i le Mataupu e 4, ua iai i le Atua le taʻu “Ieova o ʻau” talu ai lona tulaga o se Taʻitaʻiʻau sili i le ʻautau tele o le faitau selau miliona o foafoaga agaga. O le faamaoniga lenei o le mana o Ieova. E faapefea la, ona aofia ai ma lona atamai? Seʻi manatu: E lē taitai muta le galulue pea o Ieova ma Iesu. (Ioane 5:17) Ua talafeagai ai foʻi la, ona tele pea galuega e faia e auauna faaagelu a le Silisili Ese. Ia manatua, e sili atu i latou na i lo tagata, e sili atu foʻi lo latou atamai, ma le malosi. (Eperu 1:7; 2:7) Peitaʻi, ua faamautinoa e Ieova o loo tele pea auaunaga a na agelu e fai, le galulue fiafia i le “faia [o] lana afioga” ma “faia lona finagalo” mo le faitau piliona o tausaga. (Salamo 103:20, 21) Maʻeu le uigaese o le atamai o lenei Pule!

17, 18. Aiseā ua faapea mai ai le Tusi Paia o Ieova e ʻatamai ia e toʻatasi,’ ma aiseā e tatau ai ona tatou matuā maofa i lona atamai?

¹⁷ Pe a fua atu i na faamaoniga, pe iai ea la se tau masalosalo i le faapea mai o le Tusi Paia e silisili ese le atamai o Ieova? E pei foʻi ona faapea mai, o Ieova e ʻatamai ia e toʻatasi.’ (Roma 16:27) Ua na o Ieova lava e matuā atoatoa lona atamai. O ia o le Puna o le atamai moni. (Faataoto 2:6) O le pogai lenā, e ui ai lava o Iesu o le foafoaga lea a Ieova ua silisili ona atamai, peitaʻi sa lē faalagolago o ia i sona lava atamai, ae na tautala e pei ona taʻitaʻia ai o ia e lona Tamā.—Ioane 12:48-50.

¹⁸ Seʻi mātau le auala na faaalia ai e Paulo le silisili o le atamai o Ieova: “Auē! le loloto o le tamaoaiga o le poto atoa ma le silafaga a le Atua. E lē masuʻesuʻeina ana faamasinoga; e lē mafai foʻi ona iloa ona ala.” (Roma 11:33) I le amataina o le fuaiupu i le alaga faapea “Auē,” na faaalia ai e Paulo se faalogona malosi—o se mataʻu talafeagai. O le upu Eleni ua ia filifilia mo le “loloto” e fesootaʻi tonu atu i le upu mo le “to e lē gata.” O lea ua fafagu mai ai e ana upu se ata manino faalemafaufau. Pe a mafaufau i le atamai o Ieova, e peiseaʻī o loo tatou faataupupula atu i se lua telē e lē gata mai, o se nofoaga e matuā loloto lava, e lē taitai mafai ona tatou fuaina lona telē, e lē mafai foʻi ona  tatou faamatalaina ona auʻiliʻiliga uma. (Salamo 92:5) Pe tatou te lē lagona ai ea le lotomaulalo pe a fua atu i lenā manatu?

19, 20. (a) Aiseā ua avea ai le aeto ma faailoga fetaui o le atamai o le Atua? (e) Ua faataʻitaʻia mai faapefea e Ieova lona tomai e silafia ai mea o i le lumanaʻi?

¹⁹ E iai foʻi se isi māfuaaga ua faapea ai o Ieova e ʻatamai ia e toʻatasi.’ E na o ia lava e mafai ona silafia mea o i le lumanaʻi. Manatua, e faaaogā e Ieova le vaai mamao a le aeto e fai ma faailoga o lona atamai. O se aeto telē atonu e na o le 10 pauna (5 kilokalama) lona mamafa, peitaʻi e lapopoʻa atu ona mata na i lo mata o se tagata matua. E matuā masau lava le manino o le vaai a le aeto, e mafai ai ona ia iloa patino atu ni manu ninii mai le faitau afe o futu i le ʻea, ma atonu foʻi e tele maila o mamao ese atu ai! Na fetalai Ieova e faatatau i le aeto: ʻUa vaai mamao atu ona mata.’ (Iopu 39:29) I se uiga tutusa, e mafai e Ieova ona tagaʻi atu i se taimi “mamao” lava—i le lumanaʻi!

²⁰ Ua tumu le Tusi Paia i faamaoniga o le moni o lenei manatu. O loo iai le faitau selau o valoaga, po o talafaasolopito o mea ua leva ona tusia a o leʻi oo ina tutupu. O iʻuga o taua, o le tulaʻi mai ma le paʻūʻū atu o malo malolosi o le lalolagi, e oo lava i ni faiga taua patino a ni taʻitaʻiʻau, sa muaʻi valoia uma mai lava i le Tusi Paia—i nisi taimi, i le faitau selau o tausaga a o leʻi tutupu na mea.—Isaia 44:25–45:4; Tanielu 8:2-8, 20-22.

21, 22. (a) Aiseā ua leai ai se faavae mo se manatu faapea ua muaʻi silafia e Ieova filifiliga uma o le a e faia i le olaga? Faataʻitaʻi mai. (e) E faapefea ona tatou iloa, o le atamai o Ieova e lē faapea ai ua leai ni ona lagona alofa, po ua leai se māfana?

 ²¹ Ae pe o le uiga ea o lenei manatu faapea, e muaʻi silafia e le Atua filifiliga o le a e faia i le olaga? E matuā ioeina lenā manatu e nisi tagata o loo latou talaʻia le aʻoaʻoga o le muaʻi tuupoina. Peitaʻi, o lenā manatu e mautinoa le lē amanaʻia ai o le atamai o Ieova, auā e peiseaʻī ua faapea mai, e lē mafai ona ia puleaina lona tomai e silafia ai mea i le lumanaʻi. Seʻi fai se faataʻitaʻiga: Afai e matuā uigaese le matagofie o lou leo pe a e pese, po o le uiga ea la, e tatau ai lava ona e pese i taimi uma? E lē fetaui lenā manatu! Ua faapena foʻi ona iā Ieova le tomai na te muaʻi silafia ai le lumanaʻi, peitaʻi e na te lē o faaaogāina i taimi uma lava. O lona faia faapea o le a faaleagaina ai la tatou filifiliga saʻoloto, o se meaalofa tautele o le a lē taitai ona toe aveesea e Ieova.—Teuteronome 30:19, 20.

²² O le isi itu e sili ai ona leaga, ona o lenā manatu i le muaʻi tuupoina e peiseaʻī e taʻu mai ai, o le atamai o Ieova e leai ni lagona alofa o iai, e lē māfana, pe lē agalelei foʻi. Ae matuā lē moni lava lenā manatu! O loo aʻoaʻo mai e le Tusi Paia faapea, o Ieova e ʻatamai lona finagalo.’ (Iopu 9:4) E masani ona faaaogā e le Tusi Paia le upu finagalo po o le loto e fesootaʻi atu i lagona i totonu, lea e aofia ai uunaʻiga ma faalogona, e pei o le alofa. O le atamai la o Ieova, i le pei o isi uma uiga, e puleaina e le alofa.—1 Ioane 4:8.

23. O le ā e tatau ona uunaʻia i tatou e fai, ona o le silisili ese o le atamai o Ieova?

²³ E matuā maufaatuatuaina le atamai o Ieova. E silisili mamao atu na i lo so tatou lava atamai, o lea ua ʻaiʻoi mai ai le Afioga a le Atua iā i tatou: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” (Faataoto 3:5, 6) Seʻi o tatou matuā iloiloina nei le atamai o Ieova, ina ia mafai ai ona tatou faalatalata atili atu i lo tatou Atua e ona le atamai uma.