1, 2. Ua faapefea ona faamatalaina e le Tusi Paia le tulaga o loo iai tagata, ma ua na o le ā lava le auala tatou te sao ese mai ai?

 “UA OI faatasi, ma oono faatasi mea uma lava na faia.” (Roma 8:22) O upu na o loo faamatala ai e le aposetolo o Paulo le tulaga mafatia o loo tatou iai nei. Mai le vaaiga faaletagata, e foliga mai ua leai se mea tatou te sao ai mai le pagatia i le agasala ma le oti. Peitaʻi e leai ni vaivaiga o Ieova e pei ona iai i tagata. (Numera 23:19) Ua saunia e le Atua o le faamasinoga tonu se auala mo i tatou e sao ese ai mai mafatiaga. O lea auala o le togiola.

² O le togiola o le meaalofa silisili lea a Ieova mo tagata. Ua mafai ai ona tatou sao mai le agasala ma le oti. (Efeso 1:7) O le faavae lea mo le faamoemoe atu i le ola e faavavau, i le lagi pe i se lalolagi parataiso. (Luka 23:43; Ioane 3:16; 1 Peteru 1:4) Ae o le ā tonu lava le togiola? Ua faapefea ona aʻoaʻo mai ai i tatou e uiga i le faamasinotonu silisili ese a Ieova?

3. (a) Aiseā na talafeagai ai le faia o se togiola? (e) Aiseā na lē tatau ai i le Atua ona tau lava ina suia le faasalaga o le oti mo fanau a Atamu?

³ Sa manaʻomia le togiola ona o le agasala a Atamu. Ona o le lē usiusitai o Atamu i le Atua, na ia tuufaasolo mai ai i ana fanau maʻi, puapuaga, tigā, ma le oti. (Kenese 2:17; Roma 8:20) E lē tatau ona lolo atu le Atua i faalogona ootia ma suia ai i se isi sala māmā le faasalaga o le oti. O le faia o lenā mea o lona uiga ua ia lē amanaʻia ai lana lava tulafono: “O le oti, o le totogi lea o le agasala.” (Roma 6:23) Ma pe ana faalēaogāina e Ieova ana lava tapulaa o le faamasinotonu, semanū ua matuā sasao faaafi faiga leaga ma soligatulafono i le lalolagi aoao!

4, 5. (a) Na faapefea ona taufaaleaga Satani i le Atua, ma aiseā na lagona ai e Ieova e tatau ona ia tali atu i na luʻi? (e) O le ā le luʻi na faia e Satani e tusa ai o auauna faamaoni a Ieova?

 ⁴ E pei ona talanoaina i le Mataupu e 12, o le fouvalega i Etena na lāgā ai isi luʻi e sili atu. Sa matuā faaleaga e Satani le suafa lelei o le Atua. E tusa o lea na ia tuuaʻia Ieova faapea o se taʻitaʻi fia tautalatasi e pepelo ma sauā, e musu e tuu atu le saʻolotoga i ana foafoaga. (Kenese 3:1-5) E foliga mai na mimilo sesē e Satani le fuafuaga a le Atua o le faatumuina o le lalolagi i tagata amiotonu, ma tuuaʻia ai faapea e lē taulau le Atua i ana fuafuaga. (Kenese 1:28; Isaia 55:10, 11) Pe ana tuu ai pea e Ieova nei luʻi e lē taliina, semanū e toʻatele nisi o ana foafoaga atamamai e latou te lē toe faatuatuaina lona tulaga pule.

⁵ Na taufaaleaga foʻi Satani i auauna faamaoni a Ieova, i lona faapea mai e ala ona latou auauna iā Ieova ona o ni faanaunauga manatu faapito, ae afai o le a fetaiaʻi ma omiga, e aunoa ma se tasi o i latou e tumau pea ona faamaoni i le Atua. (Iopu 1:9-11) Sa sili atu ona tāua nei luʻi na i lo le tulaga faigatā o loo iai le tagata. O lea sa talafeagai la le lagona o Ieova e tatau ona tali atu i moliaga taufaaleaga a Satani. Ae o le a faapefea ona taliina e le Atua nei luʻi ma faasaoina foʻi tagata?

6. O ā nisi o faaupuga ua faaaogā i le Tusi Paia e faamatala ai le auala a le Atua mo le faasaoina o tagata?

⁶ O le vaifofō a Ieova, sa sili ona alofa mutimutivale ma na matuā tonu lelei foʻi—o se vaifofō e lē taitai mafai e se tagata ona fuafuaina. Peitaʻi, sa matuā leai lava se lavelave. O loo tele ina faasino i ai e faapea o se faatauga, se faaleleiga, ma o se togisala. (Salamo 49:8; Tanielu 9:24; Kalatia 3:13; Kolose 1:20; Eperu 2:17) Ae atonu e sili ona lelei le faamatalaina o na mea, i le faaupuga lea sa faaaogā e Iesu. Na ia fetalai mai: “O le Atalii o le tagata e leʻi sau ia ina ia auauna mai  tagata iā te ia, a ia auauna atu ia, ma foaʻiina atu lona ola e fai ma togiola [Eleni, lyʹtron] e sui aʻi tagata e toʻatele.”—Mataio 20:28.

7, 8. (a) O le ā le uiga o le upu “togiola” o loo faaaogā ai i le Tusi Paia? (e) I le ā le auala o loo aofia ai i le togiola le tulaga o le tutusa?   

⁷ O le ā le togiola? O le upu Eleni o loo faaaogā i inei e sau mai se veape o lona uiga, “ia toe tatala, ia faasaʻoloto.” Sa faaaogā lenei faaupuga e faamatala ai tupe sa totogi ina ia toe faasaʻoloto ai pagota o taua. O lona uiga moni lava, e mafai ona faamatalaina le togiola, o se mea ua totogia ina ia toe faatau mai ai se mea. I Tusitusiga Eperu, o le upu mo le “togiola” (koʹpher) e sau mai le veape e faauiga faapea “ia ufiufi.” O lea la, e mafai ona tatou malamalama i le uiga o le togiola, o le ufiufi lea o agasala.—Salamo 65:3.

⁸ E lelei ona mātau, o loo taʻua i le Theological Dictionary of the New Testament e faapea, o lenei upu (koʹpher) “e masani ona faailoa mai ai se mea e tutusa,” po o se mea ua talafeagai. O lea, ina ia togiola, pe ufiufi le agasala, sa tatau ona totogia se tau e talafeagai lelei, pe ufiufia atoa ai le tulaga lea na faaleagaina e le agasala. O lea na taʻu atu ai e le Tulafono a le Atua iā Isaraelu e faapea: “Ia sui atu le ola i le ola, o le mata i le mata, o le nifo i le nifo, o le lima i le lima, ma le vae i le vae.”—Teuteronome 19:21.

9. Aiseā na ofoina atu ai e tane faatuatua taulaga sa faaaogā ai manu, ma na faapeʻī le silafaga a Ieova i na taulaga?

⁹ O tane faatuatua e amata iā Apelu ma faasolo mai ai, sa latou ofoina atu i le Atua taulaga sa osia i manu. I le faia o lenā mea, sa faaalia ai lo latou iloa o le tulaga agasala na iai ma le manaʻoga mo se togiola, ma sa latou faatuatua atu i le saʻolotoga na folafola e le Atua e ala mai i lana “fanau.” (Kenese 3:15; 4:1-4; Levitiko 17:11; Eperu 11:4) Sa finagalo malie Ieova i na taulaga ma taʻuleleia nei tagata tapuaʻi e ui o na taulaga sa faia i manu. E lē mafai e manu ona ufiufia atoatoa  ai le agasala a le tagata, auā e faatauvaa manu na i lo o tagata. (Salamo 8:4-8) O lea, ua faapea mai ai le Tusi Paia: “E lē mafai ona aveeseina o agasala i le toto o povi poʻa ma ʻoti.” (Eperu 10:1-4) O na taulaga sa na o se ata po o se faatusa o le taulaga togiola moni lea o le a oo ane.

10. (a) O ai sa tatau ona faatutusa atu i ai lē o le a faia le togiola, ma aiseā? (e) Aiseā sa tatau ai ona osia le taulaga i le tagata e toʻatasi?   

¹⁰ Na faapea mai le aposetolo o Paulo: ʻUa oti tagata uma iā Atamu.’ (1 Korinito 15:22) O lona uiga sa tatau ona aofia i le togiola le maliu o sē e tutusapau atu iā Atamu—o se tagata lelei atoatoa. (Roma 5:14) E leai se isi meafaiola e mafai ona fetaui lelei ma mea e manaʻomia e tusa ai ma le faamasinotonu. E na o le tagata lelei atoatoa lava, o se tasi e lē o aafia i le faasalaga oti mai iā Atamu, e mafai ona ia ofoina atu se “togiola e fetaui lelei mo tagata uma”—o sē e atoatoa ona tutusa atu iā Atamu. (1 Timoteo 2:6, NWT) O le a lē manaʻomia ona osia ni taulaga i le faitau miliona o tagata ina ia faatutusa atu ai i fanau uma a Atamu. Na faamatala mai e le aposetolo o Paulo: “[Ua] oo mai o le agasala i le lalolagi i le tagata e toʻatasi [Atamu], o le oti foʻi ona o le agasala.” (Roma 5:12) Talu ai “ua oo mai le oti ona o le tagata,” ua saunia ai foʻi e le Atua le togiola mo tagata e ʻala mai i le tagata.’ (1 Korinito 15:21) E faapefea?

11. (a) O le a faapefea i lē o le a faia ai le togiola ona “oo iā te ia le oti ona o tagata uma”? (e) Aiseā ua lē mafai ai e Atamu ma Eva ona la mauaina ni aogā mai le togiola? (Tagaʻi i le faaopoopoga.)

¹¹ Sa saunia e Ieova se tagata lelei atoatoa e tauofo atu lona soifua e fai ai le taulaga. E tusa ai o le Roma 6:23, “o le oti, o le totogi lea o le agasala.” I le faataulagaina o lona soifua, o le a oo ai i lē o le a faia ai le togiola “le oti ona o tagata uma.” I se isi faaupuga, o le a ia totogia le tau o le agasala a Atamu. (Eperu 2:9; 2 Korinito 5:21; 1 Peteru 2:24) E mautinoa o le a maua ai āuga lelei. I le taofia o le faasalaga oti mai le aafia ai  o fanau usiusitai a Atamu, o le a aveesea atoatoa ai e le togiola le pule faaoosala a le agasala. a—Roma 5:16.

12. Faataʻitaʻi mai pe faapefea i le totogia o se aitalafu e tasi ona manuia ai tagata e toʻatele.

¹² O se faataʻitaʻiga: Seʻi faapea o loo e nofo i se aai o le toʻatele o ona tagata e faigaluega i se falegaosimea telē lava. E lelei tele tou totogi ma ou tuaoi, ma o loo outou ola foʻi i ni olaga sologa manuia. O le tulaga lenā sa iai, seʻia oo ina tapunia le falegaosimea. Mo le ā le māfuaaga? Ua fai mea piʻopiʻo le pule ma gau ai le kamupani. O lenei ua faafuaseʻi ona leai ni a outou galuega ma ou tuaoi, ma ua lē mafai ai ona toe totogi a outou pili. Ua pagatia o outou taʻitoʻalua, o fanau, ma tagata ia o loo aitalafu ai le kamupani, talu ai faiga piʻopiʻo a lenā tagata e toʻatasi. Pe iai ea se auala e toe sao ese mai ai? E iai! Ua filifili nei se tagata mauʻoa agalelei e fesoasoani ane. E tāua iā te ia le kamupani. E alofa foʻi i le tulaga mafatia lea ua iai le toʻatele o tagata faigaluega ma o latou aiga. Ona ia faia ai lea o se fuafuaga e toe totogi le aitalafu a le kamupani ma toe tatala le falegaosimea. O le soloia o lenā aitalafu e tasi ua toe aumaia ai se mapusaga i le toʻatele o tagata faigaluega ma o latou aiga faapea foʻi tagata o loo aitalafu ai le kamupani. Ina ua soloia foʻi le aitalafu a Atamu sa faapena ona toe manuia ai le faitau miliona o tagata.

13, 14. (a) Na faapefea ona saunia e Ieova le togiola mo tagata? (e) Iā te ai ua totogi atu i ai le togiola, ma aiseā ua talafeagai ai lenā tau?

¹³ E na o Ieova e mafai ona ia saunia mai “le Tamaʻi mamoe, . . . na te aveesea le agasala a le lalolagi.” (Ioane 1:29) Peitaʻi e  leʻi auina mai e le Atua so o se agelu lava e laveaʻia le fanau a tagata. Na i lo lea, sa ia auina mai Lē e mafai ona ia saunia maia le tali māeʻaeʻa ma le atoatoa i le tuuaʻiga a Satani e faatatau i auauna a Ieova. Ioe, na faia e Ieova le taulaga silisili o le auina mai o lona Alo e toʻatasi, lea “na fai . . . mona fiafia.” (Faataoto 8:30) Sa finagalo malie le Alo o le Atua e “sasaa atu o ia e ia lava” ina ia lē toe iai i lona tino agaga. (Filipi 2:7) Sa tuua faavavega e Ieova le soifua o lona Alo ulumatua faalelagi i le manava o se tamaʻitaʻi taupou Iutaia e suafa iā Maria. (Luka 1:27, 35) Ina ua avea o se tagata, sa faasuafa o ia o Iesu. Ae tusa ai o le tulafono, e mafai ona taʻua o ia o le Atamu lona lua, auā o ia lea na fetaui atoatoa atu iā Atamu. (1 Korinito 15:45, 47) O lea na mafai ai e Iesu ona ofoina atu o ia lava e fai ma togiola mo tagata agasala.

¹⁴ Iā te ai o le a totogi atu i ai lenā togiola? Ua taʻu patino mai e le Salamo 49:7, o lenā togiola e totogi atu “i le Atua.” Ae pe lē o Ieova ea lē na fuafuaina le faia o le togiola? Ioe, ae e lē faaitiitia e lenei mea le aogā o le togiola ua peiseaʻī o se fesuiaʻiga e lē tāua, ma tau ina fai, e pei o le aveese o se tupe mai le tasi taga ae tuu i le isi taga. E tatau ona malamalama lelei, o le togiola, e lē o se fesuiaʻiga i ni mea faitino, ae o se gaoioiga faaletulafono. E ala i le saunia o le togiola, e tusa lava pe sa matuā faigatā mo ia, ae ua faamautinoa mai ai e Ieova lona maumaututū i lana lava faamasinotonu e lelei atoatoa.—Kenese 22:7, 8, 11-13; Eperu 11:17; Iakopo 1:17.

15. Aiseā na tatau ai ona oo puapuaga ma le oti iā Iesu?

¹⁵ I le tau e totogo ai laau i le 33 T.A., na talia ai ma le lotomalie e Iesu Keriso se puapuaga ogaoga lea sa iʻu ai i le totogia o le togiola. Na ia talia le puʻea faapagota o ia i ni tuuaʻiga sesē, le faasalaina e peiseaʻī o sē agasala, ma le tuʻituʻia i se laau faaoosala. Pe na tatau ea ona matuā puapuagatia faapena Iesu? Ioe, auā sa tatau ona faasaʻoina le luʻi i le faamaoni o auauna a le Atua. E lelei ona mātau, e leʻi faatagaina e le Atua le pepe o Iesu ina ia fasiotia e Herota. (Mataio 2:13-18) Ae ina ua tagata matua Iesu, sa mafai ona ia teena le malolosi  o osofaʻiga a Satani, auā sa ia malamalama lelei i luʻi o loo aafia ai. b O lona tumau i le “paia, e leai sona leaga, e lē ponā, e taumamao ma ē agasala” e ui i faiga leaga sa faia iā te ia, na matuā faamaonia atu ai e Iesu, e iai auauna a Ieova o loo tumau pea lo latou faatuatua e ui ina fesagaʻi ma puapuaga. (Eperu 7:26) E lētioa la, i lenā lava taimi a o leʻi maliu, na alaga fiafia ai Iesu: “Ua taunuu.”—Ioane 19:30.

16, 17. (a) Na faapefea ona faaauau e Iesu lana galuega faatogiola? (e) Aiseā na talafeagai ai ona tulaʻi atu Iesu “i luma o le Atua mo i tatou”?

¹⁶ Ae o lea e leʻi faaiʻuina uma le galuega faatogiola a Iesu. I le lona tolu o aso talu ona maliu Iesu, na toe faatūina aʻe ai o ia e Ieova mai le oti. (Galuega 3:15; 10:40) E ala i lenei gaoioiga lē mafaagaloina, na tauia ai e Ieova lona Alo mo lana auaunaga faamaoni, ma tuuina atu foʻi iā te ia le avanoa e faamāeʻa ai lana galuega faatogiola o le Ositaulaga Sili a le Atua. (Roma 1:4; 1 Korinito 15:3-8) Ua faamatala mai e le aposetolo o Paulo: “A o Keriso ua maliu mai, o le ositaulaga sili . . . , ona ulu faatasi lava lea o ia i totonu o le mea paia, e lē ma le toto o ʻoti ma tamaʻi povi, a o lona lava toto, ua na maua le togiola e faavavau mo i tatou. Auā ua lē ulu atu Keriso i le mea paia ua faia e lima, o le faatusa lea o le mea moni, a o le lagi lava, ina ia iloa ai nei o ia i luma o le Atua mo i tatou.”—Eperu 9:11, 12, 24.

¹⁷ Sa lē mafai e Keriso ona avatu lona toto i le lagi. (1 Korinito 15:50) Peitaʻi sa ia avatu le mea na fai ma faatusa o lenā  toto: le aogā faaletulafono o lona soifua lelei atoatoa faaletagata ua faataulagaina. Ona ia tulaʻi atu ai lea i luma o Ieova, ma tauaao aloaʻia atu le aogā o lenā soifua e fai ma togiola e sui aʻi tagata agasala. Pe na talia ea e Ieova lenā taulaga? Ioe, ma na manino mai lenā mea i le Penetekoso o le 33 T.A., ina ua liligiina ifo le agaga paia i soo e tusa ma le toʻa 120 sa iai i Ierusalema. (Galuega 2:1-4) E mataʻina lenā mea na tupu, na amata mai ai i le taimi lenā ona saunia mai e le togiola ni aogā ofoofogia.

18, 19. (a) O ā vaega e lua o tagata ua maua aogā mai le leleiga lea ua faia ona o le toto o Keriso? (e) O ā nisi o aogā i le taimi nei ma le lumanaʻi, ua maua e le “motu o tagata e toʻatele” ona o le togiola?

¹⁸ I lana tusi i Kerisiano i Kolose, o loo faamatala ai e Paulo faapea, sa silafia e le Atua e lelei ona avea Keriso e fai ma auala o se leleiga i le va o Ia ma isi mea uma, i le osia o le filemu e ala i le toto o Iesu na faamaligiina i le satauro. Ua faamatala foʻi e Paulo faapea, o lenei leleiga e aofia ai vaega patino e lua o tagata, o “mea o i le lagi” ma “mea o i le lalolagi.” (Kolose 1:19, 20; Efeso 1:10) O le vaega muamua o loo aofia ai Kerisiano e toʻa 144,000, o ē mauaina le faamoemoe e auauna ai o ni ositaulaga faalelagi, ma pule faatasi mai ma Keriso Iesu i le lalolagi. (Faaaliga 5:9, 10; 7:4; 14:1-3) E ala mai iā i latou, o le a faasolosolo mālie ai ona maua e tagata usiusitai aogā o le togiola a o faagasolo le afe tausaga.—1 Korinito 15:24-26; Faaaliga 20:6; 21:3, 4.

¹⁹ O “mea o i le lalolagi” o i latou ua faamoemoe e mauaina le ola lelei atoatoa i le Parataiso i le lalolagi. O loo taʻua e le Faaaliga 7:9-17 i latou e faapea, o “le motu o tagata e toʻatele” o ē o le a faasaoina mai le “puapuaga tele.” Peitaʻi e lē tau manaʻomia ona latou faatali mo lenā taimi ina ia maua ai aogā o le togiola. Ua uma ona “faasinasinaina o latou ofu i le toto o le Tamaʻi mamoe.” Ona o lo latou faatuatua i le togiola, ua latou mauaina ai foʻi i le taimi nei aogā faaleagaga o lenā sauniuniga alofa. Ua taʻuamiotonuina i latou o ni uō  a le Atua! (Iakopo 2:23) O le taulaga a Iesu ua mafai ai ona latou ʻfaalatalata atu ma le loto tele i le nofoalii o le alofa tunoa.’ (Eperu 4:14-16) Pe a faia se mea sesē, latou te mauaina le faamagaloga moni. (Efeso 1:7) E ui ina lē lelei atoatoa, ae ua latou mauaina se lotofuatiaifo ua faamamāina. (Eperu 9:9; 10:22; 1 Peteru 3:21) O le faia o se leleiga ma le Atua, e lē o se mea o faatalitali atu pea i ai, ae o se mea moni ua tupu i le taimi nei! (2 Korinito 5:19, 20) I le faagasologa o le Meleniuma, o le a faasolosolo mālie ona “tuusaunoa ia lava mea na faia ia lē faapologaina e le iʻu vale” ma mulimuli ane ai “oo i le saʻolotoga o le fanau a le Atua e manuia ai.”—Roma 8:21.

20. E faapefea i lou manatunatu loloto i le togiola ona aafia tonu ai oe?

²⁰ Ia “faafetai lava i le Atua, auā o Iesu Keriso” ua mafaia ai le togiola! (Roma 7:25) Ua pei e na o sina mea e leai se lavelave, ae mautinoa lo tatou matuā maofa ai. (Roma 11:33) Ma pe afai tatou te manatunatu loloto i ai i se agaga talisapaia, e ootia ai o tatou loto, ma atili ai ona tatou faalatalata atu i le Atua o le faamasinotonu. I le pei o le faisalamo, ua iā i tatou māfuaaga uma e vivii atu ai iā Ieova, o le Atua e ʻfiafia i le amiotonu ma le faamasinotonu.’—Salamo 33:5.