1-3. (a) Aiseā ua tatou nonofo aitalafu ai iā Ieova? (e) O le ā ua faafinagaloina e lo tatou Laveaʻi alofa mai iā i tatou?

 SEʻI faapea ua e lavelavea i se vaa o loo magoto. A o e mafaufau faapea o le iʻuga lea, ae taunuu ane loa se tagata laveaʻi ma toso atu oe i se mea e te saogalemu ai. Maʻeu sou lagona fiafia a o laveaʻiina oe e le tagata mai lea tulaga mataʻutia ma faapea atu: “Aua e te popole o lea ua e sao mai”! Faamata e te lē lagona lou nofo aitalafu i lenā tagata? O lona uiga ana leai o ia, e te lē ola.

² I nisi itu, ua faataʻitaʻia mai e lenei tala faatusa le mea ua faia e Ieova mo i tatou. E mautinoa o loo tatou nonofo aitalafu iā te ia, auā ua ia saunia mai le togiola, lea ua mafai ai ona laveaʻia i tatou mai saisaitiaga a le agasala ma le oti. E tatou te lagona le saogalemu i le iloa faapea, pe afai tatou te faaalia le faatuatua i lenā taulaga tāua, o le a faamagaloina a tatou agasala, ma faamautinoaina ai lo tatou lumanaʻi e faavavau. (1 Ioane 1:7; 4:9) E pei ona tatou talanoaina i le Mataupu e 14, o le togiola o se faailoga silisili lea o le alofa ma le faamasinotonu a Ieova. O ā ni gaoioiga e ao ona tatou faia ona o lenā mea?

³ E talafeagai ona tatou iloa le mea o loo faafinagaloina e lo tatou Laveaʻi alofa mai iā i tatou. Ua fetalai Ieova e ala mai i le perofeta o Mika e faapea: “Sole, ua faaali atu e ia iā te oe le mea lelei; se ā foʻi se mea e finagalo ai Ieova iā te oe, pe a lē o ia mea, ia fai le amiotonu, ia naunau i le alofa, ma ia feoaʻi ma lou Atua ma le loto faamaulalo?” (Mika 6:8) Seʻi mātau, o se tasi o mea e faafinagaloina e Ieova mai iā i tatou, o lo tatou ʻfaia lea o le faamasinotonu.’ E faapefea ona tatou faia?

4. E faapefea ona tatou iloa e finagalo Ieova ina ia tatou ola aʻe e tusa ma ana tulafono amiotonu?

⁴ E finagalo Ieova ina ia tatou ola e tusa o ana tulafono e faatatau i le mea e lelei ma le mea e leaga. Talu ai o ana tulafono  e saʻo ma amiotonu, tatou te saʻilia la le faamasinotonu ma le amiotonu pe a tatou ola e tusa ai o na mea. Ua faapea mai le Isaia 1:17: “Ia outou faamasani i le amio lelei, saʻiliʻili ia i le faamasinoga.” Ua timaʻi mai le Afioga a le Atua ina “ia [tatou] saʻili le amiotonu.” (Sefanaia 2:3) Ua fautua mai foʻi ina ia “oofu [i tatou] i le tagata fou ua faia e foliga i le Atua, i le amiotonu ma le amio lelei.” (Efeso 4:24) O le amiotonu moni—le faamasinotonu—e teena ai faiga sauā, o amioga lē mamā, o amioga lē tatau, auā o mea nei e solia ai mea ua paia.—Salamo 11:5; Efeso 5:3-5.

5, 6. (a) Aiseā e lē o se avega mamafa ai lo tatou usitaia o tulafono a Ieova? (e) Ua faaalia faapefea e le Tusi Paia, o le saʻilia o le amiotonu o le gaoioiga e faaauau pea?

⁵ Po o se avega mamafa ea mo i tatou le usitaia o tulafono amiotonu a Ieova? E leai. Afai ua uaʻi atu o tatou loto iā Ieova, e lē o se avega mamafa la iā i tatou mea ua ia faafinagaloina mai. Talu ai e tatou te alolofa i lo tatou Atua ma talisapaia ona uiga uma, e tatou te mananaʻo ai e ola i se olaga e faafiafiaina ai lona finagalo. (1 Ioane 5:3) Manatua, “e fiafia [Ieova] i le amiotonu.” (Salamo 11:7) Afai e tatau ona tatou faataʻitaʻi moni i le faamasinotonu po o le amiotonu a le Atua, e tatau foʻi la ona tatou naunau i mea e naunau i ai Ieova, ae ʻinoʻino i mea e inosia e ia.—Salamo 97:10.

⁶ E lē faigofie mo tagata lē lelei atoatoa ona saʻilia le amiotonu. E tatau ona tatou toese le tagata tuai ma ana gaoioiga agasala ae oofu i le tagata fou. Ua fai mai le Tusi Paia “ua faafouina” le tagata fou e ala i le poto saʻo. (Kolose 3:9, 10) O le upu “ua faafouina” e faaalia ai o le ofuina o le tagata fou o se gaoioiga e faaauau pea, ma e manaʻomia ai taumafaiga filigā. Po o le ā lava lo tatou taumafai malosi e faia le mea ua tonu, e iai lava taimi e faapogaia ai e o tatou tulaga agasala i tatou e sasi i se mafaufauga, se upu, po o se gaoioiga.—Roma 7:14-20; Iakopo 3:2.

7. E tatau faapefea ona tatou manatu i ni tulaga e toe lapelapea ai a tatou taumafaiga e saʻilia le amiotonu?

⁷ E tatau faapefea ona tatou manatu i ni tulaga e toe lapelapea  ai a tatou taumafaiga e saʻilia le amiotonu? E lē faapea o le a tatou manatu māmā i le matuiā o le agasala. Ae i le taimi e tasi, e lē tatau ona faavaivai, ma manatu faapea, ona o o tatou vaivaiga, ua lē tatau ai ona tatou auauna atu iā Ieova. Ua faia e lo tatou Atua mamalu se sauniuniga ia toe faafoʻisia mai i latou ua matuā salamō ina ia maua lona finagalo malie. Seʻi manatu i upu faalaeiau a le aposetolo o Ioane: “Ou te tusi atu nei mea iā te outou, ina neʻi agasala outou.” Ona ia toe faapea mai lea: “Pe afai foʻi e agasala se tasi, o iā te i tatou le fautua i luma o le Tamā, o Iesu Keriso lea.” (1 Ioane 2:1) Ioe, ua saunia e Ieova le taulaga togiola a Iesu ina ia mafai ai ona tatou faia se auaunaga e taliaina e Ia, e ui lava i so tatou tulaga agasala. Po ua lē faagaeetia ai ea la i tatou ina ia faia le mea e sili ona lelei e faafiafiaina ai Ieova?

8, 9. E faapefea i le faalauiloaina o le tala lelei ona faaalia ai le faamasinotonu a Ieova?

⁸ E mafai ona tatou faataʻitaʻi ma faaalia le faamasinotonu e ala i le faia o se sao tele i le talaʻiga o le tala lelei o le Malo o le Atua i isi. O le ā le sootaga o le faamasinotonu a Ieova ma le tala lelei?

⁹ O le a lē faaiʻuina e Ieova lenei faiga leaga o mea e aunoa ma le muaʻi faailoa mai o le lapataʻiga. I le valoaga a Iesu i le mea o le a tupu i le taimi o le iʻuga, na ia fetalai ai: “Ia muaʻi talaʻiina foʻi le tala lelei i nuu uma lava e ao ai.” (Mareko 13:10; Mataio 24:3) O le faaaogāina o le upu “muaʻi” po o le muamua, e faamaonia ai e iai isi mea o le a tutupu pe a muta le galuega talaʻi i le lalolagi aoao. E aofia ai le puapuaga tele na valoia mai, lea o le a faaumatia ai tagata amioleaga ae faaavanoa le ala mo se lalolagi fou amiotonu. (Mataio 24:14, 21, 22) E mautinoa lava, e leai se tasi na te mafai ona molia ma le tonu Ieova e faapea e lē o saʻo mea o loo ia faia i ē amioleaga. O le faailoa mai o le lapataʻiga, ua matuā telē ai le avanoa ua ia tuuina mai i na tagata ina ia suia o latou ala ma sao ai mai le faaumatiaga.—Iona 3:1-10.

10, 11. E faapefea i lo tatou talaʻia o le tala lelei ona atagia atu ai le faamasinotonu a le Atua?

 ¹⁰ E faapefea ona atagia atu le faamasinotonu a le Atua i la tatou talaʻiga o le tala lelei? Muamua lava, o se mea saʻo lo tatou faia o le mea e mafai ina ia fesoasoani ai i isi e maua le faaolataga. Seʻi toe manatu i le talafaatusa o le laveaʻiina mai se vaa ua goto. Pe afai ua e saogalemu i totonu o se vaa faaola, e mautinoa o le a e manaʻo e fesoasoani i isi tagata o loo iai pea i le sami. Ua faapena foʻi ona tatou lagona le fia fesoasoani atu iā i latou o loo fesouaʻiina pea i siʻosiʻomaga mataʻutia e pei o se “sami” i lenei lalolagi amioleaga. E moni, e toʻatele e tetee i la tatou feʻau. Peitaʻi, po o le ā lava le umi e onosai mai ai Ieova, o le umi foʻi lenā o la tatou tiute tauave ina ia avatu i na tagata le avanoa e ʻoo ai i le salamō’ ma maua le faamoemoe i le ola e faavavau.—2 Peteru 3:9.

¹¹ O le talaʻi atu o le tala lelei i tagata uma tatou te feiloaʻi, ua tatou faaalia ai le faamasinotonu i se isi foʻi auala tāua: E lē o tatou o nisi e faailogatagata. Ia manatua, “e lē faailogaina tagata e le Atua; a e peitaʻi o le mataʻu iā te ia i nuu uma lava, ma fai le amiotonu, ua talia i latou e ia.” (Galuega 10:34, 35) Pe afai tatou te fia faataʻitaʻi i Lana faamasinotonu, e lē tatau la ona tatou muaʻi faia faaiʻuga o tagata. Na i lo lea, e tatau ona tatou tufa atu i isi le tala lelei e tusa lava po o le ā lo latou lanu, o latou tulaga i le olaga, po o latou tulaga i mea tau tupe. O inā tatou te avatu ai i tagata uma o le a faalogo mai se avanoa ina ia latou faalogo ma talia le tala lelei.—Roma 10:11-13.

12, 13. (a) Aiseā e lē tatau ai ona tatou vave faamasinosino atu i isi? (e) O le ā le uiga o le fautuaga a Iesu ina ia ʻaua le faamasino atu’ ma ʻaua le faasala atu’?

¹² E mafai foʻi ona faaalia le faamasinotonu e ala i lo tatou feutagaʻi ma isi i le auala o loo feutagaʻi mai ai Ieova iā i tatou. E faigofie lava le faamasinosino atu i isi, ma faitioina o latou masei ma fesiligia māfuaaga o a latou gaoioiga. Ae o ai se tasi o i tatou e manaʻo e matuā vaʻiliʻili mai e Ieova i se uiga lē alofa, māfuaaga o a tatou gaoioiga ma o tatou vaivaiga? E lē o  le auala lenā e feutagaʻi mai ai Ieova iā i tatou. Na faapea mai le faisalamo: “Ioa e, afai e te mātaulia le amio leaga, le Alii e, o ai sē na te mafaia ona tulaʻi?” (Salamo 130:3) Pe tatou te lē lotofaafetai ea ona e lē o finagalo lo tatou Atua faimeatonu ma le alofa mutimutivale, e taulaʻi mai i taimi uma i o tatou vaivaiga? (Salamo 103:8-10) E tatau la faapefea ona tatou feutagaʻi ma isi?

¹³ Pe afai tatou te malamalama lelei i le uiga alofa o le faamasinotonu a le Atua, o le a lē vave ai la ona tatou faamasinosino isi i ni mataupu e mautinoa e lē aafia ai fua i tatou, pe leai se tāua tele. I lana Lauga i luga o le Mauga, na lapataʻi atu ai Iesu e faapea: “Aua tou te faamasino atu, ina neʻi faamasinoina outou.” (Mataio 7:1) E tusa ai o le faamatalaga a Luka, na toe fetalai mai Iesu: “Aua tou te faasala, ona lē faasalaina mai ai lea o outou.” (Luka 6:37) Sa silafia lelei e Iesu le faanaunauga o tagata lē lelei atoatoa e fia faamasinosino atu. So o se tasi o lana ʻaufaalogologo sa soona faia lenei masani, sa tatau loa ona latou lē toe faia.

14. O ā māfuaaga e tatau ai ona ʻaua tatou te faamasino atu’ i isi?

¹⁴ Aiseā e tatau ai ona ʻaua tatou te faamasino atu’ i isi? O se tasi o pogai, e leai sa tatou pule e faia ai lenā mea. Ua faamanatu mai e le soo o Iakopo iā i tatou: “E toʻatasi lava lē fai tulafono ma faamasino”—o Ieova lea. Ona tuusaʻo mai lea o le fesili a Iakopo: “O ai ea oe e te faamasino ai i lē lua te tuaoi?” (Iakopo 4:12; Roma 14:1-4) E lē gata i lea, o lo tatou tulaga agasala e faigofie ai lava ona lē saʻo a tatou faamasinoga e fai. E tele uiga ma uunaʻiga—e pei o le faailogalanu, le loto tigā i le lē amanaʻia o sou tulaga, le matauʻa, ma le faafiaamiotonu—e mafai ona mimilo sesē ai le auala tatou te manatu ai i o tatou uso a tagata. E iai foʻi isi o tatou vaivaiga, ma o le toe manatu i nei vaivaiga e tatau ona taofia ai i tatou mai le vave ona vaavaai masei i isi. E lē mafai ona tatou faitauina loto o tagata; e lē mafai foʻi ona tatou iloa tulaga uma e patino i isi. O ai la i tatou, e faauiga sesē ai fua gaoioiga a o tatou uso talitonu, pe faitioina a latou taumafaiga i le auaunaga a le Atua? Maʻeu le sili atu ona lelei o le faataʻitaʻi iā Ieova, e ala i le taulaʻi atu i  uiga lelei o o tatou uso ma tuafāfine, na i lo le taulaʻi atu i o latou vaivaiga!

15. O ā upu ma faiga e matuā lē tatau lava ona faaaogā e auauna a le Atua, ma aiseā?

¹⁵ Ae faapefea tagata o o tatou aiga? E faanoanoa lava, talu ai i le lalolagi i aso nei, o nisi o faamasinoga e sili ona leaga, o loo faia i le nofoaga ua tatau ona avea ma malu o le filemu—o le aiga lea. Ua lē toe fou le faalogo atu i tane, o avā, ma mātua sauā o matuā “faapuapuagatia” tagata o o latou aiga i ni faaupuga tutui po o le faaoolima i ai. Peitaʻi, e matuā lē tatau lava i auauna a le Atua ona latou faaaogā upu mamafa ma le tutui, faapea faiga sauā. (Efeso 4:29, 31; 5:33; 6:4) E lē tatau ona suia le fautuaga a Iesu ina ia ʻaua le faamasino atu’ ma ʻaua le faasala atu’ pe a tatou iai i o tatou aiga. Manatua, o le faatinoina o le faamasinotonu e aofia ai le feutagaʻi ma isi i le auala o loo  feutagaʻi mai ai Ieova iā i tatou. E lē taitai ona ʻinaʻinā pe sauā le Atua i ana feutagaʻiga ma i tatou. Na i lo lea, e “mutimuti vale tele” o ia iā i latou o ē alolofa iā te ia. (Iakopo 5:11) Maʻeu se faaaʻoaʻoga ofoofogia mo i tatou e faataʻitaʻi i ai!

16, 17. (a) O le ā e faatalitalia e Ieova mai toeaina? (e) O le ā e tatau ona faia pe a lē faaalia e le tagata agasala le salamō, ma aiseā?

¹⁶ Ua iā i tatou uma le tiute tauave e faaalia ai le faamasinotonu, aemaise lava i toeaina i le faapotopotoga Kerisiano. Seʻi manatu i le faamatalaina faavaloaga o “alii” po o toeaina, e pei ona tusia ai e Isaia: “Faauta, e pule le tupu ma le amiotonu, e pule foʻi alii ma le tonu.” (Isaia 32:1) Ioe, e faatalitalia e Ieova toeaina ina ia latou auauna i se tulaga faamasinotonu. E mafai faapefea ona latou faia o lenei mea?

¹⁷ Ua malamalama lelei nei tane agavaa faaleagaga, o le faamasinotonu po o le amiotonu, e manaʻomia ai ona tausia le mamā o le faapotopotoga. E iai taimi e tatau ai i le ʻautoeaina ona taulima ni faamasinoga i ni sesē matuiā ua fai. Pe a faia lenā mea, e latou te manatua o le faamasinotonu tauatua e tatau ona faaalia ai le alofa mutimutivale pe a talafeagai. E latou te taumafai ai e fesoasoani atu i le tagata agasala ina ia salamō. Ae faapefea pe afai e lē faaalia e le tagata agasala le salamō moni e ui i ni taumafaiga e fesoasoani atu iā te ia? E tusa ma le faamasinotonu lelei atoatoa a Ieova, ua faasino mai ai e lana Afioga se laasaga mausalī e tatau ona uia: “Ia faateʻaeseina e outou lenā tagata amio leaga iā te outou.” O lona uiga e tuuesea o ia mai le faapotopotoga. (1 Korinito 5:11-13; 2 Ioane 9-11) E faanoanoa toeaina pe afai o le a faia lenā tulaga, peitaʻi ua latou iloa e talafeagai lea laasaga, ina ia puipuia ai le mamā tau amio ma le mamā faaleagaga o le faapotopotoga. Ae ui i lea, e latou te faamoemoe pea ina ia iai se aso o le a toe atamai ai le tagata agasala ma foʻi mai i le faapotopotoga.—Luka 15:17, 18.

18. O le ā e tatau ona manatua e toeaina pe a ofoina atu ni fautuaga faale-Tusi Paia i isi?

¹⁸ O le auauna ma le faamasinotonu e aofia ai foʻi le ofoina atu o ni fautuaga faale-Tusi Paia pe a manaʻomia. O le mea moni, e  lē taumafai le ʻautoeaina e saʻili masei o isi. E lē taumafai foʻi e suʻesuʻevale i avanoa uma e avatu ai se faasaʻoga. Peitaʻi atonu e faia e se uso talitonu se “agasala.” Afai la e manatua e toeaina, o le faamasinotonu a le Atua e lē sauā pe ʻinaʻinā, ona latou taumafai ai lea e “faafoʻi mai lē ua faapeaina ma le loto o le agamalu.” (Kalatia 6:1) O lona uiga, e lē otegia e toeaina se tagata faimea sesē pe soona lafo atu i ai ni faaupuga mamafa. Na i lo lea, o fautuaga e avatu ma le alofa e faalaeiauina ai lē o loo fautuaina. E tusa lava po o ni aʻoaʻiga tuusaʻo—e taʻu saʻo atu āuga o se laasaga lē atamai ua uia—ae ia manatua pea e toeaina, o le uso po o le tuafafine lea ua faia le mea sesē, o se mamoe i le lafu a Ieova. a (Luka 15:7) Pe afai e manino mai o le alofa ua māfua ai ona avatu le fautuaga po o le aʻoaʻiga, atonu o le a sili atu ai le mautinoa o le toe faasaʻoina o lē ua faia le mea sesē.

19. O ā filifiliga e manaʻomia ona faia e toeaina, ma o ā mea e tatau ona faavae aʻe ai na filifiliga?

¹⁹ E masani ona manaʻomia le faia e toeaina o ni filifiliga e aafia ai o latou uso talitonu. Mo se faaaʻoaʻoga, mai lea taimi i lea taimi, e fono ai le ʻautoeaina ina ia talanoa po ua agavaa ona filifilia isi uso o le faapotopotoga, e avea o ni toeaina po o auauna o le faiva. E iloa lelei e toeaina le tāua o le lē faailogatagata. Latou te faaaogā faatulagaga a le Atua mo na tofiga e taʻitaʻia ai a latou filifiliga, ae lē faalagolago i o latou lava faalogona totino. Ona latou gaoioi ai lea “e aunoa ma le alofa faapito ma le faailogaina o se tasi.”—1 Timoteo 5:21.

20, 21. (a) O le ā e taumafai malosi toeaina ina avea ai i latou, ma aiseā? (e) O le ā e mafai e toeaina ona fai e fesoasoani atu ai i “ē loto iti”?

²⁰ E iai foʻi isi auala e tatau ona faatino ai e toeaina la latou  faamasinotonu tauatua. Ina ua uma ona muaʻi taʻu mai faapea o le a auauna toeaina “ma le tonu,” ona toe faaauau mai lea o Isaia: “E fai foʻi le tagata e pei o se lafitaga i le matagi, ma se mea e malu ai i le afā; e pei o vaitafe i le nuu naumati, e pei o le paolo foʻi o le papa tele i le nuu ua lē o i ai se vai.” (Isaia 32:1, 2) O lea, o le a taumafai malosi ai toeaina e avea ma faamāfanafanaloto, ma faalaeiauina ai o latou uso tapuaʻi.

²¹ I aso nei, e manaʻomia e le toʻatele faalaeiauga a o fesagaʻi ma le tele o faafitauli e lotovaivai ai. Toeaina e, o le ā se mea e mafai ona tou fai e fesoasoani atu ai i “ē loto iti”? (1 Tesalonia 5:14) Ia faalogologo atu ma le alofa iā i latou. (Iakopo 1:19) Atonu e manaʻomia se tasi latou te faatuatuaina, e sasaa mai i ai lagona o loo atuatuvale ai o latou loto. (Faataoto 12:25) Ia faamautinoa i ai o loo manaʻomia i latou, o loo tāua pea, ma alofagia i latou e Ieova faapea foʻi o latou uso ma tuafāfine. (1 Peteru 1:22; 5:6, 7) E mafai foʻi ona outou tatalo mo i latou.  O se matuā faamāfanafanaloto lava pe a latou faalogologo a o tatalo faatauanau se toeaina mo i latou. (Iakopo 5:14, 15) O a outou taumafaiga alofa e fesoasoani i ē lotomafatia, e mautinoa lava o le a silafia mai e le Atua o le faamasinotonu.

22. O ā auala e mafai ona tatou faataʻitaʻi atu ai i le faamasinotonu a Ieova, faatasi ai ma ā iʻuga?

²² E mautinoa, o le a sili ona tatou faalatalata atu iā Ieova e ala i le faataʻitaʻi i lana faamasinotonu! Pe a tatou sapasapaia ana tulafono amiotonu, pe a tatou tufa atu le tala lelei faasaoola i isi, ma tatou taumafai e taulaʻi atu i uiga lelei o isi na i lo le vaavaai masei i ai, ona tatou faaalia ai lea o le faamasinotonu a le Atua. Toeaina e, pe afai tou te puipuia le mamā o le faapotopotoga, pe afai tou te ofoina atu fautuaga faalaeiau faale-Tusi Paia, pe afai tou te faia ni filifiliga e lē faailogatagata, ma pe afai tou te faalaeiau atu i ē ua loto iti, ona outou faaatagia atu ai lea o le faamasinotonu a le Atua. Maʻeu le faafiafiaina o le finagalo o Ieova i lona silasila mai le lagi, ma silafia mai ona tagata o loo taumafai e faia le mea sili latou te mafai ina ʻia fai le faamasinotonu’ a o latou savavali faatasi ma lo latou Atua!