Se Tusi Mai i le Vaega Pule
E “tatau ona fai outou ma ē e aʻoaʻo atu.” (Epe. 5:12) Seʻi faaāta, o loo valaaulia i tatou e Ieova le Aʻoaʻo Sili i le aoao o mea, e aʻoaʻo isi e faatatau iā te ia. O so o se tofiga e aʻoaʻo atu le upu moni e faatatau iā Ieova, i totonu o le aiga, le faapotopotoga, po o le faiva i le fanua, o se faaeaga tautele ma o se tiute tauave tāua. E faapefea ona tatou taulau?
E maua le tali i upu a le aposetolo o Paulo ina ua tusi atu iā Timoteo: “Ia toʻaga pea e faitau i luma o tagata, ia apoapoaʻi atu ma aʻoaʻo atu.” Na ia toe taʻua: “O le faia faapea e faaolaina ai oe lava atoa ma i latou o faalogo iā te oe.”(1 Timo. 4:13, 16) Ua iā i tatou se feʻau faasaoola e faasoa atu. O le mea lea e tāua ai le galulue e faaleleia la tatou faitau ma le aʻoaʻo atu. Ua saunia lenei polosiua e fesoasoani iā te oe e faia ai faapea. Mātau nisi o mea o loo aofia ai.
I itulau taʻitasi e iai se mau sii o loo aumaia ai, a lē o se mataupu silisili faale-Tusi Paia e fesootaʻi atu i le uiga o le tautala, po o se faaaʻoaʻoga foʻi o lenā uiga o le tautala
O Ieova o le “Aʻoaʻo Sili.” (Isa. 30:20) A o fesoasoani lenei polosiua e faaleleia atili o tatou tomai i le faitau ma le aʻoaʻo atu, ia manatua o Ieova o le Puna o la tatou feʻau ma e na te tosina mai tagata. (Ioa. 6:44) O le mea lea, ia tatalo e lē aunoa mo le agaga paia. Ia faaaogā i taimi uma le Afioga a le Atua. Ia uaʻi atu iā Ieova ae lē o i tatou lava. Ia taumafai e atiaʻe i loto o lau aofia le alofa loloto mo ia.
Ua valaaulia oe e aʻoaʻo atu se feʻau pito sili ona tāua ua tuuina mai i tagata. Ua matou mautinoa, o lou faalagolago “i le malosi mai i le Atua,” e te taulau ai.—1 Pete. 4:11.
O outou uso o loo galulue faatasi ma outou,
Le Vaega Pule o Molimau a Ieova
