O Ieova * le Atua na amataina le uluaʻi faaipoipoga. Ua faapea mai le Tusi Paia na ia faia le uluaʻi fafine ma “aumaia o ia i le tamāloa.” Na matuā fiafia Atamu ma faapea mai: “O le ivi lava lenei o oʻu ivi. Ma le aano o oʻu aano.” (Kenese 2:22, 23) E finagalo pea Ieova e maua e tagata faaipoipo le fiafia.

Pe a uma ona e faaipoipo, e te ono mafaufau o le a lelei atoatoa mea uma. Peitaʻi, o le mea moni e oo i se tane ma se avā e alofa moni le tasi i le isi, e iai lava puapuaga po o faafitauli i le la faaipoipoga. (1 Korinito 7:28) E te maua mataupu silisili mai i le Tusi Paia i lenei polosiua, ma pe a faatatauina e mafai ona e maua ai se faaipoipoga taulau manuia ma se aiga fiafia.—Salamo 19:8-11.

LE MANATU O LE TUSI PAIA: O le tane o le ulu lea o le aiga.—Efeso 5:23.

Afai o oe o se tane, e finagalo Ieova e te tausi faapelepele i lau avā. (1 Peteru 3:7) Na faia e Ieova lau avā o sē e talafeagai lelei mo oe, ma e finagalo o ia e te alofa ma faamamaluina o ia. (Kenese 2:18) O le tele o lou alofa i lau avā, o le a e lotomalie ai e faamuamua ona manaʻoga nai lo mea e te manaʻo i ai.—Efeso 5:25-29.

Afai o oe o se avā, e finagalo Ieova e te matuā faaaloalo loloto i lau tane ma lagolago i lona tulaga ulu. (1 Korinito 11:3; Efeso 5:33) Ia lagolagosua ma le lotoatoa i ana faaiʻuga. (Kolose 3:18) Afai e te faia faapea, o le a tautele ai oe iā Ieova ma lau tane.—1 Peteru 3:1-6.

LE MEA E MAFAI ONA E FAIA:

• Fesili atu i lau paaga, po o le ā e ao ona e faia ina ia avea ai oe o se tane po o se avā lelei. Faalogologo lelei ma fai le mea e mafai ina ia faaleleia ai

• Ia onosaʻi, auā e umi se taimi faatoʻā iloa e le tasi le mea e fiafia ai le isi

LE MANATU O LE TUSI PAIA: E tatau ona e mataalia i mea e fiafia i ai lau paaga. (Filipi 2:3, 4) Ia pele lau paaga iā te oe, ma manatua o le finagalo o Ieova mo ana auauna ia “agamalu i tagata uma.” (2 Timoteo 2:24) O loo taʻua i le Faataoto 12:18: “O le tagata e tautala lē mafaufau, ua pei o le tutuʻi o le pelu, a o le laulaufaiva o ē e atamamai, e mālōlō ai.” O lea ia faaaogā upu e logolelei. O le a fesoasoani le agaga paia o Ieova iā te oe, e te tautala atu ai ma le agalelei ma le alofa.—Kalatia 5:22, 23; Kolose 4:6.

LE MEA E MAFAI ONA E FAIA:

• Ia tatalo ina ia maua le filemu ma se mafaufau fetālaʻi, a o leʻi talanoaina ni mataupu tāua ma lau paaga

• Ia mafaufau lelei i au tala o le a fai atu ma le auala o le a fai atu ai

LE MANATU O LE TUSI PAIA: Pe a uma ona lua faaipoipo ona avea lea o oulua ma “tino e tasi.” (Mataio 19:5) Peitaʻi, e eseese o oulua tagata ma atonu foʻi e eseese o oulua manatu. O lea, e ao ai ona oulua iloa le auala e tasi ai o oulua manatu ma lagona. (Filipi 2:2) E tatau ona lotogatasi pe a faia ni faaiʻuga. O loo taʻua i le Faataoto 20:18: “Ua matuā faatumauina fuafuaga ona o fautuaga lelei.” Ia avea mataupu silisili o le Tusi Paia ma o oulua taʻiala a o lua faia filifiliga tāua.—Faataoto 8:32, 33.

LE MEA E MAFAI ONA E FAIA:

• Faailoa atu i lau paaga ou faalogona moni, ae lē na o faamatalaga ma manatu e faatatau i se mataupu

• Talanoa ma lau paaga a o leʻi faia se faaiʻuga