1, 2. Aiseā e te alofa ai iā Ieova le Atua?

 PE E te alofa i le Atua? Atonu o lou alofa tele i le Atua na e tuuina atu ai iā te ia. E te ono lagona o ia o lau Uō moni. Peitaʻi, na muaʻi alofa mai Ieova a o leʻi faaalia atu lou alofa iā te ia. Ua taʻua i le Tusi Paia: “Ua tatou alolofa auā na muaʻi alofa mai le Atua iā i tatou.”​—1 Ioane 4:19.

² Seʻi mafaufau i auala ua faaalia mai ai e Ieova lona alofa mo i tatou. Ua ia tuuina mai le lalolagi matagofie e tatou te nonofo ai, faapea isi mea uma e tatou te olioli ai i le olaga. (Mataio 5:43-48; Faaaliga 4:11) E finagalo Ieova ia iai sa tatou faiā lelei ma ia, ma fesoasoani mai ina ia tatou aʻoaʻoina e faatatau iā te ia. Pe a tatou faitauina le Tusi Paia, ua tatou faalogo atu iā Ieova. Ae a tatou tatalo, o loo faafofoga mai o ia iā i tatou. (Salamo 65:2) E na te taʻitaʻia ma faamalosia i tatou e ala i lona agaga paia. (Luka 11:13) Sa ia auina mai foʻi lona Alo pele i le lalolagi ina ia faasaʻoloto i tatou mai i le agasala ma le oti.​—Faitau le Ioane 3:16; Roma 5:8.

3. E faapefea ona tatou faatumauina se faiā lelei ma Ieova?

 ³ Seʻi manatunatu mo sina taimi i sau uō mamae, o sē na oulua faatasi i taimi fiafia ma taimi faanoanoa. E tele ni taumafaiga ina ia faatumauina le māfana ma le malosi o lenā faauōga. E faapena foʻi la tatou faauōga ma Ieova, o ia o se Uō e sili ona māfana ua tatou maua. E mafai ona tumau e faavavau la tatou faauōga ma ia. Ua taʻua i le Tusi Paia: “Ia outou faatumau iā te outou i le alofa o le Atua.” (Iuta 21) E faapefea? Ua tali mai le Tusi Paia: “O le alofa lenei i le Atua, ia tatou tausi i ana poloaʻiga; ma e lē mamafa ana poloaʻiga.”​—1 Ioane 5:3.

4, 5. Na faapefea ona amata tuputupu aʻe lou alofa mo Ieova?

⁴ O le ā e uiga i ai le Tusi Paia ina ua faapea mai “o le alofa i le Atua”? O loo uiga atu i o tatou faalogona loloto mo le Atua. Po o e manatua le uluaʻi taimi na amata ai ona e alofa iā Ieova?

⁵ Seʻi mafaufau i ou faalogona ina ua e faatoʻā iloaina, e finagalo Ieova ia e ola e faavavau i lana lalolagi fou. Sa e aʻoaʻoina ai mea uma ua ia faia ina ia faataunuu ai lea fuafuaga, ma e iloa ai e maʻeu se meaalofa matagofie ua aumaia e Ieova mo i tatou, e ala i le auina mai o lona Alo i le lalolagi. (Mataio 20:28; Ioane 8:29; Roma 5:12, 18) A o e aʻoaʻoina le alofa tele o Ieova iā te oe, sa pāʻia ai lou loto ma amata ai ona e faaalia le alofa iā te ia.​—Faitau le 1 Ioane 4:9, 10.

6. O le ā e aofia ai i le alofa i se tasi? O le ā ua uunaʻia oe e fai ona o lou alofa i le Atua?

⁶ Ae o lenā faalogona alofa i le Atua ua na o se amataga. O se faaaʻoaʻoga, pe a e alofa i se tasi, e tele mea  e te faia nai lo o le tau ina faapea atu “ou te alofa iā te oe.” O le alofa e māfua ai ona tatou faia mea e faafiafia ai lenā tagata. I se tulaga talitutusa, o lou alofa mo Ieova e te manaʻo ai e ola i se olaga e faafiafiaina ai o ia. A o tuputupu aʻe lenā alofa, o le a tuuina atu lou ola iā Ieova ma papatisoina. O lou faia faapea ua e tautō atu ai iā Ieova o le a e auauna e faavavau iā te ia. (Faitau le Roma 14:7, 8.) E faapefea ona e tausisi i lenā tautoga?

7. O le ā e tatou te faia pe afai e tatou te alolofa iā Ieova? O ā nisi o ana poloaʻiga?

⁷ O lo tatou alolofa iā Ieova ua ʻtatou tausi ai i ana poloaʻiga.’ E faapefea ona tatou faia faapea? E ala i lo tatou usiusitaʻi iā te ia. Ua faailoa mai i le Tusi Paia le auala e finagalo Ieova e tatou te ola ai. O se faataʻitaʻiga, ua ia faailoa mai e sesē le onā, gaoi, pepelo, faia o feusuaʻiga ma se tasi e leʻi faaipoipo i ai, po o le tapuaʻi i se tasi po o se isi mea nai lo o ia.​—1 Korinito 5:11; 6:18; 10:14; Efeso 4:28; Kolose 3:9.

8, 9. E faapefea ona tatou iloa le silafaga a Ieova i tulaga e lē o iai ni tulafono maʻoti i le Tusi Paia? Aumai se faaaʻoaʻoga.

⁸ Ae e tele isi mea e ao ona tatou faia ina ia faafiafiaina ai Ieova, nai lo o le tau ina usiusitaʻi i ana poloaʻiga. E na te leʻi aumaia se lisi umī o tulafono e aofia ai vala uma o lo tatou olaga. O lea la, o nisi taimi e leai ni tulafono maʻoti i le Tusi Paia e faailoa mai ai le mea e ao ona fai. E faapefea la ona tatou faia ni filifiliga lelei? (Efeso 5:17) Ua iai i le Tusi Paia mataupu silisili, o upu moni faavae ua aʻoaʻoina ai i tatou i auala e silasila ai Ieova i mea. A o tatou faitauina le  Tusi Paia, o le a tatou iloa lelei ai le ituaiga Atua e iai Ieova. Ua tatou iloa ai lona finagalo, e aofia ai mea e fiafia i ai ma mea e ʻinoʻino i ai.​—Faitau le Salamo 97:10; Faataoto 6:16-19; tagaʻi i le Faaopoopoga 1.

⁹ O se faaaʻoaʻoga, o le ā le auala e te filifilia ai polokalame o le TV po o le Initaneti e te matamata ai? E lē o taʻu patino mai e Ieova le mea e tatau ona tatou faia. Ae e fesoasoani mataupu silisili ua ia tuuina mai ina ia tatou faia ai ni filifiliga lelei. O le tele o faafiafiaga i aso nei ua tumu i feusuaʻiga ma faiga sauā. Ua faailoa mai e Ieova i le Tusi Paia, “e inosia lava e Ia le tagata e fiafia i le faasauā,” ma ʻe faamasino e ia o ē e faitaaga ma ē e mulilulua.’ (Salamo 11:5; Eperu 13:4) E faapefea ona fesoasoani nei mataupu silisili ina ia tatou faia ai filifiliga lelei? Pe afai ua tatou iloa se mea e ʻinoʻino pe e silasila i ai Ieova o se amioga lē mamā, e tatau la ona tatou ʻalofia.

10, 11. Aiseā e tatou te usiusitaʻi ai iā Ieova?

¹⁰ Aiseā e tatou te usiusitaʻi ai iā Ieova? E lē tau ina ia ʻalofia ai faasalaga po o faafitauli ona o le faia o filifiliga sesē. (Kalatia 6:7) Nai lo o lea, e tatou te usiusitaʻi iā Ieova ona e tatou te alolofa iā te ia. E pei lava ona mananaʻo le fanau e faafiafia lo latou tamā, e tatou te mananaʻo foʻi e faafiafia lo tatou Tamā i le lagi. E leai se mea e sili atu nai lo o le iloa ua tatou maua le finagalo malie o Ieova!​—Salamo 5:12; Faataoto 12:2; tagaʻi i le Faaopoopoga 2.

¹¹ E lē na o taimi e faigofie ai po o ua leai foʻi se isi filifiliga e mafai ona fai, e tatou te usiusitaʻi ai iā Ieova. E tatou te lē filifili foʻi po o lē fea o ana  tulafono ma tapulaa e usitaʻia, a o lē fea e lē usitaʻia. (Teuteronome 12:32) Nai lo o lea, e tatou te usiusitaʻi atoatoa iā te ia, e pei o le faisalamo o lē na faapea mai: “Ou te fiafia lava i au poloaʻiga ua ou naunau i ai.” (Salamo 119:47; Roma 6:17) E tatou te fia pei foʻi o Noa, o lē sa faaalia lona alofa mo Ieova e ala i le usitaʻia o poloaʻiga uma na tuuina atu iā te ia. Ua taʻua i le Tusi Paia sa ʻfaapea lava ona faia’ e Noa. (Kenese 6:22) Pe e te manaʻo e fetalai mai faapena Ieova iā te oe?

12. E faapefea ona tatou faafiafiaina Ieova?

¹² O ā faalogona o Ieova pe a tatou usiusitaʻi iā te ia? Ua tatou “faafiafia ai [lona] loto.” (Faataoto 11:20; 27:11) Seʻi manatu i lenā mea! E tatou te faafiafiaina Lē na foafoaina le vateatea pe a usiusitaʻi iā te ia. Ae e na te lē faamalosia i tatou e faia faapea. Ua ia tuuina mai iā i tatou le filifiliga saʻoloto. O lona uiga, ua iā i tatou le saʻolotoga e filifili ai e fai le mea saʻo po o le mea sesē. E finagalo Ieova ia avea lo tatou alolofa iā te ia, ma uunaʻiga e tatou te faia ai filifiliga lelei ina ia tatou maua se olaga e sili ona lelei.​—Teuteronome 30:15, 16, 19, 20; tagaʻi i le Faaopoopoga 3.

13, 14. E faapefea ona tatou iloa e lē matuā faigatā ona usitaʻia poloaʻiga a le Atua? Ia faataʻitaʻi.

¹³ Ae faapefea pe a tatou manatu e faigatā ona usitaʻia poloaʻiga a Ieova, po ua aveesea ai lo tatou saʻolotoga? Ua taʻua ma le manino i le Tusi Paia: “E lē mamafa ana poloaʻiga.” (1 Ioane 5:3) Ua faamatalaina i le New English Translation e faapea: “E tatou te lē  mafatia i ana poloaʻiga.” E lē “mamafa” poloaʻiga a Ieova, o lona uiga e lē matuā faigatā ona tatou usitaʻia. E fetuutuunaʻi pea o Ia e tusa ma mea ua ia faafinagaloina mai iā i tatou.

¹⁴ O se faaaʻoaʻoga, seʻi faapea o loo e fesoasoani i sau uō e siitia atu i se fale fou. Ua ia tuu ana mea uma i atigipusa. O nisi atigipusa e māmā e faigofie ona sii, ae o isi e mamafa e manaʻomia ona sii e ni tagata se toʻalua. Pe afai e alofa lau uō iā te oe, po o le a fai atu e te siiina na o oe se pusa e matuā mamafa? E mautinoa e leai! Aiseā? E lē manaʻo o ia e te afāina ai. E faapena foʻi Ieova, e lē mafai ona ia fetalai mai e tatou te faia se mea e matuā faigatā. (Teuteronome 30:11-14) E silafia lelei e Ieova i tatou. “Ua silafia lelei e ia le mea na faia ai i tatou, ua ia manatu o le efuefu lava i tatou.”​—Salamo 103:14.

15. Aiseā e tatou te mautinoa ai o poloaʻiga a Ieova e mo lo tatou lelei?

¹⁵ Na taʻu atu e Mose i le nuu o Isaraelu, o poloaʻiga a Ieova e mo lo latou “lelei i aso uma,” ma o le a “ola ai pea” i latou pe a usiusitaʻi i ai. (Teuteronome 5:28-33; 6:24) E faapena foʻi i aso nei. O so o se mea lava e finagalo Ieova e tatou te faia, e mo lo tatou lelei. (Faitau le Isaia 48:17.) E silafia pea e lo tatou Tamā o Ieova mea e sili ona lelei mo i tatou. (Roma 11:33) Ua taʻua i le 1 Ioane 4:8: “O le Atua o le alofa lava ia.” O lona uiga, o mea uma e faia ma fetalai mai ai Ieova e uunaʻia e le alofa.

16. E faapefea ona iloa e mafai ona tatou usiusitaʻi e ui i le lē lelei atoatoa ma ola i se lalolagi amioleaga?

¹⁶ E lē o taimi uma e faigofie ai ona tatou usiusitaʻi  i le Atua. O loo tatou ola i se lalolagi amioleaga ua pulea e le Tiapolo. O loo taumafai o ia e taaʻina tagata ia fai le mea leaga. (1 Ioane 5:19) E manaʻomia foʻi ona tau faasaga i o tatou manatu ma faalogona lē lelei atoatoa, ona e mafai ona tatou lē usiusitaʻi ai i le Atua. (Roma 7:21-25) Peitaʻi, o lo tatou alolofa iā Ieova e faamalosia ai i tatou e fai le mea saʻo. E na te silafia a tatou taumafaiga ia usiusitaʻi iā te ia, ma fesoasoani mai e ala i lona agaga paia e sili ona malosi. (1 Samuelu 15:22, 23; Galuega 5:32) E fesoasoani mai le agaga paia e tatou te atiaʻe uiga e faigofie ai ona usiusitaʻi iā Ieova.​—Kalatia 5:22, 23.

17, 18. (a) O le ā o le a tatou aʻoaʻoina i lenei lomiga? (e) O le ā o le a tatou iloiloina i le mataupu o loo sosoo mai?

¹⁷ O le a tatou aʻoaʻoina i lenei lomiga le auala e ola ai i se olaga e faafiafia ai le finagalo o Ieova. O le a tatou aʻoaʻoina pe faapefea ona faatatau ana mataupu silisili ma tapulaa tauamio i o tatou olaga. Ia manatua e lē faamalosia e Ieova i tatou ia usiusitaʻi iā te ia. Pe a tatou filifili e usiusitaʻi, o le a faaleleia o tatou olaga ma maua se lumanaʻi matagofie. Ae sili atu ona tāua, o lo tatou usiusitaʻi e faaalia atu ai i le Atua le tele o lo tatou alofa mo ia.​—Tagaʻi i le Faaopoopoga 4.

¹⁸ Ua tuu mai e Ieova iā i tatou taʻitoʻatasi se lotofuatiaifo ina ia fesoasoani e iloa ai le mea saʻo ma le mea sesē. Pe a aʻoaʻoina o tatou lotofuatiaifo, o le a fesoasoani iā i tatou e “tausi i ana poloaʻiga.” O le ā la le lotofuatiaifo ma e faapefea ona tatou aʻoaʻoina? Seʻi o tatou iloiloina.