O tulafono a le Atua e faavae i ana mataupu silisili. O nei mataupu silisili o upu moni faavae ia e tatou te maua i le Tusi Paia. E fesoasoani iā i tatou e malamalama ai i le auala e mafaufau ai le Atua ma ona faalogona e faatatau i mea. E fesoasoani mataupu silisili iā i tatou e faia ai filifiliga lelei i le olaga ma faia le mea saʻo. E fesoasoani patino lava i tulaga e lē o maʻoti mai ai tulafono a le Atua.

▸ Mataupu 1, palakalafa 8

O le usiusitaʻi iā Ieova e uiga atu i le lotomalie e fai mea ua ia fetalai mai e fai. E finagalo Ieova ia tatou usiusitaʻi iā te ia ona o le alolofa iā te ia. (1 Ioane 5:3) Pe afai e tatou te alolofa ma maufaatuatuaina le Atua, o le a tatou mulimuli i ana fautuaga i mea uma, ma usiusitaʻi iā te ia e tusa lava pe e faigatā. E tāua ona tatou usiusitaʻi iā Ieova, auā ua ia aʻoaʻoina i tatou i le auala e maua ai se olaga lelei i le taimi nei, ma folafola mai o le a tatou olioli i le tele o faamanuiaga i le lumanaʻi.​—Isaia 48:17.

▸ Mataupu 1, palakalafa 10

Ua tuuina mai e Ieova i tagata taʻitoʻatasi le saʻolotoga e filifili ai, po o le tomai e faia ai filifiliga. E na te leʻi faia i tatou e pei o ni masini. (Teuteronome 30:19; Iosua 24:15) E mafai ona faaaogā lo tatou saʻolotoga e fai ai ni filifiliga lelei. Ae afai e lē faaeteete, e tatou te ono faia ni filifiliga lē lelei. O le iai o le saʻolotoga e filifili ai, o lona uiga e tatau ona tatou filifili pe e mananaʻo e faamaoni iā Ieova, ma faamaonia atu e tatou te alolofa moni lava iā te ia.

▸ Mataupu 1, palakalafa 12

Ua saunia e Ieova tapulaa tauamio, po o taʻiala e taʻitaʻia ai a tatou amioga ma gaoioiga. E tatou te aʻoaʻoina mai i le Tusi Paia na tapulaa,  ma le auala e fesoasoani ai iā i tatou ia ola i se olaga lelei. (Faataoto 6:16-19; 1 Korinito 6:9-11) E fesoasoani nei taʻiala e tatou te iloa ai le silafaga a le Atua i le mea saʻo ma le mea sesē, iloa ai le auala e faaalia ai le alofa, faia ai filifiliga lelei, ma agalelei i isi. E ui o loo faaauau ona paʻū maulalo tapulaa a le lalolagi, ae e lē o suia ai tapulaa a Ieova. (Teuteronome 32:4-6; Malaki 3:6) O le mulimuli i tapulaa a Ieova e puipuia ai i tatou mai le faaleagaina faaletino ma faalogona.

▸ Mataupu 1, palakalafa 17

O o tatou lotofuatiaifo o le lagona i totonu o i tatou e iloa ai le saʻo ma le sesē. Ua tuuina mai e Ieova iā i tatou taʻitoʻatasi se lotofuatiaifo. (Roma 2:14, 15) Ina ia gaoioi ma le saʻo o tatou lotofuatiaifo, e tatau ona toleni i tapulaa tauamio a Ieova. O le a mafai ai ona fesoasoani o tatou lotofuatiaifo iā i tatou ina ia faia filifiliga e fiafia i ai le Atua. (1 Peteru 3:16) E lapataʻi e o tatou lotofuatiaifo i tatou pe afai o le a faia se filifiliga sesē, pe e oo foʻi faalogona tigā iā i tatou pe a uma ona faia se mea sesē. E mafai ona vaivai o tatou lotofuatiaifo, ae o le fesoasoani a Ieova e toe faamalosia ai. O se lotofuatiaifo lelei e maua ai le filemu o le mafaufau ma le mautinoa.

▸ Mataupu 2, palakalafa 3

O le mataʻu i le Atua, o lona uiga e tatou te matuā alolofa ma faaaloalo iā te ia, ma e lē mananaʻo e faia se mea e lē fiafia i ai lona finagalo. O le mataʻu i le Atua e tatou te faia ai mea lelei ae ʻalofia le faia o mea leaga. (Salamo 111:10) E uunaʻia ai i tatou e faalogologo lelei i mea uma ua fetalai mai ai Ieova. E fesoasoani foʻi e tausisi ai i a tatou folafolaga sa fai iā te ia, ona e tatou te matuā faaaloalo iā te ia. O le mataʻu i le Atua e aafia ai le auala e tatou te mafaufau ai, auala e feutagaʻi ai ma isi, ma filifiliga e tatou te faia i aso uma.

▸ Mataupu 2, palakalafa 9

O le salamō e aofia ai le lagona e se tasi o le matuā faanoanoa ona o se mea sesē na ia faia. O ē e alolofa i le Atua, e matuā faanoanoa pe a iloa ua latou faia se mea e feteenaʻi ma ana tapulaa. Pe a tatou faia se mea sesē, e tatau ona ōle atu iā Ieova e faamagalo i tatou e faavae i le taulaga togiola a Iesu. (Mataio 26:28; 1 Ioane 2:1, 2) Pe a tatou salamō moni lava ma lē toe faia le mea sesē, e mautinoa o le a faamagalo i tatou e Ieova. E lē manaʻomia ona tatou toe lagona le nofosala i mea sa tatou faia i le taimi ua teʻa. (Salamo 103:10-14; 1 Ioane 1:9; 3:19-22) E tatau ona tatou tauivi malosi ina ia aʻoaʻo ni lesona mai i a tatou mea sesē, suia mafaufauga sesē, ma ola e ōgatusa ma tapulaa a Ieova.

▸ Mataupu 2, palakalafa 18

Pe a lē salamō se tasi na faia se agasala matuiā ma musu e mulimuli i tapulaa a Ieova, e lē mafai ona toe avea o ia ma sui o le faapotopotoga. E tatau ona faateʻaina o ia. Pe a faateʻaina se tasi, e tatou te lē toe faifaimea faatasi ma lenā tagata pe toe talanoa atu i ai. (1 Korinito 5:11; 2 Ioane 9-11) O le faatulagaga o le faateʻaina e puipuia ai le suafa o Ieova faapea le faapotopotoga. (1 Korinito 5:6) O le faateʻaina o se aʻoaʻiga foʻi e mafai ona fesoasoani i se tasi ia salamō, ina ia mafai ona toe foʻi mai ai iā Ieova.​—Luka 15:17.

▸ Mataupu 3, palakalafa 19

E alofa Ieova iā i tatou ma e finagalo e fesoasoani mai. O le pogai lea ua ia saunia mai ai le taʻitaʻiga, taʻiala, ma fautuaga e ala mai i le Tusi Paia ma ē e alolofa iā te ia. Talu ai o i tatou o tagata e lē lelei atoatoa, e tatou te matuā manaʻomia ai lava lenei fesoasoani. (Ieremia 17:9) Pe a tatou usiusitaʻi i ē ua faaaogā e Ieova e taʻitaʻia i tatou, ua faaalia ai e tatou te āva ma mananaʻo e usiusitaʻi iā te ia.​—Eperu 13:7.

▸ Mataupu 4, palakalafa 2

Talu ai e tatou te lē lelei atoatoa, e faigofie la ona tatou manatu faapito ma faamaualuga. Ae e faatalitalia e Ieova i tatou ia lotomaulalo. E amata ona tatou faaalia le lotomaulalo pe a faatusatusa i tatou iā Ieova, ma iloa ai lo tatou matuā faatauvaa. (Iopu 38:1-4) O se isi vaega tāua o le lotomaulalo, o le taumafai lea ia matuā manatu mamafa i isi ma lo latou lelei nai lo o i tatou lava. O le faamaualuga e masani ona manatu ai se tasi e sili atu o ia nai lo o isi. O le tagata e lotomaulalo, e iloilo ma le faamaoni iā te ia lava ma iloa ona itu lelei ma ona vaivaiga. E lē fefe e faailoa atu ona sesē, e faatoese atu, ma talia manatu ma fautuaga a isi. O se tasi e lotomaulalo e faalagolago iā Ieova ma mulimuli i lana taʻitaʻiga.​—1 Peteru 5:5.

▸ Mataupu 4, palakalafa 4

O le pule e uiga atu i le aiā e avatu ai faatonuga ma faia filifiliga. O Ieova o le pule silisili i le lagi ma le lalolagi. Talu ai na ia foafoaina mea uma lava, o ia la o Lē e sili ona malosi i le vateatea. E na te faaaogā i taimi uma lana pule ina ia maua ai e isi aogā. Ua tuuina e Ieova i isi tagata le tiute tauave o le tausia lea o i tatou. O se faaaʻoaʻoga, ua iai sina pule i mātua, toeaina o le faapotopotoga, ma malo, ma e finagalo Ieova ia tatou lagolagosua iā i latou. (Roma 13:1-5; 1 Timoteo 5:17) Ae afai e feteenaʻi tulafono a tagata ma tulafono a le Atua, e tatau la ona tatou usiusitaʻi i le Atua nai lo o tagata. (Galuega 5:29) Pe a tatou taliaina le pule a i latou ua faaaogā e Ieova, e faaalia atu ai e tatou te faaaloalo i ana faaiʻuga.

▸ Mataupu 4, palakalafa 7

Ua faaaogā e Ieova toeaina, o uso ua agavaa e tausia le faapotopotoga. (Teuteronome 1:13; Galuega 20:28) Ua fesoasoani nei tane ina ia faamalosia la tatou faiā ma Ieova, ma tapuaʻi iā te ia i se auala filemu ma  maopoopo. (1 Korinito 14:33, 40) E tatau ona ausia e toeaina ni agavaa patino o loo i le Tusi Paia, ina ia tofia ai i latou e le agaga paia. (1 Timoteo 3:1-7; Tito 1:5-9; 1 Peteru 5:2, 3) E tatou te fiafia e galulue felagolagomaʻi ma toeaina, ona e tatou te maufaatuatuaina ma lagolagoina le faalapotopotoga a Ieova.​—Salamo 138:6; Eperu 13:17.

▸ Mataupu 4, palakalafa 8

Ua tuuina mai e Ieova i mātua le tiute tauave o le tausia o le fanau ma le aiga. Peitaʻi, o loo taʻua i le Tusi Paia o le tane o le ulu lea o le aiga. Afai e leai se tamā i le aiga, o le tinā e ulu i le aiga. O tiute tauavea o le ulu o le aiga e aofia ai le saunia o meaʻai, lavalava, ma se fale. E tāua tele ona taʻimua o ia e fesoasoani i le aiga e tapuaʻi iā Ieova. O se faaaʻoaʻoga, e na te faamautinoa latou te auai e lē aunoa i sauniga, talaʻiga, ma suʻesuʻe faatasi le Tusi Paia. E taʻimua foʻi le ulu o le aiga i le faia o filifiliga. E taumafai o ia e faaaʻoaʻo iā Iesu e ala i le faaalia o le agalelei ma fetuutuunaʻi, e lē sauā pe ʻinaʻinā. E fesoasoani lea ia iai se siʻomaga alofa, ina ia lagona ai e sui uma o le aiga le saogalemu ma faamalosia ai la latou faiā ma Ieova.

▸ Mataupu 4, palakalafa 12

O le Vaega Pule o le vaega lea o tane e faamoemoe e ola i le lagi, ua faaaogā e le Atua e taʻitaʻia le galuega a ona tagata. I le uluaʻi senituri, na faaaogā e Ieova se vaega pule e taʻitaʻia le uluaʻi faapotopotoga Kerisiano i la latou tapuaʻiga ma le galuega talaʻi. (Galuega 15:2) I aso nei, o loo taʻimua le vaega o uso o loo auauna o le Vaega Pule i le faatonutonuina, taʻitaʻia, ma le puipuia o tagata o le Atua. Pe a faia e nei uso ni filifiliga, e latou te faalagolago i le taʻitaʻiga mai le Afioga a le Atua ma lona agaga paia. Na taʻua e Iesu lenei vaega o tane ua faauuina, o le “pologa faamaoni ma le faautauta.”​—Mataio 24:45-47.

▸ Mataupu 4, palakalafa 15

E iai taimi e ono talosagaina ai se tuafafine e na te faia se mea i le faapotopotoga e masani ona faia e se uso. Pe a faia e le tuafafine lenei galuega, e faaalia lona faaaloalo i le faatulagaga a Ieova e ala i le faia o se ufiulu. Ae e iai lava tulaga patino e tatau ai ona ufiufi lona ulu. O se faaaʻoaʻoga, e fai e le tuafafine se ufiulu pe a ia faia se suʻesuʻega faale-Tusi Paia a o iai lana tane po o se uso papatiso.​—1 Korinito 11:11-15.

▸ Mataupu 4, palakalafa 17

Pe a tatou solitū, e tatou te teena le faia o se vaega i mataupu faapolotiki. (Ioane 17:16) E lagolagoina e tagata o Ieova lona Malo. E tatou te solitū i mataupufai a le lalolagi, e pei ona faia e Iesu.

Ua faatonuina i tatou e Ieova “ia gauaʻi ma usiusitaʻi i malo ma pule.” (Tito 3:1, 2; Roma 13:1-7) Ae ua taʻua foʻi i le tulafono a le Atua e aua tatou te fasioti tagata. O lea, e lē faatagaina e le lotofuatiaifo o se Kerisiano o ia e auai i taua. Pe afai e tuu mai i se Kerisiano le filifiliga e faia galuega mo le lautele e sui ai galuega faavaegāʻau, e tatau ona iloilo pe e faataga o ia e lona lotofuatiaifo e fai na galuega.

E na o Ieova e tatou te tapuaʻi i ai, auā o ia o Lē na faia i tatou. E ui lava e tatou te faaaloalo i tagāvai a le atunuu, ae e tatou te lē faʻalo i le fuʻa pe usu le vii o le fuʻa. (Isaia 43:11; Tanielu 3:1-30; 1 Korinito 10:14) E taʻitoʻatasi foʻi tagata o Ieova ma filifili e lē palota i so o se vaega faaupufai po o se sui tauvā. O le māfuaaga ona ua uma ona tatou filifili e lagolagoina le malo o le Atua.​—Mataio 22:21; Ioane 15:19; 18:36.

▸ Mataupu 5, palakalafa 2

Ua faaauiluma e le lalolagi le auala e mafaufau ai Satani. O lenei auala ua taatele i tagata e lē alolofa ma lē faaaʻoaʻo iā Ieova, ma ē e teena ana tapulaa. (1 Ioane 5:19) O na mafaufauga ma gaoioiga ia e iʻu i ai, ua taʻua o le agaga o le lalolagi. (Efeso 2:2) E faamautinoa e tagata o  Ieova e lē pulea i latou e lenei agaga. (Efeso 6:10-18) Nai lo o lea, e tatou te fiafia i ala o Ieova ma galulue mamafa ia tumau i le auala e finagalo i ai o ia.

▸ Mataupu 5, palakalafa 7

E uiga atu i le tetee i upu moni o le Tusi Paia. O ē ua liliuese mai i le upu moni, ua fouvale iā Ieova ma Iesu, le Tupu tofia o le Malo o le Atua, ma taumafai e taaʻina isi e mulimuli atu iā i latou. (Roma 1:25) E latou te mananaʻo e faatupu masalosaloga i mafaufau o ē e tapuaʻi iā Ieova. Sa iai nisi i le uluaʻi faapotopotoga Kerisiano na liliuese mai i le upu moni, ma e faapena foʻi i aso nei. (2 Tesalonia 2:3) O ē e faamaoni iā Ieova e leai sa latou fesootaʻiga ma ē ua liliuese mai i le upu moni. E tatou te lē faatagaina le fia iloa po o uunaʻiga mai i isi, e tatou te faitau ai pe faalogo i manatu o ē ua liliuese mai i le upu moni. E tatou te faamaoni iā Ieova ma tapuaʻi atu tau lava o ia.

▸ Mataupu 5, palakalafa 9

I lalo o le Tulafono a Mose, na talosaga atu le nuu o Isaraelu iā Ieova e faamagalo a latou agasala. Na latou avatu i le malumalu taulaga togisala na faaaogā ai saito, suāuu, ma manu. O le faia faapea na faamanatu atu ai iā Isaraelu, e finagalo Ieova e faamagalo a latou agasala o se nuu ma tagata taʻitoʻatasi. Mulimuli ane, ina ua ofo atu e Iesu lona soifua e ufiufi ai a tatou agasala, sa lē toe manaʻomia loa nei taulaga togisala. “E na o le faatasi lava” ona ofo atu e Iesu le taulaga lelei atoatoa.​—Eperu 10:1, 4, 10.

▸ Mataupu 7, palakalafa 6

I le Tulafono a Mose, na faataga tagata e faaaogā manu mo meataumafa. Na poloaʻia foʻi i latou ia aumai manu e fai ai taulaga. (Levitiko 1: 5, 6) Peitaʻi, e leʻi faatagaina e Ieova ona tagata e sauā i manu. (Faataoto 12:10) Na iai tulafono e puipuia ai mai i le faasauā i manu. Na poloaʻia tagata Isaraelu ia tausia lelei meaola.​—Teuteronome 22:6, 7.

▸ Mataupu 7, palakalafa 6

Vaega ninii o le toto. O le toto e faia aʻe i vaega autū e fā​—o sela mūmū, o sela papaʻe, o sela faatoʻa toto (platelets), ma le vaega faasuavaia o le toto (plasma). O nei vaega autū e fā o le toto e ono vaevaeina i ni vaega ninii. *

E teena e Kerisiano tuigātoto e aofia ai le toto atoa po o so o se vaega o vaega autū e fā o le toto. Ae pe e latou te taliaina vaega ninii o le toto? E leai ni faamatalaga maʻoti o taʻua i le Tusi Paia. E tatau la i Kerisiano taʻitoʻatasi ona fai lana lava filifiliga e faavae i lona lotofuatiaifo ua aʻoaʻoina i le Tusi Paia.

O nisi Kerisiano e filifili e teena vaega ninii uma o le toto. E latou te ono manatu o le Tulafono a le Atua iā Isaraelu, e tatau ona sasaa “i le palapala” so o se toto e aveese mai i se manu.​—Teuteronome 12:22-24.

E ese foʻi filifiliga a isi. E faataga e o latou lotofuatiaifo i latou e talia nisi o vaega ninii o le toto. E latou te ono manatu e lē o toe iai se ola i vaega ninii o le toto o le manu po o le tagata lea na aveese mai ai le toto.

Pe a faia filifiliga e faatatau i vaega ninii o le toto, ia iloilo fesili nei:

• Po ua ou malamalama o le teena o vaega ninii uma o le toto, o lona uiga o le a ou lē taliaina nisi o vailaau ma fualaau e togafitia ai faamaʻi, pe e ono fesoasoani foʻi e taofia ai le alu o le toto?

• O le a faapefea ona ou faamatala atu i se fomaʻi, le māfuaaga ou te teena pe talia ai le faaaogāina o vaega ninii o le toto?

 Togafitiga faafomaʻi. I le avea ai ma Kerisiano, e tatou te lē foaʻi atu, pe tui ese o tatou toto ma teu a o leʻi faia se taotoga. Peitaʻi, e iai isi togafitiga e faaaogā ai le toto o le tagata maʻi lava ia. E tatau i Kerisiano taʻitoʻatasi ona filifili le auala e taulima ai lona toto pe a faia sona taotoga, se suʻesuʻega faafomaʻi, po o se togafitiga o loo maua i le taimi lenā. A o faia na togafitiga, e ono matuā alu ese le toto o le maʻi mai i lona tino mo sina taimi.​—Mo nisi faamatalaga, tagaʻi i Le Olomatamata o Oketopa 15, 2000, itulau 30-31.

O se faaaʻoaʻoga, e iai se togafitiga e taʻua o le hemodilution, lea e faaalu ese le toto o le tagata maʻi i le taimi lava lea a o leʻi faia le taotoga, ae tui i ai se IV e sui ai le toto lea e alu ese. Mulimuli ane a o fai pe faatoʻā uma lava ona fai le taotoga, e toe faafoʻi atu le toto i le tagata maʻi.

O le isi togafitiga e taʻu o le cell salvage, lea e toe faaaogā ai le toto o loo alu ese mai le tino o le maʻi i le taimi o le taotoga. I lenei togafitiga, e aumai le toto lea e alu ese i le taimi o le taotoga, faamamā, ona toe faafoʻi atu lea i le maʻi a o fai pe faatoʻā uma lava foʻi ona fai le taotoga.

 Atonu e iai sina eseesega o auala e faatino ai e fomaʻi nei togafitiga. O lea, a o leʻi taliaina e se Kerisiano so o se taotoga, suʻesuʻega faafomaʻi, po o se togafitiga o loo maua i le taimi lenā, e tatau ona ia iloa lelei po o le a faapefea ona taulima lona toto.

Pe a faia filifiliga e faatatau i togafitiga faafomaʻi e faaaogā ai lou lava toto, ia iloilo fesili nei:

• Pe afai e faaalu ese se vaega o loʻu toto mai i loʻu tino, ma e iai sina taimi e ono motusia ai le fegasoloaʻiga o loʻu toto, po o le a faataga aʻu e loʻu lotofuatiaifo e manatu i lenei toto o loo avea pea ma se vaega o loʻu tino, ma e lē manaʻomia ona “sasaa i le palapala”?​—Teuteronome 12:23, 24.

• Po o le a afāina loʻu lotofuatiaifo ua aʻoaʻoina i le Tusi Paia, pe afai e aveesea se toto mai iā te aʻu ma faafefiloi ma se vailaau, ona toe tui mai lea i loʻu tino a o faia se togafitiga?

• Po ua ou malamalama o le teena o togafitiga uma faafomaʻi e aofia ai le faaaogāina o loʻu toto, o lona uiga o le a ou lē taliaina ai se suʻesuʻega i loʻu toto, faamamāina o le toto, po o se masini e faaaogā pe a faia se taotoga o le fatu?

A o leʻi faia filifiliga e faatatau i vaega ninii o le toto ma togafitiga faafomaʻi e faaaogā ai o tatou lava toto, e ao ona tatou tatalo mo le taʻitaʻiga a Ieova ona fai lea o ni saʻiliʻiliga. (Iakopo 1:5, 6) Pe a uma, ia faaaogā o tatou lotofuatiaifo ua aʻoaʻoina i le Tusi Paia, ina ia fai ai a tatou filifiliga. E lē tatau ona tatou fesili atu i isi po o le ā e latou te faia pe a iai se  tulaga faapena e tupu iā i latou, ma e lē tatau foʻi i isi ona taumafai e aiā i a tatou filifiliga.​​—Roma 14:12; Kalatia 6:5.

▸ Mataupu 7, palakalafa 11

O le mamā tauamio o lona uiga e mamā a tatou amio ma gaoioiga i le silafaga a le Atua. O le mamā tauamio e aofia ai mea e tatou te mafaufau i ai, tautatala ai, ma mea e tatou te faia. Ua poloaʻia i tatou e Ieova ia ʻalofia so o se ituaiga o amioga lē mamā taufeusuaʻiga. (Faataoto 1:10; 3:1) E tatau ona tatou filifili e mulimuli i tapulaa mamā a Ieova, a o leʻi tupu se tulaga e ono faaosoosoina ai i tatou e faia se mea sesē. Ia tatalo e lē aunoa mo le fesoasoani a le Atua ina ia mamā pea o tatou mafaufau, ma ia maumauaʻi e teena faaosoosoga e faia amioga lē mamā.—1 Korinito 6:9, 10, 18; Efeso 5:5.

▸ Mataupu 8, palakalafa 11

O amioga lē kea faauamaaa e aofia ai le tautala po o le gaoioi i se auala e matuā solia ai tapulaa a le Atua, ma atagia mai ai se uiga e lē mā. O le tagata e faia faapea e lē faaaloalo i tulafono a le Atua. Pe a faamaonia ua faia e se tasi ni amioga lē kea faauamaaa, o le a taulima e le komiti faafaamasinoga lenei mataupu. O amioga lē mamā e aofia ai so o se ituaiga o amioga sesē. E fua i le matuiā o le tulaga e tupu, o nisi mataupu e aofia ai amioga lē mamā, e ono manaʻomia ona taulima e se komiti faafaamasinoga i le faapotopotoga.—Kalatia 5:19-21; Efeso 4:19; mo nisi faamatalaga, tagaʻi i le mataupu “Fesili Mai le ʻAufaitau” i Le Olomatamata o Iulai 15, 2006.

▸ Mataupu 9, palakalafa 7; Mataupu 12, palakalafa 10

Na faatulaga e Ieova feusuaʻiga o se faailoaga mamā o le alofa i le va o le tane ma le avā. Peitaʻi, pe afai e taaloalo pe faaaogā sesē e se tasi ona  totogasā ina ia faamalie ai ona manaʻoga taufeusuaʻiga, ua ia faaaogā la feusuaʻiga i se auala e lē mamā. O lenei masaniga e mafai ona faaleagaina ai le faiā a se tasi ma Ieova, faatupu ai tuʻinanauga lē talafeagai, ma sesē ai le vaaiga e faatatau i feusuaʻiga. (Kolose 3:5) E lē tatau ona lotovaivai se tasi o loo iai lenei masaniga lē mamā ma o loo faigatā ona tuu. (Salamo 86:5; 1 Ioane 3:20) Pe afai o le tulaga lenā o loo tupu iā te oe, ia tatalo ma le faamaoni iā Ieova ma ōle atu mo lana fesoasoani. Ia ʻalofia mea e pei o ata ma faamatalaga matagā taufeusuaʻiga, lea e faapogaia ai mafaufauga lē mamā. Ia talanoa atu i se tasi o ou mātua Kerisiano po o se uō taʻumatuaina o sē e usitaʻi i tulafono a Ieova. (Faataoto 1:8, 9; 1 Tesalonia 5:14; Tito 2:3-5) E mafai ona e mautinoa o loo silasila mai Ieova ma talisapaia au taumafaiga ina ia tausisi i le mamā tauamio.​—Salamo 51:17; Isaia 1:18.

▸ Mataupu 9, palakalafa 9

O le ʻautaunonofo, o le tū lea e sili atu i le tasi le paaga faaipoipo a se tasi. Na faatulaga e Ieova le faaipoipoga i le va o le tamāloa e toʻatasi ma le fafine e toʻatasi. I Isaraelu anamua, e leʻi taofia e le Atua ona sili atu i le tasi le avā a se tamāloa, ae e lē o lona finagalo lenā mai i le amataga. I aso nei, e lē faatagaina e Ieova ona tagata e fai ni ʻautaunonofo. E na o le tasi le avā a se tamāloa, ma e tasi le tane a se fafine.​—Mataio 19:9; 1 Timoteo 3:2.

▸ Mataupu 10, palakalafa 12

Na finagalo Ieova ia nonofo faatasi le tane ma le avā seʻia oo i le oti. (Kenese 2:24; Malaki 2:15, 16; Mataio 19:3-6; 1 Korinito 7:39) E pau le māfuaaga e na te faataga ai ona tatala le faaipoipoga, o le faamaonia lea ua mulilua se tasi o le paaga. I lenā tulaga, e tuu atu e Ieova le faitalia i le paaga o loo mamā e filifili ai pe tatala le faaipoipoga pe leai.​—Mataio 19:9.

O nisi taimi, e filifili nisi Kerisiano e teteʻa ma a latou paaga e tusa pe  leʻi faia se amioga lē mamā taufeusuaʻiga. (1 Korinito 7:11) I tulaga o loo mulimuli mai, e ono filifili ai se Kerisiano e teteʻa ma lana paaga.

• Matuā lē manaʻo e tausia le aiga: E musu se tane e tausia manaʻoga faaletino o le aiga, ma ua iʻu ai ina leai se tupe po o se meaʻai a le aiga.​—1 Timoteo 5:8.

• Matuā faasauā: E sauā ma oo ai ina lagona e le paaga ua lamatia lona soifua mālōlōina po o lona ola.​—Kalatia 5:19-21.

• Ua matuā lamatia le faiā a se tasi ma Ieova: Ua faasā e le tane po o le avā ma lē mafai ai ona auauna lana paaga iā Ieova.​—Galuega 5:29.

▸ Mataupu 11, palakalafa 19

O i tatou uma lava e manaʻomia se faamālō ma faalaeiauga. (Faataoto 12:25; 16:24) E mafai ona tatou faamalosiau ma fefaamāfanafanaaʻi i upu alofa ma agalelei. O na faaupuga e mafai ona fesoasoani i o tatou uso ma tuafāfine, ina ia tumau ma faaauau ona auauna iā Ieova e ui lava i tulaga matuā faigatā. (Faataoto 12:18; Filipi 2:1-4) Pe afai e matuā lotovaivai se tasi, e tatau ona tatou faalogologo atu ma le faaaloalo iā te ia ma taumafai e malamalama i ona faalogona. E fesoasoani lenā e tatou te iloa ai se tala e fai atu po o se mea e fesoasoani atu ai iā te ia. (Iakopo 1:19) Ia fai ma ou sini le taumafai e iloa lelei ou uso ma tuafāfine, ina ia e malamalama lelei ai i mea o loo latou manaʻomia. O le a mafai ai ona e fesoasoani iā i latou ina ia saʻili atu i le Puna o faamāfanafanaga ma faalaeiauga uma, lea e mafai ona faafouina moni ai lava i latou.​—2 Korinito 1:3, 4; 1 Tesalonia 5:11.

▸ Mataupu 12, palakalafa 16

E lē o aumaia i le Tusi Paia ni tulafono maʻoti e faatatau i faaipoipoga. E eseese aganuu ma tuutuuga faaletulafono a atunuu taʻitasi. (Kenese 24:67; Mataio 1:24; 25:10; Luka 14:8) O le vaega e sili ona tāua o se  faaipoipoga, o le tautoga lea a se ulugalii i luma o Ieova. E filifili le toʻatele o ulugalii ia auai o latou aiga ma uō mamae i le taimi e fai ai a latou tautoga, ma fai e se toeaina se lauga faale-Tusi Paia. E filifili le ulugalii lava ia i le ituaiga ʻaiga mo le la faaipoipoga, ma afai e fai se ʻaiga, o le a fai pe a uma le faaipoipoga. (Luka 14:28; Ioane 2:1-11) Po o le ā lava le auala e filifili se ulugalii e fai ai le la faaipoipoga, e tatau ona la faamautinoa o le a faamamaluina ai Ieova. (Kenese 2:18-24; Mataio 19:5, 6) E mafai ona fesoasoani mataupu silisili o le Tusi Paia e la te faia ai filifiliga lelei. (1 Ioane 2:16, 17) Pe afai e filifili le ulugalii e faaaogā le ʻava malosi i le la ʻaiga, e tatau ona la faamautinoa o le a lelei ona vaavaaia lenā faatasiga. (Faataoto 20:1; Efeso 5:18) Pe afai e la te filifili e iai ni musika po o ni faafiafiaga, e tatau ona la faamautinoa o le a faamamaluina ai Ieova. E tatau ona taulaʻi atu se ulugalii Kerisiano i le iai o se faiā lelei ma le Atua ma le mauaina o se faaipoipoga taulau manuia, nai lo o le tau ina taulaʻi atu i le aso o le la faaipoipoga.​—Faataoto 18:22; mo nisi faamatalaga, tagaʻi i Le Olomatamata o Oketopa 15, 2006, itulau 18-31.

▸ Mataupu 13, palakalafa 18

E tatou te mananaʻo e fai filifiliga lelei e faavae mai i mataupu silisili o le Afioga a le Atua. O se faaaʻoaʻoga, e ono valaaulia se Kerisiano e lana paaga e lē o se Molimau a Ieova, mo se taumafataga faatasi ma tauaiga i le taimi o se aso faamanatu a le lalolagi. Pe afai e tupu lenei tulaga iā te oe, o le ā e te faia? Pe afai e faataga oe e lou lotofuatiaifo e te alu, e mafai ona e faamatala atu i lau paaga afai e iai ni aganuu faapaupau o le a faia i lenā taumafataga, e te lē auai la i na aganuu. E tatau foʻi ona e iloilo po o le a tausuai ai nisi pe afai e te alu i lenā taumafataga.​—1 Korinito 8:9; 10:23, 24.

Pe atonu e ofo mai e lou pule o le galuega se ponesi mo oe i le vaitaimi o aso faamanatu. Pe e tatau ona e teena le ponesi? Atonu e leai. O se tasi o vala e ono faalagolago iai lau filifiliga e talia pe lē talia, o le iloilo lea po o le ā le vaaiga a lau pule e faatatau i lenā ponesi. Po o vaai i le ponesi o se vaega o le aso faamanatu? Pe e na o se auala e faaalia ai  lona lotofaafetai? O le iloilo o nei fesili ma isi vala, e manaʻomia ai ona e filifili pe e talia le ponesi.

I se isi tulaga, e ono foaʻi atu e se tasi se meaalofa iā te oe i le vaitaimi o aso faamanatu ma faapea atu: “Ou te iloa e te lē faamanatuina lenei aso, ae ou te manaʻo e te talia mai laʻu meaalofa.” Atonu o loo faaalia mai e lenā tagata le agalelei. I le isi itu, pe e iai se māfuaaga e te manatu ai o loo ia taumafai e tofotofo lou faatuatua, pe faaaofia oe i le faamanatuina o le aso faamanatu? Pe a uma ona iloilo, e filifili oe lava pe e talia pe lē talia lenā meaalofa. E tatou te mananaʻo ia lelei o tatou lotofuatiaifo ma faamaoni iā Ieova i filifiliga uma e tatou te faia.​—Galuega 23:1.

▸ Mataupu 13, palakalafa 22

O le tele o taimi, pe a vave ona taulima ni feeseeseaʻiga ma taulima i se auala filemu, e lē manaʻomia la ona avea ma ni mataupu tugā. (Mataio 5:23-26) O Kerisiano uma lava e tatau ona latou faamuamua le faamamaluina o Ieova ma le tausia o le autasi o le faapotopotoga.​—Ioane 13:34, 35; 1 Korinito 13:4, 5.

Pe afai e feeseeseaʻi ni Kerisiano i se mataupu faapisinisi, e tatau ona latou taumafai e foʻia e aunoa ma le tuuina atu i le faamasinoga. O loo taʻua i le 1 Korinito 6:1-8 le fautuaga a le aposetolo o Paulo e faatatau i le molia e se Kerisiano o le isi Kerisiano i le tulafono. O le molia o lo tatou uso i le tulafono, e ono taʻuvalea ai Ieova ma le faapotopotoga. O loo taʻua i le Mataio 18:15-17 laasaga e tolu e tatau ona uia e Kerisiano, ina ia taulima ai tuuaʻiga matuiā e pei o le taufaaleaga po o le taufaavalea. (1) E tatau ona latou taumafai muamua e foʻia le mataupu i le va o i latou lava. (2) Pe afai e lē taulau, e mafai ona talosaga atu i se sui taʻumatuaina se toʻatasi pe toʻalua o le faapotopotoga mo se fesoasoani. (3) Pe afai e manaʻomia, e mafai ona tuu atu le mataupu i le ʻautoeaina e latou te taulimaina. Pe afai o le tulaga lenā, o le a faaaogā e le ʻautoeaina mataupu silisili o le Tusi Paia ina ia taumafai e fesoasoani ai i ē uma o loo aafia ia maua se maliega filemu. Pe afai e iai nisi o loo aafia ai  e lē o fia mulimuli i taʻiala a le Tusi Paia, e ono manaʻomia la ona faia e toeaina o le faapotopotoga se taulimaga faafaamasinoga.

E iai nisi o tulaga e ono talafeagai ai ona molia i le tulafono. Atonu o tulaga e aofia ai le tatalaina o le faaipoipoga, le aiā a se tasi e vaavaaia ai se tamaitiiti, le totogiina o tupe i se paaga ma le fanau pe a teteʻa, tupe mai i le inisiua, gau se pisinisi, po o mavaega. Pe afai e faaaogā e se Kerisiano nei auala faaletulafono e taulima ai se mataupu i se auala filemu, e na te lē o solia la le fautuaga a Paulo.

Pe afai e aafia ai se solitulafono matuiā e pei o le faamalosia o se tasi e fai feusuaʻiga, faileagaina o tamaiti, faaoolima, matuā gaoi, po o le fasioti tagata, o se Kerisiano la e na te lipotiina i le tulafono se solitulafono faapena, e na te lē o solia le fautuaga a Paulo.

▸ Mataupu 14, palakalafa 14

Talu mai le taimi i le faatoʻaga i Etena, ua taumafai Satani e faasesē tagata. (Kenese 3:1-6; Faaaliga 12:9) Ua ia iloa afai e na te faasesēina o tatou mafaufau, e mafai la ona ia taaʻina i tatou e fai mea leaga. (2 Korinito 4:4; Iakopo 1:14, 15) E na te faaaogā faiga faapolotiki, lotu, faiga faapisinisi, faafiafiaga, aʻoaʻoga, ma le tele o isi mea, ina ia faaauiluma ai ona manatu ma faafoliga mai ai e lelei.​—Ioane 14:30; 1 Ioane 5:19.

Ua iloa e Satani ua puupuu lona taimi o totoe e faasesē ai tagata. O lea ua ia faia ai mea uma e na te mafai ina ia faasesē le toʻatele o tagata e mafai ai. O loo uaʻi faapitoa atu o ia e faasesē auauna a Ieova. (Faaaliga 12:12) Pe a tatou lē faaeteete, e mafai e le Tiapolo ona faasolosolo ona faaleagaina o tatou mafaufauga. (1 Korinito 10:12) O se faaaʻoaʻoga, e finagalo Ieova ia tumau faaipoipoga. (Mataio 19:5, 6, 9) Peitaʻi, e toʻatele tagata i aso nei e manatu māmā i le faaipoipoga e faapea o se feagaiga e faigofie ona faamuta. Ua faaauiluma foʻi e le tele o ata tifaga ma polokalame i le televise lenei manatu. E tatau ona faamautinoa e lē o taaʻina i tatou i le vaaiga a le lalolagi e faatatau i le faaipoipoga.

O se isi auala e taumafai Satani e faasesē ai i tatou, o le uunaʻia lea o le agaga fiatutoʻatasi. (2 Timoteo 3:4) Pe a tatou lē faaeteete, e tatou te  ono lē faaaloalo ai i ē ua tofia e Ieova i le tulaga pule. O se faataʻitaʻiga, e ono amata ona tetee se uso i le taʻitaʻiga a toeaina o le faapotopotoga. (Eperu 12:5) Pe e ono amata foʻi ona fesiligia e se tuafafine le faatulagaga a Ieova i le tulaga ulu i le aiga.​—1 Korinito 11:3.

E tatau ona tatou maumauaʻi ia aua neʻi taaʻina e le Tiapolo o tatou mafaufauga. Nai lo o lea, e ao ona tatou faaaʻoaʻo i manatu o Ieova ma ʻtaulaʻi atu o tatou mafaufau i mea faalelagi.’​—Kolose 3:2; 2 Korinito 2:11.

▸ Mataupu 16, palakalafa 9

O i tatou uma lava e mananaʻo ia soifua mālōlōina ma maua le tausiga e sili ona lelei e mafai ai pe a tatou mamaʻi. (Isaia 38:21; Mareko 5:25, 26; Luka 10:34) I aso nei ua tele auala ma togafitiga faafomaʻi e maua mai i fomaʻi ma isi. Pe a tatou filifili po o ā togafitiga e talia, e tāua ona tatou mulimuli i mataupu silisili o le Tusi Paia. Ia manatua e na o le Malo o le Atua e mafai ona faamālōlōina tumau i tatou. E lē tatau ona tatou soona uaʻi atu i lo tatou soifua mālōlōina, ma lafoaʻia ai la tatou tapuaʻiga iā Ieova.​—Isaia 33:24; 1 Timoteo 4:16.

E tatau ona tatou faaeteete ia ʻalofia so o se togafitiga e foliga mai o loo faaaogā ai le mana o temoni. (Teuteronome 18:10-12; Isaia 1:13) O lea, a o leʻi taliaina so o se togafitiga po o fualaau ma vailaau, e ao ona tatou faia mea uma e mafai ai ina ia iloilo po o le ā le māfuaaga ma po o ā manatu o loo faaauiluma ai i na mea. (Faataoto 14:15) Ia aua neʻi galo e manaʻo Satani e maileia i tatou ina ia tatou aafia i faiga faatemoni. Pe afai foʻi e tatou te masalosalo e iai se fesootaʻiga o se togafitiga ma temoni, e sili ona lelei pe a ʻalofia lenā togafitiga.​—1 Peteru 5:8.

▸ Mataupu 16, palakalafa 18