1, 2. Aiseā e tatau ai ona filifili ma le faaeteete a tatou faafiafiaga?

 SEʻI faapea o le a e taumafaina se fua o se laau ʻaina, ae ua e vaai atu e pala le isi itu. O le ā lau mea e fai? Po o le a e taumafaina pea? Po o le a e tiʻai ese? Pe e te tipi ese le itu pala ae taumafa le itu o loo lelei?

² E mafai ona faatusaina faafiafiaga i lenā fualaau ʻaina. O nisi faafiafiaga atonu e manaia, ae o le tele o faafiafiaga e pala ona e lē mamā, e sauā, pe faatemoni. O lea, pe a filifili au faafiafiaga, pe e te faapea  ifo: “E pule lava aʻu. E mafai lava ona ou filifili so o se faafiafiaga ou te manaʻo i ai”? Pe e te faapea ifo: “E leaga faafiafiaga uma”? Po o e filifili foʻi ma le faaeteete au faafiafiaga, ina ia ʻalofia ai mea leaga ae fiafia i mea lelei?

3. O le ā e tatau ona tatou mafaufau i ai pe a filifili a tatou faafiafiaga?

³ E tatou te manaʻomia uma ni tafaoga ma faafiafiaga, ma e tatou te mananaʻo ia filifili lelei. E ao la ona tatou fesili ifo, pe faapefea i a tatou filifiliga i faafiafiaga ona aafia ai la tatou tapuaʻiga iā Ieova.

4. O le ā se mataupu silisili o le Tusi Paia e fesoasoani iā i tatou pe a filifili faafiafiaga?

⁴ Ina ua tuuina atu i tatou iā Ieova, ua tatou tautō iā te ia o le a faaaogā o tatou ola e auauna ai mo ia. (Faitau le Failauga 5:4.) Ua tatou tautō o le a “faia mea uma lava ina ia faamamaluina ai le Atua.” (1 Korinito 10:31) O lona uiga ua tatou tuuina atu atoatoa i le Atua e aofia ai ma taimi e tatou te auai ai i tafaoga po o faafiafiaga, ae e lē na o taimi e tatou te auai ai i sauniga po o le talaʻiga.

5. O le ā le ituaiga tapuaʻiga e tatau ona tatou tuuina atu iā Ieova?

⁵ O mea uma e tatou te faia i le olaga e fesootaʻi atu i la tatou tapuaʻiga iā Ieova. Na faamatala e Paulo lenei mea ina ua faapea mai: “Ia tuuina atu o outou tino o le taulaga ola, e paia, ma e mālie i le Atua.” (Roma 12:1) Na fetalai Iesu: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa, ma lou malosi atoa.” (Mareko 12:30)  E tatou te mananaʻo e avatu pea iā Ieova le mea sili e tatou te mafaia. I Isaraelu anamua, pe a avatu e tagata se manu e fai ai le taulaga iā Ieova, sa faatalitalia e latou te avatu se manu e matuā lelei. E leʻi taliaina e le Atua se taulaga pe a faalētonu. (Levitiko 22:18-20) I se tulaga talitutusa, e ono lē talia e Ieova la tatou tapuaʻiga. E faapefea?

6, 7. E faapefea i a tatou faafiafiaga ona aafia ai la tatou tapuaʻiga iā Ieova?

⁶ Ua fetalai mai Ieova: “E tatau ona paia outou, auā o aʻu nei e paia lava aʻu.” (1 Peteru 1:14-16; 2 Peteru 3:11) E faatoʻā talia e Ieova la tatou tapuaʻiga pe afai e paia pe mamā. (Teuteronome 15:21) E mafai ona lē mamā la tatou tapuaʻiga pe afai tatou te faia mea e inosia e Ieova, e pei o amioga lē mama, faiga sauā, po o mea e fesootaʻi atu i faiga faatemoni. (Roma 6:12-14; 8:13) Ae e lē fiafia foʻi le finagalo o Ieova pe afai e faaaogā nei mea ina ia faafiafiaina ai i tatou. O le faia faapea e mafai ona lē mamā ai la tatou tapuaʻiga ma lē taliaina e Ieova, ma matuā faaleagaina ai la tatou faiā ma ia.

⁷ E faapefea la ona filifili ma le atamai a tatou faafiafiaga? O ā mataupu silisili e fesoasoani iā i tatou e iloa ai faafiafiaga e talia ma faafiafiaga e lē taliaina?

8, 9. O ā ituaiga o faafiafiaga e tatou te ʻalofia? Aiseā?

⁸ E tele ituaiga o faafiafiaga ua iai i aso nei. O nisi o na faafiafiaga e talia e Kerisiano, ae o le tele o faafiafiaga e latou te lē taliaina. Muamua, seʻi o tatou iloilo ituaiga o faafiafiaga e tatau ona tatou ʻalofia.

 ⁹ O le tele o ata tifaga, upega tafaʻilagi, polokalame i televise, taaloga vitiō, ma pese, ua faalauiloa ai amioga lē mamā, faiga sauā, po o faiga faatemoni. E masani ona faaalia mai ai mea leaga i se auala e foliga mai e lelei ma mālie. Peitaʻi, e faaeteete Kerisiano ia teena faafiafiaga e lē o atagia mai ai tapulaa mamā a Ieova. (Galuega 15:28, 29; 1 Korinito 6:9, 10) Pe a tatou teena na faafiafiaga, ua faaalia atu ai iā Ieova e tatou te ʻinoʻino i le leaga.​—Salamo 34:14; Roma 12:9.

10. O le ā le iʻuga pe a sesē a tatou filifiliga i faafiafiaga?

¹⁰ Ae e manatu nisi e lē leaga faafiafiaga sauā, lē mamā, pe faatemoni. Ua latou manatu: ʻO le ā le leaga? E lē taitai oʻu faia nei mea.’ Pe a tatou mafaufau faapea, ua faasesēina la i tatou. Ua faapea mai le Ieremia 17:9: “E sili ona faaʻoleʻole le loto nai lo o mea uma, ma e matuā leaga lava.” Pe afai o faafiafiaina i tatou i mea e lē taliaina e Ieova, e faapefea la ona faapea atu e tatou te ʻinoʻino i nei mea? O le tele e faafiafiaina ai i tatou i na mea, o le tele foʻi lenā o le a amata ai ona tatou talia e avea ma mea masani o le olaga. O le iʻuga, o le a faavaivaia ai le lotofuatiaifo ma lē toe gaoioi ai e lapataʻia i tatou pe a faia se filifiliga sesē.​—Salamo 119:70; 1 Timoteo 4:1, 2.

11. E faapefea ona fesoasoani le Kalatia 6:7 e filifili ai a tatou faafiafiaga?

¹¹ Ua taʻua i le Afioga a le Atua: “O le mea e lūlūina e le tagata, o le mea lava lea e na te seleseleina mai.” (Kalatia 6:7) O le mea moni, pe a faafiafiaina i tatou i mea leaga, e ono iʻu ai ina tatou faia na mea. O se faaaʻoaʻoga, ua matuā aafia nisi Kerisiano i faafiafiaga  lē mamā, ma iʻu ai ina latou faia amioga lē mamā. Peitaʻi, ua aumaia e Ieova le fesoasoani manaʻomia ina ia filifili ai ma le atamai a tatou faafiafiaga.

12. O le ā e fesoasoani iā i tatou e faia ai filifiliga lelei e faatatau i faafiafiaga?

¹² O nisi faafiafiaga e matuā manino mai e lē taliaina e Ieova, ma ua tatou iloa e tatau ona ʻalofia. Ae faapefea pe afai e lē o manino mai? E leʻi aumaia e Ieova se lisi o tulafono o mea e mafai ma mea e lē mafai ona tatou matamata, faalogo, pe faitau i ai. Peitaʻi, e finagalo o ia e faaaogā o tatou lotofuatiaifo ua aʻoaʻoina i le Tusi Paia. (Faitau le Kalatia 6:5.) Ua tuuina mai e Ieova mataupu silisili, o upu moni faavae ia, e aʻoaʻo ai i tatou i le auala e silasila ai o ia i mea. Ua fesoasoani nei mataupu silisili e aʻoaʻoina ai o tatou lotofuatiaifo. E fesoasoani e tatou te iloa ai “po o le ā le finagalo o Ieova,” ona tatou faia ai lea o ni filifiliga e faafiafiaina ai o ia.​—Efeso 5:17.

13. Aiseā e eseese ai filifiliga a Kerisiano e faatatau i faafiafiaga? Ae o le ā le mea e tāua i Kerisiano uma?

¹³ E masani lava ona eseese filifiliga e faia e Kerisiano e faatatau i faafiafiaga. Aiseā? E eseese uma mea e tatou te fiafia i ai. E lē gata i lea, o mea e talia e se isi Kerisiano e ono lē talia e le isi. E ui i lea, e tatau ona taʻitaʻia Kerisiano uma i mataupu silisili o le Tusi Paia ina ia faia ai filifiliga lelei. (Filipi 1:9) O le a fesoasoani nei mataupu silisili iā i tatou e filifili  ai faafiafiaga e talia e le Atua.​—Salamo 119:11, 129; 1 Peteru 2:16.

14. (a) O le ā e tāua ona iloilo e faatatau i le auala o loo tatou faaaogā ai le taimi? (e) O le ā le fautuaga a Paulo i Kerisiano?

¹⁴ E tatau foʻi ona iloilo le tele o le taimi o loo tatou faaalu i faafiafiaga. E faaalia mai ai po o le ā le tāua o faafiafiaga iā i tatou. I le avea ai ma Kerisiano, o la tatou auaunaga iā Ieova o le mea lea e sili ona tāua i o tatou olaga. (Faitau le Mataio 6:33.) Ae e mafai ona alu uma lo tatou taimi i faafiafiaga e aunoa ma le iloaina. Na fautua mai Paulo i Kerisiano: “Ia outou matuā faautauta ina neʻi outou savavali e pei o ē e vālea, ae ia pei o ē e atamamai,  ia outou faaaogā tatau le taimi.” (Efeso 5:15, 16) O lea la, ia faatapulaa le taimi e faaalu i faafiafiaga, ma ia faamautinoa pea e faamuamua i o tatou olaga la tatou auaunaga i le Atua.​—Filipi 1:10.

15. E faapefea ona puipuia i tatou mai i faafiafiaga e ono faaleagaina ai la tatou faiā ma Ieova?

¹⁵ E manino mai, e tatau ona tatou teena faafiafiaga e tatou te iloa e lē talia e Ieova. Ae faapefea faafiafiaga atonu e tatou te lē mautinoa i ai? Pe e ao ona tatou faaeteete pea i ai? Seʻi mafaufau i le mea lenei. Pe afai o loo e savali i luga o se mauga, pe e te savali latalata lava i le pito mauga? E leai. Pe afai e tāua iā te oe lou ola, e te taumamao ese mai i mea e lamatia ai. E faapena foʻi i a tatou filifiliga i faafiafiaga. Ua taʻua i le Afioga a le Atua: “Ia laa ese lou vae mai i le mea leaga.” (Faataoto 4:25-27) O lea, e lē na ona tatou ʻalofia o faafiafiaga e tatou te iloa e leaga, ae e tatou te taumamao ese foʻi mai i faafiafiaga e tatou te lē mautinoa pe lelei ma ono faaleagaina ai la tatou faiā ma Ieova.

16. (a) O ā nisi o mea e inosia e Ieova? (e) E faapefea ona faaalia atu e tatou te ʻinoʻino i mea e inosia e Ieova?

¹⁶ Na tusi le faisalamo: “O outou o ē e alolofa iā Ieova, ia outou ʻinoʻino i le leaga.” (Salamo 97:10) Ua aʻoaʻo i tatou e le Tusi Paia i manatu ma faalogona o Ieova. Ia fesili ifo pe faapefea i mea ua e aʻoaʻo ona fesoasoani iā te oe e vaai ai i mea e pei ona silasila i ai Ieova. O se faaaʻoaʻoga, ua tatou aʻoaʻoina e inosia e Ieova le “laulaufaiva pepelo, o lima e sasaa le toto o ē e lē sala, o le loto e fafau faufauga  leaga, o vae e vave ona tamoʻe e fai le mea leaga.” (Faataoto 6:16-19) Ua aʻoaʻoina i tatou e tatau ona ʻalofia “le faitaaga, . . . o le ifo i tupua, o faiga faaagaga, . . . o le lotoleaga, o le lotoa, . . . o le mataʻua, o onāga, o patī lē taupulea, ma mea faapena.” (Kalatia 5:19-21) Pe e te iloa le auala e fesoasoani ai nei mataupu silisili o le Tusi Paia iā te oe e filifili ai faafiafiaga? E tatou te mananaʻo e usitaʻia tapulaa a Ieova i vala uma o o tatou olaga, pe a tatou faatasi ma isi pe na o i tatou foʻi. (2 Korinito 3:18) O filifiliga e tatou te faia pe a na o i tatou, e masani ona faaalia mai ai le tagata moni e iai i tatou.​—Salamo 11:4; 16:8.

17. O ā fesili e ao ona tatou fesili ifo ai a o leʻi filifilia faafiafiaga?

¹⁷ O lea, pe a tatou filifili faafiafiaga, ia fesili ifo: ʻE faapefea i laʻu filifiliga ona aafia ai la ma faiā ma Ieova? E faapefea ona aafia ai loʻu lotofuatiaifo?’ Seʻi o tatou iloilo nisi mataupu silisili e fesoasoani iā i tatou pe a filifili faafiafiaga.

18, 19. (a) O le ā le fautuaga na avatu e Paulo i Kerisiano? (e) O ā mataupu silisili o le a fesoasoani iā i tatou e filifili ai faafiafiaga?

¹⁸ Pe a filifili faafiafiaga, ua tatou filifilia mea e faatumu ai o tatou mafaufau. Na tusi Paulo: “O mea uma ua moni, o mea uma ua matuā tāua, o mea uma ua tonu, o mea uma ua mamā, o mea uma e faatupu ai le lotofiafia, o mea uma ua taʻuleleia, o amioga lelei uma lava ma mea e viia ai se tasi, ia faaauau ona manatunatu i nei mea.” (Filipi 4:8) Pe a faatumu o tatou mafaufau i na mea lelei, e mafai ona tatou faapea atu: “Ia mālie iā te oe upu a loʻu gutu ma manatunatuga o loʻu loto Ieova e.”​—Salamo 19:14.

 ¹⁹ Ia fesili ifo: ʻO ā mea o loo faatumu ai loʻu mafaufau? Pe a uma ona matamata i se ata po o se faafiafiaga, pe ou te maua ai ni mafaufauga lelei ma faafouina ai? Pe ou te lagona ai le filemu ma maua ai se lotofuatiaifo lelei? (Efeso 5:5; 1 Timoteo 1:5, 19) Pe ou te saʻoloto ai e tatalo atu iā Ieova? Po o le a leaga ai oʻu faalogona? Po ua avea le faafiafiaga ma pogai ou te mafaufau ai i faiga sauā po o amioga lē mamā? (Mataio 12:33; Mareko 7:20-23) Po o oʻu “mulimuli i lenei faiga o mea a le lalolagi” pe a filifili aʻu faafiafiaga? (Roma 12:2) O a tatou tali faamaoni e fesoasoani e iloa ai mea e ao ona tatou faia ina ia faamalosia ai pea la tatou faiā ma Ieova. E tatou te fia tatalo e pei o le faisalamo: “Ia e liliuese oʻu mata mai i le vaai atu i mea e lē aogā.” *​—Salamo 119:37.

20, 21. Aiseā e ao ai ona tatou amanaʻia faalogona o isi pe a filifili a tatou faafiafiaga?

²⁰ O le isi mataupu silisili tāua lenei ia manatua: “E taga mea uma lava; ae e lē o mea uma e aogā. E taga mea uma lava; ae e lē o mea uma e atiaʻe ai. Aua neʻi saʻilia e se tasi lona lava lelei, a ia faaauau ona saʻili le lelei o isi.” (1 Korinito 10:23, 24) O le iai o le saʻolotoga iā i tatou e faia ai se mea, e lē uiga ai e faapea e tatau lava ona tatou faia lenā mea. E tatau ona tatou mafaufau ma le faaeteete i auala e aafia ai uso ma tuafāfine i a tatou filifiliga.

 ²¹ E lē tutusa lotofuatiaifo o tagata uma. O se faaaʻoaʻoga, e ono faataga e lou lotofuatiaifo oe e matamata i se polokalame o le televise. Ae mulimuli ane e iloa, o lenā polokalame e aafia ai le lotofuatiaifo o le isi uso po o se tuafafine. O le ā e te faia? E ui lava e iai lau aiā e matamata ai i lenā polokalame, ae e te ono filifili e te lē matamata ai. Aiseā? Talu ai e te lē manaʻo e ʻagasala i lou uso,’ po o le sili atu foʻi ona leaga, o le ʻagasala iā Keriso.’ (1 Korinito 8:12) E tatou te lē mananaʻo e faia se mea e tausuai ai o tatou uso Kerisiano.​—Roma 14:1; 15:1; 1 Korinito 10:32.

22. E faapefea ona faaalia lo tatou magafagafa pe a faia filifiliga a isi Kerisiano?

²² Ae faapefea pe afai e lē faatagaina oe e lou lotofuatiaifo e matamata, faitau, pe faia foʻi se mea o loo talia e le isi tagata? Talu ai e te alofa ma faaaloalo i lou uso, e te lē faamalosia la o ia e tutusa a oulua filifiliga. E iloa e se ave taavale e ono saoasaoa pe lemū foʻi le aveave a isi nai lo o ia, ae o i latou uma o ni ave taavale lelei. I se tulaga talitutusa, atonu o loo oulua mulimuli uma ma le isi uso i mataupu silisili o le Tusi Paia, e ui e iai sina eseesega i o oulua manatu e faatatau i faafiafiaga e talia.​—Failauga 7:16; Filipi 4:5.

23. O le ā e fesoasoani ina ia filifili lelei ai a tatou faafiafiaga?

²³ O le ā la e fesoasoani ina ia filifili lelei ai a tatou faafiafiaga? O le a tatou faia filifiliga lelei pe a faaaogā o tatou lotofuatiaifo ua aʻoaʻoina i mataupu silisili o le Tusi Paia, ma matuā manatu mamafa i uso ma tuafāfine. O le a tatou fiafia ona ua tatou faia “mea uma lava ina ia faamamaluina ai le Atua.”