1-3. (a) O ā lagona o le toʻatele o tagata e faatatau i a latou galuega? (e) O ā fesili o le a tatou iloiloina i lenei mataupu?

 E GALULUE mamafa tagata i le lalolagi aoao e tausia i latou ma o latou aiga. Ua lē fiafia le toʻatele i a latou galuega, ma ua fāʻatu nisi e faigaluega i aso taʻitasi. Po o lou lagona foʻi lenā, ma o le ā e mafai ona e faia ina ia atili avea ai lau galuega o se siʻomaga fiafia? E faapefea ona e fiafia i lau galuega?

² Ua fetalai mai Ieova: “Ia taʻitasi le tagata ma ʻai ma inu ma fiafia i mea lelei ona o ana galuega mamafa uma. O le meaalofa lea mai i le Atua.” (Failauga 3:13) Na foafoaina i tatou e Ieova ma tuu i ai le manaʻoga ma le faanaunauga e galulue. E finagalo o ia e tatou te fiafia i a tatou galuega.​—Faitau le Failauga 2:24; 5:18.

³ O lea la, o le ā e fesoasoani iā i tatou ina ia fiafia ai i a tatou galuega? O ā galuega e tatau i Kerisiano ona ʻalofia? E faapefea ona faapaleni a tatou galuega ma le tapuaʻiga iā Ieova? O le ā le galuega e sili ona tāua e mafai ona tatou faia?

4, 5. O le ā le silafaga a Ieova i galuega?

⁴ E fiafia Ieova e galue. Ua taʻua i le Kenese 1:1: “Na foafoaina e le Atua le lagi ma le lalolagi i le amataga.”  Ina ua māeʻa ona foafoaina e le Atua le lalolagi ma mea uma o i ai, ona ia fetalai lea “ua matuā lelei lava” ana foafoaga. (Kenese 1:31) Ua faamalieina Lē na Foafoaina mea uma i ana galuega.​—1 Timoteo 1:11.

⁵ O loo galue pea Ieova. Na fetalai Iesu: “O loo galue loʻu Tamā e oo mai i le aso nei.” (Ioane 5:17) E ui lava e tatou te lē o iloa mea matagofie uma ua faia e Ieova, ae e iai nisi o na mea ua tatou iloaina. Ua ia filifilia i latou o le a pule faatasi ma lona Alo o Iesu Keriso i le Malo. (2 Korinito 5:17) O loo taʻitaʻia ma tausia foʻi e Ieova tagata. E faitau miliona i latou ua aʻoaʻo e faatatau iā Ieova ma maua le faamoemoe e ola e faavavau i se lalolagi parataiso, ona o le talaʻiga i le lalolagi aoao.​—Ioane 6:44; Roma 6:23.

6, 7. O le ā le ituaiga tagata galue e i ai Iesu?

⁶ E fiafia foʻi Iesu e galue e pei o lona Tamā. A o leʻi sau Iesu i le lalolagi, sa avea o ia ma “tufuga poto” a le Atua i le foafoaina o mea uma i le lagi ma le lalolagi. (Faataoto 8:22-31; Kolose 1:15-17) Sa faaauau ona galue mamafa Iesu a o iai i le lalolagi. A o talavou sa aʻoaʻoina o ia e avea o se kamuta tomai, ma atonu na ia fausiaina meafale ma fale. Sa matuā tomai Iesu i lana galuega ma na taʻua ai o ia “o le kamuta.”​—Mareko 6:3.

⁷ Ae o le galuega e sili ona tāua a Iesu i le lalolagi, o le talaʻia lea o le tala lelei ma aʻoaʻo tagata e uiga iā Ieova. Na tatau ona māeʻa lana talaʻiga i le tolu ma le ʻafa tausaga, ma sa galue mamafa o ia mai i le taeaopō seʻia oo i le leva o le pō. (Luka 21:37, 38; Ioane 3:2) E faitau selau maila na savali ai Iesu i auala pefua, ina ia  folafola atu le tala lelei i le toʻatele o tagata e mafai ai.​—Luka 8:1.

8, 9. Aiseā na fiafia ai Iesu i lana galuega?

⁸ O le faia o le galuega a le Atua sa pei o se meaʻai iā Iesu. Sa ia maua le malosi mai i lenei galuega. O nisi aso na matuā galue mamafa Iesu ma e leʻi maua se taimi e taumafa ai. (Ioane 4:31-38) Na ia faaaogā avanoa uma e fesoasoani ai i tagata ia aʻoaʻo e faatatau i lona Tamā. O le māfuaaga lenā na ia faapea atu ai iā Ieova: “Ua ou faamamaluina oe i le lalolagi, ma ua ou faamāeʻaina le galuega na e tuuina mai iā te aʻu e fai.”​—Ioane 17:4.

⁹ E manino mai, sa matuā galulue mamafa Ieova ma Iesu ma sa fiafia ma faamalieina i laʻua i a la galuega. E tatau ona tatou “faaaʻoaʻo i le Atua” ma ʻmulimulituʻi i tulaga aao’ o Iesu. (Efeso 5:1; 1 Peteru 2:21) O le māfuaaga lenā e tatou te taumafai ai e galulue mamafa ma faia le mea e sili i mea uma e tatou te faia.

10, 11. O le ā e fesoasoani iā i tatou ina ia maua se vaaiga saʻo i galuega?

¹⁰ I le avea ai ma tagata o Ieova, e tatou te galulue mamafa e tausia i tatou lava ma o tatou aiga. E tatou te mananaʻo ia fiafia i a tatou galuega, ae o se luʻi lenā mea. O lea, o le ā e mafai ona faia pe a tatou lē fiafia i a tatou galuega?

¹¹ Ia iai se vaaiga saʻo. Atonu e lē mafai ona suia galuega po o le tele o galuega e tatou te faia, ae e mafai ona sui la tatou vaaiga. Ina ia faia faapea, e fesoasoani lo tatou malamalama i mea o loo faatalitalia  mai e Ieova. O se faaaʻoaʻoga: E faatalitalia e Ieova le ulu o le aiga ia tausia lelei manaʻoga o lona aiga i le mea e gata ai lona mafai. Ua taʻua i le Tusi Paia, o se tasi e na te lē tausia lelei lona aiga, “e sili lona leaga i lo le tagata e lē faatuatua.” (1 Timoteo 5:8) Pe afai o oe o se ulu o le aiga, ia galue mamafa e tausia lou aiga. E tusa pe e te fiafia pe lē fiafia i lau galuega o loo fai, ae ua e iloa o lou tausia o lou aiga ua e faafiafiaina ai Ieova.

12. O ā aogā o lo tatou galulue mamafa ma faamaoni?

¹² Ia galue mamafa ma faamaoni. O le faia faapea e faigofie ai ona e fiafia i lau galuega. (Faataoto 12:24; 22:29) O le a maufaatuatuaina ai oe e lou pule. E tāua tele i pule o galuega tagata faigaluega faamaoni, ona latou te lē gaoia tupe, meatotino, ma le taimi. (Efeso 4:28) A o le sili ona tāua, o loo silafia e Ieova lou galue mamafa ma le faamaoni. E te maua se “lotofuatiaifo lelei” ona ua e iloa o loo e faafiafiaina le Atua, o Lē e te alofa i ai.​—Eperu 13:18; Kolose 3:22-24.

13. O le ā e iʻu i ai pe a tatou faamaoni i galuega?

¹³ Ia e iloa e viia Ieova i lau amio i le galuega. O se tasi lea o māfuaaga e tatou te fiafia ai i a tatou galuega. (Tito 2:9, 10) Atonu foʻi o lau faaaʻoaʻoga lelei o le a fiafia ai se tasi lua te faigaluega e suʻesuʻe le Tusi Paia.​—Faitau le Faataoto 27:11; 1 Peteru 2:12.

14-16. O le ā e tatau ona tatou iloiloina pe a filifilia se galuega?

¹⁴ E lē o taʻua i le Tusi Paia se lisi o galuega e tatau ona talia pe lē talia e se Kerisiano. Ae o loo iai mataupu silisili e fesoasoani e tatou te faia ai filifiliga lelei  e faatatau i galuega. (Faataoto 2:6) E tusa ai o mataupu silisili o le Tusi Paia, ia fesili ifo ai iā i tatou lava i fesili o loo mulimuli mai.

¹⁵ Po o le a manaʻomia ai i lenei galuega ona ou faia se mea ua fetalai Ieova e sesē? Ua aʻoaʻoina i tatou i faiga e inosia e Ieova e pei o le gaoi ma le pepelo. (Esoto 20:4; Galuega 15:29; Efeso 4:28; Faaaliga 21:8) E tatou te faaeteete la ina ia ʻalofia galuega e feteenaʻi ma tapulaa a Ieova.​—Faitau le 1 Ioane 5:3.

 ¹⁶ Po o lagolagoina pe faaauiluma e lenei galuega faiga e taʻusalaina e Ieova? Ia mafaufau i se faaaʻoaʻoga. E lē leaga le faigaluega e avea o se talitelefoni. Ae faapefea pe a maua e se Kerisiano se avanoa talitelefoni i se fale e faatau ai pepa Lotto? E moni e na te lē o faatauina atu ni pepa Lotto, e na o le talitelefoni lana mea e fai. Ae pe e lē o lagolagoina e lana galuega talitelefoni lenei fale e faatau ai pepa Lotto, o se faiga e lē ōgatusa ma le Tusi Paia? (Efeso 5:3-5) Talu ai e tatou te alolofa iā Ieova, e tatou te lē fia aafia la i faiga e taʻusala e le Tusi Paia.

17. O le ā e fesoasoani iā i tatou e faia ai filifiliga e faafiafiaina ai le Atua?

¹⁷ O le faaaogā o mataupu silisili a le Atua, e mafai ai ona avea i tatou ma tagata o loo faamatalaina i le Eperu 5:14, “o ē ua faaaogā o latou mafaufau e iloa le mea saʻo ma le mea sesē ina ua aʻoaʻoina.” Ia fesili ifo iā te oe lava: ʻPo o le a tausuai ai nisi pe afai ou te taliaina lenei galuega? Po o le a ou tuua ai laʻu paaga ma laʻu fanau ae ou alu atu i se isi atunuu? E faapefea ona aafia ai i latou?’

18. Aiseā o se luʻi ai le uaʻi atu pea i la tatou tapuaʻiga?

¹⁸ E lē faigofie ona faamuamua la tatou tapuaʻiga iā Ieova i nei “aso e sili ona faigatā.” (2 Timoteo 3:1) O se luʻi le saʻilia o se galuega ma tumau ai. E manaʻomia ona tausia o tatou aiga, ae ua tatou iloa e tatau ona faamuamua la tatou tapuaʻiga. E lē mafai ona avea meafaitino ma mea e sili ona tāua i o tatou olaga. (1 Timoteo 6:9, 10) O lea la, e faapefea ona tatou ʻfaamautinoa  mea e sili ona tāua,’ ae i le taimi e tasi o loo tausia o tatou aiga?​—Filipi 1:10.

19. E faapefea i le faatuatuaina o Ieova ona fesoasoani iā i tatou ina ia paleni i a tatou galuega?

¹⁹ Ia faatuatua atoatoa iā Ieova. (Faitau le Faataoto 3:5, 6.) E tatou te iloa e silafia e le Atua mea e tatou te manaʻomia moni lava, ma e matuā manatu mamafa mai o ia iā i tatou. (Salamo 37:25; 1 Peteru 5:7) Ua taʻu mai i lana Afioga: “Ia aunoa o outou olaga ma le manaʻo tele i tupe, a ia outou lotomalilie i mea ua iai iā te outou. Auā na fetalai [le Atua]: ʻOu te lē tuua lava oe, ma ou te lē tuulafoaʻia lava oe.’” (Eperu 13:5) E lē finagalo Ieova e tatou te popole i taimi uma i le tausia o tatou aiga. Ua tele taimi ua ia faaalia mai ai e mafai ona ia tausia manaʻoga o tagata. (Mataio 6:25-32) E tusa lava po o ā tulaga o a tatou galuega, ae e tatou te suʻesuʻe e lē aunoa le Afioga a le Atua, talaʻi le tala lelei, ma auai i sauniga faa-Kerisiano.​—Mataio 24:14; Eperu 10:24, 25.

20. E faapefea ona faafaigofie o tatou olaga?

²⁰ Ia lelei pea lau vaai. (Faitau le Mataio 6:22, 23.) O lona uiga ia faafaigofie lou olaga ina ia e uaʻi atu ai i le auaunaga iā Ieova. Ua tatou iloa o se mea valea le faataga o tupe, olaga sologa lelei, po o masini fou e avea ma mea e sili ona tāua nai lo o la tatou faauōga ma le Atua. O le ā la e fesoasoani ina ia tatou faamuamua ai mea e tatau ona muamua? Tatou taumafai malosi e aua neʻi faia ni aitalafu. Pe afai o loo iai sau aitalafu, ia fai se fuafuaga e faaitiitia pe totogi uma foʻi. Pe a tatou lē faaeteete, e ono alu uma lo tatou taimi ma le malosi i le saʻilia o meafaitino, ma ua leai  ai se taimi e tatalo, suʻesuʻe, ma talaʻi ai. Nai lo o le faataga o meafaitino e faafaigatā ai o tatou olaga, e tatau ona tatou lotomalilie i mea e manaʻomia moni e pei o ʻmeaʻai ma mea e oofu ai.’ (1 Timoteo 6:8) Po o le ā lava lo tatou tulaga, ae e lelei ona iloilo i tatou lava mai i lea taimi i lea taimi, ina ia iloa le auala e tatou te auauna atoatoa ai iā Ieova.

21. Aiseā e ao ai ona tatou filifili po o le ā le mea e tatau ona faamuamua i o tatou olaga?

²¹ Ia saʻo mea e faamuamua. Ia faaaogā tatau lo  tatou taimi, malosi, ma meafaitino. Pe a tatou lē faaeteete, o le a alu uma lo tatou taimi i le saʻilia o mea e itiiti le tāua e pei o aʻoaʻoga ma tupe. Na fetalai Iesu: “Ia faaauau pea ona outou saʻili muamua le malo.” (Mataio 6:33) E faaalia mai i a tatou filifiliga, masaniga, mea fai i aso taʻitasi, ma sini, mea o loo faamuamua i o tatou loto.

22, 23. (a) O le ā la tatou galuega e sili ona tāua o ni Kerisiano? (e) O le ā e fesoasoani iā i tatou ina ia fiafia ai i a tatou galuega?

²² O le galuega e sili ona tāua e tatou te faia, o le auauna iā Ieova ma talaʻi atu le tala lelei i isi. (Mataio 24:14; 28:19, 20) I le pei o Iesu, e ao ona tatou faia mea uma tatou te mafaia i lenei galuega. Ua siitia atu nisi i nofoaga o loo tele ai le manaʻoga mo le ʻautalaʻi. Ua aʻoaʻo e nisi se isi gagana ina ia talaʻi atu ai i tagata e tautatala i na gagana. Ia talanoa atu iā i latou na faia faapea, ma fesili i ai e faatatau i na mea. O le a latou taʻu atu iā te oe ua sili ona fiafia ma faaaogā tatau o latou olaga.​—Faitau le Faataoto 10:22.

²³ I aso nei, ua faaalu e le toʻatele o i tatou le tele o itula e faigaluega ai po o le silia foʻi ma le tasi le galuega, mo le na ona tausia ai o manaʻoga masani o le aiga. E silafia e Ieova lenā mea ma e na te talisapaia mea uma o loo tatou faia ina ia tausia ai o tatou aiga. Seʻi o tatou faaaʻoaʻo pea iā Ieova ma Iesu i le galulue mamafa, e tusa lava po o le ā le galuega e tatou te faia. Ia manatua o la tatou galuega e sili ona tāua, o le auauna iā Ieova ma talaʻi le tala lelei o le Malo o le Atua. O lea, o le a tatou maua ai le fiafia moni.