MATAUPU 16
Ia Tetee Atu i le Tiapolo
“Ia tetee atu i le Tiapolo, ona sola ese ai lea o ia mai iā te outou.”—IAKOPO 4:7.
1, 2. O le ā le mea e ao ona tatou malamalama i ai e faatatau iā Satani ma temoni?
O LE a matuā matagofie le olaga i le lalolagi fou a Ieova. O i inā o le a tatou ola ai e tusa ma le fuafuaga a le Atua mo i tatou. Ae i le taimi lenei, o loo tatou ola i se lalolagi ua pulea e Satani ma ana temoni. (2 Korinito 4:4) E ui lava e tatou te lē o vaaia i latou, ae o loo iai moni lava ma e matuā malolosi.
2 O le a iloiloina i lenei mataupu auala e tatou te mafuta vavalalata atu ai iā Ieova, ma puipuia ai i tatou mai iā Satani. Ua folafola mai e Ieova o le a ia fesoasoani mai. Peitaʻi, e manaʻomia ona tatou malamalama i auala o loo faaaogā e Satani ma temoni e maileia ma osofaʻia ai i tatou.
“E PEI O SE LEONA O LOO TAGI LEOTELE”
3. O le ā e manaʻo le Tiapolo e fai iā i tatou?
3 Ua faapea mai Satani e ala ona tapuaʻi tagata iā Ieova ona o ni māfuaaga manatu faapito, ma o le a tatou lē toe auauna iā Ieova pe a matuā faigatā le tulaga o mea. (Faitau le Iopu 2:4, 5.) Pe a naunau se tasi e suʻesuʻe e faatatau iā Ieova, o le a mātauina e Satani ma temoni ma taumafai e taofia o ia. E feita i latou pe a tuuina atu se tasi iā Ieova ma papatisoina. Ua faatusa e le Tusi Paia le Tiapolo i “se leona o loo tagi leotele, e saʻili se tasi e na te ʻaina.” (1 Peteru 5:8) E manaʻo Satani e faaleaga la tatou faiā ma Ieova.—Salamo 7:1, 2; 2 Timoteo 3:12.
E ita Satani pe a tuuina atu i tatou iā Ieova
4, 5. (a) O ā mea e lē mafai ona faia e Satani? (e) O le ā e uiga i ai le “tetee atu i le Tiapolo”?
4 Peitaʻi, e lē tatau ona tatou fefefe iā Satani ma ana temoni. E faatapulaa e Ieova mea e mafai ona latou faia iā i tatou. Ua folafola mai e Ieova o le a faasaoina “se motu o tagata e toʻatele” o Kerisiano moni i le “puapuaga tele.” (Faaaliga 7:9, 14) E leai se mea e mafai ona faia e le Tiapolo e taofia ai le faataunuuina o lenā mea, auā o loo puipuia e Ieova ona tagata.
5 Pe afai e tatou te mafuta vavalalata atu iā Ieova, e lē mafai e Satani ona faaleagaina la tatou faiā ma Ia. Ua faamautinoa mai i le Afioga a le Atua: “E ʻau Ieova ma outou pe afai tou te ʻau ma ia.” (2 Nofoaiga a Tupu 15:2; faitau le 1 Korinito 10:13.) E toʻatele tane ma fafine faamaoni i aso anamua e pei o Apelu, Enoka, Noa, Sara, ma Mose, na tetee i le Tiapolo e ala i le mafuta vavalalata atu iā Ieova. (Eperu 11:4-40) E mafai foʻi ona tatou faia faapea. Ua folafola mai i le Afioga a le Atua: “Ia tetee atu i le Tiapolo, ona sola ese ai lea o ia mai iā te outou.”—Iakopo 4:7.
O LOO TATOU TAUINA SE TAUA
6. E faapefea ona osofaʻia i tatou e Satani?
6 E ui e iloa e Satani ua faatapulaa e Ieova mea e mafai ona ia faia iā i tatou, ae o loo taumafai pea Satani e fai so o se mea e faavaivaia ai la tatou faiā ma le Atua. E tele auala o loo osofaʻia ai i tatou e le Tiapolo i aso nei, ma ua ia faaaogā togafiti ua faitau afe tausaga o ia faaaogāina. O ā nisi o na togafiti?
7. Aiseā ua osofaʻia ai e Satani tagata o Ieova?
7 Na tusi le aposetolo o Ioane: “O le lalolagi atoa o loo nofo toʻilalo i le pule a lē o loo leaga.” (1 Ioane 5:19) Ua pulea e Satani lenei lalolagi amioleaga, ma e manaʻo e na te pulea foʻi tagata o Ieova. (Mika 4:1; Ioane 15:19; Faaaliga 12:12, 17) Ua iloa e le Tiapolo ua puupuu lona taimi o totoe, o lea ua ia faateteleina ai omiga ina ia tatou lē faamaoni ai i le Atua. O nisi taimi e faaaogā e le Tiapolo osofaʻiga tuusaʻo, ae o isi taimi e na te faaaogā osofaʻiga e iloagatā.
8. O le ā e ao ona iloa e Kerisiano taʻitoʻatasi?
8 Ua taʻua i le Efeso 6:12 o loo ʻtatou tau ma agaga leaga uma i mea o i le lagi.’ O loo tau Kerisiano taʻitoʻatasi faasaga i le Tiapolo ma temoni. E ao ona tatou iloa, o i latou uma e tuuina atu iā Ieova, e latou te tauina lenei taua. E faatolu ona uunaʻia e le aposetolo o Paulo Kerisiano i lana tusi i Efeso ia “tutū mausalī.”—Efeso 6:11, 13, 14.
9. O le ā e taumafai Satani ma temoni e fai iā i tatou?
9 E eseese auala e taumafai Satani ma temoni e faasesē ai i tatou. Pe a tatou teena Satani i se tofotofoga, e lē faapea ai o le a lē faasesēina ai i tatou i se isi tofotofoga. E taumafai le Tiapolo e saʻili o tatou vaivaiga ina ia mafai ai ona ia filifilia togafiti e osofaʻia ai i tatou. Peitaʻi, e lē tatau ona maileia ai i tatou auā ua aʻoaʻoina i tatou i le Tusi Paia e faatatau i mailei a le Tiapolo. (2 Korinito 2:11; tagaʻi i le Faaopoopoga 31.) O se tasi o nei mailei o faiga faatemoni.
IA MATUĀ FAAMAMAO ESE MAI I TEMONI
10. (a) O ā faiga faatemoni? (e) O le ā le silafaga a Ieova i faiga faatemoni?
10 O faiga faatemoni e aofia ai so o se malosiaga e lē faalenatura e fesootaʻi atu ai se tasi ma temoni, e pei o valovaloga i mea o le a tutupu i le lumanaʻi, o faiga faaagaga, faalauatau, po o le taumafai e talanoa atu i ē ua feoti. Ua taua i le Tusi Paia e “inosia” faiga faatemoni, ma e lē mafai ona tatou tapuaʻi atu iā te ia a o aafia i nei faiga. (Teuteronome 18:10-12; Faaaliga 21:8) E tatau ona matuā ʻalofia e Kerisiano so o se faiga faatemoni.—Roma 12:9.
11. Pe a tatou fia iloa e faatatau i malosiaga e lē faalenatura, o le ā e iʻu i ai?
11 Ua iloa e Satani pe afai e tatou te tosina atu i malosiaga e lē faalenatura, o le a faigofie la ona ia taaʻina i tatou i faiga faatemoni. O le a faaleagaina la tatou faiā ma Ieova i so o se faiga faatemoni.
E TAUMAFAI SATANI E FAASESĒ I TATOU
12. E faapefea ona taumafai Satani e taaʻina o tatou mafaufauga?
12 E taumafai Satani e faafenumiaʻi mafaufauga o tagata. E faasolosolo ona ia faatupu ni masalosaloga seʻia oo ina manatu tagata “e lelei le leaga, ma e leaga le lelei.” (Isaia 5:20) Ua faaauiluma e le Tiapolo le manatu e faapea e lē aogā fautuaga a le Tusi Paia, ma o le a sili atu ona tatou fiafia pe a teena tapulaa a le Atua.
13. Ua faapefea ona taumafai Satani e faatupu masalosaloga?
13 O le faatupuina o masalosaloga o se tasi lea o metotia sili ona taulau manuia a Satani. Ua leva ona ia faaaogā lenei metotia. Sa taumafai o ia e faatupu masalosaloga i le faatoʻaga i Etena ina ua fesili atu iā Eva: “E moni ea na fetalai mai le Atua, e aua neʻi lua aai mai i fua o laau uma o le faatoʻaga?” (Kenese 3:1) Mulimuli ane i taimi o Iopu, sa fesili atu Satani iā Ieova i luma o agelu: “Po ua mataʻu fua ea Iopu i le Atua?” (Iopu 1:9) Ina ua uma le papatisoga o Iesu, na luʻia o ia e Satani e ala i le faapea atu i ai: “Afai o oe o se atalii o le Atua, inā fetalai atu ia i nei maa ia liu falaoa.”—Mataio 4:3.
14. E faapefea ona faatupu e Satani masalosaloga i tagata e faatatau i lamatiaga o faiga faatemoni?
14 O loo faaauau ona faatupu e le Tiapolo masalosaloga i aso nei. Ua ia taumafai e uunaʻia tagata e fesiligia pe e leaga moni lava faiga faatemoni, e ala i le faafoliga mai e lelei nisi o na faiga. E oo lava i nisi o Kerisiano ua faatauasoina i lamatiaga o faiga faatemoni. (2 Korinito 11:3) O le ā la e mafai ona tatou faia ina ia puipuia ai i tatou? E faapefea ona tatou faamautinoa e lē faasesēina i tatou i togafiti a Satani? Seʻi o tatou iloilo vala e lua e ono faasesēina ai i tatou: o faafiafiaga ma togafitiga faafomaʻi.
E FAAAOGĀ E SATANI FAANAUNAUGA MASANI E MAILEIA AI I TATOU
15. E faapefea ona tatou aafia i faiga faatemoni e ala i faafiafiaga?
15 I aso nei, o le tele o ata tifaga, vitiō, polokalame i televise, taaloga i komepiuta, ma le Initaneti, ua faaalia ai faiga faatemoni, faiga faamaneta, ma malosiaga e lē faalenatura . Ua manatu le toʻatele e lē leaga nei faafiafiaga, ae e latou te lē o iloa lamatiaga o le fesootaʻi atu i temoni. E ono aafia foʻi se tasi i faiga faatemoni e ala i le saʻili i fetu, faitau tositosi o alofilima, faaaogā le pelē e suʻe ai le lumanaʻi, ma polo tioata. E natia e le Tiapolo lamatiaga ae taumafai e faatupu i tagata le manatu e faapea, o nei faiga e lē mafaamatalaina, e maua ai le fiafia, ma e mālie. E ono manatu se tasi e lē afāina le matamata i ata e iai faiga faatemoni po o malosiaga e lē faalenatura, ona e na te lē o faatinoina nei faiga. Aiseā o se lamatiaga ai lenei manatu?—1 Korinito 10:12.
16. Aiseā e tatau ai ona tatou teena faafiafiaga o loo aofia ai malosiaga e lē faalenatura?
16 E lē mafai ona iloa e Satani ma temoni o tatou mafaufauga. Ae e mafai ona latou mātauina o tatou faanaunauga ma le auala e tatou te mafaufau ai, pe a faia a tatou filifiliga mo i tatou ma o tatou aiga, e aofia ai filifiliga i faafiafiaga. Pe afai e tatou te filifilia ata tifaga, musika, po o tusi e faatatau i togafiti faataulāitu, faiga faalauatau, ulufia e temoni, faataulāitu, tagata oti e mimitiina toto o isi tagata, po o nisi mea faapena, o le a iloa ai e Satani ma temoni o loo tatou fia iloa e faatatau iā i latou. O lea o le a latou taumafai ai e matuā faaaafia i tatou i faiga faatemoni.—Faitau le Kalatia 6:7.
17. E mafai faapefea ona faaaogā e Satani lo tatou faanaunauga ia ola mālōlōina?
17 E mafai foʻi ona faaaogā e Satani lo tatou faanaunauga ia ola mālōlōina. E toʻatele ua mafatia i aso nei ona o le lē lelei o le soifua mālōlōina. E ono faataʻitaʻi e se tasi ni togafitiga eseese ae e lē manuia. (Mareko 5:25, 26) Atonu foʻi e matuā naunau ia malosi, ma iʻu ai ina lotomalie e talia so o se togafitiga. Ae i le avea ai o ni Kerisiano, e ao ona tatou faaeteete ia lē filifilia ni togafitiga faafomaʻi e aofia ai le faaaogāina o “faiga faataulāitu.”—Isaia 1:13.
Ia faalagolago iā Ieova pe a e maʻi
18. O ā togafitiga faafomaʻi e teena e se Kerisiano?
18 I Isaraelu anamua, sa iai nisi na faia “faiga faataulāitu.” Na fetalai Ieova iā i latou: “Pe a faaloaloa mai o outou lima, e ʻalo ese oʻu mata mai iā te outou. E tusa lava pe tele ni a outou tatalo e fai, ou te lē faalogo atu lava i ai.” (Isaia 1:15) Seʻi manatu i ai, e oo lava i a latou tatalo e lē faafofoga i ai Ieova! E tatou te lē mananaʻo e faia so o se mea e faaleagaina ai la tatou faiā ma Ieova, ma taofia ai lana fesoasoani aemaise lava i taimi e tatou te mamaʻi ai. (Salamo 41:3) O lea, e tatau ona tatou iloilo pe e iai se sootaga o se togafitiga o le a tatou faia, i faiga faatemoni po o malosiaga e lē faalenatura. (Mataio 6:13) Pe afai e iai sona sootaga i na faiga, e tatau la ona tatou teena lenā togafitiga!—Tagaʻi i le Faaopoopoga 32.
O TALA E FAATATAU I TEMONI
19. Aiseā ua fefefe ai le toʻatele o tagata i le Tiapolo?
19 E manatu nisi e lē moni le Tiapolo ma temoni, ae o isi ua iloa e iai moni lava le Tiapolo ma temoni ona o mea na tutupu iā i latou. Ua matataʻu le toʻatele o tagata i agaga leaga ma ua faapologaina i tū ma aganuu faataulāitu. Ua faatupu e isi le fefe i temoni e ala i le faamatala o tala e faatatau i mea leaga e faia e temoni i tagata. E masani ona ofo tagata i nei tala ma fiafia e toe faamatala atu i isi. O na tala e masani ona lagona ai e tagata le fefefe i le Tiapolo.
20. E mafai faapefea ona tatou faasalalau atu pepelo a Satani?
20 Seʻi manatu i le mea lenei—e manaʻo Satani ia fefefe tagata iā te ia. (2 Tesalonia 2:9, 10) O ia o sē e pepelo e na te iloa le auala e taaʻina ai mafaufau o ē e fiafia i faiga faatemoni, ma faatalitonu i latou i mea e lē moni. E ono faamatala e na tagata ni tala e faatatau i mea e latou te manatu na vāai ma faalogo i ai. Ae e uma ane ua soona faatetelē na tala ona o le faamatala soo. E tatou te lē mananaʻo e fesoasoani iā Satani e faatupu le fefe i temoni, e ala i le toe faamatala atu o na tala.—Ioane 8:44; 2 Timoteo 2:16.
21. Nai lo o le faamatala atu o tala e uiga i temoni, o le ā e tatau ona tatou talanoa i ai?
21 Pe afai e i ai se mea na aafia ai se tagata o Ieova i temoni, e lē o se mea lelei ona toe faamatala atu i isi. E lē tatau ona fefefe tagata o Ieova i so o se mea e faia e le Tiapolo ma ana temoni. Nai lo o lea, e ao ona tatou taulaʻi atu iā Iesu ma le mana na tuuina atu i ai e Ieova. (Eperu 12:2) E leʻi fiafia Iesu e toe faamatala atu i ona soo tala e faatatau i temoni. Na taulaʻi atu o ia i le feʻau o le Malo ma “mea matagofie a le Atua.”—Galuega 2:11; Luka 8:1; Roma 1:11, 12.
22. O le ā ua e maumauaʻi e fai?
22 Ia aua neʻi galo, o le sini o Satani ia faaleaga la tatou faiā ma Ieova. E taumafai o ia e fai so o se mea ina ia faaleagaina ai. Peitaʻi, ua tatou iloa faiga a le Tiapolo, ma e tatou te maumauaʻi e teena so o se ituaiga o faiga faatemoni. O le a tatou lē tuu atu “se mea e mautū ai le Tiapolo,” ina ia faavaivaia ai la tatou filifiliga maumauaʻi. (Faitau le Efeso 4:27.) Ioe, pe afai e tatou te tetee atu i le Tiapolo, o le a tatou sao mai i ana mailei ma saogalemu i le puipuiga a Ieova.—Efeso 6:11.